Discursu del Congresu Nacional de Repunantes
Amigues, amigos y repunantes tóos:
Volvemos a aconceyar en congresu dempués d'un tiempu un tanto de paralís motivao pola inercia de la dómina la covid y la llenta recuperación de la vida cuotidiana. Pero equí tamos otra vuelta, güei nesta reunión en L'Infiestu. Aprovecho pa dar les gracies a los nuesos anfitriones del conceyu de Piloña pol so recibimientu.Y tamos de vuelta porque la repunancia patria necesita una renovación y un impulsu, puesto que les condiciones socioambientales, nun ye que cambiaran a bien, sinón que les coses pónense peor cada día que pasa, faciendo más necesaria entá l'aición de los repunantes.
Esti añu ta resultando ser una movilización, un pequeñu trunfu, d'eses posiciones repunantes, especialmente como rempuesta al turismu creciente que mos ta llegando. El turismu ye importante y va seguir siéndolo, y munchos viven d'ello, non namás que los empresarios o trabayadores direutamente implicaos. Oponese visceralmente al fenómenu ye inútile, sacantes que tolos asturianos, xunto con otros pueblos, decidan nun viaxar a dengún sitiu cuando nun seya necesario. A lo meyor sería mester siguir el conseyu de Baroja: "a partir d'una edá nun debemos viaxar a dengún lláu del que nun podamos volver andando". Garrar un avión y dir a Venecia y lluéu quexase de que nun se puede caminar peles cais nin navegar pelos canales nun ye propio de repunantes, sinos de maltomaos y refalfiaos, que ye cosa diferente. Pero lo que sí podemos facer y debemos desixir ye facer un turismu respetuosu y non otru avasallador, evitando llugares que se visiten muncho meyor a traviés de la realidá virtual.
A un tiempu, y eso ye lo más importante, hai qu'oponese al turismu dominante nes cais y caleyes asturianes: el turismu maleducáu y faltón. Seguramente qu'estos bederres, normalmente sudmesetarios, son minoría, pero, dende lluéu son los más visibles y los que provoquen la sensación, a vegaes mui real na so materialidá, de que tamos siendo ocupaos pola barbarie posmoderna de Borjamari IV, de Cuca III o de Cayetano I.
Lo qu'ata hai un par d'años, igual tamién a causa de la pandemia, yera anéudota que facía gracia ye agora comportamientu xeneralizáu de persones, por decir dalgo, que piensen que vienen de la contemporaneidá y que, al pasar el cordal, entren nuna tierra de bonos salvaxes ente los qu'entá se prautica l'esclavismu y onde los bwana son ellos. El maltratu, los malos usos, el vocerío, el despreciu, cuando non l'autitú represora, sobro los fechos culturales y, especialmente, la llingua, tan al orde'l día. ¡Colo fácile que ye nun visitar llugares que tean una llingua propia y nun dir a onde nun aguantes la so música o nun quies beber y comer lo que beben y comen los indíxenes!
Tóos sabemos de situaciones y cada día apaez un sucesu más increyible qu'el del día anterior: quexes porque los bufones de Pría tan apagaos, pisar los praos y comer la fruta de los árboles, marchar con un corderu porque ta abandonáu, tar de turismu rural y protestar porque canten los pitos, caguen les vaques o metan ruíu les motosierres o les campanes. Espero qu'un día sepamos de qu'un ayandés, por falar d'un conceyu cualisquiera, desixa a la direición del hotel na Gran Vía madrilana o na Rambla barcelonesa que les ambulancies circulen en silenciu y que les faroles tean apagaes a partir de les doce de la nueche, porque nun tien por qué aguantar les molesties urbanes.
Lo de los chigres yá ye pa nota, como sabemos por desobra. Tanto qu'un hosteleru que seguramente tóos nosotros conocemos, collaborador d'esti congresu, llegó a facer un cartelu que más lluéu nun colgó por un sabiu conseyu, onde se lleyía: "n'Asturies cómese abundante, pero un platu nun da pa siete".
Voi quedame colo último de lo que supe, de lo que nun falé ata que nun lo viera na prensa serio unos díes dempués de la primer publicación nuna rede social, porque nun podía creyelo. Tamos nuna pescadería y una muyer empobínase a la pescadera y señala a un pexe. "-¿A cómo ta'l besugu? -Eso nun ye besugu. -¿Va decime vusté lo que ye un besugu? -Señora, eso ye un rodaballu. -Pues en Madrid llamámoslu besugu".
Tóo esto provién de la inorancia pero, evidentemente, nuna suma esplosiva con prepotencia, mala educación y supremacismu. Frente a tóo eso, lo que llamen turismofobia, dalgo inesistente, namás que ye una serie de xeitos d'autodefensa.
Pero la repunancia debe orientase particularmente a poner en solfa la publicidá turística oficial. Ye imposible torgar que cada vuelta vengan más visitantes con esos perfiles cuando les campañes gubernamentales, nun falo de les privaes, son les que son. Cualesquiera que siga l'asuntu en Madrid o Barcelona, principales places nes qu'el nuesu gobiernu busca demanda, dase cuenta al momentu. Como siempres, Asturies ye naturaleza, edificios, playes, pero ensín xente. Recuérdome d'aquella frase de los uvieínos d'hai cincuenta años: "¡qué guapo sería l'aldea ensín aldeanos!". Como muncho, salen les piragües d'El Seya, pero, caro, son deportistes de mediu mundiu. Eso por nun decir que nunca llueve nin hai ñebla: Asturies ye un parayisu natural y soleyeru. ¡Y dempués viénenmos cola matraca de la desestacionalización!
Lo importante ye que venga muncho xente, nun importando cómo, nin pa qué nin de qué tipu. Lleguen cruceros, una de les formes más sucies de viaxar, con tóo incluyío. Los cruceristes ocupen los espacios, usen los servicios pero nun faen denguna xanta: a lo sumo tomen un refrescu, comen un xeláu o merquen una imán pa la nevera. Pero, eso ye lo importante, sumen y sumen. Eso sí, hai que facer y conservar infraestructures portuaries. Sí qu'hai un turismu dalgo más desestacionalizáu, presente ente marzu y ochobre: les dispidíes de solteru. En Xixón un vienres o un sábadu puedes atopar cincu dispidíes ente Cimavilla y El Parchís. Pero'l casu ye sumar, por mui chabacanu, sexista y casposu que seya esi turismu. L'otru día la esquierda municipal de Xixón denunciaba que la villa taba convirtiéndose nun centru d'atraición fascista, con un llugar emblemáticu como'l monumentu franquista del colexu de La Inmaculada. Nun tuvo finu'l gobiernu municipal. Podría argumentar qu'eso ye bono porque mueve un tipu turismu que nun alcuentra muncha oferta y que Xixón diba asegurase ingresos y... ambientín nes cais.
Tamién tenemos la gastronomía. La publicidá oficial y empresarial, les dos, contribuyen a la esaltación de la tontería. Una anéudota real: una familia de turistes quiere comer un cachopu y, ¿cuála fue la entruga qué ficiera?, pues que cuánto midía. ¡Normal! "Equí un cachopu de mediu metru", "el cachopu más grande'l mundiu", "prebe'l cachopu triple de cincu kilos". Asturies ye calidá... A un tiempu, tenemos concursos sobro'l meyor cabrales del mundiu, que raro sería que se criara en Murcia; la meyor fabada'l mundiu, que raro sería que se ficiera en Cracovia; como si fuera esa taza qu'el neñu-y regala a la madre con aquello de "pa la meyor mamá'l mundiu", lo que ye normal porque sólo tien una. Paez ser que Xixón nun pudo batir el record mundial d'escanciadores porque quedó a 893 participantes del record de 2022, que tamién lu tién Xixón, cuando batiera'l record de 2021, que tamién lu tenía Xixón. En 2023 nun batiera Xixón el récod de Xixón de 2022, pero como namás qu'esa preba faese en Xixón, resulta que Xixón volviera ser ganador d'esi campionatu mundial. Y teo entendío que l'ochu setiembre van nomar a la meyor delegada'l gobiernu'l mundiu y al más grande arquiobispu de la historia.
Y suma y sigue. Cada vuelta qu'una alministración decide iguar, nun digamos yá restaurar, un monesteriu, un molín, unos cuantos horros, la primer argumentación ye qu'eso va ser bono pal turismu y que va poner el llugar nel mapa, como si los vecinos nun supieran ónde tan nel mapa. Podría dalguien decir que la restauración contribui a dignificar la sociedá, valorizar la historia, dar emplegu llocal y, de pasu, podría ser un recursu turísticu. Pero difícilemente alcontraremos ente nosotros a tres políticos capaces de pensar asina. Si Asturies fora Sodoma y Gomorra tamién diba desapaecer embaxo'l fuéu de Dios, porque difílimente alcontraríamos un políticu, nun sé si xustu, pero, dende lluéu, sensatu.
Un casu que conozo de primera manu. Hai unos menses vinieron a la valle l'España los Borbón Ortiz pa poner unes plaques de bronce declarando pueblos exemplares a les parroquies d'Arroes, Pion y Candanal. Unos díes enantes hebo una asamblea de vecinos y caún entrugó lo que quiso. Dando desplicaciones y rempuestes, taba un conceyal socialista del gobiernu municipal y un conceyal popular que lo fue hai un tiempu. Nun momentu, el socialista dixo que lo importante nun yera'l fin de selmana nel que diben venir los reis y les sos fíes, sinón lo que diba entamar a partir del llunes. ¿Y cuála fue l'argumentación?: el turismu y ponese nel mapa. Eso nun pasara en dengún pueblu exemplar, y van bastantes, pero, en fin... ¿qué diben decir?, ¿que los premios ye propaganda pa los borbones a costa nuestra y non lo contrario? Pues tres menses dempués yá se ve l'impautu de la visita: proyeutu pa poner un depósitu de bateríes, oseya, residuos, en Pion, o n'Arroes, o nes parroquies vecines de Quintueles o Castiellu.
Pa terminar, queda la sistemática humillación de la nuesa cultura y les nueses tradiciones, nun respetando nin la toponimia que ye oficial y que ye la verdadera, la qu'empleguen los que son d'equí y non la qu'inventaron nuna cancillería vallisoletana o madrilana. Feries d'abril, rocíos, oktoberfest, carnavales, sanpatricios, halloween... Y falseamientu de la historia o, direutamente, mentir, como si nun tuviéramos historia abondo pa cellebrar unos cuantos díes. Un exemplu: a la patochada de Carlos de Gante en Tazones yá se sumen fiestuquis en Villaviciosa, na capital, onde esti añu yá se faló de la primer corte de Carlos I, cuando'l flamencu nin yera rei nin lu fuera ata bastantes años dempués. ¡Home!, si por corte entendemos un sinónimu de cuadra, términu mui propiu del occidente y emeplegáu particularmente pa los gochos, igual la cosa...
Con esto termino. Ye'l primer discursu como Presidente Soberanu del Conceyu de Repunantes que ye monográficu, pero ye que, aparte de que tamos nel mediu la discusión, toi particularmente encabronáu. Pero que tean tranquilos, que pel momentu nun vamos plantegar l'asaltu a los cruceros, anque a lo meyor díbamos pasalo bien y, entóncenes sí, entóncenes pondríamos nel mapa.
Nesti día'l congresu de repunantes cellebramos a santa Gaudencia, patrona de los que traen gayola, como los llagareros, Rodrigo Cuevas y'l ministru de tresportes; a santa Tecla, patrona de los pianistes y los mecanógrafos; a San Bonifacio, un paisanu con cara bona persona y que, por eso, nun ta nel Facebook; y a San Palmaquio, santu mentor de los equipos de fúbol asturianos.
Más nada.
¡Puxa la repunancia!
¡Puxa Asturies!
