"La sidra propició la revolución agraria y la modernización"

David Castañón: La entrada d'esta música nun ye pa ponese seriu nin de pies, o coses paecíes. Simplemente quier dicir que con Mozart de fondu volvemos falar de la sidra, de la historia de la sidra. ¿Con quién?, pues col nuesu espertu David Rivas, que ye munches coses: catedráticu d'economía, yá xubiláu pero con munchos años de clase al recostín, ecoloxista, pero tamién estudiosu de la sidra. Profesor Rivas, ¿cómo ta?

David M. Rivas: Mui bien, Castañón, mui bien. Bono, la verdá ye que yo siempres digo que toi bien. Hai munchu tiempu dalguién me dixo qu'a la entruga de "¿cómo tas?" arrepostiaras que "mui bien, como nunca". Y ye que con eso allegres a los tos amigos y molestes a los que nun te tienen apreciu.

D.C.: Hehehe..., anque namás seya que por repunar...

D.M.R.: ¡Si, ho! Pero lo cierto ye que toi bien, con dalgún achaque yá, nun vaiga pensar, pero bien. Tovía me da'l cuerpu pa dir a la cama cola consorte y... ¡durmir como un benditu!.

D.C.: ¡Hahaha...! David Rivas tien un llibru guapísimu sobro la sidra del que tovía hai dalgún exemplar nes llibreríes, onde fae un repasu de la cultura sidrera asturiana y de la so historia. 

D.M.R.: Yá nun hai munchos nes llibreríes pero entá viera yo dalgún en quioscos y tiendes de regalos, porque ye un llibru que se vendiera mui bien ente turistes. Los últimos que yo viera taben nun quioscu prensa de Xixón y nuna tienda regalos de Potes. Hebo dos ediciones, la segunda nel 2004, va yá pa venti años. La tirada fora d'unos 20.000 exemplares, que ye muncho pa un llibru d'esti tipu.

D.C.: A mi préstame muncho esi llibru y falar col autor porque los asturianos, ente'l grandonismu y'l babayismu, damos por feches siempres munches coses. Pensamos que lo sabemos tóo. Pensamos qu'eses coses faense normalmente día tres día y nun somos conscientes de que nun ye asina, tan simple. La sidra llevamos con ella dos mil años, con toa una evolución que mos llevó a onde tamos, una historia impresionante. Conocer esa historia sirve pa valorar lo que tenemos, pa valorar el nuesu presente.

D.M.R.: Ye verdá eso, anque paeza chiste, de que los asturianos oscilamos ente un grandonismu y un babayismu. Eso ta estudiao n'antropoloxía, concretamente fora mui analizao por dalgunes corrientes de l'antropoloxía fenomenolóxica, la derivada de Lévi-Strauss y mui influyía tamién pola visión de Jung, colos sos arquetipos y col so inconsciente colleutivu. Pero a min paezme que nestos tiempos tamos caendo más del lláu del babayismu. Son los tiempos del cachopu, del tren d'alta velocidá, de los rapitos y de les faralaes piloñeses. Tiempos d'inorancia y baxa calidá cultural.

D.C.: Hehehe... Ríome pero ye bien triste.

D.M.R.: Ye que nun hai más que ver lo que ta pasando nestos díes con motivu del aniversariu de la batalla de Cuadonga. Agora paez ser que nun esistiera, que Pelayo tampoco, qu'el reinu d'Asturies, en fin, fora un pueblín asina como d'andar per casa... ¡Vaya!, que talamente paez que los asturianos apaecimos como cayíos del cielu pa ser, como muncho, súbditos del rei de Castiella, yá pol sieglu XI o XII.

D.C.: Pero ye que pasen d'un estremu a otru: o la creación de la nación española, mentira completa, o una escaramuza que nun tuvo importancia denguna, cuando la realidá ye qu'ellí naz el reinu d'Asturies.

D.M.R.: Esto sácamos un poco de la historia de la sidra pero tampoco muncho, porque tamos nun escenariu ampliu y complexu de minorización d'un país y d'una historia. Ye qu'esta xente menosprecia por motivos ideolóxicos, non sólo la historia d'Asturies, sinón la d'Europa y la de tol mundiu. ¿Qué mos quieren cuntar?, ¿que la batalla de Poitiers, onde Carlos Martel machacó a los musulmanes fora un alcuentru de dos exércitos de cien mil homes caún?. ¿qu'Alexandru Magnu derrotara a los perses con un miyón de soldaos?, ¿que con Gengis Kan cabalgaben cientos de miles de mongoles y otros guerreros de la estepa? Quitando dalguna batalla de la época romana, ata los años napoleónicos nun hebo denguna con miles de combatientes. Na edá media puede que les batalles con más de mil homes por bandu fueran diez o doce: Hastings, Alxubarrota, Les Naves de Tolosa, Grunwald... La inmensa mayoría de les batalles yeren pequeñes en númberu. Nun voi dicir que foran toes de cuatro pa cuatro, pero nun yeran Waterloo, nin Lepanto, nin Stalingrado. Lo de Cuadonga, independientemente del sitiu concretu, qu'eso sí puede ser discutible, seguramente fora la historia d'una fuerza espedicionaria árabe que venia a investigar qu'había per estes tierres que los godos nun dominaran y que taben poco romanizaes y menos cristianizaes. Y tuvieron la mala suerte d'atopar con un pueblu belicosu que, posiblemente con pocos efeutivos, los acorripió naquellos escobios. ¿Que yeren cien pa cien?, pues igual. Mil doscientos años dempués cinco mil asturianos mal armaos pararon a cincuenta mil invasores, ente españoles, vasconavarros, alemanes, italianos y marroquinos n'El Mazucu. Al final perdieron, pero con eso quiero poner enriba la mesa lo rellativo de los númberos y lo importante del territoriu. Y lo de defender lo tuyo, que tamién ye mui importante.

D.C.: Ye verdá, ye como si hubiera una continuidá, nun sé, máxica.

D.M.R.: Pues seguramente. Pero podría poner munchos más exemplos. Hai unos años sentí a una guía turística n'El Naranco dicir que, bono, qu'aquellos reis yeran más unos caudillos militares, con poco poder, qu'aquello nun yera un reinu como güei lo entendemos. Y como datu ponía que Santa María, posible sé real, yera un edificiu pequeñu y probe. Pero vamos ver: ¿cómo yera'l palaciu d'Aquisgrán, la corte de Carlomagno? ¿Qué piensen?, ¿qué yera como Versalles o Buckingham? Pues yera una casina, un chamizu, non muncho más grande que Santa María. Por cierto, daquella el noble más grande de Bardulia, lo que más tarde va ser Castiella, vivía nuna cabana xunta los gochos, si ye que los tinía. Carlomagno yera'l rei más grande de la cristiandá pero yera poco más qu'un señor tribal y la so milicia tinía menos poder qu'el que tién güei la policía llocal d'Avilés.

D.C.: Eso ye lo importante: saber d'historia pa ponelo tóo en perspeutiva.

D.M.R.: Evidentemente. Tamién eso pasa cola sidra. La sidra ye un ellementu importantísimu na nuesa historia. Habrá quien diga que fora mui importante la pataca, y ye verdá, y'l maízu, y tamién ye verdá, y con una importancia descomanada. Y los gochos, y'l carbón, y'l llechi, y agora, nun sé, el turismu rural. Tóo ye importante nuna dómina concreta y esa importancia acaba pronto o tien llarga vida nel desendolcu económicu, pero tien un tiempu. Ye como si, con esta moda de treslladar coses, mos contaran que los romanos d'Augusto vinieron a facer turismu rural. Non, non. Los romanos nun vinieron a surfear a Tapia, buscando la fola'l sur de La Grande. Vinieron en plan de conquista y a por l'oru. A mi ye qu'estes coses sáquenme de les mios casielles, y eso que soi bastante aplomáu, porque odio la inorancia. Paezme tan absurdo tóo esto, yá non que la xente lo piense, sinón qu'académicos que se dicen escelentes defendan estes tesis falses, que son mentira y que, amás, sábenlo. Tóo eso de la reconquista, d'eses historietes que nun se tienen en pie... Son coses que pasaron, ye verdá, pero nunca hebo un programa, un proyeutu políticu. Eso de que se llevantaron n'Asturies pa entamar una reconquista que duró ocho sieglos, ¿pero quién lo puede creyer? ¿Qué reconquista? Si les tierres más allá del Esla y del altu Dueru yeren terra ignota. De fechu los reis asturianos nun pasaron d'ehí. ¿Cómo diben pensar reconquistar lo que nunca fuera suyo? ¿Dalguién maxina a Fruela II viendo atapecer n'Uviéu y pensando tomar un fino en Xerez? ¡Chico! De fechu, Adefonso II, el gran rei, preocupose por tener firme allianza con Inglaterra y Francia, y col califatu cordobés la meyor rellación posible y una amplia frontera despoblada ente les dos naciones.

D.C.: Hehehe... Volvamos a la sidra.

D.M.R.: Sí, volvamos, que los oyentes van dicir qu'amás de repunante soi un pesáu.

D.C.: Non, ¡qué va!, de pesáu nada, tolo contrario. Dícenlo los oyentes que mos manden mensaxes. Nel últimu programa quedamos yá cuásique a les puertes del sieglu XIX, con un gran espoxigue de la sidra. Decíamos qu'a finales del XVIII había años nos que les esportaciones d'alimentos dende'l puertu de Xixón yeran el cien por cien de sidra, cosa interesantísima y seguramente mui desconocía. Podríamos siguir a partir d'esi momentu. Ye la bebida básica n'Asturies y  la bébora qu'esportamos. Falamos de qu'el calvados seguramente proceda de les barriques d'un barcu asturianu qu'encallara nes costes de Normandía. Vamos siguir a partir d'equí.

D.M.R.: Como recordaba vusté, nel sieglu XVIII dase un saltu mui grande, con una perimportante espansión de los pumares y del espoxigue de la sidra. Pero ye que non sólo fora una decisión privada, de los propietarios de tierres o de los mamposteros, de los que yá falamos, sinón qu'hebo un fomentu programáu por parte de la Sociedá Económica d'Amigos del País y de la mesma Xunta Xeneral. Nes Ordenaces Xenerales del Principáu d'Asturies, de finales del XVIII, me paez recordar que de 1781, sofitaba'l llante racional de pumarada. Esto ye mui importante dende un puntu vista económicu xeneral, porque mos diz que yá ye de vieyo nun fialo tóo a la iniciativa privada, sinón que ye mester la intervención. Lo que plantega la Xunta Xeneral nesta dómina ye dalgo muy asemeyao a lo que güei llamamos iniciativa pública, anque poca inversión habría nun momentu d'escosos recursos fiscales y tóos dedicaos a otres coses más de corte que d'aldea. Tóo eso va propiciar cambios mui importantes. Gonzalo Anes, qu'estudia la economía de l'Asturies d'esi fin de sieglu, lo que sedria, más o menos, el final del antigu réxime, del ancien régime, diz que la ganancia pola sidra permitió facer frente a los gastos de les caseríes. Eso vien a refrendar un llargu poema de Bruno Fernández Cepeda, tituláu Bayura d'Asturies y que ye d'esos años. Fernández Cepeda fae una descripción idílica del país y de les sos coses: les llubines son como tolines de grandes, los centollos de diez kilos, les pataques nin-y cuento, y les mazanes riquísimes y que faen una sidra sensacional.

D.C.: El grandonismu nun ye d'agora, non, que vien, como poco, del XVIII.

D.M.R.: Sí, sí... Pero lo importante pa lo que traemos ye que, falando de la sidra, diz "qu'el que lo faga, da dones al que nun tien y horros y cases llevanta". El poeta ta diciendo la verdá: la sidra, col maizu, ye lo que tira de la renta campesina. Apaecen les casones, llevantaes por families fidalgues que teníen tierres en propiedá, multiplíquense los horros, apaez la panera. Lo que diz Anes nes sos investigaciones ye lo mesmo que diz Fernández Cepeda nun poema de la dómina.

D.C.: Medra la riqueza al rodiu la sidra.

D.M.R.: Sí.

D.C.: Eso ye un asuntu maraviyosu: una bebida propia, unos pumares propios, una cultura propia, un país propiu. 

D.M.R.: Asina ye, El fríu analís económicu estructural coincide cola so poética nacional, amigu Castañón, como coincide Anes con Fernández Cepeda dos sieglos dempués. Esti espoxigue rural basáu na sidra yera mui del gustu de Xovellanos. A Xovellanos creyo que yá lu cité varies vegaes nestes mañanes radiofóniques de sábadu. Tal paez que Xovellanos ye'l Churchill d'Asturies, el que tolo dixo y tolo escribió. Eso nun ye verdá, pero sí que lo ye qu'escribiera muncho, que fora una de les cabeces meyores d'Europa... Sí, sí... d'Europa. Y yera un patriota que siempres consideró Asturies como "el mio país". Nun diera más pasos, como sí que dieron Flórez Estrada o Riego porque yera moderáu y quedara un tanto espavoriáu polos años del terror de la revolución francesa. Ye una figura estraordinaria. Si fora de Llondres, d'Edimburgo, de París o d'Amsterdam, y non de Xixón, y lleal a una casa decente y non a la de Borbón, Xovellanos taría güei nel parnaso de los políticos mundiales. Como escribiera tanto y de tantes coses, a los escolinos del mio tiempu mos lu presentaben como l'illustre polígrafu, y nós decíamos illustre bolígrafu. Ye que nun sabíamos que yera eso de polígrafu. Aquello yera'l franquismu, un réxime grandilocuente y de pallabrería. Eso sí, polo menos sabíamos con pocos años quién yera Xovellanos. Yo tuve más suerte: na mio familia había un gran posu xovellanista. De fechu, cuando fuimos a vivir a Zaragoza, dos años, 1969 y 1970, nel colexu d'El Salvador formamos grupos d'estudiu col nome d'un personax. El míu llamose Xovellanos, a propuesta mía. Los demás yeran Alfonso el Batallador, Fernando el Católicu, Gracián, Cervantes... Los profesores y los xesuites taben sosprendíos de qu'un neñu d'once años supiera de Xovellanos y de la so obra. En casa siempres cellebramos el 6 d'agostu. Coses de mio güelu Manolo, un anarquista que tenía a gala ser de Cimavilla. Dicía que "como don Gaspar".

D.C.: ¿Por qué-y da tanta importancia Xovelanos a la sidra?

D.M.R.: Lo primero, quiero repetilo, ye porque Xovellanos ye un asturianu de la cabeza a los pies. Y conoz mui bien Asturies. Y ama a Asturies. Y, polo tanto, estudia el país. Y estúdialu, non namás como un observador, sinón como un activista. Xovellanos ye un lliberal de la escuela escocesa, pero tamién ta lligáu al mercantilismu de la escuela salmantina. Na mio opinión, mui discutible, ye, básicamente, un lliberal de la llínia de Smith y, seguramente, mui influyíu por Cantillon y por Hamilton. Pero piensa que n'Asturies ye mester siguir la fisiocracia de Quesnay, la escuela de Versalles. Esta escuela plantega que la riqueza ta nel seutor primariu, n'agricultura, y que pa medrar ye mester una clas campesina media, de pequeños propietarios. N'Asturies d'entóncenes les caseríes yeran probes, arrendaes, con grandes rentes a pagar al propietariu. Pero llega la espansión de la pumarada y de la sidra. Los aldeanos ensín propiedaes pero con tierres arrendaes ven crecer la renta, y la mampostería, de la que yá falamos, permite sacar beneficios grandes porque, anque nun tean la tiera, tienen los árboles, y por munchos años. Eso llévalos a poder comprar la casa y, más dempués, les tierres. Yera la idega de Xovellanos: crear una clas campesina fuerte, de mediana propiedá, pa facer la revolución agraria, lo que diba llevar, por intercambios de valor, una idega muy de Ricardo, al desenrollu xeneral.  Lo de la sidra, col maízu, va llevar a lo que podríamos llamar acumulación orixinaria de capital, un conceptu de Marx. Nun ye esautamente lo mesmo lo que se da nel campu asturianu, pero paezse enforma. Tamién ye verdá que Marx cuásique nunca mira la realidá, sinón la cenceptualización de la mesma, mui propio de Hegel. 

D.C.: Tamos nun momentu de gran consumu y tamién cuando entamen les esportaciones. La sidra yera la bebida d'Asturies.

D.M.R.: Sí, caro. Eso ya lo víamos tiempu atrás, nel XVII, nl XVI, nel XV y enantes. Ye la bebida alcohólica que toma tola xente. Tamién se bebe vinu, nel suroccidente básicamente, anque tamién tomen sidra. Hai bonos llagares pa mazana nes tierres de Tinéu, por exemplu, y más alló del Narcea. Ye un mitu engañosu esi de que nel occidente nun se producía sidra. Pela so parte, los pudientes urbanos beben vinu. Y nun lu lleven precisamente del suroccidente'l país, lo que dalgo indica, sinón que lo importen. Dicía yo nun programa anterior que lo trayíen de Ribadavia, de Llión, del Duero, pero tamién de Valencia. Esti datu ye llamativu, pola gran distancia qu'hai, pero venía bastante vinu de Valencia, supongo que de Requena y Utiel, no que ye la Valencia castellana.

D.C.: Sí que ye llamativo.

D.M.R.: Amás, la sidra y tol so entornu productivu tiraron de la industria tradicional. Espoxigaron los negocios toneleros, ferreros, carrumateros, carpinteros, camineros, cesteros... Tóos esos oficios tradicionales van dando pasu a lo que, al poco, diba dar orix a la industrialización.  Ameyoraron les carreteres y les caleyes a les collaciones y a unes villes qu'entamaben l'esporpolle. Son los años de desendolu d'Avilés, la villa principal d'Asturies dende la edá media, Uviéu, más sele pero calteniblemente, Xixón, col puertu y un poco dempués col carbón y les comunicaciones terrestres, y les villes costeres, como Llanes, Villaviciosa, L.luarca, Navia..., y dalguna nos valles centrales, como Mieres. El casu ye que la sidra ye un ellementu fundamental pa esi saltu nel sector agrariu y pal impulsu de la modernización, momentos previos al capitalismu y a la industrialización.

D.C. Creyo, David Rivas, que podemos parar equí, quedando a piques de la industrialización y cómo esa nueva sociedá concasó cola sidra.

D.M.R.: Paezme una bona idega, sacantes que mos perdamos otra vuelta per Cuadonga, Los Picos d'Europa y la defensa de la nacionalidá.

D.C. Ye mui nuestro, ye mui guapo tamién.

D.A.R.: ¡Home, yo creyo que sí! Amás, l'oyente mediu que vusté tien ye un poco asina. Nun lu veo yo escuchando a un profesor mui seriu falando de les característiques organoléptiques de la sidra o del decretu sobro variedaes de mazana y taches pa ser refugaes pa la denominación oficial.

D.C.: Y si repuna tampoco tién problemes. Un abrazu, profesor.