"El modelu de financiamientu d'agora nun mos sirve"

Samuel Gradín: Mui bones, collacios y collacies. Tamos equí nun nuéu direutu d'Alderiques pa falar d'economía, d'un asuntu que ta mui presente estos díes como ye'l financiamientu de les comunidaes autónomes, dempués de los alcuerdos ente'l gobiernu central y los nacionalistes catalanes. Tamién falaremos del turismu, de les tases turístiques, esi debate que surdiera con gran fuerza nesti final de branu. Vamos falar de tóo ello col profesor David Rivas, de la Universidá Autónoma de Madrid. Yá ta xubiláu pero sigue tando na batalla cuotidiana, con artículos, intervenciones, autividaes de toa triba. Supongo que la mayoría de los oyentes sabe d'elli. Ye un referente na cultura y na política asturiana dende hai munchos años. Coneuta con nós dende la so casa n'Argañosu, l'aldea más alta del conceyu de Villaviciosa, anque a poco de la mar. La comunicación non siempres ye mui bona.

D.M.R.: Lo primero, bones tardes y gracies por convidame al programa. Sí que tenemos equí problemes de comunicación, especialmente en díes como güei, con bastante ñebla. Puede que marche la imax dacuando, pero la voz suel sentise polo xeneral. 

S.G.: Vusté ye profesor d'estructura económica, yá retiráu, y prestábamos falar d'un garrapiellu temes d'autulalidá.

D.M.R.: Soi profesor, sí, anque tea xubiláu. Los profesores nunca dexamos de selo. El que profesa adouta un votu pa tola vida. Asumimos un privilexu y una carga sagraos.

S.G.: Ta montáu un espolín col asuntu'l financiamientu, particularmente tres los alcuerdos de Pedro Sánchez con Esquerra Republicana de Catalunya y la votación del parllamentu asturianu contra esos pautos. A min dame la sensación de que recibimos información en pildorines pero ensín afondar na realidá. ¿Cómo lo ve vusté, profesor?

D.M.R.: De manu llámame l'atención qu'un parllamentu, la Xunta Xeneral nesti casu, tome una decisión sobro dalgo que desconoz. El pautu del PSOE y ERC nun lu conocemos realmente. Precisamente lo más censurable de toa esta situación ye que nun sabemos nada. Paez ser qu'hai un alcuerdu, pero más nada. Qu'un parllamentu vote contra, o lo mesmo si fuera a favor, de dalgo que nun conoz ye d'un ridículu soberanu. A min prestaríame entrugáis a los diputaos del PP, de Foro y de Vox qué fue lo que votaron. Bono, lo cierto ye que lo de Vox dame lo mesmo. Nun sabemos que firmaron PSOE y ERC. Yo puedo suponelo. Llevo munchos años nestos negociaos y la intuición furrula bastante bien, pero nada puedo afirmar, y muncho menos cuantificar los cambios financieros autonómicos. Facer otra cosa ye d'una frivolidá escomanada. Pero eso paez ser yá normal n'España, con xueces faciendo declaraciones contra la llei d'amnistía enantes de que tuviera redautáu'l proyeutu de llei. ¡Xueces!, que dicen basar les sos resoluciones en fechos contrastaos. La Xunta Xeneral fizo'l ridículu, anque nun ye nada raro pa una cámara que lo fae normalmente.

S.G.: Pero, ¿qué piensa vusté del financiamientu autonómicu?

D.M.R.; A min prestaríame facer dalgo de pedagoxía. La mayor parte de la so audiencia, paezme, ye bastante xoven.

S.G.: Sí.

D.M.R.: Supongo que la mayoría sabe de qué va esto de les automíes, pero igual nun sabe cómo y porqué se fixo l'estáu autonómicu nin, evidentemente, cómo se desendolcara'l modelu financiamientu, un modelu que lleva ensín revisase once años, va pa doce. La última vegada que tocaran l'asuntu fue con Rodríguez Zapatero y aquello fora un apañu pa salir del pasu. Lluéu llegara la recesión y Rajoy, especialista en nun facer nada, pues nun fizo nada. Eso fae qu'el modelu financieru autonómicu d'anguaño nun val pa Cataluña, pero tampoco pa La Rioxa, Baleares o Asturies. Tamos con un modelu financiamientu d'hai trenta años, cuando Cataluña representaba'l 20 por cientu'l PIB español y'l País Vascu'l 10, cuando agora son, respeutivamente y axustando estadísticamente, el 8 y'l 6, puede qu'el 10 y'l 8. La forma de calcular les aportaciones al PIB nun sigue una metodoloxía única. El casu ye que nos setenta, tres la muerte de Franco, había dos países, o naciones, da lo mesmo, que presionaben, con una burguesía belixerante. Por cierto, les dos burguesíes más fieles al franquismu de toles de les del reinu. El PNV y CIU plantegaron una autonomía pero namás que pa Euskadi y Cataluña. Pero la UCD, Suárez, por miéu a la involución, a los militares, tamos en 1977, alcuentra como solución lo de "café pa tóos", autonomíes a mamplén. Daquella namás qu'había autonomismu en Galicia y dalgo n'Asturies y Andalucía. Tamién taba Canaries, cola so peculiaridá insular y ultraperiférica. Pero quedaben les Castielles, un enorme oceánu mesetariu ensín identidá política: Llión, Castiella la Vieya, Castiella la Nueva... Les clases dominantes de les capitales pelearon y la vallisoletana impúsose a la burgalesa y a la llionesa, la llogroñesa y la santanderina. Los caciques de Valladolid consiguieron la so parte'l pastel. Más al sur, los terratenientes de Toledo y Ciudá Real sacaron a la roxa Madrid de la rexón. ¡Mira tu qué visión de futuru la de los caciques manchegos! Y les demás vinieran por pura simplicidá. Más tarde llegara lo de la financiación. Hai que recordar que nun había un sistema fiscal que mereciera esi nome ata cuando la reforma de Fuentes Quintana, profesor míu, enantes de la constitución, cuando los pautos de La Moncloa. Yo recuérdome d'ello mui bien. Taba en quintu d'economía y'l mio profesor d'economía rexonal na Complutense, un home estupendu del que fui compañeru dempués n'Autónoma, desplicábalo mui bien. Yera Laureano Lázaro y entós llevaba los asuntos de financiación autonómica como asesor parllamentariu del PCE. Fue ún de los meyores profesores que tuve. Ata teo una anéudota mui chunga. El desamen final d'economía rexonal fuera'l 7 de xunetu. Yera l'últimu de la carrera. Lázaro nun se presentó. Taba nel Congresu porque se discutía la Llei Orgánica de Financiación Autonómica y elli yera'l meyor téunicu que tinía'l grupu parllamentariu comunista. Armose la de coller na facultá. Güei entiendo mui bien a Laureano Lázaro: taben montando un estáu y doce estudiantes yera poca cosa. Desamineme oralmente unos díes dempués. Diérame sobrosaliente y recomendome a Manuel Castells pa llevame a Boloña, n'Emilia, onde'l PCI caltenía un urbanismu exemplar.

S.G.: ¡Qué historia!

D.M.R.: Sí. Toi abusando de la so lliberalidá contando cuentiquinos d'escañu. Pero lo que quiero amosar ye que conozo dende'l principiu cómo fuera lo del financiamientu autonómicu, que poco tuvo de racional y muncho de llucha d'intereses. La propuesta'l PCE, defendía por Ramón Tamames, otru bon profesor y amigu, saliera derrotada. Yera la más racional. por cierto, Yo nunca fui del PCE nin tuve simpatía pol comunismu, pero lo que ye, ye. L'estáu autonómicu llevantose como un edificiu ensí planos, a güelpe d'improvisación.

S.G.: Ye mui interesante tóo eso, porque lo cuenta, como se suel decir, ún que taba ellí.

D.M.R.: Sí, taba, pero como visitante. Yo nun participé en nada. Les diferencies económiques ente rexones, güei comunidaes autónomes, yeren tremendes. Si agora hai una distancia grande ente Estremaúra y Cataluña o ente Andalucía y Madrid, maxíne lo de finales de los setenta. Y tamién había descomanaes diferencies interiores nes comunidaes. Asturies yera, como provincia, la tercera potencia, dempués de Vizcaya y Barcelona, pero yera mui heteroxénia. Tol desendolcu, la renta, taba concentrao en Xixón, Avilés y les cuenques mineres, amás de n'Uviéu, una ciudá burocrárica y rentista. Los conceyos rurales taben, en bona midía, nun modelu d'agricultura tradicional, cuásique precapitalista. Galicia taba entá peor, sacantes l'entornu de la ría de Vigo. La única comunidá medianamente equilibrada naquel momentu yera la valenciana y tamién Navarra. Y'l modelu navarru furrulaba bien porque tinía un réxime foral, el que sigue teniendo. La carlistona y españolista Navarra nunca puso un duru a la facienda común. Yo viviera de neñu en Zaragoza y pasar col coche d'Aragón a Navarra yera cambiar d'una caleya a una autovía. Recuérdome d'ello mui bien. Falo de 1968 o 1969.

S.G.: Pero'l casu ye que nun se fala muncho, como vusté escribiera recientemente nun artículu, sobro los cupos vascu y navarru. Armose l'espolín colo de Cataluña, pero poco sabemos.

D.M.R.: El cupu navarru pasa desapercibíu porque Navarra ye poca cosa na economía española, pero'l País Vascu ye una comunidá que pesa muncho, menos qu'hai unes décades pero muncho. Equí tóo se tracamundia: el conciertu nun ye lo mesmo qu'el cupu. El conciertu ye la manera d'articular la rellaición de les dos faciendes, la vasca o la navarra y la común española. El cupu ye lo que se calcula pa decidir qué pon cada cual. Y esi cupu ye, como diría Hitchcock, un macguffin: naide sabe lo qué ta na maleta nin el papel que xuega. Naide conoz cómo se calcula. Nun esiste un polinomiu razonable, ye una caxa negra. Ye la cuenta la vieya. Podríamos tener diecisiete conciertos, una facienda confederal, pero non diciesiete cuentes de la vieya. Por eso'l PNV tién tantu miéu col asuntu catalán, porque igual tienen que poner enriba la mesa cómo se calculen les coses y se compensen les balances. Asturies podría perfeutamente dir a un modelu confederal, de conciertu, porque saldría bien parada por ser probe, pero tendría qu'apautar un cupu, lo que ye'l porcentax de retribución. Lo que ta en custión agora ye que nun sabemos cómo se calcula, si ye que se calcula, y en qué situación financiera quedaríen les comunidaes riques.

S.G.: Nun conocemos los datos reales.

D.M.R.: Non, ye un intríngulis que nun responde a dengún criteriu de racionalidá económica. Por eso'l PNV apoya oficialmente, por principios políticos, a ERC, pero la realidá ye que prestaríai que la cosa quedare en nada.

S.G.: Tamién mos falen, pel otru lláu, de la igualdá tarrentorial, pero resulta qu'Asturies, Castiella y Llión o Galicia, avieyaes, con población dispersa, con baxa población autiva, nun son lo mesmo que Madrid, Euskadi o Cataluña.

D.M.R.: Ye qu'eso de la igualdá, ¿qué significa? Porque resulta que los gobernantes enllenen la boca d'igualdá" pero, a un tiempu, de singularidá. ¿La igualdá significa que tenemos que pagar los mesmos impuestos? Sí, evidentemente. Pero yo vivo nun pueblu ensín saneamientu, ensín fibra óptica, ensín tresporte públicu, ensín escuela, pero pago colos mesmos tipos el IRPF qu'un ciudadanu d'Uviéu o de Zaragoza. Pues mester será apelar a la singularidá, individual, por contribuente, o a traviés de la financiación autonómica. O pago menos impuestos o teo más aída pública. Yo nun soi igual fiscalmente qu'un avilesín o qu'un valencianu. Pago lo mesmo qu'ellos y recibo munchos menos servicios. La igualdá ye qu'un paisanu, viva onde viva, tea facilidá pa dir a un ambulatoriu. Y eso requier que la financiación respuenda al coste por serviciu, al coste unitariu, que n'Asturies, Galicia, Llión o dalgunes islles ye más altu. Yo veolo pol mio mesmu casu: toi bien, puedo conducir, la mio muyer ye xoven... Pero en diez o quince años, ¿qué faigo si vienen mal daes? Pues o me lleven al centru salú o me traen el mélicu a casa. Y eso ye un coste, evidentemente, pero un coste que debería tar cubiertu, primero por xusticia, pero tamién pola mio contribución durante cuarenta años. Y'l mio casu nun ye de lo malo porque teo una bona renta, soi persona acomodada, pero esa nun ye la situación de la mayor parte los mios vecinos. Ehí ta l'asuntu: Andalucía, Madrid, Valencia, Murcia y Cataluña pretenden que lo que más pese nel polinomiu financieru seya la población absoluta.

S.G.: Agora tamos viendo cómo tan reorganizando n'Asturies les áries sanitaries, basculando pa Uviéu y Xixón tol centru y l'oriente, pa Avilés l'occidente, dexando Nalón, Xarriu, Cangas y Les Arriondes en mínimos.

D.M.R.: Sobro eso nun teo opinión. Nun conozo los pormenores nin sé gran cosa del modelu sanitariu. Nel doctoráu estudié economía de la salú, pero, anque me quedaron los rudimentos, teolo tóo mui lloñe. Pero sí que conozo un casu que ye de llibru. ¿Sabe vusté cuála ye la entidá finaniera más rentable d'Asturies?

S.G.: Non, evidentemente.

D.M.R.: La Caxa Rural. Y ye la que ta abriendo sucursales en pueblos pequeños cuando tolos bancos tan piesllándoles. Nun ye que tea un caxeru automáticu, que tamién lu tien, non. Ye que tien una oficina pequeña qu'abre dos o tres díes a la selmana. Eso permite a la xente mayor, con poca formación teunolóxica, que-y presta ver la cara al bancariu, poder facer operaciones. Eso ta llevando a que la xente ta pasando les perres a la Rural y sacándoles de les otres entidaes.

S.G.: Esi ye un problema grave nes zones rurales, les de dexar al debalu a la xente, ensín servicios, nin públicos nin privaos.

D.M.R.: Pero vamos volver a l'asuntu de la igualdá. Ye una aberración qu'el gobiernu andaluz rebaxe los impuestos a los ricos, como fizo, lo que supuso unos 900 miyones d'euros y al poco pida a l'alministración común mil miyones porque hai sequía. A un tiempu, mientres ciudaes y pueblos andaluces tienen restriciones d'augua potable, la comunidá tien tres de cada cuatru campos de golf del reinu. Eso ye, lliteralmente, robar, pero con apariencia de solidaridá. Andalucía sigue siendo una comunidá necesitada, evidentemente, y mester ye que reciba fondos, pero non con estos plantegos que rayen na tomadura pelu. Lo que nun ye de recibu ye qu'un ganaderu d'Ayande o un obreru de Móstoles paguen la rebaxa fiscal de los señoritingos de Marbella, Sotogrande o Guadalmina. Y esto nun ye demagoxa nin nada asemeyao, sinón un analís sensatu del modelu fiscal español. 

S.G.: Vusté conoz bien la economía de Madrid. Fue profesor ellí cuarenta años y, amás, tamién fue un tiempu téunicu nel ayuntamientu de la capital. ¿Ye verdá que Madrid fai un dumping fiscal y que vive del restu de les comunidaes? El nuesu presidente, Adrián Barbón, ta firme en nun rebaxar impuestos. ¿Cómo lo ve vusté?

D.M.R.: Yo nun coincido con Barbón en toles polítiques económiques que ta plantegando, pero sí no básico. Paezme que l'asuntu l'impuestu sucesiones ta sacáu de cualisquier racionalidá y pienso qu'el gobiernu tien razón. Naide normal sufre una sangría por esi impuestu, sacantes los qu'hereden deldes, que ye cosa mui diferente. Y los ricos de verdá nun hereden, sinón que tienen empreses y fundaciones. El de patrimoniu ye otra cosa. Paezme que ye, conceutuamente, xustu. Decíalo incluso Adam Smith, el padre del lliberalismu, pero ye discutible. Pero, al final, resulta poca cosa na estructura fiscal. Y polo que toca a lo político, a min paezme qu'el problema tienlu el Partido Popular. El PSOE sólo gobierna en dos comunidaes de facienda común, Asturies y Castiella la Mancha. ¿Qué pueden sacar de más mañana los socialistes?, ¿recuperar Estremaúra?, ¿conservar Castiella la Mancha y Asturies? Nun va gobernar en denguna comunidá rica. Pero'l PP tien Madrid y Valencia, pero tamién Galicia y Castiella y Llión, que van al enfrentamientu total pola financiación. ¿Exerce Madrid un dumping fiscal? Vamos ver. El términu esi nun me gusta. Ye una tresllación forzada de la terminoloxía'l comerciu internacional y a min eses coses nun me presten res. Colo que si xuega Madrid ye con otres coses, colo que siempres se llamó renta de situación, que ye la ventaxa competitiva que tienes por tar xeográficamente onde tas. Esti reinu sigue siendo centralista y mui centralista no económico. De cada 100 emplegos públicos d'España, 72 tan en Madrid, y de cada 100 negocios d'empreses col seutos públicu, 65 faense en Madrid. Por frente a lo que diz Díaz Ayuso, Madrid vive de la burocracia y de l'alministración publica, non de la innovación nin de la empresa competitiva. Si'l modelu autonómicu diera en federal Madrid fundiría. El poder de Madrid ye mui superior al de cualisquier capital d'un estáu descentralizáu. Camberra, Bruxelles, Brasilia, Berna, Washington... Nin tansiquier Berlín tien el pesu de Madrid.

S.G.: Pero recauden muncho.

D.M.R.: Vamos facer otra vuelta pedagoxía d'andar per casa. Por IRPF, evidentemente, recauda más una comunidá de siete miyones qu'otra d'ún, que ye la proporción, por exemplu, ente Madrid y Asturies. Pero, ¿qué pasa coles empreses? Repsol tien gasolineres en toles comunidaes, el BBVA sucursales en tolos sitios, Mercadona ye la primer cadena de supermercaos, Renfe percorre mediu mundiu, Iberia lo mesmo... pero tributen en Madrid, en Barcelona, en Bilbao, en Valencia... Dalgunes grandes empreses "españoles" yá tributen n'Irlanda o nel Reinu Uníu. Supongamos que toles empreses asturianes tributaren en Mónaco... ¿Qué? Llull decía que "si nun puedes poner paz pola igualdá, ponla pola proporción". Un gran pensador esti mallorquín.

S.G.: La economía nun ye tan cenciella como a+b+c.

D.M.R.: Voi repetir lo que tantes vegaes dixe; cuando una persona de cultura media nun entiende a un economista, eso significa que l'economista ta mintiendo. La economía, como ciencia, tien métodos complicaos, requier munchu conocimientu y dalgo de formalización. Por seguir nesto de la financiación autonómica, calcular una balanza fiscal nun ye fácile, con métodos distintos y tóos con virtues y defeutos. Pero desplicar les coses a un paisanu normal nun ye difícile. Por exemplu, si me pregunten a min pola bolsa, sé desplicalo perfeutamente, pero que nun me pidan inferencies autuariales. Nun me pida qu'opine sobro qué valores van subir mañana, porque nun lo sé y porque nunca tuve interés neso. Pero puedo desplicar a un amigu cómo funciona la bolsa. La economía nun ye una cosa tan complicao como dalgunos quieren facer creyer.

S.G.: Pero los téunicos tienen munchu pesu nes decisiones de los gobiernos.

D.M.R.: Puede que sí, pero nun me lo paez. Otra cosa ye que consideremos téunicos a los asesores. Yo podría falái mil y una histories d'esos asesores. La mayoría son amiguetes de partíu. Yo fui téunicu del ayuntamientu de Madrid y traté con los asesores de los partíos. Había xente estraordinario, pero otro... Cosa de primos y cuñaos.  Porque un ministru o un conseyeru puede ser una persona ensín munchos estudios. El ministru de defensa nun tien por qué ser un xeneral nin el conseyeru de sanidá un mélicu. ¡Qué va! Un políticu tien que tener un modelu de sociedá y espíritu de serviciu. Yo podría ser titular de sanidá perfeutamente, pero arrodiándome d'unos pocos espertos de verdá que me aconseyen, non de militantes que me digan qué tan llistu soi y lo muncho que valgo pal país. Llego y digo: "prometí nel programa odontoloxía pública universal, pónganse a ello". Y vienen y dícenme que nun ye posible porque'l presupuestu nun da pa ello. Entós entrugo: "¿y pa dende neños a los trenta años'". Y dícenme que mui poco viable. "¿Y ata los dieciocho?". "Eso sí". "Pues entamemos con ello". Y al día siguiente diría al parllamentu y a los medios y desplicaría l'asuntu: "prometimos sanidá bucal universal y sólo podemos cubrir esto pel momentu". Toi seguru que tol mundiu lo diba comprender. Caltener promeses que sabes inviables ye una necedá y un engañu a la xente. Pero tamos viendo qu'a los téunicos y a los científicos denguna cadena los lleva a una tertulia. Tamién ye verdá que pueden enquivocase pero, en principio, nun hai que suponer que lo faigan aposta.

S.G.: Tamos en mediu d'un debate mui gordu, con un gobiernu asturianu afirmando que nun va consentir un maltratu a Asturies nel nuéu modelu financieru. ¿Cómo ta Asturies agora, cómo ve vusté lo que vien?

D.M.R.: Les declaraciones del gobiernu y del presidente, eso de que van defender Asturies, ye lo normal. ¿Qué van decir? Tamién ye verdá qu'un presidente, el socialista Javier Fernández, dixo que nun yera la so misión defender los intereses d'Asturies. Nun sé, la so misión igual yera defender a los ciudadanos de Kansas. El modelu autonómicu autual, dende un puntu vista financieru, nun-y vino mui mal a Asturies, pero ye un modelu que descansa en criterios d'hai trenta años, que vien d'una situación mui diferente a la que tenemos güei. Asturies ye la comunidá que más avieyó, más se despobló y más aprobeciera de toles comunidaes. Por exemplu, hai trenta años la dispersión yera la mesma pero la situación estremada: había más población nes collaciones, la xente tenía trenta o cuarenta años, el modelu agropecuariu yera otru; mientres que güei hai poca población, la xente tien de sesenta años parriba, les esplotaciones tan sometíes a un mercáu únicu européu, les rentes son baxes... El modelu de financiamientu d'agora nun mos sirve, pero ye que nun ye problema d'Asturies. Tampoco sirve pa Cataluña por una razón, nin pa Galicia por otra nin pa Canaries por otra. Esto requier una vuelta calcetu y'l problema ye que non toes les comunidaes tienen la mesma fuerza pa tirar d'esi calcetu, y Asturies ye, posiblemente, la más débile nesti momentu. Tamién tamos pagando mui caro l'españolismu de los nuesos gobiernos, que siempres tarrecieron les nueses señes d'identidá, entamando pola llingua y pola mesma denominación de principado, una auténtica humillación a la que mos sometiera la corona de Castiella en 1388. Aquello nun fue un honor sinón, siguiendo l'exemplu d'Inglaterra con Gales, un mescabu de les llibertaes asturianes por parte de la casa de Trastamara, la dinastía bastarda qu'entamó con Enrique II y acabó con Xuana I, pero que continuaron los Habsburgo y los Borbón. Na transición los partíos monárquicos, PSOE, UCD y AP, güei PP, continuaron cola humillación. Namás qu'el PCE defendiera llamar Asturies a Asturies, más bien Asturias porque tampoco yeren los comunistes mui cercanos a la nuesa cultura. Yeran, decíen, internacionalistes, oseya, uniformadores y colonizadores con banderes bermeyes. Pero, en fin, por republicanos, nun se alliaron colos tres tenores de la corona. Mire, abasta con ver cualisquier informativu o cualisquier alderique de radio o de televisión: Asturies ye, con Castiella la Mancha, la única comunidá de facienda común gobernada pol PSOE, y resulta que naide convida a Barbón a decir lo que piensa o lo que va facer. García Page, el manchegu, anda per tolos platós y emisores. Eso ye porque la FSA y la castria dominante asturiana nun pinta nada, sacantes pa facer de bufón y paganini nos premios Príncipe. Y fue una decisión d'ellos, de los provincianos cosmopaletos. Pero, volviendo al modelu financiamientu, ye necesariu un plantegu distintu, un plantegu que tea en cuenta les nueves condiciones y circunstancies.

S.G.: Tener en cuenta la singularidá de les comunidaes, la nuesa nesti casu.

D.M.R.: Sí, asina ye, pero lo de la singularidá ye complicao d'entender y d'abordar. Nun ye lo mesmo, falando sensu estricto, aceutar qu'hai realidaes diferentes que reconocer una singularidá. Lo de la singularidá n'España va haber qu'entendelo conforme a la física cuántica. En ciencia una singularidá ye un llugar onde les lleis físiques nun se cumplen, como pasa nos furacos negros; mientres qu'en matemática una singularidá apaez cuando fallen les régules, como pasa cuando nuna función perfeutamente definía apaecen resultaos absurdos. Nel llinguax ordinariu una singularidá ye una esceición, dalgo que se separta de lo común, pero si toles comunidaes autónomes son singulares nun hai manera de construyir un modelu, quitando la confederalización o, direutamente, la secesión. ¿Qué comunidá soportaría económicamente la independencia? Yo nun lo sé. Ye una rempuesta mui difícile de dar, pero ye posible que nun fueran les más riques les que salieran meyor paraes. Por exemplu, Cataluña vende más en Cantabria que nos Estaos Uníos. Pero vamos almitir qu les rellaciones internacionales nun se desestabilizaren, anque ye muncho suponer. Tres l'estaye de Yugoslavia, ¿qué países salieron meyor paraos?: los que tiníen potentes llazos económicos con Alemaña, oseya, Croacia y Esloveña. Serbia tenía como principales proveedores y clientes a otres comunidaes yugoslaves y a Rusia, y la cosa salió bastante peor.

S.G.: Caro, caro, entren toles comunidaes nuna mesma carrera: si una consigue una competencia, al poco pídela otra comunidá y tóes en cadena.  

D.M.R.: Ye que nun hai una uniformidá española y una singularidá catalana, por falar de lo más polémico d'anguaño. Históricamente, los nacionalismos basáronse na llingua, na relixón y nes diferencies económiques. Equí nun hai comunidaes católiques y protestantes, como pasaba nel Reinu Uníu, Alemaña o Austria-Ungría. Si mos basamos na lingua, tenemos, como poco, siete singularidaes. Y si vamos a lo económico, el País Vascu y Cataluña son comunidaes riques, pero tamién lo ye Madrid. El principal teóricu del nacionalismu gallegu fue un profesor d'estructura económica, Xosé Manuel Beiras, y la so tesis, mui influyía pol tercermundismu y la visión marxista, taba basada nel subdesendolcu de Galicia y'l so caráuter de periférica, nel sen que tien la periferia na teoría del intercambiu desigual. Eso, si tenía base hai cincuenta años, qu'igual sí, güei nun lo tien. Y volvemos a lo d'enantes: hai once años qu'el modelu debería tar revisáu pero naide-y quiso poner el ñarigón al machu. Y, como fora nel entamu, cuando la transición, son los nacionalistes vascos y catalanes los que rompieron la mesa xuegu y planteguen otres régules. Esa ye la verdadera singularidá: nel País Vascu y en Cataluña hai una voluntá de ser nación y la voluntá ye política, non relixosa o económica. Tamos delantre d'una visión de la nación de caráuter republicanu, nel sen d'aquel plebiscitu cuotidianu del que mos falaba Renan. Esti autor decía qu'una nación yera una gran solidaridá construyía históricamente, anclao nel pasáu, pero nel deséu de seguir palantre, continuando con una vida en común. Esto ye, que la patria nun se basa esxlusivamente "nel sangre y los muertos", como defendía'l nacionalismu clásicu xermánicu y célticu, sinón que ta encarnada na república. Esi ye'l plantegamientu tradicional d'ERC y agora el de Bildu, que non por casualidá ta quitando sitiu al PNV, más de tradición xermánica. 

S.G.: Nesos trenta años que pasaran Asturies cambiara muncho. Yera una comunidá potente pero la so estructura económica baltiara dafechu, dende la ganadería y la pesca a la siderurxa, de la minería a la construición naval, avieyando la población, emigrando los mozos, cuando aquello de la llienda urbana... ¿Cómo ve vusté el futuru económicu d'esti país? Yo noto qu'hai un discursu mui murniu, mui negativu, un discursu de qu'Asturies va ser la película esa del país de vieyos.

D.M.R.: ¡Ah!, la película de Joel y Ethan Coen Nun ye país pa vieyos. Bono, nun sé si hai demasiáu paralelismu. Pero vaigamos al asuntu. Por cierto: convién recordar que fue un presidente, Álvarez Areces, el que tachara de llienda urbana la sangría demográfica. Nun lo fizo un contertuliu de radio o de barra chigre. Y taben colando 42 mozos al día. N'Asturies tenemos una ventaxa sobro toles comunidaes y ye que tenemos una base de datos única, con unes estadístiques sensacionales. Les series cronolóxiques son mui llargues. Como somos una comunidá uniprovincial el tarrentoriu a analizar nunca cambió dende hai décades y décades. Dende la época de Madoz l'obxetu d'analís yer la provincia, colo qu'Asturies sigue siendo, a efeutos estadísticos, lo mesmo que yera na restauración, cola república o nel franquismu. Amás, dende los primeros setenta, la Sociedá d'Estudios Económicos ya Industriales, conocío como Sadei vien estudiando y analizando tolos datos y faciendo estudios d'historia económica, prospeutiva económica y perspeutiva económica, y munchos de los que trabayaron nesa empresa pasaron a la universidá cuando se fundó la facultá d'economía. Tóo eso permítemos tener un conocimientu fonderu de la realidá. Agora, otra cosa ye la política económica a seguir. Nos años sesenta Asturies yera la provincia, Oviedo se llamaba oficialmente, cola renta más alta, xunto con Vizcaya, Barcelona y Madrid. Pero, si tomamos la renta industrial y minera, sólo taba al nuesu nivel, un poco perriba, Vizcaya. El nuesu seutor agrariu yera arcaicu. Vamos facer un poco d'historia y ver cuálu fue'l papel d'Asturies na formación del mercáu común español, que ye lo que de verdá configura un estáu-nación. España como estáu-nación nun surde ata la metada'l sieglu XIX. Ye tan de recién como Italia. Eso de la nación más vieya d'Europa sólo lo creyen los propagandistes. La España unificada de Carlos I nun ye una nación, sinón un imperiu, como lo fuera Roma nel so día. Inglaterra y Portugal llegaron a imperios siendo yá naciones, pero España non. Nun había llingua común, sistema monetariu común, sistema métricu común, nin códigu civil, nin códigu mercantil, nin bancu central... Sólo yeren comunes la corona, la inquisición, l'exércitu y la guardia civil, ¡mire vusté!. A partir de la perda de la España ultramarina les coses cambien y, amás, entama la revolución industrial y'l capitalismu modernu. Nesi procesu, Asturies tuvo un papel fundamental pero siempres subsidiariu. Lo de tener renta alta, como nos sesenta, ye engañoso. Asturies contribui con emigración, primero a América y dalgo a Madrid, dempués a Europa y más sero al mundiu en xeneral. Per otra parte, Asturies especialízase n'enerxía, dalgo d'hídrica y riba tóo, como tol mundiu sabe, carbón. Llega la crisis de los setenta, el fin del proteicionismu, un capitalismu más competitivu y funde'l modelu minerosiderúrxicu y metalnaval. ¿Cómo respuende Asturies?: otra vuelta con emigración, esta vegada básicamente a Madrid, Valencia, Canaries..., a seutores de servicios o de construición. Y eso contando cola más alta cualificación académica del reinu. ¿Y agora qué ye lo que tamos vendiendo?: paisax y clima al traviés del turismu. Total, qu'el nuesu modelu económicu siempres fuera estrautivu: sacar del país persones y recursos naturales. Eso, en cualisquier manual d'economía política o de desendolcu económicu, conozse como economía colonial o, pa ser más finu nel analís porque nun hai otros ellementos que configuren, rigurosamente, a una colonia, economía d'enclave. Y agora, col turismu, vamos consolidar esa economía d'enclave. Nun hai dengún modelu económicu autocentráu, dende dengún puntu vista, dende denguna corriente de pensamientu. Sigue vixente la vieya economía, la estrautiva, cola diferencia colos años sesenta y setenta de qu'agora la manu d'obra ye más barata y más vulnerable. Y otru día falaremos de cómo un turismu desordenáu y perroneru como'l que tenemos acaba desfaciendo'l mediu natural y urbanu, matando'l recursu que ponemos en venta. Una caricatura de lo que pasa: llega una empresa a una carbayera, corta doscientos carbayos, pon trenta xalés pa madrilanos, dexa un carbayu nuna placina central, amuralla tol perímetru pa que nun entren los indios que facíen verbena na carbayera dende hai mil años y pon un cartelu que reza Urbanización La Carbayera, si ye que nun pon El Robledal.

S.G.: Veolu mui pesimista.

D.M.R.: Pues nun lo soi. Cuando me caliento póngome un poco tremendista pero creyo q'Asturies tien posibilidaes. Lo que duldio ye de la intelixencia y capacidá de los nuesos gobernantes. Hai seutores que funcionen mui bien y una cualificación profesional alta. Y tamién una inmigración, que ye pequeña, dimpuesta a trabayar y a progresar, y qu'esperemos que non a culisquier preciu o embaxo la esplotación más xabaz. Pero vamos a lo  que tábamos. Hai un tiempu, nuna reunión n'Uviéu con chavales de los últimos años de bachiller y primeros de carrera, Mónica Barettino, una profesional como nun hai, una bona amiga, preguntó qué cuántos yeran del occidente. Llevantaron la manu once o doce. Ella entrugárais cómo yera la economía de los sos conceyos. La rempuesta fue unánime: "elli nun hai nada, nun hai futuru, tenemos que marchar...". Pues bien, eso nun ye verdá. Nel occidente d'Asturies contamos colos dos astilleros ente los más rentables y teunolóxicamente dotaos d'Europa, ún n'As Figueiras y otru en Navia; cola meyor cooperativa agraria n'Outur; con una lláctia qu'esporta n'Anlleo; con una empresa que manda componentes a la NASA en La Curiscada; con dos cafeteres que tan al altor de grandes tresnacionales en Tinéu y Zorrina; con una papelera, problemática polo ambiental, en Navia; con una denominación vinícola d'una calidá impresionante en Cangas del Narcea ya Ibias; cola rula con categoría europea de sostenible pal bonito y la merluza en Cuideiru; col biltu'l turismu rural en Taramundi... Y habrá más coses que dexo de lláu, como tola chacinería, un turismu que puede ser de calidá, non como nel oriente o en Xixón, que ye de tralla, d'una calidá ínfima, lo que lleva, en causación circular, a una hostelería de pena. ¿Cómo que nel occidente nun hai nada? Lo qu'hai ye mui poco pa la potencialidá que tien. Pero los estudiantes nun lo ven asina. ¿Por qué?: porque los eduquen pa otres coses y tamién nel menospreciu de lo propio. Edúquenlos pa que marchen pa Madrid. Yo conozo mui bien América. A los neños en Guatemala edúquenlos, no que llamen educación diversificada, pa profesiones que nun son necesaries nel país. ¿Cómo acaba la cosa?: pues con emigración a los Estaos Uníos. Pues resulta qu'esi occidente avanzáu y emprendedor ye'l meyor exemplu d'integración rural-industrial. Y si miramos pal oriente vemos lo mesmo, anque más tomáu pol turismu, un seutor nel que yo nun confiaría pal futuru de los mios ñetos. Por eso yo creyo que les llamaes ales, despeutivamente, son la clave del desendolcu. Y tamién la innovación y la investigación. El parque teunóxicu de Xixón, ensín ser mui grande, ye ún de los mayores contribuentes al PIB asturianu, y puede qu'el primeru si facemos los cálculos d'otra manera. Asturies tien posibilidaes si llogra combinar vieyes tradiciones y nueos conocimientos. Tenemos una cadarma agropecuaria sensacional, qu'espoxigó ensín sofitos públicos o con mui pocos. Y hai una industria pequeña, mui puntera, con obreros de gran cualificación, pa la que naide mira. Yo sería optimista, eso sí, contando colos inmigrantes, que son necesarios y traen ganes de vivir a un país mui avieyáu. Pero pa eso sería mester tener un gobiernu nacional y universalista, cuando lo que tenemos ye un cosmopaletismu de premios príncipe y madrilanismu.

S.G.: Préstame esto que diz, profesor, porque hai un discusu xeneral mui murniu, mui pesimista, mui antigu.

D.M.R.: Al ser Asturies un país mui avieyáu ye pesimista. Vivieron los nuesos padres y güelos la gloria industrial, de pies de barru, tamién hai que decilo, y agora tamos más de la metada camín de los setenta. Les naciones, como los individuos, sigún avieyen tienen menos horizontes y miren más patrás. Ye una llóxica vital. Y los xóvenes tan educaos asina, nunes families ensín ilusiones. Pero yo niégome a eso. Yo sigo pensando en qu'hai futuru pa esti verde país y pa los neños que nacen equí, o pa los que vengan de los confines del mundiu. Por eso ye tan importante la defensa de la llingua y la cultura nacionales, pa que seya una afirmación y tamién pa que seya un llugar común pa los nueos conciudadanos.

S.G.: La xente ve negra la cosa.

D.M.R.: Y puede que lo seya, pero non tanto. Yo yá teo más vida a popa qu'a proa, pero sigo creyendo qu'hai futuru, qu'hai posibilidaes. Pero la clave ta n'avanzar ensín perder la tradición. Yá nun van volver los tiempos de la minería hullera y la metalurxia primitiva, non, pero caben otros modelos. Voi poner un exemplu que puede ser interesante, un casu emblemáticu de fusión ente lo rural y lo industrial. L'astilleru de Gondán, nel conceyu de Castropol, ta fechu coles midíes d'una aldea. Voi desplicame. Toles pieces que lleguen al astilleru siguen una midía canónica, la de Granda. Ye Granda la zona alta de la parroquia d'As Figueiras y la empresa naval fae les coses de manera que toles pieces tean un anchor, como muncho, del que tien la caleya que va ata la mar dende El Cotarelo, la meyor fastera ganadera de la collación. Y tamos falando d'un astilleru que ye punteru nel mundiu. Conozo mui bien As Figueiras, Nel so  barriu pesqueru, nació mio padre, David.

S.G.: ¿Yera de familia de pescadores?

D.M.R.: Non. El padre yera militar, Xosé, un oficial de caballería pasáu al arma de carabineros, y la madre, Elisa, una muyer de bona familia del conceyu de Villaviciosa. A él fusiláronlu por ser lleal a la república, tres defender el pasu de la ria l'Eo.

S.G.: Mui interesante. Merez atención pero vamos a lo que tábamos.

D.M.R.: El casu ye que los téunicos calculen el tamañu de les pieces, conforme a la caleya d'El Cotarelo. Bien podríen, con tolos sacramentos municipales, desbrozar y asfaltar, pero la empresa tomó otra decisión. Otra cosa ye qu'haiga, qu'habralo, confliutu ente usos ganaderos, pesqueros, navales... Pero que la midía industrial seya la caleya que lleva a los pastos ye una cosa mui interesante.

S.G.: Quedamos una custión mui d'autualidá, mui en boga nesti branu, lo del turismu. Vusté falaba de, paezme, una economía asemeyada a la colonial.

D.M.R.: Falbaba d'una economía d'enclave.

S.G.: ¡Eso yera! Tases sí, tases non... Izquierda Unía, que ye sociu de gobiernu del PSOE, propón tases pero dexándolo a la decisión de los conceyos... Vamos a Roma o a Barcelona y pagamos tases y, en cambio, equí tol mundiu saliera a la escontra. ¿Cómo lo ve vusté?

D.M.R.: Vamos a ello, pero déxeme referime a un asuntu que me paez importante, porque sopelexa cuála ye la política económica d'Asturies.

S.G.: Lo que-y pete.

D.M.R.: L'otru día dalguién del gobiernu asturianu decía que la siderurxa integral diba seguir palantre con Arcelor o ensín Arcelor. ¿Qué quieren decir con eso?, ¿van improvisar una siderurxa del llunes pal martes?, ¿van nacionalizar Arcelor?, ¿va nacionalizala Pedro Sánchez o va nacionalizala Adrián Barbón?, ¿van pagar por ella tolos españoles o namás que los asturianos? Si podemos seguir ensín Arcelor será porque los nuesos gobernantes tienen l'alternativa pensada, estudiada, analizada... Supongo qu'habrá un equipu potente de téunicos detrás d'eses declaraciones... Son frases diches ensín ton nin son, pa la galería, pa ocupar espacios nos medios, pa que pensemos que faen dalgo y que tienen un proyeutu de país, un proyeutu pa esta Asturies del XXI. Ye lo mesmo que cuando'l presidente'l gobiernu español dixo aquello de que "gobernaremos col parllamentu o ensín él". ¿Pero cómo se puede gobernar ensín el parllamentu nun modelu de democracia parllamentaria? Otra boutade. Y yá vimos dalgún revolcón parllamentariu y más que vamos ver. Son frases de twit, los tuyos apláudente, la prensa ponlo en titulares y lluéu... ná de ná.

S.G.: Tóo ye una pose.

D.M.R.: Más o menos. Vamos a lo del turismu. Ye un seutor que va medrando y que va seguir medrando muncho más. Ye un seutor que da riqueza, que beneficia a tóos, non namás qu'a los direutamente implicaos, pero que ye mester regular, y regular bien, non a lo xole. N'Asturies entá nun tenemos problemes graves pero van apaiciendo focos de tensión como puede ser el de Cimavilla, en Xixón, o Ribeseya y Llanes. Tamién tan surdiendo na costa occidental, en Tapia, por exemplu. Tamos a tiempu de reconducir la situación, pero eso ye imposible cuando los dirixentres salen con eso de que "nun tamos como n'Ibiza". ¿Y a qué vamos esperar?, ¿a que nin los mélicos quieran vivir equí porque nun hai vivienda o ye prohibitiva? Precisamente, tenemos la ventaxa de que conocemos lo de Baleares, Canaries, los centros de Madrid y Barcelona, les ríes baxes gallegues, Málaga... Lo que pasa ye qu'equí tovía tenemos un turismu masivu durante tres o cuatru selmanes nel branu, non como notros sitios, que tan tol añu. Pues, yá que tamos a tiempu, tendremos qu'anticipamos. Neso consiste'l bon gobiernu. Pero, y esto ye importante, la presión turística dase en zones perfráxiles, como son les sableres costeres y l'alta montaña. L'impautu turísticu na playa San Llorienzu, como pasa na Concha o na Barceloneta, ye pequeñu, porque nun son sistemes naturales. Son playes degradaes y urbanes. ¡Nun falemos yá de la playa de Poniente, en Xixón, que ye artificial! Ehí puedes meter mediu miyón de persones pa que se bañen n'augua portuaria, qu'esa ye otra. Pero nun puedes permitir que lleguen miles y miles a Gulpiyuri, como tampoco al llagu Enol o a los tambayones d'Oneta.  

S.G.: Siempres se fala de desestacionalizar.

D.M.R.: Esa ye la gran frase, el mantra de los gobernantes y los hosteleros. Pero la política paez ser otra. Si queremos desestacionalizar el turismu, que vengan visitantes na seronda o nel iviernu, habrá que buscar nichos de mercáu, y esos nichos tan ente los cien miyones d'europeos mayores de sesenta años, que tan sanos y tienen perres y que nun busquen sol, playa y cachopos. Entós nun faigas publicidá d'Asturies en Madrid, en Barcelona o en Valladolid, que son de branu, fin de selmana y dispidíes de solteru. ¡Failo en Llondres, en Munich y n'Estocolmo! Pero non, faen tolo contrario. Hebo un tiempu nel qu'Astuties llamábenla Inilandia, pol pesu de la empresa pública, l'INI. Pues agora paez que gobierna la patronal hostelera, en connivencia con una empresa de tresporte de viaxeros. OTEA, mui visiblemente en Xixón esti branu, potencia esi turismu depredador, influendo claramente nun ayuntamientu ensín horizonte nin xacíu. Amás, ofrecen baxa calidá, altu preciu y mal serviciu. Y, pa enriba, monten nes cais festivales de baxu nivel, gastropaseos, que quiten caxa a los establecimientos de tol añu, los que paguen impuestos y contribuin a la bona vida nel día a día. Eso sí, con tolos costes de llimpieza y seguridá pa lo público. Y nun falemos yá de la manu d'obra, en precario, con salarios infames, con horarios esclavistes...

S.G.: Queda l'asuntu de la tasa turística.

D.M.R.: Lo primero qu'hai qu'entrugar ye qué rediola ye una tasa. Una tasa ye lo más paecío a un preciu, non a un impuestu. Ye importante conceutualmente: una tasa ye un pagu por un serviciu, mientres qu'un impuestu ye una contribuición a la facienda común. Cuando l'otru día dos llíderes del PP, Pumariega y Queipo, decíen que la tasa turística suponía un incrementu de la presión fiscal, o mentíen o amosaben la so inorancia. Les tases nun contabilicen na presión fiscal. La tasa turística ye como'l peax del Güerna, que nada tien que ver col modelu fiscal. Vien a ser como un preciu. Ye como les matrícules na universidá: doscientos euros por asignatura. Eso nun ye un impuestu, sinón un preciu, un preciu públicu, non autorregulao pol mercáu, pero un preciu. Nun ye un impuestu.

S.G.: ¿Quién debería poner esa tasa?

D.M.R.: La tasa debe ser autonómica, non, como plantegó'l presidente Barbón, municipal, y, muncho menos que, como tamién dixo, que seya voluntaria, que quede al llibre petite l'ayuntamientu. Si mañana'l conceyu de Villaviciosa pon una tasa de cincu euros por entrar en Rodiles y pa dir a La Griega, que ta a diez minutos, nun se paga, ¿qué pasará? Pues lo que pasará ye que Villaviciosa nun contará con unes perres que pueden ser emplegaes pa reparar llaceries, pero con Rodiles igual de masificao, y que Colunga nun recaude nada y La Griega tea más deterioru del que tien. ¿Qué quier el gobiernu asturianu? ¿Poner a los conceyos a competir ente ellos a ver cuálu ye'l menos responsable? ¿Pensaría eso Barbón y los sos asesores, que puede que seyan bastantes? ¿Esa ye una política de sostenibilidá, igualdá, solidaridá, de la 2030? ¡Eso nu tien xacíu! 

S.G.: ¡Tóos pa La Griega!

D.M.R.: A mi esa playa gústame muncho.

S.G.: Pero teo entendío que vusté nun ye mui de playa.

D.M.R.: Non, la verdá. Suelo dir a pasear nel iviernu o en primavera. La mía ye La Ñora, la playa de la mio infancia y adolescencia, de cuando baxábamos en bicicleta y había venti persones como muncho. Tamién me gusten Torimbia, La Franca, El Gavieiru, Penarronda, La España, Rodiles, San Pedro Bocamar, Merón, La Espasa y unes cuantes más.  

S.G.: La memoria.

D.M.R.: Sí. Pero, volviendo al asuntu, el parllamentu'l Reinu Uníu acaba de decidir cobrar doce llibres esterlines a cualisquier persona que llegue y que nun vaiga con papeles de trabayador, estudiante, investigador, participante nun congresu o una esposición... Con esa tasa tienes pa seyes menses y nun puedes regresar ata pasaos dos años. Eso ye una tasa turística. Si nun afleuta a un trabayador, a un estudiante, a un mélicu que va a un congresu o a un empresariu que va a una feria muestres, ¿a quién va empobinada?: pues al turista. Eso quier decir que si mañana un paisanu de Quirós va a Llondres paga una tasa, pero si un llondinense va a Quirós nun fae lo mesmo. Pero ye que nel mesmu reinu d'España pasa eso: yo pagué una tasa hai poco cuando fuí a Ibiza pero un ibicencu nun la paga si vien a Villaviciosa. Oseya, que los asturianos pagamos por salir de casa pero nun cobramos porque vengan. ¿Volvemos al discursu de la solidaridá, la igualdá y la singularidá?

S.G.: ¿Y cómo ve vusté el futuru?

D.M.R.: Nin bien nin mal. Yo soi mui críticu y un tanto repunante, pero nun soi un alarmista nin un apocalípticu. Los estudios más recientes dícenmos qu'Asturies podría tener tres miyones y mediu de turistes nel 2035, cuando la nuesa población malamente pasará de les 900.000 persones. Yo tendré entós 77 años y espero velo. Si caltenemos el modelu que güei tenemos, la cosa será de pánicu. Pero si llogramos un modelu diferente, estacionalizando de manera equilibrada, podríamos tener una bona situación. Pero eso requier un bon gobiernu, unes alcaldíes conscientes y unos empresarios menos cortoplacistes y depredadores.

S.G.: El 2035 ta ehí.

D.M.R.: Los políticos y los columnistes y contertulios deberíen atender un poco más a los científicos. Ye curioso ver cómo nun mundiu tan teunificáu como esti de nueso la ciencia ta enterrada ente pseudoteoríes y engañifes. Hai yá más de cien años qu'esiste el conceutu de capacidá de carga" y llevamos décades ameyorando los sos métodos de cálculu. Un espaciu, seya natural o urbanu, tien una capacidá llimitada. Y esa capacidá ye calculable. Hai métodos pa tolos gustos. Podemos saber cuántes vaques soporta un práu y cuántos cazadores un monte, pero tamién cuántos turistes soporta la villa de Llanes, cuánta xente aguanta ensín alteriase un llagu de Somiedu, cuántos bañistes soporta Artéu... Yá ye dalgo normal y asumío qu'haiga un cupu de visitantes a una cueva prehistórica o a una ermita altomedieval, pero lo de les playes o les viesques, pel momentu, ta costando dios y aída. 

S.G.: Yo soi aficionáu a la bici. Nu ye llóxico subir a los llagos de Cuadonga y ver autobuses y aurtobuses, cientos, y que na collada ente Enol y La Ercina paeza un mercáu. Y la xente molestando a les vaques, los perrinos urbanos espavoriando a les oveyes, xente y xente que, a la fin, ta acabando cola pita de los güevos d'oru. Tenemos un recursu y vamos acabar con ello.

D.M.R.: Por poner cifres: esti branu Villaviciosa, que tien, tol conceyu, 15.000 habitantes, tuvo 30.000 turistes; Llanes, con 14.000 habitantes, recibiera 121.000; y Cangues d'Onís, el top del top, con 6.000 habitantes na ciudá, pechó con 128.000 turistes. La mio muyer, Charo, ye de Cangues y ellí tien a la familia y un montón d'amigos. Selo mui bien: nun pueden vivir. Tomar un café en Cangues ye más caro qu'en Montmartre. ¿Eso nun ye tensión pa Barbón y'l so gobiernu? Entós, ¿cuándo entama la tensión?, ¿cuando lo diga'l xeneral Álvarez Almeida, el d'OTEA?

S.G.: Ye mui gordo l'asuntu.

D.M.R.: Tamién hai otru asuntu nel que nun aparamos. Esti turismu de baxa calidá como ye l'asturianu pide manu d'obra de baxa calidá. Tenemos turistes inorantes y faltosos, y ofrecemos establecimientos malos y enchipaos. Debe ser lo que los economistes clásicos llamaben equilibriu de mercáu. La hostelería asturiana ye de la peor triba: ye mala y cara. Pero, conforme al dichu: "tira, que llibres". Pero hai otra derivada. Cuando la burbuxa de la costruición, hai venti años, munchos neños dexaron d'estudiar pa dir a un salariu relativamente altu. Aquello morriera y vímosmos con toa una xeneración en paru y ensín formación denguna. Pues agora ta pasando lo mesmo cola hostelería. Un rapaz o una neña de venti años aguanta doce hores de trabayu por cuatru duros y tovía va de marcha colos amigos a les cincu la mañana. Pero cuando españe la burbuxa hostelera, que lo va facer porque ye de razón histórica y mui bien analizada polos economistes, resultará que nun podrán facer otra cosa qu'engromecer la bolsa paru de llarga duración, como pasó colos de la costruición hai unos años. Asturies siempres tuvo una cualificación profesional na so clase obrera estraordinaria, pero eso acabó.

S.G: Munches gracies, profesor Rivas. Namás que me queda convidalu a, cuando quiera, volver a esta emisora.

D.M.R.: Munches gracies. Toi a la orde de lo que necesite y, si veo dalgo interesante, yo mesmu-y propondré un alderique.