"La figura central del reinu d'Asturies ye Adosinda"

Monchi Álvarez: Tenemos que falar güei de reines asturianes. Yo soi más antigu que la oriella'l rigu pero nun voi poneme cola llista de los reis godos. Esti convidáu que mos vien, un humanista, David Rivas, amigu del programa, va falamos d'aquelles reines. ¿Qué tal, profesor?

David M. Rivas: Bona tarde, Monchi Álvarez.

M.A.: Ta equí con nós Cris Puertas, que ye la reina de les tardes.

Cris Puertas: ¡Hola, profesor!

D.M.R.: Encantáu de tar otra vuelta con vustedes.

M.A.: ¿Fueron, Rivas, les reines asturianes tan importantes?

D.M.R.: Sí, ensín duldia denguna. Les reines asturianes quedaron un poco tapecíes na historia, como les reines de toa Europa, como polo xeneral les muyeres ata hai cuatru díes. Pero n'Asturies tuvieron gran importancia porque la monarquía asturiana yera matrillinial. Eso quier dicir que, anque'l rei fora home y la muyer consorte y ensín númberu, yera ella la del sangre rial. Esa ye una preba más de que nada tien que ver el reinu d'Asturies colos godos toledanos. Los godos tiníen un orde patrillinial. Los asturianos siguíen la tradición céltica, que tamién, llamaderamente, siguen los xudíos. Y tien razón de ser: la madre siempres ye la que ye, mientres qu'el padre ye discutible. Los pueblos sabios son matrilliniales. Esa tradición llegara ata l'Asturies del sieglu XX. Eso nun quier dicir qu'hubiera un matriarcáu. De fechu, lo del matriarcáu paez más una historieta qu'una realidá antropolóxica.

M.A.: Pero la monarquía asturiana, ¿nun yera por elleición?

D.M.R.: Sí, pero, por puru pragmatismu, acabaron ellixiendo siempres al fíu o al hermanu del rei muertu. Yeren homes educaos pa gobernar, con prestixu nel exércitu, capaces de tratar nel mesmu rangu a los altos eclesiásticos, casaos con families de reinos fronterizos... El modelu primeru valía pa una organización tribal pero non pa un reinu, pa lo que güei llamaríamos estáu, anque esi conceutu nun esistía. 

M.A.: ¿Fueron munches les reines que dexaron fondera güelga na historia d'Asturies?

D.M.R. Unes cuantes. Hailes mítiques, como Gaudiosa, la muyer de Pelayo, o Ermesinda, la so fía, esposa d'Adefonso I. De fechu, Gaudiosa, hipotéticamente una llebaniega, ye de duldiosa historicidá. Hai una llienda mui antigua, la de la princesa que durme con una espada ente les manes nuna cueva de Los Picos d'Europa, la princesa encantada, qu'espera a que la llamen. Unes versiones falen  de Gaudiosa y otres falen d'Ermesinda. 

C.P.: Eso suena a artúrico.

D.M.R.: Sí, como tamién tenemos el mesmu mitu con Bernardo del Carpio, qu'espera, como rei durmiente, arrodiáu polos sos caballeros lleales a que lu reclamen pa ponese al frente'l so pueblu. Esa llienda, por exemplu, pervivió en Portugal ata'l sieglu XIX col sebastianismu.

M.A.: ¿Y otres reines más, por ser pedestres, verdaderes? 

D.M.R.: Tenemos a Froiluba, esposa de Favila, que fue rexente tres la muerte'l rei durante la minoría del fíu de los dos. Hai una discusión sobro si yera xermana o vascona. Pero la  figura central del reinu d'Asturies ye Adosinda. Ye una muyer a la qu'Ambrosio de Morales describe como guapísima y mui valiente. Lo de la belleza nun lo sabemos pero que yera arrecha, dende lluéu, sí. Yera fía d'Adefonso I y d'Ermesinda, oseya, ñeta de Pelayo, hermana de Fruela I, el rei que fundó Uviéu. Esti Fruela ordenó la muerte del otru hermanu, Vimara, que yera mui amáu pol pueblu. Más ceo Adefonso I enxendró a Mauregato con, paez ser, una árabe. Fruela, que yera de mal caráuter y poco diplomáticu, tuvo problemes en Galicia y en Vasconia porque impuso ensín negociar l'orde políticu de los astures. Los vascones nun lo aceutaron porque chocaba cola so tribalidá y los gallegos porque taben mui romanizaos. Amás tamién pegó cola Ilesia. El casu ye que lu asesinaron en Cangues d'Onís, posiblemente por una confabulación.

C.P.: Una historia de película.

D.M.R.: L'Asturies altomedieval daría pa Ridley Scott muncho más que Balduino y Napoleón, y pa Gibson muncho más que Wallace. ¡Pero somos probes y gobernaos por cosmopaletos inorantes! 

M.A.: De la edá media a esti branu de 2024, Rivas. Pero siga, siga...

D.M.R. Muertu Fruela namás qu'el sangre de Pelayo lo lleva Adosinda y'l so sobrín Adefonso, fíu del so hermanu. Entóncenes esta muyer consagró tola so vida a caltener la estirpe de los astures, a trabayar pa ver al so sobrín unxíu y coronáu. Como'l neñu taba en pelligru mandolu al monesteriu de Samos, en Galicia. Ellí tuvo'l rapaz una educación en lletres y en ciencies y, especialmente, lloñe de la nobleza y del cleru cortesanu. Ella quedó en Cangues pero embaxo la personal proteición del rei Aurelio. Esti rei llamola más sero a Sotrondio, onde instaló la corte, Nalón arriba. Ellí Adosinda conoció a Silo, un noble pravianu que dominaba amplies fasteres del Nalón y del Narcea. Y decidió casar con elli. Fue, sigún les cróniques, un matrimoniu con amor, non namás que con conveniencia. Amábalu, pero necesitaba un noble con milicia potente y que gobernara un ampliu tarrentoriu. Y Silo gobernaba dende lo que güei ye Sotu'l Barcu a lo que güei ye Miranda. Los mapes nun coinciden, ¿eh? Cuenten que siempres tuvieron namoraos.

M.A.: ¡Cómo pa fiase de les cróniques! ¿Quién fae la crónica de los reis? Agora l'Hola.

D.M.R.: Pues yo esi asuntu sí que me paez mui plausible. Primero: la mayoría de les cróniques son d'Adefonso III, ñetu de Ramiro I, polo tanto nada complaciente con Adosinda. Amás, lo de tar namoraos una reina y un rei nun yera importante nesa dómina. Ye más: igual fora visto como rasgu de debilidá. Y cuando les cróniques repiten dalgo tan poco importante como l'amor de dos persones, lo plausible ye que dalgo había... Amás, nun tuvieron fíos, colo que naide podía falar del amor ente los esposos como de dalgo significativo. Na mio opinión, la cosa ye creyible. Digo creyible, non verdá.

M.A.: Sigamos, profesor, cola historia.

D.M.R.: Muerre Aurelio y la corona ye d'Adosinda pero quien sube al trono ye'l paisanu, Silo. Adosinda aprovecha que Silo ye pravianu pa llevar la corte a Pravia. Pravia ye un llugar estraordinariu: al fondu d'una ría, defendible d'ataques, pero navegable, y que permite abrir la ruta al norte, haza Inglaterra y Francia. Per otra parte, per tierra, contaba coles antigües calzaes romanes que lleven a lo que güei son Llión, Galicia y Portugal. Pela so parte, Cangues d'Onís nun dexaba de ser una capital d'una confederación de tribus, por decilo de dalguna forma, mal comunicada. Yo creyo qu'Adosinda tinía na cabeza la formación d'un reinu. Y contaba col exércitu, que la respetaba, un exércitu mui influyíu pola figura de Pelayo, que taba pasando d'home a mitu.   

M.A.: Yera una estratega.

D.M.R.: A min paézmelo. Siempres lo comento, Monchi Álvarez, yo esto nunca lo llevaría a un congresu d'historiadores, pero tampoco ye una ensoñación. Lo plausible, la llóxica, la probabilidá y la inferencia permiten aventurar.

M.A.. Ye verdá qu'el profesor Rivas simpres insiste neso. 

D.M.R.: Ye que ye mui importante. Nun me prestaría res que dalguién diera por dogmes lo que yo digo. Pero ye que llevamos más de cien años, especialmente nel franquismu, con otros dogmes que son completamente absurdos.

M.A.: Sigamos pues, que diria un bilbainu.

D.M.R.: Nos nueve años que duró'l so reináu, Silo y Adosinda llevantaron edificios relixosos y civiles, pontes y otres obres públiques, potenciaron les artes y ameyoraron les condiciones de los campesinos. Silo pasaría a la historia pol so famosu llaberintu, qu'entá provoca discusiones. Adosinda nun tuvo fios, igual intencionadamente, y decidió reclamar pa Pravia al so sobrín pa siguir cola so educación pero cola vista puesta nel tronu. Al morrer Silo, Adosinda maniobró, con aída de Beato de Llébana, pa qu'Adefonso, que diba ser el segundu, fuera ellexíu como princeps. Asina fuera, pero'l so hermanu bastardu, Mauregato, tíu del xoven rei, sofitáu por cortesanos y nobles gallegos, diera un güelpe d'estáu. Adosinda mandó a Adefonso otra vuelta al esiliu. Esta vegada yá non a Galicia porque temía pola so vida sinón a les tierres alaveses. Adefonso fora acoyíu como ún de los suyos porque yera fíu de la reina Munia, esposa d'Adefonso I, una vascona. ¡Miren, Cris y Monchi!, un rei por matrillinealidá, un rei asturianu con problemes colos vascones, abellugáu en Vasconia por ser fíu d'alavesa, d'una muyer vascona. Ye pa pensar la cosa.

C.P: Lo que dicía: de película.

D.M.R.: Ye más. La vida d'Adosinda taba nel filu y que la mataren yera más que probable. Entós intervino Beato de Llébana, un home intocable nel reinu asturianu, anque partidariu d'Adefonso y d'Asodinda dende'l principiu. Yera'l gran intelleutual d'Asturies y'l gran intelleutual d'Europa xunto con Alcuino de York. Beato consigue convencer a la indómita Adosinda de qu'ingrese como relixosa nel monesteriu de Santianes. Pero ella siguió conspirando y calteniendo rellaciones con nobles lleales a la dinastía canguesa y con altos xefes militares, siempres col horizonte de qu'Adefonso fuera rei. Y llegó la ocasión. Sube al tronu Vermudo, un diáconu, qu'abdicó al poco tiempu. Adefonso II reclamó'l tronu. El drechu teníalu, pero, por si acasu, entró na capital coles tropes del oriente asturianu y con tropes vascones, y col sofitu del exércitu pravianu lleal a Adosinda. Los sos pares coronáronlu por segunda vegada. Y Adosinda vio, por fín, al so sobrín, bisñetu de Pelayo, a la cabeza del asturorum regnum, con Beato d'asesor y cortando, como ella quería, la influencia de la Ilesia. Esi distanciamientu d'Uviéu con Roma ye mui importante, pero esi ye otru asuntu que quedará pa otru día.

C.P.: Pregunta d'una feminista de güei: ¿qué queda d'Adosinda?

D.M.R. Poco. Que yo sepa, una calle pequeñina nun barriu de Xixón. Pero Adefonso II, el gran rei d'Asturies, siempres fue consciente de lo que-y debía a la so tía. Gracies a ella, non namás que salvó la vida por dos vegaes, sinón que tamién se convirtiera nel rei posiblemente más cultu y diplomáticu de la Europa d'entóncenes. Nel fondo, la gran nación que cimentó Adefonso II, tratando de tu a tu a Carlomagno, yeren el suañu y la obra d'Adosinda.

C.P.: ¿Aú ta Adosinda?

D.M.R.: Nun se sabe con seguridá cuando morriera y paez ser que fuera en Pravia. Sí ye cierto que la enterraron en Santianes, nel mesmu sepulcru nel que taben los restos del so esposu. Nun los enterraron en dos sepulcros paralelos, non. A Adosinda enterráronla sobro'l cuerpu de Silo. Por eso yo creyo que sí que taben namoraos. Ellí siguen a día de güei.

M.A.: ¡Gran historia!

D.M.R.: A min paezme una historia apasionante, más pa una novela o pa una película que pa un llibru científicu porque, caro, los documentos son escosos y a saber sí reinterpretaos dalguna qu'otra vuelta.

M.A.: Teníamos otra reina.

D.M.R.: Sí, la reina Urraca. D'esta sí que tenemos documentación abondosa. Tamos yá nel sieglu XII. Urraca ye fía illexítima d'Adefonso VII de Llión, el consideráu como últimu de la dinastía astúrica, y de Gontrodo Peri de Tinéu. El rei taba yá casáu con Berenguela de Barcelona pero nun tinía fíos. Si nun llega a tener un fíu varón posteriormente, el que diba ser Fernando II, Urraca podría tar güei na historia como reina de Llión y Castiella. En 1132 Adefonso VII vien en carne mortal, como diz Monchi Álvarez, a Asturies pa acabar col llevantamientu secesionista, el tercer llevantamientu, de Gonzalo Pelayi. Feríu por flecha nel asediu a Prubaza, el rei retirose al autual conceyu d'Ayer, al castiellu de Sotu, residencia del padre de Gontrodo. Al añu siguiente ñaciera nesi castiellu Urraca, a la qu'Adefonso reconoció como fía. Siempres fuera la so fía prefería y emparentola cola más alta nobleza cristiana. Nel solsticiu de branu de 1144 casó en Llión con García Ramírez, rei de Pamplona, colo qu'Urraca, a la que tol mundu llamaba L'Asturiana, ye la madre de la dinastía de los reis de Navarra. La boda fuera una bacanal, como mos cuenta la Chronica Adefonsi Imperatoris, resaltando la presencia mui bulliciosa de los asturianos y, particularmente, de la xente de Tinéu.

M.A.: Llevaríen choscu.

D.M.R.: Del choscu nada cuenta la crónica. 

M.A.: El choscu daquella sería propio de reis.

D.M.R.: Ensín duldia. El casu ye qu'a los seyes años muerre'l rei de Pamplona y Urraca decide regresar al so país. Entóncenes Adefonso VII corónala como reina d'Asturies, cosa que yá fixera décades atrás cola so propia hermana, Sancha. Oseya, que, en puridá, a los trece reis d'Asturies que conocemos habría qu'añadir a Sancha y a Urraca. La reina, yá n'Uviéu, nun xeitu mui significativu, decide residir nel palaciu d'Adefonso II el Castu. Como yera una reina probe Adefonso VII diéra-y propiedaes mui notables, siendo la más importante la del señoríu d'Ayer. Urraca gobernó ente 1153 y 1165, calteniendo la corona cuando yá reinaba en Llión y Castiella Fernando II, el so hermanu menor. La diplomacia fálamos d'ella como regina Uraca Asturias imperante.

C.P.: Esto da pa otra película.

D.M.R.: Y hai más. Casó con Álvaro Rodríguez de Castro, que yera ñetu d'Álvar Fañez, l'home que más vegaes apaez nel Cantar d'El Cid, por ser el de más confianza de Rodrigo Díaz de Vivar. Conforme a la matrillinialidá de la tradición asturiana Álvaro podría ser rei. El casu ye qu'intentaron independizar Asturies de la corona yá castellana, asuntu que se conoz por un documentu atopáu nel monesteriu de Santa María, güei desapaecíu, que taba n'Otero de las Dueñas, nes bárcenes del rigu Lluna, n'Asturia cismontana. La decisión d'Urraca, custiones personales más o menos egoístes aparte, coincide con un momentu nel que los asturianos recuperen la conciencia identitaria, mui aguiyada pola obra política y lliteraria del obispu Pelayo. Y al puntu tuvo Urraca de conseguilo. Fue la Ilesia la que traicionó a la reina, como llegó a reconocer Fernando II, con notorios agradecimientos a Gonzalo, obispu d'Uviéu, pola so contribución al fracasu de la secesión. Y, caro, Fernando II quitói tolos privilexos y, el primeru, la corona. 

M.A.: ¿Vivió munchos años?

D.M.R.: Nun se sabe con certeza. Hai controversia ente l'añu 1179 o l'añu 1189. Falamos de que viviera 46 o 56 años. Digamos que morriera na cincuentena. Sí se sabe que morriera en Palencia. Hai un documentu con fecha y sellos nel qu'Urraca ordena ser enterrada na capiella del rei castu, n'Uviéu, xunto a los soberanos asturianos, lo que diz muncho. Tamién dende Pamplona pidieron llevar el cuerpu a Nerja, pa que reposara colos reis de Navarra, como reina madre que fuera de la dinastía. L'asuntu resolviérase sepultándola na capiella de La Malena de la catedral de Palencia. Ellí sigue, con unos blasones asturianos y navarros güei desapaecíos. Puede ser que la cosa viniera porque la familia del so segundu esposu gobernaba esa ciudá, pero tamién, más plausible, porque Alfonso VIII de Castiella nun quería ver a Urraca l'Asturiana, la so tía paterna, entrando n'Uviéu anque entrara muerta.

M.A.: El tiempu radiofónicu nun mos permite más. Lleguen les noticies de les cincu. Güei esi paseín pela historia, esta vegada colloreada de llienda, llevomos a les reines d'Asturies. Noto al profesor Rivas, un aficionáu como siempres diz, contentu con estes muyeres.

D.M.R.: Puede que sí. Ye verdá que falamos d'una dómina, la de les primeres reines, non nel casu d'Urraca, na que la historia y'l mitu pueden confundise. Si yo fuera un historiador profesional sería dalgo más prudente y nun me fiaría muncho de la plausibilidá. Pero soi un aficionáu que da a los mitos la importancia que tienen, unos mitos na visión d'autores tan perspicaces como Eliade, Jung, Graves, Cirlot o Ryle, non de los mitos como cuentiquinos pa durmir al neñu.

M.A.: Munches gracies, David Rivas.

C.P.: Vémosmos pronto, profesor.