"González-Río fue un home clave na revolución de 1868"

Alejandro Fonseca:  El titular de güei sería: "revolucionariu, masón, conceyal d'Uviéu, oficial del Batallón de Voluntarios de la Llibertá d'Asturies". ¿Qué tal, David Rivas?

David M. Rivas: Mui bien, pero esi nun soi yo, sinón el personax del que vamos falar esta tarde, nun vaigan empixase los oyentes...

A.F.: Efeutivamente. El profesor Rivas vien a falamos de quien fuera tóo eso y munches coses más, un personax mui poco conocíu.

D.M.R.: Sí, asina ye, y amás nesti casu voi referime a un vecín, porque yera natural de la valle l'España, nel conceyu de Villaviciosa. Trátase de Juan González-Río, un home, como decía vusté, inxustamente escaecíu, que naciera en Pion a finales de 1823. La guerra civil española, la de 1936, y la llarga dictadura de Franco acabaron cola memoria, pero non cola memoria como podemos entendelo normalmente, nel sen de nun saber qué pasó o cuando, sinón con tóo. Destamiente hai persones que fueron mui importantes nel so día, y muncho más cuando falamos de llugares pequeños que, por simples razones de númberu, nun dieron munches figures, y que güei naide nun recuerda. Y debería ser reconocíu esti González-Río por munches coses. El fechu de que fuera lliberal, masón, revolucionariu ye mui llamativo, pero, por exemplu, fue tamién mui notable'l so llabor nel seutor mazaneru y sidreru, colo que podría tar na memoria de dos pueblos campesinos como Candanal y Pion. Como-y dicía, González-Río, qu'apaez delles vegaes na documentación como Juan Ríos, naciera a finales del 23 en Pion y fue bautizáu na ilesia de Candanal el 3 de xineru de 1824. El motivu fuera que daquella yera párracu de Candanal un tíu suyu, hermanu'l so padre, un home que va influyir muncho na so formación intellectual y política. Nun se sabe, o yo nun diera con denguna desplicación, del porqué la familia llega a estes parroquies maliayes, pero teo una idega que podría ser la clave. El padre, Fernando González-Río yera del conceyu de Salas, nun ta claro si de Doriga o de Las Dorigas. Si fuera concretamente doriga taríamos falando d'un llugar de la collación de Santolaya las Dorigas, pero si ye un xenéricu dorigas podría referise a San Antolín de las Dorigas, San Esteba las Dorigas, san Xustu las Dorigas o Santolaya las Dorigas. Pela so parte, la madre, Rosalía Meana, yera de Baldornón, nel conceyu de Xixón. Tamién de Xixón yera tola familia materna, concretamente de Fano, mientres que la paterna llegara a Salas dende Valdés, concretamente dende Muñás. Y nun se sabe, o yo nun lo sé, por qué lleguen al conceyu de Villaviciosa, incluendo un tíu, el cura Candanal.

A.F.: Pero decía David Rivas que tien una idega sobro ello.

D.M.R.: Ye una conxetura, namás, pero paezme mui probable por dalgo rellacionao cola sidra. Embaxo'l reináu de Carlos IV, el ministru Godoy fixera una desamortización eclesiástica con llicencia papal que, ente otros, afeutó al monesteriu de Valdediós. Los monxos de Valdediós tiníen tierres en Pion y Candanal, como tovía observamos en dalgunos topónimos, y eses tierres figuren na nómina de los bienes desamortizaos. Cuando Juan González-Río naz yá tamos falando d'una familia de posibles, mui bien apañada, pero que nun ye aristocrática, que nun pertenez a les vieyes clases propietaries del antigu réxime. Ye, polo tanto, una familia de lo que podríamos llamar burguesía rural, rica, con muncha tierra, pero ensín títulos. Tóo señala haza que llegaron a la valle l'España precisamente porque ocuparon tierres desamortizaes y posiblemente por la importancia del tíu cura. Nun olvidemos qu'aquella pequeña desamortización fuera alcordada ente'l reinu y la ilesia, colo qu'el repartu nun se fixo con compraventes convencionales, como diba facese cuando Mendizábal y Madoz unos años dempués. Sí qu'alcontramos una referencia concreta sobro Juan González-Río nel artículu necrolóxicu que José María de Labra espubliza nel periódicu madrilanu El Porvenir en setiembre de 1884. Escribe Labra, un autor bien conocíu, que González-Río contribuera muncho al cultivu de la mazana y a la produción sidrera, siendo, diz testualmente, "ún de los primeros mazaneros de la zona". Lo más probable, volvemos a les hipótesis, ye que fuera'l propietariu del primer llagar modernu, podríamos decir qu'industrial, de l'España, que taba en Pion, en La Riera, xunto al molín qu'entá esiste y que figura nel cancioneru: "adiós llugarín de Pion, adiós molín de La Riera, adiós Carmina del alma, que por ti llevo la pena". Esa zona tien bastantes llagares y entá se ven los resclavos d'aquel llagarón del XIX. Tamién se sabe que nesi llagar mayábase mazana procedente de la primer pumarada llantada con criterios agronómicos científicos, que yera una mui grande que taba na bárcena del llugar de Roces, en Candanal. Tóo casa bastante bien, como pa caltener esa hipótesis mía, que tien traces de responder a la realidá.

A.F.: ¿Cuándo empieza la carrera política de González-Río?

D.M.R.: Mui pronto. Aconseyáu pol so tíu cura, estudia drechu, completando los estudios en mui pocu tiempu. Y métese en política yá na universidá. De mozacu afiliose al Partido Progresista del xeneral Prim y de Sagasta, los dos masones como diba selo él unos años dempués, colo que lu alcontramos en posiciones d'un lliberalismu moderáu. Pero la so consagración política, yá en posiciones radicales, llega cola Gloriosa, cola revolución de 1868. En plenu procesu revolucionariu, el 30 de setiembre, González-Río ye ún de los seyes firmantes del manifiestu de la Xunta Provisional de Gobiernu d'Asturies, n'unión de los que diben ser ministros dempués Pedregal y Ruiz Gómez. El testu yá ye un documentu mui evidente del lliberalismu radical. Nel lleemos que van convocase unes cortes constituentes ellexíes por sufraxu universal pa dase la forma de gobiernu "que meyor convenga". Equí ya tamos nun momentu onde la idega republicana diba calando con fuerza ente los lliberales, una idega que acabaría por ser, precisamente, la de González-Río. Polo que tocaba al sufraxu universal, taba na mesa la custión del votu de les muyeres, que lu abrierá yá nos años diez otru lliberal asturianu illustre como Flórez Estrada, tamién masón. El casu ye qu'el manifiestu del gobiernu provisional acababa con unos concretos glayíos de "asturianos: ¡abaxo los borbones!, ¡viva la llibertá!".

A.F.: Sí que se nota una subida tonu importante.

D.M.R.: Sí, sí. De fechu preséntase a les elleiciones pol Partido Radical, perteneciendo yá al so comité directivu, y resulta'l cuartu diputáu con más votos d'Asturies. Al formase l'executivu asturianu participa como miembru de la Xunta Permanente de Gobiernu, un cargu asemeyáu a lo que güei ye un conseyeru del gobiernu autónomu. Tamién entóncenes, unos menses dempués, alcontramos al nuesu pionesu como segundu comandante del Batallón de Voluntarios de la Llibertá, del que llegó a ser xefe supremu, una milicia popular que tinía por misión controlar los posibles focos de llevantamientu reaccionariu. Nesi momentu decide instalase permanentemente n'Uviéu pero en 1872 nómenlu secretariu de l'Audiencia de Madrid, colo que se tresllada a la capital del reinu. Y ye esi añu cuando ingresa na masonería.

A.F.: En Madrid.

D.M.R.: Pues nun ta mui clara la cosa. Como si fuera una novela d'eses a lo Dan Brown, sábese qu'ingresa na orde el 5 de febreru de 1872 pero nun se sabe en qué lloxa nin en qué llugar. Siempres se pensó que fora iniciáu na lloxa Luz Ovetense pero Víctor Guerra, nel so llibru sobro los masones de lo que güei llamen comarca de la sidra, afirma, y faelo con documentación, qu'esa lloxa uvieína nun tuvo carta de constitución ata abril de 1874, polo que difícilemente diba poder iniciar a naide con anterioridá. Per otru lláu, el nome de González-Río nun apaez en dengún rexistru de les demás lloxes asturianes. Por eso, diz Guerra y a min paezme que tien razón, lo más probable ye qu'ingresara en dalguna lloxa madrilana, anque nun sabemos cuála pudo ser.

A.F.: Si lo diz Víctor Guerra, gran conocedor de la masonería asturiana...

D.M.R.: Guerra tien un fondu documental impresionante. Anduvo per milenta sitios fotocopiando y trescribiendo documentos rellacionaos cola masonería asturiana. Yo discrepo d'elli en munches de les sos interpretaciones, seguramente porque entendemos la francmasonería d'una forma diferente, pero la verdá ye que tien un fondu documental mui notable, dalgo de lo que yo nun dispongo. Por eso me paez fiable en cuanto a datos, a feches, a nomes. Otra cosa, como-y decía, ye la visión sobro la orde masónica y la so sencia. Guerra vela más dende una perspeutiva políticosocial y yo dende otra más esotérica y ritualística. Pero los fechos son los fechos.

A.F.: Contra los datos poco hai qu'argumentar.

D.M.R.: Efeutivamente. La lloxa a la que pertenez ye del ritu escocés antigu y aceptáu, un ritu nel que ye mui habitual emplegar un nome simbólicu. Pues el casu ye que González-Río toma como nome Riego, lo que diz bastantina de la so ideoloxía y de la so íntima vinculación a Asturies. En 1877 ta yá de vuelta n'Uviéu y asiste como convidáu al pieslle de la lloxa Luz Ovetense, lo que na xíriga masónica ye valtar columnes. El fechu de que vaiga como convidáu dizmos tamién que nun pertenecía a esa lloxa, como apuntaba Víctor Guerra. Ye entós cuando se consagra la lloxa Nueva Luz, a la que s'afilia y a la que va pertenecer siempres, ata la so muerte, que va llegái siete años dempués. Nesta lloxa uvieína va ser ellexíu venerable, que vien ser el presidente en términos normales. Nesta lloxa tamién entren los sos fíos, Manuel y Arcadio. Ye una lloxa con gran actividá, que llegara a sacar un periódicu, La Verdad, que chocaba col duru conservadurismu de les clases bien de la capital asturiana, lo qu'agora conocemos como el Oviedín del alma, una pálida herencia d'aquelles dómines. Y en 1878, González-Río algama'l cargu de Soberanu Gran Inspector, el gráu 33, el más altu de la francmasonería del ritu escocés. Esa rapideza cola gue llega a ser un 33 amuesa la so gran actividá masónica y la so importancia na orde, non namás que n'Asturies, sinón tamién fuera.

A.F.: Ye como si fuera acelerando na vida.

D.M.R.: Pues sí, y tamién en política. González-Río pierde yá lo poco que-y quedaba de moderáu y pasa a un republicanismu radical. 

A.F.: Ye que los radicales yeran, por decilo asina, lliberales consecuentes, ensín nada que ver cola connotación que la pallabra radical tien agora.

D.M.R.: El radical ye'l que va a la freba, a la radix de los problemes. Por eso, cuando a min me pregunten, digo que soi un radical. Lo que yo nun soi ye estremista. A min moléstame muncho cuando tilden de radicales a los que nun son otra cosa que besties pardes. Y hai estremistes de drecha y d'esquierda, pero tamién de centru, que son tan estremistes que lleguen a criminalizar a tol mundiu que nun piense como ellos. Tamos agora arrodiaos, por exemplu, por estremistes constitucionalistes, incapaces d'entender qu'una constitución ye una constitución, non les tables de Moisés.

A.F.: Ye verdá, hai esi estremismu.

D.M.R.: El casu ye que González-Río llega al republicanismu y, amás, a un republicanismu mui combativu. Preséntase a les elleiciones municipales na llista d'Unión Democrática, una candidatura respaldada pol mesmu Clarín. Sal conceyal xunto con otru masón uvieín mui rellevante, l'abogáu Pancracio Álvarez Llana. Como anéudota puede contase qu'esta ye la corporación que suprimiera les corríes de toros n'Uviéu y tiró la plaza, lo que motivó aquel artículu tan conocíu de Clarín, esi de "esta ciudá d'Uviéu demuestra la so cultura con esta decisión...". El grupu republicanu, mayoritariu nel conceyu, que dirixe González-Río tuvo enfrentamientos un día sí y otru tamién col alcalde Longoria Carvajal, que consigue qu'el gobernador civil, del que nun me recuerdo'l nome, faiga un escritu "d'apercibimientu y amonestación a la mayoría", nel que poco menos qu'amenaza con mandar a la fuerza pública si seguíen los conceyales por derroteros poco convencionales. Pero paez ser que los republicanos carbayones nun fixeron munchu casu porque siguieron a lo suyo.Y hai una trafulca mui guapa, qu'a min préstame particularmente porque tien tolos componentes d'una astracanada valleinclanesca.

A.F.: A ver, a ver...

D.M.R.: Fue la cosa na seronda de 1879. Yera davezu homenaxar a los uvieínos que desarmaren a los carlistes n'ochobre de 1836, lo que ye'l biltu de la fiesta'l desarme que cellebramos agora, la de los garbanzos con espinaques y bacalao. Dende 1845 había un actu relixosu na ilesia San Isidoro, que ye onde ta'l panteón d'aquellos milicianos. El casu ye que González-Río plantega que namás haiga una ceremonia civil y que les perres que l'ayuntamientu da pa los fastos y oficios católicos seyan entregaes a los descendientes de los muertos. Tamos falando del Uviéu de 1879. Armárase la de coller, aquello fue d'órdagu a la grande. González-Río tien el sofitu de gran parte de la universidá, de la sociedá más avanzada de la ciudá, del propiu Clarín y de los movimientos obreros, mutualistes, vinculaos a la Internacional, a la primera, que yá entamaben movese per una Asturies qu'entrara completamente na revolución industrial. Uviéu nun sólo yera la Vetusta tan recordada. Había un Uviéu lliberal y progresista, una Asturies obrera, un Xixón tovía más avanzáu que la capital, un país, en definitiva, que nun seguía les directrices del tronu y l'altar.

A.F.: Los tiempos tan cambiando...

D.M.R.: Como diz la canción de Bob Dylan. El masón y republicanu maliayés muerre'l 10 de setiembre de 1884, a eso de les cinco y media la tardi. Y hai una cosa mui interesante que mos desplica la historiadora Paloma Uría nun númberu de la revista "Astura" de 1984. Ella afirma que l'intierru que Clarín describe en "La regenta" ye'l cortexu fúnebre de González-Río. Ye un artículu mui interesante, non sólo pola figura de González-Río y la obra mayestra de Leopoldo Alas, sinón porque reflexa perbién la llucha ente clericalismu y anticlericalismu del momentu. Ella, siguiendo el testu de la novela, desplica que los amigos del muertu yeran claramente anticlericales, que los cures negáronse a dar sepultura en llugar sacru al fináu porque morriere fuera de la Ilesia, un intierru que más paecía una manifestación, xente de toles clases detrás del féretru y, dalgo mui llamativo ya interesante, una gran presencia d'obreros.

A.F.: Eso denotaba que yera un referente pa la clas obrera y, polo tanto, dalguién hostil pa otra.

D.M.R.: Elli venía d'una clas mui acomodada, de familia rica, propietaria, con estudios universitarios...

A.F.: Pero trabayó pa otra clas social. Eso pasara bastantes vegaes na historia.

D.M.R.: Eses figures son mui importantes. Un paisanu que taba nel pozu mineru o tres el llabiegu nun podía, anque quisiere, ponese a estudiar. A lo sumo daprendía lo ellemental nel atenéu del pueblu o con aquél mayestru que ponía clase pola nueche y cobraba poco, que cobraba "en panoyes", como se suel dicir nes aldegues. Fueron dalgunos aristócrates y burgueses, tamién dalgunos cures y flaires, los que pusieron el so saber al serviciu de les clases populares. Yo mesmu, por exemplu, teo una impronta mui importante de la obra de Kropotkin, que conozo bien. Yera un príncipe, de la familia más poderosa de Rusia después de los Romanov, de los zares, que reinara na Rus de Kiev durante siete sieglos. Ye, na mio opinión, el gran teóricu del anarquismu, amás d'un gran científicu, y acabó padeciendo y sangrando colos campesinos y los obreros. 

A.F.: Pero, ¿hay una biografía de González-Río?

D.M.R.: Non y pamidea que tampoco muncha documentación. Tolo que yo sé d'esti home ye lo qu'acabo de cuntar. Dalgo garré de Víctor Guerra, dalgo de Victoria Hidalgo, dalgo d'artículos sobro la época, dalguna referencia en llibros sobro'l lliberalismu n'Asturies, la francesada, la revolución de 1868... Otres vegaes alcontré un articulín nun cartafueyu sobro la sidra en Villaviciosa, sobro la milicia lliberal onde apaez el so nome, el mesmu testu de Labra al que me referí, dalguna referencia vaga en llibros xenerales sobro la masonería... Tampoco yo soi un historiador profesional y nun buceo en archivos y biblioteques privaes, onde de xuru qu'habrá coses qu'illuminen la cuestión. Por eso recurro al "paez ser, esto ye una hipótesis, seguramente fue asina...".

A.F.: Ehí hai un retu pa historiadores.

D.M.R.: Hai muncha historia escaecía nesta Asturies de nueso. Como yá mos provez el tiempu, vamos rematar l'asuntu. El 25 d'agostu de 1888 la masonería asturiana fae un homenax al illustre maliayu y, embaxo los auspicios del Gran Oriente Nacional, constituise la lloxa Juan González-Río, conforme al ritu escocés antigu y aceptáu. Llevanten les columnes, emplegando terminoloxía masónica, miembros de la uvieína Nueva Luz y de la xixoniega Caballeros de la Luz. Esta lloxa Juan González-Río fuera una de les más prestixoses de la historia masónica asturiana, al mesmu nivel que la llexendaria Xovellanos, de Xixón, na que taben, ente otros, Eleuterio Quintanilla y Melquiades Álvarez, llegando a contar con noventa miembros, desendolcando una actividá descomanada y protagonizando durísimos alfrentamientos col obispu Martínez Vigil y col so sobrín Maximiliano Arboleya, que fuera deán de la catedral d'Uviéu. Nomes mui conocíos alcontramos nesa lloxa, como el d'Eulalia Menéndez Vizcaíno, una muyer de les poques qu'había na orde, na estela de Rosario d'Acuña, que llegó a Mayestra Ellexía de los Nueve, ún altu gráu del escocismu. Tamién formaron parte d'ella Juan Nepomuceno Martínez, ún de los fundaores de l'agrupación socialista d'Uviéu, del PSOE; Braulio Vigón, historiador, folklorista y miembru de La Quintana; los reputaos abogaos Álvarez de la Escosura y Benigno Bances... Tamos falando de persones de munchu pesu n'Asturies en xeneral y n'Uviéu en particular. Y quédamos una última nota sobro González-Río, que ye la so tumba. Ta interráu nel cementeriu de San Salvador, n'Uviéu, y trátase d'una de les poques tumbes que conserva un epitafiu masónicu. En 1939 Franco dio personalmente la orde de destruyir tolos símbolos masónicos qu'hubiere en cualisquier llugar. Unos cuantos siguen a la vista porque los esbirros del paticurtiu nun los vieron o nun se dieron cuenta de lo que yeran, pero los de los cimenterios son mui fácilemente identificables. Franco llegó incluso a mover los restos de dalgunos masones, por exemplu los del duque de Wharton, l'introductor de la masonería n'España y que taba interráu nel monesteriu de Poblet, en Cataluña. Porembargo, la tumba de González-Río siguió nel so sitiu y l'epitafiu vémoslu güei tal y como lu ficieran. Puede qu'en dalgún cimenteriu pequeñu, en dalguna parroquia rural, haiga dalguna tumba masónica, pero namás qu'hai cuatro reconocibles en cimenterios de ciertu tamañu. En Xixón, en Ciares, hai dos, la de Rosario d'Acuña, con mui poco simbolismu, apenines los tres puntos de la mayestría, y la de Villar Valdés, que fuera mayestru d'oficiu de mio güelu Manolo. Esa sí tien una simboloxía mui completa pero igual pasó desapercibía porque taba mui deteriorada. Agora ta rehabilitada, por una decisión del ayuntamientu d'hai unos años. La tercera ye la d'Antuña Ordiales, nel cementeriu de Carbayín, nel conceyu de Siero. Y la cuarta, seguramente la más evidente, ye esta de San Salvador, la de González-Río.

A.F.: ¿Qué-y pasaba a Franco cola masonería? Esto yá-y lo entrugamos a Víctor Guerra y agora entrugámos-ylo a David Rivas. 

D.M.R.: Hai distintes opiniones. Hai que partir de cómo yera la personalidá de Franco. Yera un home apocáu y un militar mediocre, ensín habilidaes sociales, mui ambiciosu pero con poco valor, mui rastreru pa colos superiores y mui cruel pa colos inferiores. Pero nun yera un idiota, sinón astutu y prudente. Ye l'exemplu de oportunista ensín ideoloxía. Puede que fuera monárquicu si ye que yera dalgo, pero nunca fue fascista nin nada paecío. Franco sólo fue franquista. Paez ser, anque hai duldies, que pidió l'ingresu na masonería cuando taba n'África, seguramente pensando n'aprovechar esa filiación pa escalar, y que lu rechazaron dos vegaes, ente otres coses por ser cruel. La crueldá ye ún de los pecaos peor consideraos pola moral masónica. Y tamos falando de lloxes castrenses nuna guerra colonial. ¿Cómo nun sedría l'home pa que militares en tiempu de guerra, d'una guerra colonial, lu consideraran cruel? La mayor parte los estudiosos piensen qu'esa petición d'ingresu diérase pero que, tres la guerra, tóo se fizo desapaecer, persones inclusive. Amás, la masonería nun ye estrictamente una sociedá secreta pero sí discreta, colo que la documentación suel tar a bon recaudu, y más tovía la guardaríen los militares masones de Larache cuando vieron que Franco encabezaba'l güelpe contra la república en xunetu de 1936. El rechazu a ingresar en la orde puede qu'encabronara particularmente a Franco pero yo pienso que yá yera antimasón con anterioridá. Hai dalgo personal: masones yeran el so padre, al qu'odiaba, y'l so hermanu Ramón, el Franco más conocíu, aventureru y con enorme éxitu coles muyeres. Pero l'añoriciu a la francmasonería yera un rasgu mui propiu del pensamientu reaccionariu, que consideraba que la orde, al serviciu d'Inglaterra o de Francia, contribuera a la destruición del imperiu español. Y esi odiu yera mui fuerte en dalgunos militares porque un gran númberu de militares del XIX fueron masones, precisamente los que derribaron a los borbones y los que taben n'activo cuando se perdieron les últimes colonies, Cuba y Filipines, onde homes como Martí y Rizal tamién yeran masones. D'ehí vien la famosa conspiración, el famosu contuberniu. Amás, Franco, de ser dalgo, yera fonderamente antilliberal y pa la xente como elli los conceutos de lliberal, llibertín y francmasón son una mesma cosa. Lo que pasa ye que Franco ganó una guerra y caltuvo una dictadura durante cuarenta años, pero esi pensamientu taba mui enraigonáu nel conservadurismu y nel catolicismu de la España de finales del XIX y principios del XX. Esi antilliberalismu y esi antimasonismu treslladáronlu más sero al odiu al socialismu en toles sos variantes, pero non pola cantinela relixosa y moral que pregonaben sinón porque la esquierda yera internacionalista. Y asina apaez la conxura de la masonería y'l comunismu contra España. Esi pensamientu d'aniciu antilliberal y casticista vémoslu, por exemplu, en Menéndez Pelayo, na so obra sobre los heterodoxos españoles. Pero hai munchos más, dende Donoso Cortés a Pemán, pasando pol mesmu Unamuno.

A.F.: Terminamos el programa de güei con esta historia, con esta semblanza de González-Río que mos fizo David Rivas. Munches gracies, profesor.

D.M.R.: Gracies igualmente, Fonseca. Y güei voi facer dalgo que nun fice nunca, que ye saludar a los mios vecinos de Pion y Candanal, pa que recuerden qu'hubo un home como González-Río que naciera nes bárcenes del rigu España, al delláu les sos caseríes, pente los sos antepasaos.