Riego, la traxedia d'un lliberal

El 7 de payares de 1823 Fernando VII, el rei felón, ponía fin a una de les sos obsesiones más fonderes. Na madrileña plaza de La Cebada aforcaben y, yá muertu, decapitaben al xeneral asturianu Rafael del Riego. Ñacíu en Tuña, nel conceyu de Tinéu n'abril de 1784, polo tanto contando 49 años el día la execución, Riego representaba como naide l'espíritu de la revolución lliberal y de la llucha contra l'absolutismu.

Seguramente la so importancia nos procesos políticos de la época fue bastante menor de lo que la maxinación popular construyera. Riego taba nel sitiu xustu nel momentu concretu cuando, en 1820, delantre la traición del rei, exemplu paradigmáticu de la nefanda dinastía, comandaba les tropes que, dende Andalucía, taben preparaes pa marchar a les Amériques, onde la mecha la pólvora de la independencia taba yá prendiendo. El rei nun tuvo otra opción tres la sublevación que xurar la Constitución del 12 y preparase pa, cuando pudiere, dar otru güelpe.

El tiempu que va dende esi 1820 al tremendu 1823 fora conocíu como trieniu lliberal y Fernando VII, que gastaba paletó pero, especialmente, un caráuter rastiegu dende la cuna, guardó especial odiu al xeneral asturianu. Representaba Riego tolo contrario qu'el monarca: lliberal, arrogante, de gran carisma... Por si fuera poco, por frente a la mentalidá retrógrada y del más atávicu catolicismu del rei, Riego yera un francmasón anglófilu, frutu típicu de la fidalguía illustrada asturiana. Pa engromecer entá más la so fama, el so compatriota, compañeru d'armes y llugarteniente, el xixoniegu Evaristo San Miguel, convirtiéralu nun militar con toles virtúes supuestes, cuando la realidá yera que nunca destacara demasiao nesi ámbitu. Paez ser que fora tamién San Miguel el que compusiera o contribuera a componer la marcha que más lluéu, yá con un republicanismu espardíu, empezó conocese como Himnu de Riego, que la segunda república oficializó como himnu nacional.

Tóo indica que Riego fue más víctima que beneficiariu d'un protagomismu que nun buscó, anque-y prestara un tiempu, y que trató de quitase d'encima durante los años lliberales. Tampoco fuera Riego un republicanu, sinón un lliberal lleal a la corona, pero contrariu a ella si'l titular violaba los preceutos constitucionales. Neso nun fuera mui distintu a los demás illustraos asturianos, ente los que namás qu'alcontramos un ciertu protorrepublicanismu en Flórez Estrada, anque ésti siempres prefiriera'l modelu británicu qu'el francés. Namás que-y faltaba a Riego una muerte heroica pa entrar nel panteón más sagráu de los militares políticos y esa consideración fuera'l frutu de la decisión de un borbón psicópata. "Un bel morir tutta la vita honora", escribiera Petrarca.

Aquel 7 de payares Fernando VII quedó a unes llegües de Madrid. Nun quiso entrar na capital hata que nun tuviera confirmada la muerte'l xeneral. L'añoriciu, al tiempu qu'el miéu cuásique máxicu que tenía haza la figura l'asturianu yeren patolóxicos. Cuando-y comunicaron que Riego taba muertu y ensín cabeza, metiérase nel coche, espurriera les pates, sorrió y dixo: "agora, lliberales, glayái ¡viva Riego!".

Y'l de Tinéu sobroviviera na memoria, mitificáu, inclusive con canciones que recen que "Riego morriera cola espada na manu". Ye una figura tráxica, de xuru qu'una de les más tráxiques del XIX y de l'Asturies contemporánia. Pero, si fixéramos una historia de vida paralela un poco novelada, al estilu de Plutarco, vemos qu'el so antagonista, Fernando VII, sigue siendo güei una de les figures más deleznables y miserables de la historia.