Comedia y servidume

 

Como canta Skama la Rede, "tarde de comedia nel Campoamor". Llamento ser un repunante qu'opina sobro los premios Princesa, Príncipe o lo que venga, que yá tenemos otres identidaes sexuales. Vaiga per dellantre que respeto muncho a los premiaos y almiro a dalgunos, como a Joan Manuel Serrat, un iconu pa min, pero nun respeto pa nada el cortesanismu y la servidume provinciana de la bona clase asturiana.

Gústame muncho ver les semeyes de la prensa, la pasarela serondiega de tolos años n'Uviéu. Ves ellí a la élite asturiana, lluciendo modelos. Fulanina de Xixón con un zapatu de Choo, menganín de Pravia con corbata de Kiton. A un tiempu, tamién ye mui guapo sentir a los de la RPA, ver a los de la TPA y lleer a los columnistes de la prensa regional. Tóo ye d'un pasteloso impresionante y, evidentemente, ensalzando a la casa real y menos ocupaos polos premiaos. Porque, seyamos claros, equí nun importa res nin la ciencia nin la cultura, sinón la gloria de la monarquía nuna ciudá palurda que toma'l nome d'Asturies en vano.

Préstame velos, coles sos teles y brillantes, coles sos declaraciones grandilocuentes. Ves lo que ye la élite asturiana: una tropa. Yo nun creyo qu'una imax valga que mil pallabres pero, dalgunes vegaes, desplica lo suficiente. Les semeyes de la comedia del Campoamor despliquen el porqué de que tamos como tamos. Ye l'Asturies oficial, l'alcanfor, la naftalina, tolo podre que tien una sociedá. Velos pasear ente gaites por esa alfombrona azul ye sensacional. A min recuérdenme a la película de Berlanga La escopeta nacional. Cuando los ves entiendes perfeutamente por qué Asturies ye la ultima pallabra'l credo, dempues de l'amén. Somos una comunidá rastrera, la más servil de les diecisiete. Y eso siendo una nación milenaria y la patria de los lliberales. Pero, sieglu y mediu dempués de qu'aforcaron a Riego en Madrid, los serviles ganaron. Y non tóos de dreches, non.  

Tamién fueron los borbones a Sotres, onde-ys pusieron un mirador que, ye d'esperar, nun seya contrariu a les normatives, como lo fuera l'anterior de Vega d'Enol, que nun fue sometíu a la necesaria evaluación d'impautu ambiental a la qu'obliga la llei de parques nacionales. Pero naide dende l'alminitración dixo nada, nin l'alcaldía canguesa nin la presidencia asturiana. ¡Son los señores y pa ellos nun hai llei!

Deseo lo meyor pa Sotres pero, ¡atentos! L'añu pasáu fue pueblu exemplar la mio collación, Candanal, con Pion y Arroes. Tamos nel conceyu de Villaviciosa. Nun sé mui bien por qué lo merecimos. Tocaría por dalguna causa política o d'interés empresarial. A los vecinos nun mos entrugaron.  Vinieron los borbones, la princesa echó un culín, con estilu, eso sí que ye verdá, y marcharon. A los dos o tres menses apaez la idega de poner nes nueses tierres un parque de bateríes. Espero qu'en Sotres, como premiu real, nun-ys pongan una central ñuclear.

Y vamos dar un paseín pela historia. L'orix del principáu d'Asturies vien de la guerra ente los nobles asturianos secesionistes y la monarquía castellana. Gonzalo Pelayi caltuvo guerra con Adefoso VII, l'últimu rei llionés y heriede de la dinastía canguesa, col sofitu de Portugal y d'Inglaterra. Años más sero, Adefonso Henríquez, señor de Xixón y conde de Noreña, sublevárase contra'l so hermanastru Xuan I. Derrotáu el que podría ser Adefonso IV d'Asturies, en 1388, Xuan I fundaría el Principado de Asturias pa amosar que dominaba les tierres asturianes y que nun diba permitir la independencia d'Asturies. El rei castellán dizlo mui claramente nun albalá: "toles ciudades y villes y llugares d'Asturias serán mayorazu pa los príncipes de Castiella y Llión, asina como yera y ye'l el Principáu de Gales y'l Delfináu de Francia".

Pero'l conde de Xixón y Noreña volvió a llevantase contra Enrique III. En 1394, acosáu polos castellanos, resistiera en Xixón. La so muyer, Sabel, que yera fía del rei de Portugal, resistiera na villa, esperando una flota portuguesa y otra inglesa. Namás que llegaron dos naves portuguees que la llevaron a Llisboa. Los ingleses sufrieron una galernaza y nun llegaron a tiempu. Los castellanos asaltaron Xixón y quemáronla, enllenaron de sal les tierres y degollaron a cuásique tolos habitantes.

Qu'Asturies seya un principáu nun ye un honor, sinón una humillación. Somos los asturianos vasallos y sirvientes de Leonor. Pero los nuesos gobernantes, mayoritariamente socialistes, tan mui contentos.

Nota final: perdónemne esta salía de tonu y esta perorata histórica. Los que me lleen saben que soi persona de bon temple, nada estremista, poco visceral, pero hai coses que me saquen de madre, especialmente la estupideza y la servidume, especialmente la servidume voluntaria, que diría Le Boétie.