"La espada d'Arturo ye la 'ex calce liberatus', Excalibur"

Monchi Álvarez: Saludamos agora la visita d'otru bon amigu del programa que ye economista, ensayista y, sobro tóo, humanista, y figura emblemática del país astur. Y mui amigu'l programa, qu'esto hai que decilo varies vegaes. David Rivas, bienllegáu otra vegada a La buena tarde.

David M. Rivas: Munches gracies, Monchi. Munches gracies, Cris.

Cris Puertas: Mui bones. Bienllegáu.

M.A.: ¿Cómo ta pasando, sufriendo o disfrutando David Rivas esti branu?

D.M.R.: Mui bien. Yo vivo n'una aldea a la qu'ellos nun suelen dir.

C.P.: ¡Hahaha...!

D.M.R.: Y nun voi a Xixón más que cincu o seyes díes en tol branu pa tomar el vermú o una botellina sidre con mio madre, que va camín de los 90 años. Pero ata mediaos de setiembre salgo de casa lo imprescindible. Y a Llanes, a Cuideiru o a Ribeseya nin borrachu. Y de playa, una pequeñina que nun voi dicir onde ta. Tamos diez o doce persones como muncho y tóos indíxenes.

M.A.: Tará siguiendo los xuegos olímpicos, vusté, que ta interesáu pol deporte, y que siguiera bien la Eurocopa, con esos inglesones perdiendo na final. Porque vusté tien querencia polos inglesones, eso nun lo va a ocultar agora. Igual ye pola so universidá, que tanta influyencia dexó na so forma de pensar ya investigar.  

D.M.R.: Nun ye querencia, anque hai más rellación personal, familiar. Soi anglófilu, ye verdá. Siempres lo fuera. Pero vusté, Álvarez, ye'l que más se mete comigo por eso. ¿Tuvo una moza inglesa que lu traumatizó? Yo, sacándome del Sporting, voi col que meyor xuega. Nesta Eurocopa fuera pa min evidente qu'España mereciera, con diferencia, la victoria. Los xuegos estos nun los sigo muncho. Procuro ver dalgunes coses, como la hípica, la esgrima, la ximnasia rítmica, dalgunes modalidaes d'atletismu, el boxéu, pero la mayoría abúrrenme muncho. Por exemplu, pa min ye incomprensible que dalguién tea cincu hores viendo un partíu de tenis.

M.A.: Y güei tráemos, como bon humanista y con querencia poles islles britániques, una historia enllena de ñeblina, de maxa, una historia que mos suena a tóos y ue tien que ver con una espada.

D.M.R.: Con Excalibur.

M.A.: ¡Con Excalibur! ¿Atención al misticismu, Excalibur! ¡Y Ricardo Corazón de Llión!

D.M.R.: Esta propuesta que-ys traigo, amigos Cris y Monchi, ye porque hai unes selmanes llegárame al móvile una nota llamativa: "Ricardo Corazón de Llíón vendiera Excalibur". Decía la nota que Ricardo I cambiara la espada por una flota pa, dende Sicilia, marchar a Tierra Santa no que yera la tercera cruzada. Púseme a buscar y llevome a un llibru mui interesante. Yo teo una mala opinión de Ricardo Corazón de Llíón. Paezme un home que llevó a la miseria a Inglaterra pa satisfacer la so megalomanía, aparte de ser un sanguinariu. Pa Ricardo lo más importante yera ceñir la corona de Francia.  Por eso yera'l fíu favoritu de la gran reina d'Europa, una muyer impresionante, Leonor d'Aquitania. Cuando tuvi delantre'l so sepulcru quedé paralizáu. 

M.A.: Ricardo yera un normandu.

D.M.R.: Sí. La primer reina inglesa qu'emplega l'inglés en público fue Isabel I, yá n'el sieglu XVI, pero la casa real inglesa falaba francés entesigo ata los cincuenta del de XX. De fechu, nel blasón de la monarquía británica reza'l llema de Ricardo Corazón de Llión: "Dieu et mon droit". Pa los reis d'Inglaterra los ingleses yeren unos patayos con docenes de dialeutos y ensín nación. Pero ehí taben los normandos pa civilizalos. Yeren como'l PP y'l PSOE d'Asturies y Gustavo Bueno de monarca illustráu.      

C.P.: ¡Hahaha...!

D.M.R.: El casu ye que tóo eso procede d'un llibru que nun ye mistéricu nin na llínia d'Iker Jiménez sinón d'un historiador bien seriu que ye especialista nel tiempu les cruzaes. Falo de Jonathan Phillips, que recupera una forma de ver les cruzaes como lo vía Runciman, con aquella gran obra de los sesenta o setenta que yo lleí con gran pasión cuando yera estudiante. Phillips cuenta que la espada d'Arturo, la llamada Excalibur, tiníala Ricardo Corazón de Llión. Phillips nun diz qu'esa espada fuera la d'Arturo, seyamos claros, sinón qu'eso dicía Ricardo I.

C.P.: Pero, lo primero, ¿d'aú llega esa espada?

D.M.R.: La espada yera la d'Arturo, el míticu rei britanu, non inglés, que son coses distintes. Nos documentos más antiguos nun apaez el nome de la espada y les lliendes son munches. Pero vamos facer una llinialidá pa poder entendemos. La tradición que lleva d'Arturo a Ricardo parte de la llienda de Gawain, que ye'l que fala de la espada na piedra. Taríamos falando d'una espada fraguada pol druida Merlín y que la espeta nuna roca pa que namás pueda sacala el que va unificar a los britanos y ser el so rei. Hai precedentes na mitoloxía. La tradición grecollatina fálamos d'un Hércules clavando un fierru nuna roca que namás qu'el mesmu Hércules podría sacar. Ye, polo tanto, una llienda presente yá nel helenismu. De fechu, hai autores que suponen qu'Arturo, o quien fuera'l personax, yera, realmente, de raigañu romanu. Yo nun voi pontificar, pero lo cierto ye qu'el mitu ye demasiao cristianu pa tratar d'un héroe celta. De fechu, la mesa reonda de Camelot recrea la que describe Xosé d'Arimatea como aquella de la última cena de Cristo.   

C.P.: ¿Y esi nome d'Excalibur?

D.M.R.: Hai munches teoríes pero la más aceutada ye la que mos fala del llatín ex calce liberatus, que ye lliberada de la piedra. Esi ex calce liberatus daría n'excalibur. Tóo esto vien de la narración de Robert de Boron.

M.A.: Hai munches versiones de tóo esto.

D.M.R.: Sí, pero hai un filu conductor común. Yo pienso qu'Arturo nun esistió, pero que seguramente hebo un rei, un conde, un príncipe, al que se-y atribueron cualidaes estraordinaries, un divus imperator.

C.P.: Vusté, profesor, ¿sabe llatín?

D.M.R.: Sí, bastante bien. De fechu, dedico un par d'hores a la selmana a lleer testos en llatín clásico. Ye una ximnasia mental qu'aconseyo. El llatín abre la mente y permite saber más y emplegar meyor la to propia llingua. Yo falo perbién castellán y asturiano, y deféndome razonablemente en portugués, y fáigolo meyor cada día gracies al llatín. Y en Francia, Italia, Rumanía..., el llatín ábreme puertes. Incluso n'Alemaña, yo nun falo alemán, el llatín aída a ún. Si nun sabes nada de llatín tampoco entenderás a Shakespeare.

M.A.: Sigamos con Excalibur.

D.M.R.: El casu ye qu'un Arturo muerribundiu manda a ún de los sos caballeros, Perceval o Lancelot sigún tradiciones distintes, que tire la so espada a un llagu. Esi yera un vieyu vezu de los celtes, el de tirar al augua pertenencies importantes del muertu, pa que los dioses lu llevaren a la pumarada eterna. Y entóncenes, nesa imax que conoz muncho xente, surde una manu de muyer envuelta en seda que garra la espada y devuélveila al caballeru. Esti home, Percival o Lancelot, va a Glanstonbury, onde tan interrando a Arturo, y pon-y la espada ente les manes.

C.P.: ¿Tuviera vusté en Glanstonbury?

D.M.R.: Sí, pero hai yá muncho. Podía falar maravíes, pero la realidá ye qu'impresiona poco. Nostante sí que ye un sitiu perguapu ya interesante. Sí que tuviera, como yá dixe, gran emoción delantre la tumba de Leonor d'Aquitania, la reina del grial y de los trovadores.

C.P.: Interesante.

D.M.R.: Y diera col llibru de Phillips. Esti historiador ye un gran especialista nes cruzaes y yá tien espublizaos unos cuantos llibros, siendo un gran espertu na tercera cruzada, la de Ricardo Corazón de Llión. Esti llibru títulase Holly wariors, que vendría ser Soldaos sagraos, Santos guerreros, Guerreros de Dios. Nesti llibru resume la historia de toles cruzaes, pero, fundamentalmente, analiza el mesmu conceutu de cruzada, polo qu'arrepara en custiones mui personales de los protagonistes, les sos circunstancies, el so caráuter, eses coses que menosprecien munches vegaes los historiadores materialistes. Siendo como ye un positivista inglés, esti Phillips avérasa a una historiografía un tanto francesa, la propia de los annales de Braudel y la so escuela. Y esa mezcolanza ye mui interesante. Yo lleyera d'esti autor la biografía de, pal mio caletre, un home estraordinariu na historia medieval y que condicionara los referentes simbólicos del nuesu oriente: Al-Násir Saláh ad-Din, "Saladino" pa nosotros. Y, Cris, nun me pregunte: nun sé árabe.

C.P.: ¿Y hebreo?

D.M.R.: Tampoco. Soi a lleelo a trompicones.

M.A.: Saladino, un personaje interesante.

D.M.R.: Que manda a los sos mélicos pa curar a Ricardo Corazón de Llión cuando taba amaláu d'unes fiebres. Los oficiales ingleses piensen que lu quieren envelenar pero Ricardo confía nel sultán. Los árabes taben muncho más avanzaos en ciencies naturales que los europeos. El casu ye que Ricardo sanó. Ehí ta la sencia de la caballería, mesmo cristiana que musulmana. La edá media nun ye tan escura como pensaron los illustraos.

M.A.: ¿Entra'l llibru neses coses?

D.M.R.: Nesta concretamente nun me recuerdo. Pero sí que ye d'esa llínia historiográfica de nun fialo tóo a la forma ser de los personaxes, pero tampoco a la rueda determinista económica. Esa ye la visión de la historia que yo comparto: nin tóo ye frutu de la xenialidá d'un home, nin tóo depende de les fanegues d'escanda y los kilómetros de vía férrea. Como-ys dicía enantes, Phillips sigue, más o menos, l'enfoque d'aquella estraordinaria obra de Runciman de los primeros setenta.

M.A.: ¿Siempres tuvo interés pola edá media?

D.M.R.: Sí, dende neñu, seguramente polos llibros que teníamos en casa. Mio padre, David, tenía una bona biblioteca de lliteratura ya historia medieval, anque él estudiara economía. Recomiendo a los oyentes interesaos que llean el llibru de Georges Duby Los tres ordes o l'imaxinariu'l feudalismu. ¡Sensacional! Nesti sen, Phillips fálamos de Ricardo I, Godofredo de Boullon, Saladino, Balián d'Ibelín, Pedro l'Ermitañu, Sibila, el rei lleprosu... Y afirma, con contundencia y pruebes, que la persona más importante del reinu llatinu de Xerusalén ye Melisenda, la reina Melisenda. Y fálamos de la peripecia de Tancredo de Tarento, sobrín del cruel Bohemundo de Tarento.

M.A.: ¡Bohemundo! ¡Qué nome!

D.M.R.: Son nomes que deberíen volver.

M.A.: Sí, sí. A min Bohemundo gústame.

D.M.R.: Meyor que Borjamari.

M.A.: ¡Ónde vamos a parar!

D.M.R.: Cuenta Phillips nel llibru que Tancredo de Tarento tenía graves problemes intestinales que-y prevocaben una diarrea crónica, que se cagaba cada dos por tes, vaya. Pues tando nel asediu a Xerusalén tuvo una necesidá imperiosa. Pa que nun-y vieran el culu entró a cagar nuna cueva y alcontró un depósitu enorme de vigues de madera, un material que les tropes cruzaes nun teníen. Con esa madera pudieron facer les torretes que-ys permitieran tomar la ciudá.

M.A.: Eso ye como'l dichu cubanu de que "lo que sucede conviene".

D.M.R.: La fracasada revolución ye mui pragmática. Tamién mos cuenta Phillips que, cuando los europeos tomen otra vuelta Xerusalén, yá na sesta cruzada, quien lo fae ye Federico II de Prusia, sacro emperador romanoxermánicu. Esti home, últimu rei cristianu de Xerusalén, taba escomulgáu pol papa dende un añu enantes, por herexía y desobediencia, cosa que yo nun sabía. Paez ser que nun consideraba sagráu l'antigu testamentu y que Cristo nun yera herederu de la llei mosaica. Por cierto, si eso ye verdá, yo pienso lo mesmo que Federico Hohenstaufen.

M.A.: Pero escomulgáu y tóo, él fue a tomar Xerusalén.

D.M.R.: Sí. Asina yeran aquellos puntos. Esti Federico yera ñetu de Federico I, Barbarroxa.

C.P.: ¡Otru personax!

D.M.R.: Y equí ye onde entama esa historia que me llamara l'atencion. Sigún dalgunos biógrafos de Ricardo Corazón de Llíón, los monxos de Glanstonbury saquen de la tumba d'Arturo la so espada y entréguenla al rei d'Inglaterra, a Ricardo de Plantagenet. El rei, un gran aventureru pero tamién un gran estratega y un home mui prágmáticu, decide dar la espada a Tancredo de Lecce, d'aquella gobernador de Sicilia, a cambio de cuatru grandes barcos de tresporte y quince galeres, lo que yera una considerable flota, pa desembarcar en Tierra Santa.

M.A.: ¡Vaya!, que fizo negociu cola espada.

D.M.R.: ¿Vusté ye a maxinar lo que yera pa un noble altomedieval tener la espada d'Arturo, tener Excalibur?

M.A.: ¡Qué negociante don Ricardo!

D.M.R.: Yá intentó vender Llondres pa financiar la so cruzada pero nun tuvo comprador.

M.A.: Tiempu dempués fízolo Margaret Thatcher. Vendió Llondres entero.

D.M.R.: Vendiera más Cardiff, Manchester y Liverpool.

M.A.: Vendió toa Inglaterra.

D.M.R.: Pero, volviendo al asuntu, Ricardo I tenía otres tres excalibur.

M.A.: Por si acasu, pa facer más negociu.

D.M.R.: Esto ye llamadero. Que la espada d'Arturo esistiera ye complicao. Incluso qu'Arturo seya un home de verdá tamién ye más que discutible. Pero, anque hubiere una Excalibur, paez ser que Corazón de Llión tenía cuatru. 

M.A.: Dalgo asemeyáo pasó cola Tizona d'El Cid n'España. Vendieron una supuesta Tizona y lluéu viérase que yera falsa.

D.M.R.: Paez ser que la espada de la catedral de Burgos nun ye la verdadera, puede que seya la que ta nel muséu del exércitu en Madrid, dicen qu'hai otra n'Andalucía y otra en Cataluña... En Sotrondio nun hai denguna, eso sí. Puede que Tizona nin yera la espada d'El Cid, anque ye probable que sí que falemos de dalgo real. Por frente a les lliendes centroeuropées y britániques, les castellanes son más reales. El cantar d'El Cid, a la contra del de Roldán o del d'Arturo, ye mui contemporániu a la vida'l personax, ye como una crónica periodística de la dómina. Les histories de Rodrigo de Vivar son reales, quitando les apaiciones de santos, san Llázaro, por exemplu, o tonteríes como lo de la carbayera de Corpes. Oseya, que los mitos de Tizona y Colada, les dos espades del fidalgu castellán, pueden tener base. Por cierto, yo, que nun soi precisamente sospechosu d'españolismu, pienso que ye muncho más interesante la edá media de la península ibérica que la de Francia o les islles britániques.

C.P.: El negociu ye cosa de siempres, pasando perriba de la historia o de lo que seya.

D.M.R.: Evidentemente. Pero, siguiendo col llibru de Phillips, ye mui interesante tolo rellativo al conceutu de cruzada y non namás qu'al rellatu de la tercera, que ye lo central. Asina que mos fala de la cruzada contra los cátaros, la cruzada de los neños, les cruzaes báltiques o la última gran cruzada que fue la conquista de Granada por Sabel de Castiella y Fernando d'Aragón. Tamién ye mui interesante la parte na que mos fala del conceutu de cruzada na historia de más recién. Fala de Walter Scott, el gran novelista neorrománticu que saca del sepulcru a Ricardo, Ivanhoe, Robin Hood y otros. Tamién mos remite Phillips al kaiser Gillermo II, al xeneral Allemby, a Gordon de Khartum, llevao al cine con un Charlton Heston sensacional... Incluso fala de Franco, del nuesu culón patescurties, por contraponer con Heston.

M.A.: ¿Franco?

D.M.R.: Sí, caro. La guerra que provocó el militar fascista fue declarada como cruzada por Pío XII, el papa nazi, l'ultimu papa emperador, que proclamó a Franco como princeps gratia Dei, dalgo nunca visto dende la edá media.

M.A.: ¡Qué matraca aquello de la cruzada!

D.M.R.: Y nel otru lláu, Phillips fálamos de Nasser, de Sadam Husein y de Bin Laden, tres homes que se vieron como la reencarnación de Saladino. Presta l'autor particular atención al binomiu Laden-Bush. Geroge W. Bush, el más tontu de los Bush, al anunciar la invasión d'Iraq, faló de cruzada, lo que nos países árabes y ente tolos musulmanes, árabes o non, fue perfeutamente entendío: una coalición d'estaos cristianos a la conquista de Tierra Santa. El taráu de Bush, cual papa, abriera la edá media nel sieglu XXI, acompangáu pol obispu Blair y'l molancín Aznar.

M.A.: Ta bien eso de recordar a Bin Laden, que fuera bon amigu de los Bush, como los talibanes afganos yeran alliaos d'Estaos Uníos.

D.M.R.: Paezme que dientro de cincuenta años los historiadores darán bona cuenta d'esta dómina, señalando que la política esterior estadouniense fue un desastre dende'l principiu. Hai un autor mui conservador, del que nun me recuerdo'l nome, que diz, con bastante criteriu, qu'Estaos Uníos ye un imperiu que nun sabe ser imperiu. Diz que los romanos, los españoles y los ingleses supieron ser imperiu, pero non los notiamericanos. Dominar el mundiu y nun saber qué ye'l mundiu produz estes aberraciones.

M.A.: Munches gracies, profesor Rivas.Ye vusté un de los habituales de los branos de la RPA. Y va volver, ¿verdá?

D.M.R.: ¡Sí, ho! Soi como lo de Madrid: "los veranos de la villa".

C.P.: Un abrazu.