La tontería ye gratis

(El Fielato)

Acabamos esti 2021 y llevamos yá dos años de pandemia, que ta marcándomos muncho más de lo que pensamos, dende l'aumentu de les depresiones ata cambios simples nel consumu. Pero, riba tóo, pudimos ver cómo incrementa la opinión ensín fundamentu dengún y cómo, de repente, cientos de contertulios que falaben de política habitualmente, fixéranse virólogos y microbiólogos en cosa de díes y, últimamente, tamién grandes vulcanólogos. Ye mui illustrativo seguir una tertulia d'eses que tienen dos partes: dalgo menos d'una hora falen espertos y científicos y, dempués, faluquen ata la madrugada los opinantes de siempres. Nel primer tiempu sentimos de contino frases como "nun ta mui claro, nun soi espertu nesta custión concreta, los estudios paecen señalar que...". Nel segundu tiempu tóo ye afirmación categórica tres afirmación categórica y afoguín por buscar al culpable, que siempres ye'l gobiernu pa los unos y cualisquiera menos el gobiernu pa los otros.

Dalguién dixera que "el vezu de falar siempres y sobro toa triba d'asuntos ye una preba d'inorancia y de mala educación, siendo ún de les grandes llaceries del tratu humanu". Quien lo dixera fue Epicuro, yá nel sieclu III enantes de Cristo. Y nesa situación, el públicu acusa a los científicos de nun saber nada, de dicir una cosa agora y otra a los tres menses, despreciando por inorancia la realidá de que la ciencia funciona asina, que cada pasu debe ser comprebáu y que nunca se fala d'ello a la opinión pública ensín enantes superar un minuciosu sistema d'evaluación. 

Llegáramos a un momentu nel que los argumentos y los razonamientos son procesaos como obxetos de consumu rápidu, menospreciando lo que cambia despacio o lo que se mueve ente duldies metodolóxiques. D'esta forma, la xente recibe los conocimientos cola mesma indiferencia cola que recibe la más estúpida conxetura o la mentira políticamente intencionada. ¿Qué ye lo que mos queda como individuos pensantes cuando dexa d'importar tener razón o nun tenela?  

A tóo esto contribui la nuea teunoloxía, polo que supón de ruptura cola cultura, de despreciu al conocimientu y d'abandonu de la figura del mayestru, porque agora tóo ye rápido ya inmediato y porque cualisquiera tien una opinión tan válida como la d'otru, independientemente de que s'estudie o non, de que se siga una metodoloxía racional o non. Ye'l cambalache del tangu clásicu: "lo mesmo ye un burru qu'un gran profesor".

Ata tal puntu llega la cosa que vemos cómo los habituales de la tertulia televisiva tan mirando contínuamente pal móvile, puede que buscando datos, pero más bien siguiendo l'impautu nes redes de lo qu'ellos mesmos tan diciendo. Y suben el tonu pa ver si consiguen ser trending topic, que debe ser términu del asturianu inventáu del que falen los más inorantes contrarios a la cooficialidá, porque español nun paez. 

Pa estos charranes lo importante nun ye formar parte d'un grupu, sinón, anque lo ñeguen, crear una comunidá de seguidores na qu'ellos son el centru, nun intentu d'algamar popularidá mientres ñalen nun estanque d'adrenalina y endorfines. Acaben entrando dalgunos nel síndrome d'Eróstrato, aquel pastor d'Éfeso que quemara'l templu d'Artemisa cola única pretensión de pasar a la posteridá, cosa que consiguió, como constato al citalu venticincu sieclos después. Ya eso a pesar de que dicir el so nome quedara prohibío y mencionalu podía conllevar la pena muerte.  

Como vemos, la cosa nun vien d'ayeri pola nueche, pero la teunoloxía actual permite un ésitu muncho más rápidu y más espardíu. Escribíeralo Pérez Galdós en Trafalgar, ún de los episodios nacionales de la primer serie: "la ellevación de tontos y malos y toscobeyos, nun ye, como dalgunos creyen, desgracia peculiar de los tiempos modernos". Caro que Xesús Ramos, home mui céllebre de Venta les Ranes, dicíalo más a la manera popular: "la tontería ye gratis y caún paña la que puede".