Cuéntame un cuentu

(El Fielato)

"Cuéntame un cuentu". Tovía munchos de los que lleen estes lletres nesti preriódicu recordarán esa frase. Los más nuevos non, porque yá son d'otra forma de comunicase. Pero, nel fondu, tamién esos mozos, esos neños, saben de que los anteriores tábamos na cama, maxinen que nel iviernu, y dalguién, el güelu, la madre, mos falaba de mundios y de les fronteres que nun debemos trespasar. Los cuentos tradicionales nun son historiuques a lo Walt Disney, non. Los cuentos empiesllen toa una sabiduría que, anque agora la rellativicemos con bona razón, sigue viva, llatente.

Alló de cuando peronia había un cuélebre nuna cueva, pertrás d'un tambayón, onde'l rigu yera duru y los sos rabiones fuertes. La xente de la contorna taba amilanao, con muncha llerza. El cuélebre yera enorme y taba acubiciáu naquel pozón, a saber si con otros pequeñinos, famientos, esperando pola cebera. La xente'l conceyu decidiera que cada añu un guerreru fora a matar al cuélebre. Si lo conseguía tóo taba iguao. Si morría nel combate, el cuélebre comíalu y taba tranquilu un añu más. Añu tres añu un guerreru marchaba pa la cuevona'l rigu, y añu tres añu home y caballu acababen nes mandíbules del cuélebre.

Los guerreros convirtiéronse nuna élite que taba ociosa tol tiempu, allimentada y bien curiada polos aldeanos, y ún d'ellos, por sortéu, diba alfrentar al cuélebre cuando llegaba la hora. Y tolos años morría. Y'l cuélebre quedaba tranquilu na so cueva ata l'añu desiguiente. Y los habitantes del conceyu felices y contentos. Eso sí, pagaben cola metada los sos bienes a los guerreros de la fortaleza.

Pero, como ye lo normal na vida los cuélebres, cuando cumplen 99 años médren-yos les ales y, grandes y fachendosos, esnalen haza la mar. El cuélebre de la cueva yá nun taba, marchara. ¿Cómo diben vivir entós los guerreros? Ensín el cuélebre nun teníen razón de ser, pa nada valíen. Entós tomaron una decisión: ún d'ellos, por sortéu, diría a la cueva y, ellí, tendría que matase. Un suicidiu ritual. Y añu tres añu ún guerreru morría nuna aparente llucha con un cuélebre que yá nun esistía. Pero eso permitía vivir a la castria guerrera, gracies a la inxenuidá y la inoranza de los campesinos, que seguíen creendo nel pelligru del cuélebre y na necesidá de ser protexíos por aquellos nobles tan arrogantes.

Estimaos llectores: miren pa l'Asturies del nuesu tiempu. Los cuentos de los nuesos antepasaos nun son historietes, non. La nuesa tradición, la de la vieya Asturies, val va interpretar l'Asturies d'agora.