Un archipiélagu de monotonía

(El Fielato)

Cuando yera estudiante, allá polos últimos años del setenta y primeros del ochenta, taben mui de moda les teoríes de la difusión, ente les que destacaben aquelles que mos falaben de cómo la innovación y les nueves corrientes, mesmo científiques que polítiques, entraben nos países peles grandes ciudaes y dende elles espardíense pel territoriu. Les coses agora nun son esautamente asina pero les urbes siguen cumpliendo esi papel de dalguna manera. Nun ye, por exemplu, Estaos Uníos el país del progresu, nunca lo fue, sinón qu'esi rol exercíenlu Nuea York, Boston, Chicago, San Francisco... 

N'Asturies, esti cachín pequeñu del planeta que lleva un nome plural como les baleares, les canaries, les azores, les vírxenes, les antilles o les britániques, el papel de les ciudaes tamién fuera esi, anque, seguramente pol fechu de que conocemos más la nuesa realidá, pongamos más peros y discutamos si influyera más Uviéu o Xixón o si La Pola yá ye más importante que Mieres y va medise con Avilés en poco tiempu.

Ye evidente que les ciudaes, vamos quedamos nes dos más grandes, exercen como polos de difusión-atracción pa col restu'l país, como tamién lo ye que los sos asuntos son seguíos polos asturianos en xeneral, yá en Tinéu, yá en Colombres, anque namás seya porque ocupen la metada'l periódicu y de los noticiarios. Toa Asturies sabe, y posiblemente tien opinión, de lo del cascayu y lo del intercambiador de Xixón y de lo de la fábrica d'armes d'Uviéu. Por eso tamién tolos asturianos, si lleen ún de los dos periódicos de papel qu'hai, tan a favor de los planes uvieínos y en contra de los xixoniegos. Pero, si lleen l'otru periódicu, pensarán xustamente lo contrario. Ye lo que tien la llibertá de prensa y la independencia de los profesionales.

Si un ciudadanu que tuviera cuarenta años en 1977, por poner una fecha, abriera un periódicu de güei diba entendelo tóo perfeutamente. Vería la polémica'l metrotrén, la estación d'autobuses, la ronda d'El Musel, los proyeutos pal paséu de la playa, la contaminación del oeste..., si falamos de Xixón. Y alcontraríase cola carretera del Naranco, l'enllaz de l'autopista, la ordenación del cascu antigu y los planes pa les vieyes instalaciones, namás que poniendo El Vascu onde agora ponen La Vega, si falamos d'Uviéu. 

Y, como decíamos, ye que les ciudaes asturianes son compendiu y resume de l'Asturies toa, onde cada selmana salen coses nueves, cada mes hai una polémica distinta y nada se resuelve anque pasen cinco décades, Porque si falamos de los planes demográficos, l'area metropolitana, los llobos, el tren de la mesetona, el preciu la sidra, la oficialidá l'asturiano, los montes comunales, la ubicación d'escueles y facultaes..., podríamos tar lleendo esi periódicu de 1977. Eses Asturies tan plurales, esi archipiélagu tan raru nel que vivimos, ye d'una uniformidá y d'una igualdá na incompetencia ya inorancia que mete miéu pela cabeza.