Tampoco d'esta vamos daprender
(El Fielato)
Nun vamos falar de lo que pasara en Valencia, tamién notres dos comunidaes pero lo de Valencia fora particularmente grave. Tampoco vamos falar de la traxicomedia política qu'acabara nos sucesos de Paiporta, seguramente organizaos pola ultradrecha pero que responden a una más que desplicable indignación popular. Tampoco vamos falar de la incompetencia que raya cola imbecilidá del presidente Mazón y la crueldá de la so conseyera Montes, que, siguiendo la llínia marcada por Feijoo y Tello, con tal de minar al gobiernu central, tóo val. Vamos falar de lo que pasó.
Lo que pasó ye una preba más, esta vuelta dolorosamente cercana, del cambiu climáticu, pero tamién d'un modelu económicu y, concretamente, urbanísticu, completamente irracional. A cualisquier neñu que va por primera vegada al monte los monitores despliquen-y, lo primero, que nunca se pon la tienda nun calce secu, anque lleve secu cien años, porque esa nueche, si hai una tormenta grande nos picos, l'augua buscará los sos caminos ñaturales.
Nun hai que ser gran espertu pa entender delles coses. Dende siempres nel Mediterrániu, por ser una mar templada, hai tormentes fuertes ya inundaciones nes primeres selmanes de la seronda. Pero, agora, como la mar ta más caliente, el riesgu ye más altu. ¿Y por qué ye más caliente? Non por alteraciones naturales, sinón por influencia antrópica, pola nuesa autividá, la humana. Pero la cosa ye rentable. Hai un par de selmanes los telediarios falaben de lo guapo que yera tar en Valencia, en plenu ochobre y col augua a 23 graos, un parayisu pal turismu. Y una selmana dempués con esa temperatura, ascendiendo'l calor a les zones altes fríes de l'atmósfera, ¡pum!, vamos a polos trescientos muertos y una destruición total de dalgunos pueblos. Pero yá pasa eso nel norte d'Europa, como vimos l'añu pasáu. El Bálticu y'l Norte tamién tienen una temperatura muncho más alta de la que yera normal.
La cosa va dir a más y a más, y non precisamente nel Mediterrániu esclusivamente. N'Asturies nun tamos al marxe de la dinámica global. Con un total despreciu a lo qu'agora yá sabemos, porque nun tamos nos sesenta, consistorios como'l de Villaviciosa potenciaron la urbanización de les llamuergues y de la ría. Yá viéramos el resultáu hai unos años: enantos como nun se recordaben dende los cuarenta. Y más que vendrán. El Cantábricu yá ta dos graos perriba la temperatura con respeutu a la media dende que tenemos rexistros. ¿Vendrá una depresión aisllada en niveles altos, qu'eso ye una dana? Posiblemente non, pero fenómenos asemeyaos seguro.
Los nuesos antepasaos, que nun vivieron cambios climáticos aceleraos, yeran más llistos. Tamién ye verdá que nun vivíen nun modelu capitalista. A denguna comunidá se-y ocurría vivir a pie de playa nin na oriella d'un rigu. Pescaben, sí, pero les cases teníenles un poco lloñe de les barques. La mar podía ponese brava y'l rigu podía salir de madre nuna primavera dempués d'un iviernu de muncho ñeve. Meyor poner distancia. Tol mundiu se recuerda de la película de Bayona Lo imposible, sobro'l tsunami de 2004 en Banda Aceh, nel océanu Índicu. La mortalidá fue grande pero mui escosa ente los indíxenes, que, con llarga historia, nun vivíen en primera llínia de playa, sinón al interior y al pie de les montañes. Namás sonar fuerte la mar, subieron a la tiera alta, mientres que los nueos habitantes y los turistes baxaben al reinu de Poseidón, arrastraos poles foles.
Volviendo a casa, cuando hai galernazos atlánticos, n'Asturies entren les foles en Cuideiru, Tazones o Veiga, pero con dalgunos desperfeutos n'establecimientos y cases baxes. A la contra, los efeutos na costa suratlántica gallega y na costa cántabra los daños son grandes. ¿Por qué? Porque, afortunadamente, n'Asturies la llexislación costera fuera más rigurosa. Dalgo tan cenciello como eso. Nel interior la cosa fue diferente: a dengún xestor sensatu se-y ocurriría poner un hospital na confliencia de tres rigos como ficieron en Les Arriondes o un estadiu fúbol nuna vaguada como ficieron col Tartiere.
Y queda falar del coste económicu, pero va ser pa otru día. Pero vamos dar un apunte. Na Comunidá Valenciana, hai unos años, consideraron mui caro intervenir nel barrancu d'El Poyo pa evitar enantos y desbordamientos. El coste yera d'unos trescientos miyones d'euros. Esi barrancu fuera l'embudu principal que provocó lo d'esta selmana pasada. Los costes agora van ser de decenes de miles de miyones. De fechu, l'índice Stern mos siñala qu'el cambiu climáticu va suponer una perda d'un 4 por cientu de PIB cada añu nes economíes desendolcaes. ¿Cuála va ser la merma del PIB valencianu pola catástrofe de la dana?, ¿cuánto vamos aportar los contribuentes, valencianos y non valencianos?
