"N'Asturies lo importante ye que vengan más turistes, ensín denguna otra consideración"

 Alejandro Fonseca: Son les cuatru y siete minutos de la tarde. Empezamos nesta tarde de branu con un economista. ¿Un economista pa una tarde de branu? ¡Nun se preocupen! Ye David Rivas, que sabe d'economía y de munches coses más, y que tolo cuenta mui bien, capaz de facer ameno incluso lo más árido. Falaremos de turismu, del modelu turísticu, de tases turístiques, de vivienda... Bona tarde, Monchi Álvarez.

Monchi Álvarez: Equí, en carne mortal, transitando agostu, aguantando el calor y la humidá, esa humidá que siempres mos acompaña. Y los que mos acompañen nestos díes son los turistes, que son yá una invasión. Güei, viniendo pa la radio cruceme con trescientes setenta y tres persones y dos perros falderos y trescientes setenta yeran turistes. Y hai que poner una tasa especial a los turistes que paséen pela cai llevando'l palín ente los dientes.

A.F.: Nun sé si falaremos col nuesu convidáu del palín ente los dientes. Supongo que non. Tenemos con nosotros a un economista, a David Rivas.

M.A.: Un gran tipu.

A.F.: Sabe de munches coses y cuéntales mui bien.

M.A.: Ye un gran humanista del país astur.

A.F.: Podemos falar de modelu turísticu, de cómo lo ficieron notros sitios, de cómo lo fae Asturies, de qué puede facese, de sí ye posible la intervención estatal, de si ye posible qu'el crecimientu económicu deriváu del turismu beneficie a la mayoría de la población y que los beneficios d'unos nun conlleven perxuicios a otros. David Rivas, bona tarde.

David M. Rivas: Bona tarde.

A.F.: Los equilibrios económicos son difíciles, ¿verdá?

D.M.R.: Sí, polo xeneral sí. Ye complicao eso de que tóos ganemos nel sistema económicu, seguramente na vida na so totalidá. El turismu aporta un bon porcentax de PIB y n'Asturies anda ente'l 10 y'l 12 por cientu, lo que ye mui considerable. A munchos puede molestar el turismu, cosa mui normal, pero esi 10 por cientu de PIB supón que vivimos bien gracies al seutor, anque nun teamos rellación direuta con ello. Ye un seutor mui difícile d'abordar. Tien una enorme complexidá. Ser espertu en turismu ye cuásique imposible. Ye un seutor que nun va retroceder sinón tolo contrario. Cambiará'l so fluxu, cambiará la so especialización, pero va siguir aumentando. Escluendo países en guerra o con graves problemes sanitarios o de violencia, el turismu medra en tol mundiu. Cuando mos quexamos del turismu, y yo soi de los que se quexen, escaecemos que tóos somos turistes dalguna vegada, normalmente unos díes cada añu. Otra cosa ye qu'hai un turismu más respetuosu cola cultura y la forma de vida'l país o la ciudá que visita y otru maleducáu y avasallador. Esti, precisamente, el maleducáu y avasallador, ye'l más presente n'Asturias, igual non el más numberosu pero sí qu'el más visible. Amás el turismu incide nos salarios, na vivienda, nel mediu ambiente... Tamién hai enormes diferencies temporales y espaciales: nun ye lo mesmo febreru qu'agostu nin Málaga que Coruña, nin tampoco Berlín qu'El Cairo, como ye diferente la so incidencia nel entornu urbanu que nel rural.

A.F.: Eso quier dicir que ye de complicada regulación.

D.M.R.: Por eso les alministraciones, enantes de metese en coses concretes, deberíen saber qué modelu quieren y ye entós cuando pueden articular polítiques específiques. Hai polítiques que potencien el deterioru ambiental, la xentrificación del centru les ciudaes, l'acosu a la vida rural, como les hai compatibles o, a lo menos, poco llesives. N'esti escenariu Asturies ta nun bon momentu. El fechu de que fuéramos mui atrasaos en desarrollu turísticu permítemos conocer otres esperiencies y daprender de los erros que cometieron otros. Seguramente qu'Asturias nunca nun va tener un problema como'l que tienen Ibiza o Málaga, pero ye bono mirar pa esos casos y poner las midíes necesaries, especialmente nesos sitios onde yá apunta, como'l centru de Xixón, o Llanes, o Ribeseya, o dalgunos puntos más mui concretos, como delles villes costeres del occidente. Pero pa eso necesitamos tener un modelu turísticu, que nun ye'l de la patronal hostelera, que paez ser quien gobierna dalgunos conceyos, especialmente el de Xixón. Dizlo mui lluminosamente'l nuesu amigu Monchi Álvarez, esi aprendice de playu qu'acaba salir del estudio: ¿queremos ser como Edimburgu o como Magaluf? Si queremos ser como Magaluf la cosa ye fácile: dexemos qu'el mercáu campe a les sos anches.

A.F.: Esi mercáu lleva a casos tan estremos como'l d'Ibiza, qu'espulsó a la población llocal y onde los funcionarios piden treslláu al día siguiente de tener la plaza porque nun pueden vivir.

D.M.R.: Ye que marchen los mélicos y los xueces, que tienen salarios rellativamente altos. Nun falemos yá de los mayestros, los policíes, los enfermeros... Eses coses n'Asturies nun pasen y seguramente nun llegarán a pasar con tanta virulencia, pero ya se deteuten. Pero ye necesario tener un plan, una programación, pa diseñar un modelu turísticu. Y eso nun esiste. N'Asturies, hai d'esto yá cuasi cuarenta años, llanzárase l'eslogan del parayisu natural, que tuvo un enorme ésitu propagandísticu, con una imax de marca sensacional, pero que resultó falsa y en cierta manera perxudicial. Digo esto porque, añu tres añu, campaña tres campaña, toó yeran viesques, praos verdes, osos, playes, horros, barcos, edificios nobles, pero nunca apaecía la xente, les persones. Eso fizo d'Asturias un destín turísticu nel que los asturianos sólo yeren camareros de temporada o porteros de discoteca, solombres subordinaes, ensín cultura, ensín llingua, ensín tradiciones. Si encomparamos esa imax cola qu'ufertaben otros, el País Vascu, ensín dir más lloñe, na qu'ufertaben una suma de naturaleza, cultura y vida cuotidiana, entenderemos munches coses.

A.F.: Pero ye un llugar común dicir qu'Asturies ye la comunidá meyor conservada, especialmente la costa.

D.M.R.: Los indicadores son engañosos cuando facemos comparances ente unes comunidaes y otres pero sí que ye cierto que tenemos la costa meyor conservada de to'l reinu. Por exemplu, si te lleven nun coche durante venti munutos colos güeyos vendaos, cuando te dexen ver sabes perfeutamente si tas n'Asturies o en Cantabria. Del Mediterrániu, les ríes baxes gallegues y les islles nin falemos, con esceiciones como El Hierro y Menorca. Esa ye agora una ventaxa comparativa pero si, col cuentu de qu'Asturies nun sufre tensión turística, permites modificaciones o lleves a les zones costeres a sobropasar la so capacidá de carga, non namás que pierdes esa ventaxa comparativa, sinón qu'acabes por esfarrapar la costa, por perder el recursu. Pero, como vemos tolos díes de tolos branos, los gobiernos asturianos presumen más qu'El Bomba, cuando non tóo ye tan exemplar. Agora tamos nel sestu plan turísticu, que llega ata l'añu 2030, y que, pomposamente, fala de calidá y sustentabilidá. Nuna d'eses páxines publicitaries con apariencia d'información tan típiques de la prensa asturiana, a comuña con gobiernu y empresarios, lleemos coses como qu'Asturies ye'l destín de los que busquen naturaleza, tratu amable, bona gastronomía, bon clima, lo que mos convierte nun llugar onde'l turismu respeta los espacios naturales y les señes d'identidá. Esto que-y digo ye, más o menos, testual. Eso ye, simplemente, mentira. Por exemplu, mire les bárcenes del rigu Alba, en plenu parque de Redes, enllenes de colielles de tabacu, cuando non plásticos más grandes, que nun se degraden en cientos d'años, o los perros bañándose y espavoriando a especies protexíes. Mire la toponimia na prensa y na publicidá de los ayuntamientos y dígame aú ta'l respetu a la identidá. Alcontrar un programa de fiestes n'asturiano ye millagru. Y la bona gastronomía debe ser el cachopu, qu'Asturies paez el Planeta Cachopu. Y agora los gastropaseos, un negociu casposu qu'invade los espacios públicos. Hai facilidaes de tou tipu pa que los hosteleros pongan terraces en media ciudá mientres les comisiones de fiestes de los pueblos carecen de torgues y amenaces. Un dirixente d'Otea, la patronal hostelera, criticaba que les verbenes populares duraben munches hores, una forma amatagada d'acusación de competencia deslleal. ¡Allabao, allabao! Tola propaganda ye una falcatrúa. Playes mui concurríes tan contaminaes, les troches de les montañes son desfiles de cientos de turistes a los qu'hai que dir a rescatar cada dos por tres, la hostelería ye cara, mediocre y esclavista...

A.F.: ¿Tan mal lo ve, profesor?

D.M.R.: Bono, nun ye tóo tan malo. Lo que pasa ye que tóo se desaxera pela parte positiva. Cáfienme muncho los discursos autocomplacientes y les visiones dulciplayes. Por eso dacuando envez salme una vena percrítica. Pa enriba llegara la pandemia de la covid y la tremenda evolución climática, qu'impulsaron el mercáu de vivienda en ciudaes pequeñes y zones rurales como abellugu y defensa. Entós saliera esi discursu recurrente de la solución a la decadencia económica y demográfica: los nómades teunolóxicos, los neorrurales ecoloxistes, los xubilaos con bona salú y renta alta... Pero esa tendencia quebró en poco tiempu, especialmente polo que respeuta a les zones rurales. Nos últimos dos años ta caendo la demanda. Falo del campu, de l'aldea, non de les urbanizaciones alreor de dalgunas villes costeres. L'abellugu climáticu ye un conceutu aplicable a quien decide vivir nun llugar más bonancible, pero residir dafechamente, non pal que compra o alquila pa venir dos menses de calorón. Son situaciones mui diferentes. El residente sí qu'incide positivamente, porque normalmente adáutase culturalmente, paga impuestos y tases, compra nel comerciu llocal, polo menos na mesma proporción que los vecinos de siempres... El residente temporal nun fae nada d'eso y carga de costes adicionales al seutor públicu, la sanidá y les redes de saneamientu, por exemplu.

A.F.: Esi residente por motivos climáticos, ¿nun esiste?

D.M.R.: Hailo, caro, pero ye dalgo residual. ¿O ye que pensaben los alministradores que díbamos atrayer a cien mil persones a vivir equí nuna década? La realidá ye qu'aumenten les urbanizaciones, los pisos turísticos, la xentrificación, pero Madrid, por exemplu, sigue medrando en población. ¿Ónde ta lo de los cambios por motivos climáticos? Lo que sucede ye que les grandes ciudaes, faigan 20 graos o 35 n'abril, nun decrecen, sinón que provoquen un fluxu turísticu insostenible en xunetu y agostu. Y eso provoca tamién tensiones na sociedá rural, como tamos viendo dende hai un tiempu. El turista típicu, esi que s'entusiasma col práu y cola tardiquina tomando dalgo n'antoxana pel branu, nun ye consciente de que l'añu ye perllargu y de que n'aldea hai vecinos cola so vida particular, mui estremada de la suya en munches coses. Siempres se dixo que los dos momentos más felices del propietariu d'un veleru son cuando lu compra y cuando lu vende. Pues eso ta pasando coles cases de les aldées. Vivir nun pueblu nun ye fácile. Nun lo ye nin pa los que vivimos nesi pueblu siendo d'equí. Yo vivo nuna aldea de venti habitantes y sé de qué falo. Pero, pa enriba, tener una casa a quinientos kilómetros d'aú vives habitualmente nun ye cenciello nin barato. Una simple gotera nun país como Asturies puede arruinar la casa nun par de menses, porque nun puedes siguir la so evolución nin saber onde ta'l problema, amás de que nun prendes la cocina, la calefaición o la chimenea. Lluéu atopes con custiones coles que nun contabes: drechos de pasu, andeches y sestaferies, obligaciones con respeutu al augua, llendes mal especificaes, custiones d'esa triba. Amás, nun lo escaezamos, los campesinos son mui suyos y, anque seyan simpáticos y amigables, nun te consideren de los suyos asina como asina y, dende lluéu, nunca van facelo si pases diez menses ensín vivir ellí, si la maleza d'una finca tuya malcuriosa invade la que llenda con ella, si andes con remilgos urbanites y pretendes imponer un nuéu orde cultural, si lleguen los tos amigos pel branu y aparquen siete coches na caleya... Nun creyo que seya necesario falar de los que denuncien que los pitos canten, que les motosierres faigan ruíu, de que les campanes avisen, de que les vaques caguen delantre la so portiella... Pero ellos pueden destrozar colos sos quads los caminos rurales d'usu ganaderu, convirtiédolos en pedregales y barrizales.  

A.F.: Tóo paez indicar que ye necesaria una planificación turística, un modelu. ¿Qué opina de la tasa turística?

D.M.R.: En práuticamente toa Europa esiste la tasa turística y n'España tiénenla Cataluña y Baleares. El problema ye que la tasa ta pensada pa un turismu tradicional, colo que suel aplicarse nos hoteles. Pero resulta qu'el modelu ta camudando, como bien sabe tol mundiu, col enorme crecimientu de los pisos turísticos, illegales o allegales munchos d'ellos. Sobro la tasa proyéutense dellos interrogantes pero hai tres básicos: quién debe imponela, sobro qué fechu y pa qué se recauda. Yo soi partidariu d'una tasa finalista, ye dicir, que lo que se recaude destínese, precisamente, a aquello qu'el turismu deteriora: el mediu ambiente, el mobiliariu públicu, les redes de saneamientu, los edificios emblemáticos, la llimpieza de playes y parques...

A.F.: Fundamental lo de les redes de saneamientu. Por exemplu, les islles tan desbordaes nesi aspeutu dende yá va tiempu.

D.M.R.: Les islles son particularmente vulnerables y más vulnerables cuanto más esceicionales son dende un puntu vista ecosistémicu. Les Canaries, por exemplu, nun soporten más presión, alcuéntrense nel carel del colapsu ambiental. Pero'l el problema del saneamientu ye xeneral. Una villa como Llanes tien la rede d'augua que tien, o la de recoyía de basura. Nun va facer una inversión y un gastu propios d'una ciudá de cincuenta mil persones cuando tien un censu de cuatru mil habitantes, que ye la población real durante diez menses. Supongo que Xixón tendrá menos problemes porque'l so tamañu real yá obliga a redes más potentes y que seguramente soporten meyor una sobrocarga en xunetu y agostu. Pero nun lo sé. Volvemos a lo que dicíamos enantes: ye difícile ser espertu en turismu. Yo nun lo soi. Yo abordo la custión dende'l puntu vista ambiental, tamién dende los impautos sobro la cultura, si acasu dende'l puntu vista fiscal. Pero nun soi espertu nel mercáu inmobiliariu, nin n'hostelería, nin n'orde públicu.  

A.F.: ¿Tanto ye l'impautu'l  turismu sobro'l mediu ambiente?

D.M.R.: Ye descomanao y particularmente n'Asturies, porque tres de los puntos calientes de la masificación son ecosistemes perfráxiles: les playes, los rigos y l'alta montaña. Amás, nun falamos de coses mui visibles, como quemar una viesca o matar un osu, sinón de la degradación callada y poco perceutible. L'otru día lleyía un informe que detallaba cómo taba morriendo una viesca de secuoyes en Cantabria pol fechu cenciellu de que miles de turistes pisen la tierra, endurécenla y faenla impermeable. Nos pedreros de les playes asturianes nun queden bígaros y nin tansiquier sapes, que ata hai bien poco, en Xixón, víesles baxar y subir pela parea'l muru'l paséu ente la pescadería y la ilesia San Pedro. Por supuesto que nun se ven yá babosos o escamones. O vas a Los Llagos de Cuadonga y ves a críos colo que creyen que son margarites y que resulten ser flores endémiques en pelligru. ¿Resuelve esti problema una tasa? Posiblemente nun lo resuelva, posiblemente seya imposible devolver l'espaciu al so estáu orixinal, pero puede emplegase lo recaudao pa remover la tierra la viesca o repoblar los pedreros. Agora bien, siempres va haber casos nos que namás que la prohibición del aicesu consiga dalgún resultáu. Y, caro, las alministraciones, pienso nos ayuntamientos, resístense a esto. Ye dalgo mui vieyo: yá Ibsen lo dramatizó en Un enemigu'l pueblu y Spielberg filmáralo en Tiburón.

A.F.: Dicía vusté qu'un tema a discutir ye qué alministración debería aplicar la tasa.

D.M.R: Hai un debate importante, mesmo por visión del estáu que por eficacia. Naide defende qu'una tasa turística seya aplicada pola alministración central. La discusión céntrase en si debe ser autonómica o municipal. En Cataluña y en Baleares ye autonómica. N'Asturies hai gran controversia. Paez ser qu'el gobiernu apuesta pola tasa pero que nun sabe cómo aplicala. Hai poco qu'el presidente Barbón dixera que la tasa aplicaríase si la piden los conceyos y que, llóxicamente, sería municipal. Y la razón que daba pa nun implantala en toa Asturies ye que nun hai tensión turística. ¡Menudu razonamientu! ¿A qué espera, a que la situación tense, que ye'l pasu previu al colapsu? Sigún esi razonamientu nun sé por qué pagamos tributos ambientales en los combustibles si n'Asturies la contaminación sólo ye problema grave de tres o cuatru puntos. ¿Por qué paga por contaminar un vecín de Santalla d'Ozcos, onde nun hai tensión ambiental? Y podríamos falar de mil exemplos más.

A.F.: ¿Pa vusté sí qu'hai tensión turística?

D.M.R.: Vamos ver: si contemplamos tol país nun hai esa tensión, de la mesma manera que nun hai gran contaminación, como tampoco llobos o plumeros de la pampa. Pero ye qu'el compartamientu d'estes variables nun se analiza asina. Uviéu, con 220.000 habitantes, recibe 520.000 turistes, mientres que Xixón tien 269.000 y recibe 386.000, Villaviciosa tien 15.000 y recibe 30.000, Llanes tien 14.000 y recibe 121.000 y, Cangues d'Onís, el top del asuntu, tien 6.000 habitantes y recibe 128.000 turistes. Nun sé si esto ye tensión pero sí que merez una atención dalgo menos simplista. Pela so parte, evidentemente, la patronal Otea nun la ve necesaria y la drecha recházala, dos custiones qu'a naide estrañará. Lo de la drecha nun merez atención porque ye lo propio: oponse porque sí, aduciendo que la esquierda tien afán recaudatoriu, anque cuásique toa Europa, gobernada pola drecha, tien aprobada la tasa turística. Porembargu, teo lleyío a Queipo qu'el PP plantega una bolsa de financiación pa los conceyos turísticos, lo que llevaría a otra complicación: un conceyu turísticu, ¿ye'l que tien munchos visitantes, munches segundes residencies, munchos pisos turísticos...? Esa ye una mala solución dende'l puntu vista fiscal porque, pa evitar una tasa a los visitantes, que ye, polo visto, afán recaudatoriu, lo que se propón ye un fondu que, evidentemente, saldrá de los bolsos de los asturianos, tanto de los que van a Llanes o a Somiedu como de los que queden en casa n'Avilés o Sotrondio. Oseya, que deterioren los espacios y sobrocarguen los servicios los turistes y dalgunos asturianos y paguen por ello tolos asturianos pero non los turistes. Nun tien xacíu dengún. Lo de la patronal hostelera, anque seya una posición interesada, tien cierta racionalidá. Argumenta que la tasa turística pretende, especialmente, compensar la fuelga ambiental, una fuelga non sólo atribuyible al turismu nin, en concreto, a la hostelería. Y tienen los empresarios del seutor bona parte de razón. Pero ye que nun ye lo mesmo una tasa turística qu'una ecotasa, diferencia qu'el gobiernu asturianu paez nun conocer. La ecotasa ye una tasa finalista de caráuter medioambiental y la tasa turística ta empobinada a reforzar los servicios públicos en xeneral, diferencia de la que namás que falara na Xunta Xeneral Covadonga Tomé, la diputada de Podemos. Polo que respeuta a quién aplica la tasa, el gobiernu opta polos ayuntamientos, mientres qu'el sociu Izquierda Unida, seguramente el grupu que más afina nel asuntu, opta por una tasa autonómica, nel envís d'evitar competencies absurdes ente conceyos.

A.F.: ¿Cómo lo faen los nuesos vecinos d'Europa?

D.M.R.: De formes mui diferentes. En Francia y en Portugal les competencies tiénenles los ayuntamientos. Pela so parte, los países que centralicen la xestión dan soluciones estremaes: n'Italia tienen cuotes cada dos díes d'estancia, nel Reinu Uníu impiden al turista tar más de 90 díes al añu nel so tarrentoriu, en Grecia vinculen la tasa al IVA... Caro que ningún d'estos estaos tienen una cadarma política como la española. Amás la cosa nun ye d'agora, sinón que la polémica entamó hai más de venticincu años, cuando l'alcalde de Gozón plantegó que nun podía mantener el coste de les playes del conceyu. Siguió Muros, un conceyu pequeñu con una playa, Aguilar, que ye la más concurría por xente de Pravia y Grau, y más tarde Villaviciosa, qu'alfontaba, entóncenes, un coste de 200.000 euros pa tener curiosa la sablera de Rodiles. Y equí nun falamos de turismu estriutamente, sinón d'asturianos d'otros conceyos, mui especialmente nel casu d'Aguilar. El turismu interior nun incide no cultural pero sí no ambiental y nos servicios públicos. Les coses nun se resolvieron daquella pero permitiérase cobrar por aparcar, que nun ye una solución, pero sí un alliviu pa les arques municipales.

A.F.: ¿Y cuála ye la solución?

D.M.R.: Puede haber soluciones distintes, toles colos sos virtúes y defeutos, pero, básicamente, hai qu'entamar por dalgo ellemental: estudiar ya investigar. Hai decenes de métodos pa calcular la capacidá de carga d'un espaciu, un conceutu emplegáu dende hai más d'un sieglu y perfeicionáu constantemente. Una playa, un pueblu, una viesca, tienen una capacidá llimitada de soportar impautos antrópicos, y calculala ye la base de cualisquier política sensata. Pero equí, non namás que n'Asturies, opina tol mundiu menos los científicos. Por eso vamos siempres a güelpes d'ocurrencia y con debates ensín fundamentu dengún. ¿Vusté creye que la presión sobro Gulpiyuri resuélvese con tases y precios? Non, nesi casu namás que sirve la llimitación y la prohibición.    

A.F.: Y vusté, profesor Rivas, ¿qué prefier en cuanto a competencies?

D.M.R.: Hai un problema de base y que ye ún de los principales dende la transición: la financiación municipal. Ye necesario, y con urxencia, engromecer los ingresos de los conceyos, especialmente pa que nun dependan de les llicencies d'obra y de les tases. Ye necesaria una nueva llei de bases de réxime llocal o promulgar una nuea concretamente sobro financiación. Dempués de dicir esto, pienso que ye meyor una tasa autonómica, que tamién tien les sos disfunciones, pero muncho menores que les que diba traer la municipalización. Per otra parte, tamién hai otres soluciones pa determinaos espacios. N'España l'accesu a los parques ye gratuitu por llei pero hai soluciones intelixentes y que naide refugara nunca, como la de Timanfaya. Nel parque de Llanzarote ye obligao dir nun autobús que percuerre tol espaciu, un autobús de pagu, de poco pagu, un preciu políticu que nun ye disuasoriu. Fae un percorríu pel parque y, al final, para nun sitiu onde se puede comer, faer paseos llargos, durmir la siesta o tomar el sol. ¿Por qué n'Asturies debemos entregar tolos espacios al usu indiscrimináu? Convendría recordar que los ciudadanos tenemos drechu al accesu pero nada dicen les lleis de poder acceder como mos dea pola gana. Yo teo una fonte mui bona a un cuartu d'hora de casa pero podría facelo na tercera parte d'esi tiempu, eso sí, atravesando el práu d'un vecín. Teo tol drechu'l mundiu a dir a la fonte, pero toi obligáu a dir pel camín de pasu común. Pues ye lo mesmo.

A.F.: El turismu, entós, ruempe les estructures sociales.

D.M.R.: Sí, esi ye un riesgu grande, pero que puede evitase si l'alministración ta atenta. Pero equí namás qu'interesen el númberu de pernoctaciones, que cada añu venga más xente, l'aportación al PIB, ensín restar lo que Samuelson llamara malestar económicu y Myrdal subdesenrrollu brutu. Por eso da lo mesmo que seyamos el destín de media España de dispidía de solteros, un turismu chabacanu, sexista, alcohólicu y de baxu coste. El casu ye sumar. O los cruceros. Los cruceros son la forma de viaxar más contaminante, más sucia y que menos renta dexa. Hai unes selmanes llegara un cruceru a El Musel y, como yo conozo'l percal, miré los folletos. Yera pensión completa: almorzaben, comíen y cenaben nel barcu. En Xixón pasearon, compraríen una camiseta, enllenaron les papeleres de botes de cerveza y marcharon, dexando una fuelga de deterioru ambiental encomparable a diez mil coches nuna autovía.

A.F.: Hai una perceición cada vegada más xeneralizada de qu'el turismu amenaza los centros de les ciudaes. ¿Puede afirmase eso nel casu d'Asturies?

D.M.R.: Puede afirmase eso naquellos sitios onde ye posible un turismu masivu, non, evidentemente, na xeneralidá d'Asturies. Hai barrios como Cimavilla, en Xixón, onde los pisos turísticos tan echando a los vecinos porque nun pueden afrontar l'alza de precios. A un tiempu, nel centru de les villes turístiques empieces a nun ver panaderíes o fruteríes, nun digamos yá ferreteríes o llibreríes. Tolos llocales acaben siendo restoranes o tiendes orientaes esclusivamente al turismu. Y la cai Uría podría tar en Barcelona, Milán o París: son les mesmes franquicies, los mesmos zapatos, les mesmes camises, les mesmes hamburgueses... De les ciudaes que conozo, y conozo bastantes, namás que Llondres caltién rasgos de la ciudá que fue, por exemplu coles xastreríes clásiques de Westminster, prohibitives pa la mayor parte de los mortales, y que resisten por una clientela pequeña pero mui acaudalada.   

A.F.: El profesor Rivas vive, dende hai décades, nuna aldea de Villaviciosa. ¿Ellí nótase'l turismu?

D.M.R.: Na mio parroquia non. Tenemos dos cases rurales pequeñes en tola valle alta l'España y nun hai confliutos. Tamos na costa pero non a cincu minutos andando de la playa. Pero conozo munchos casos de desarticulación social. Yo trabayé nos primeros estudios de l'ampliación del Parque de Cuadonga a Parque de Los Picos d'Europa y tamién nos del Parque de Somiedu, col mio compañeru Xosé Alba, de la Universidá d'Uviéu. Pues diéronse, especialmente en Somiedu, graves confliutos d'usu. Una cuadra o una tenada yeren edificios bonos pal turismu. Dalgún propietariu pudo ganar bastante vendiendo pero la mayoría, arrendatarios o comuñeros, tuvieron que dexar la ganadería o facer una cuadra lloñe de la so casería. El turismu franciera la estructura social. Ye lo del chiste: una inmobiliaria compra una viesca de carbayos, corta quinientos árboles, construi cincuenta xalés y llama a aquello Urbanización La Carbayera. 

A.F.: Vamos cambiar d'asuntu y dir al impautu'l turismu sobro la vivienda. Los pisos turísticos tan incidiendo nel mercáu de la vivienda, con una ellevación descomanada de los precios.

D.M.R.: Yo eso nun lo teo tan claro. Sacantes de dalgunos puntos mui concretos pienso qu'el pisu turísticu nun ye'l motivu direutu más importante del crecimientu de los precios y de los alquileres. Podemos poner dos exemplos. En Barcelona subieron los precios de la vivienda nun 70 por cientu nos últimos cincu años, pero en Cuenca subieron un 60, práuticamente lo mesmo. El problema ye que nun hai oferta y, especialmente, de vivienda pública. Otra cosa ye qu'el turismu desplaza a la población de los barrios centrales de les ciudaes. Pero ye otra cosa, grave, pero otra cosa. Hai yá barrios del centru históricu onde nun queden tiendes, onde nun hai panadería nin frutería, onde nun hai nin chigres de los de siempres porque tóo son bares mui puestos orientaos al turismu. Los vecinos son espulsaos o conviértense en monos de feria pa los turistes. Cualisquier que conoza la Cimavilla de Xixón dende siempres, como ye'l mio casu, velo ensín muncho cavilar: ta desapaeciendo la cadarma social. Yo viviera en Lavapiés, en Madrid, cuatru-cincu menses al añu durante trenta y tantos, precisamente na cai principal, la que güei ta fotografiada en periódicos y redes, y viviera'l procesu. En tola cai, que tien un establecimientu en cada edificiu, queda una carnicería. Y sólo queda un bar, lleváu concretamente por una familia portuguesa, onde la xente del barriu puede ver los partíos de la Copa d'Europa, tomar un café con churros pola mañana, les muyeres mayores facer tertulia col xocolate... Hai diez años había floristería, frutería, panadería, bodega, llibrería-papelería, tres bares con menú del día... Ye tarrecible. Tuve hai unos menses y diérame dolor de corazón. Tóo son bares pensaos pa turistes y pjiprogres, los de la multiculturalidá. Munches cultures: los inmigrantes nun bancu col tetrabrik y los caucásicos col gintonic a diez o doce euros na terracina.

A.F.: Entós, ¿ónde ta'l problema?

D.M.R.: Na falta de vivienda pública. Esi ye'l problema de verdá. Y mui especialmente l'ausencia de vivienda pública n'alquiler. Tamién ye un gran problema la perversión de lo público: tu alquiles un pisu al ayuntamientu y, de repente, la propiedá ye de un fondu d'inversión porque l'alcaldía vendió los edificios, pasando de pagar un alquiler de 1 a pagalu de 10. Eso fue lo que pasó en Madrid embaxo'l mandatu d'Ana Botella. Yo conozo bastante bien la estructura económica de Madrid, que, dicho seya de pasu, ye una economía de pandereta, una economía de mentira que namás progresa pol hipercentralismu que sigue teniendo esti reinu.

A.F.: Hai una gran controversia sobro les midíes sobro vivienda destinaes a facer más complicao los desahucios o les rescisiones de los contratos d'alquiler por impagos.

D.M.R.: Ye mui llóxico qu'haiga controversia. Dalgunes vegaes les polítiques teóricamente progresistes devienen en tolo contrario porque tan plantegaes ensín facer un analís fonderu de les custiones y, frecuentemente, nun cortoplacismu apegáu a los ciclos elleitoriales. Hai unos años, gobernando Rodríguez Zapatero, plantegárase dar una subvención a los mozos pa que pudieran emancipase. Yo entrugué a los mios alumnos que qué-ys paecía, particularmente porque diben tar nesa situación en dos o tres años. Como ye lo llóxico, cuásique tóos taben d'alcuerdu cola midía. Pero despliqué-ys que n'economía les coses nun se miren asina. Nun abasta con saber cuálos son los capítulos de gastu públicu, sinón que ye mester saber d'aú salen los ingresos públicos. Si pa qu'el so fíu, Fonseca, tenga facilidaes pa una vivienda me suben a min l'IRPF, cuando la mio renta ye del trabayu, y pa que la mio fía se beneficie de lo mesmo-y lo quiten a vusté, que tamién vive del so trabayu, pa eso yá-y lo doi yo a la neña y vusté al neñu. Otra cosa ye qu'el gastu esi saliera de les grandes rentes o del impuestu sociedaes de les empreses del Ibex-35.

A.F.: Porque si non ye cambiar les perres de manes ente la mesma clas social.

D.M.R.: ¡Caro! Son los trabayadores los que se subvencionen unos a otros. Y cola vivienda pasa lo mesmo: apliquen el mesmu criteriu a un fondu d'inversión o a un bancu, propietarios de cientos o miles de pisos, qu'al que tien el pisu de la güela que-y da un complementu de renta. El que tien un pisu p'alquilar tien miéu a que la familia inquilina seya declarada vulnerable y nun tea forma de resolver les coses, acabando con más gastos qu'ingresos durante años. Eso lleva a la retirada de pisos del mercáu, a pedir garantíes adicionales, a nun fiase de ciertu tipu d'arrendatarios, lo que sube los precios y dexa al debalu a xente de renta baxa, a inmigrantes, a families con neños pequeños. Yá hai quien nun permite por contratu perros o gatos porque contabilicen nes ratios de vulnerabilidá pola llei de bientar animal. 

A.F.: Eso lleva a aumentar la crisis de la vivienda.

D.M.R.: Evidentemente. Hai una másima n'economía que mos diz que la vivienda, l'alquiler o la cuota hipotecaria por compra, nun debería tar perriba'l trenta por cientu la renta. Pues agora la vivienda lleva un setenta o un ochenta por cientu. Col nivel salarial que tenemos, eso lleva a munchos trabayadores, trabayadores llegales, que coticen a la seguridá social, que paguen impuestos, al umbral de la probetú o más allá del umbral. ¿Qué puede facer una parexa con un neñu con 1.500 euros d'ingresu cuando paga pola vivienda 900 o 1.000? ¡Pero hai rentes llaborales de 700 euros!

A.F.: Pero, que vamos terminando, qu'el tiempu na radio ye mui axustáu, con esto'l turismu, ¿tamos tovía a tiempu n'Asturies?

D.M.R.: ¡Home!, pienso que sí. Pero la solución nun ye la del gobiernu o los ayuntamientos, esa de que nun hai tensión turística. ¿Vamos esperar a que seya irreversible lo de Xixón, Ribeseya, Llanes, Cangues d'Onís, Tapia...? Porque siempres podremos dicir que nun hai problemes porque en 45 conceyos de los 57 nun hai problemes. Tampoco n'El Nataoyo, en Ciares o en Contrueces tienen problemes d'estos. Na mayor parte Xixón viven al marxe de la marabunta turística. Lo mesmo qu'en Barcelona tan en situación crítica y en Pedralbes nun lo noten. Lo que tienen que facer los ayuntamientos y'l gobiernu asturianu ye ponese a ello. Hai munches coses que se pueden facer pa resolver o, como poco, minimizar los problemes que tan apaeciendo y que conocemos bien pola esperiencia d'otros llugares.   

A.F.: Seguiremos otru día falando col profesor David Rivas d'eses polítiques que se pueden siguir. Munches gracies, amigu.