El problema nun ye qu'haiga demasios conceyos

Ponía yo en Facebook, con un tanto de retranca, el siguiente comentariu: "Vuelven per onde faen cada equis años y proponen unir conceyos, esto ye, suprimir conceyos. Esta vuelta l'obxetivu ye la valle'l Nalón. Dicen que reduciríase'l gastu y ameyoraríen los servicios. Nun teo yo claro nin l'uno ni l'otro. Pero, en fín, ¿por que nun suprimir los 78 conceyos y centralizalo tóo n'Uviéu? Ye de suponer que, pola mesma llóxica, reducirase'l gastu y ameyorarán los servicios. O podríamos derogar los estatutos d'autonomía, inclusive eliminar los ayuntamientos, y centralizalo tóo en Madrid. La llóxica sedría la mesma y, amás, hai cuásique tres sieglos d'esperiencia".

Dalgunos seguidores intervinieron. Ente ellos L.luis Fernández Álvarez, gran y vieyu amigu de Tinéu, escribiera "Nun hai país. Guipúzkoa 88 municipios con una superficie de 1.997 kilómetros cuadraos. Madrid 179 municipios con una superficie de 8.021 y Nafarroa 272 municipios con una superficie de 10.381. Los datos d'Asturies nun los pongo, que los conoz vusté de sobra".

Entóncenes decidiera espublizar l'apartáu terceru del útimu articulu qu'escribí pa la revista Cultures (núm. 25, pp. 9-35, 2021) y tituláu "Cambiu, crisis y recambiu: la sociedá rural asturiana ente la traxedia y la esperanza".

Asina reza'l testu: 

                                 La tecnocracia nun casa con eso de los principios éticos

                                     Miguel Delibes

El casu ye que tou esti procesu lleva a l'Asturies rural a la despoblación. ¿Ye un síntoma?, ¿ye una causa?, ¿ye un efeutu? La verdá ye que nun lo sabemos mui bien, pero, ensín sabelo mui bien, plantéguense polítiques que, llóxicamente, fracasen una tres otra. Habrá munches razones pa esti despropósitu pero una ye más qu'evidente: con un tirallínies, un mapa y una comida nun reserváu d'un restorán d'Uviéu ye difícile que nada salga bien. Y, nel fondu, ye que les soluciones son previes al estudiu de los problemes.

Dicía Jesús Arango, que fuera conseyeru d'agricultura, nun artículu de prensa, qu'Asturies taba "ampliamente analizada y estudiada", afirmación que ye más que discutible. Asturies puede que tea mui bien descrita, pero non estudiada. La innovación y'l desendolcu, l'aplicación del conocimientu na vida práctica, que ye de lo que se trata n'últimu términu cuando se diseña cualisquier política económica, parte del conocimientu científicu, de la investigación. Ye un erru perespardíu confundir investigación o invención con innovación, la teoría cola política. La ciencia intenta pescanciar el mundiu y les rellaciones ente los sos componentes, la tecnoloxía lleva esi conocimientu a aplicaciones práctiques y, d'un lláu la política económica plásmalo nuna planificación, y d'otru la empresa llévalo al mercáu al traviés de la innovación. 

N'Asturies pué qu'haiga teoríes porque, a la fin, les teoríes son universales, como tamién hai descripciones. Pero lo que sobren nun son estudios, sinon ocurrencies que, dempués de plantegaes, busquen na universidá y otros centros profesores ya investigadores que les avalen, faciendo, como diz la espresión coloquial, un traxe pal moñecu. De fechu, el mesmu Arango diz, citando a Stiglitz, que los principios claves d'una estratexa de desendolcu deben tar fundamentaos "nuna nuea visión a llargu plazu del territoriu obxetu d'analís, qu'implique una fondera tresformación de la forma de pensar en rellación a los métodos de producción".

De los tres subsistemes de poblamientu, ciudá, villa y aldea, n'Asturies ta en grave crisis l'últimu que, precisamente, ye la forma más propia del país, la que conforma la identidá territorial y sociocultural, anque non toles aldees son iguales. Por eso, anque'l vaciamientu rural ye un fechu, un datu, ye mester que, por selo, seya interpretáu, ponelu en rellación con otros y sacar conclusiones, envede aplicar indices xenéricos pensaos pa otros territorios y pa otru tipu de sociedá. De les 859 parroquies del país, un terciu tién una densidá de menos de diez habitantes por kilómetru cuadráu, que ye onde ponen convencionalmente los xeógrafos convencionales l'umbral estadísticu de desertificación. Hai urbanizaciones eslusives en mediu mundiu onde l'indiz ye muncho más baxu, dicho seya por anotar y pa dicir qu'el simple datu de densidá mui poco indica. La mayor parte d'eses parroquies tan nos conceyos interiores del oriente y'l suroccidente, pero nun ye lo mesmo una collación con cayía natural haza Cangas del Narcea qu'otra cercana a una villa turística como Llanes o Ribeseya; como nun lo ye una parroquia de Los Picos d'Europa, nun entornu de parque nacional, qu'otra del altu Ayer con cayía a zones urbanes tamién en procesu de desertificación y tremendamente deterioraes pola desindustrialización. La descripción ye la mesma pero la política a siguir, la prescripción, tien que ser, necesariamente, diferente.

En 141 collaciones hai menos de cincu habitantes por kilómetru cuadráu, datos equiparables a Mongolia y a Llaponia, los países con menor densidá demográfica del mundiu, lo que nun quita pa que la renta media de los llapones seya sustancialmente superior a la renta media de les parroquies menos denses d'Asturies. Y tendremos que buscar desplicación a que la única parroquia de tol país despoblada dafechamente seya San Adrianu, nel suroriente'l conceyu de Grao, que ta a pocos kilómetros d'Uviéu.

Pero ye que ta partiéndose d'una realidá que nun ye l'asturiana, sinón la d'otres zones, nes que les ciudaes tan creciendo sobro la perda de población del mediu rural y, más tovía, de población procedente d'otres ciudaes de tamañu mediu, dalgunes d'elles a muncha distancia del centru receptor. Nel casu d'Asturies, ata hai unos años, les villes y les ciudaes, principalmente les dos más grandes, engromecíen a costa de los conceyos de les dos periferies, la oriental y la occidental. Pero anguaño prácticamente tolos núcleos pierden población y mui particularmente los centros urbanos de les vieyes cuenques mineres.

Pesie a tóo ello, los programes y propuestes lleven siendo los mesmos dende hai cuarenta años, coles mesmes recetes y la última tan destinada al fracasu como la primera, y con más claridá por, precisamente, el tiempu que pasara. Recordemos lo escrito más arriba: en 1979 yá se falaba d'un área metropolitana con un metrotrén ente los sos núcleos. Pero ye que si miramos les decenes de programes que siempres ye'l mesmu, atoparemos nomes de tecnócrates que, resulta, tamién son los mesmos.

Como diz acertadamente Xosé Alba, siempres se piensa en polígonos, n'infraestructures de tresportes, en buscar inversiones como seya y onde seya, cuando lo más razonable sedría "valorar más les condiciones bioxeofísiques y de poblamientu que mos faen distintos y atractivos, y propiciar l'encax d'un capital humanu nada despreciable". Neso coincide con los teóricos del desendolcu llocal endóxenu, como Vázquez Barquero, que, por cierto, participó durante una década nos alcuentros de la rexón Esva-Entrecabos (Cuideiru, Valdés, Salas, Tinéu, Ayande), aconceyamientu que muncho contribuyera nel cuerrespondiente programa LEADER. Pero Alba va más allá, a poner sobro la mesa la errónea y anticuada forma de plantegar les coses ente nosotros, incluso cuando se fala de reindustrializar, que ye la de "medir en tonelaes", mientres que la especialización debe siguir parámetros d'altu valor añadíu. Asina, afirma que facémosmos de contino trampes al solitariu, como cuando comparamos, por exemplu, el movimientu de mercancíes nel norte y nel llevante d'España: "dicen que tamos per encima, pero equí movemos tonelaes ya ellí mueven valor".

Asina, por exemplu, tamos asistiendo, otra vuelta más, al proyectu de reducir el númberu de conceyos. Ye'l proyectu de siempres y fechu polos mesmos de siempres, que deben tar emperraos en pasar a la historia como los nuesos particulares Javier de Burgos. Tol problema d'Asturies ye que tien una barbaridá de conceyos, 78. Analicemos.

España tién 8.114 municipios. Si dividiéramos la superficie total del reinu ente esos ocho mil y picu ayuntamientos saldríamos una media de 62 kilómetros cuadraos pa caún. Conforme a esa media Asturies tendría 169 conceyos. Resulta que tién 78. Pero si tolos conceyos asturianos foran iguales na so superficie tendríamos 78 del tamañu de Parres, Castropol, Llaviana, Mieres o Villayón. Pel so lláu, la provincia de Burgos tién 371 municipios, 362 la de Salamanca, 310 de la Barcelona, 291 la de Zaragoza y 179 la de Madrid. 

Cientos de municipios d’España tienen un territoriu de menos de 10 kilómetros cuadraos, cosa que n’Asturies namás pasa en Noreña y Muros. Decenes de municipios tienen menos de 3 kilómetros cuadraos ya en Valencia hai ún, Llocnou, que tién 0,04 kilómetros cuadraos, 100 metros de llargo por 60 metros d’ancho, contando con una una plaza, dos cais, ochenta cases y l’edificiu consistorial. Tamién tién una ermita, una farmacia ya un taller de costura. Nun hai bar. El cimenteriu ta notru pueblu y l’augua potable tráenlo de la capital. Mui cerquino ta otru municipiu, Emperador, que, con 0,10 kilómetros cuadraos, cabría en La Escandalera.

Pero tamién danse tendencies contraries. Asina, Navarra, con una superficie asemeyada a la d’Asturies y con una estructura económica de les más equilibraes d'España, si non la más equilibrada, tién una atomización municipal sosprendente: cuenta con 272 municipios. Na rodolada de Pamplona hai tres pueblos que sumen, ente los tres, 5 kilómetros cuadraos: Villava, Burlada y Ansoaín. Villava tién menos d’un kilómetru cuadráu y Burlada constituyérase como municipiu en 1978. En Noreña, el conceyu condal, el más pequeñu d’Asturies, caben tres Burladas, cinco Villavas, sesenta Emperadores y ciento vente Llocnous.

De los 78 conceyos asturianos 57 superen la media d’estensión de los municipios españoles. Cangas del Narcea ocupa’l puestu 21 por tamañu de to’l reinu y Tinéu el 39. Pela so banda, Carreño, Navia, Cuaña, Tapia y Les Regueres sedríen el municipiu mediu español. Y muncho perriba la media tan tamién, por orde y dempués de Cangas del Narcea y de Tinéu, otros dieciocho: Ayer, Valdés, Ayande, Ibias, L.lena, Casu, Somiedu, Piloña, Villaviciosa, Llanes, Cabrales, Salas, Grao, Cangues d’Onís, Siero, Quirós, Miranda y Ponga.

Otra cosa bien distinta ye la ineficiencia más o menos xeneralizada del gastu públicu, con servicios que podríen ser comunes a varios conceyos, dende la secretaría municipal al caltenimientu de viales o recoyía de basories, pero eses funciones comunes nun lleven apereyao por necesidá la supresión de consistorios nin la centralización política na villa más grande d'una rexón.

Detrás d'estes posiciones hai una desconfianza haza lo llocal y, mui particularmente, haza lo llocal rural. Consideren Asturies como un país conservador, resistente escontra cualisquier cambiu, lo que lu sitúa frente a la modernidá, amás de tar acocáu de llocalismos, particularmente nos conceyos rurales, onde les mentalidaes son más estreches. Lleven diciendo esto, como mantra repetitivu, dende hai cuarenta años, y, como víamos enantes, son los mesmos o los discípulos de los mesmos los que planteguen la custión.

Lo primero que debemos entrugamos ye que, si en cuarenta años fora imposible modificar esos comportamienros sociales, ¿pa qué incidir nello y reincidir en polítiques que nacen fracasaes y nun dar l'asuntu por perdíu y gastar esfuerzos y dineru públicu notres coses? Cuando un científicu observa qu'una llínia d'investigación ye improductiva dempués de varios intentos, y cuarenta años ye un llargu períodu, espubliza les sos conclusiones y eso permite a otros que nun pierdan el tiempu nun camín del qu'elli yá descubriera que nun tien salida. Y, dende lluéu, nin la comunidá científica nin los patrocinadores, seyan públicos o privaos, siguiríen confiando nesa persona si sigui emperrada en volver a lo mesmo pa llegar a la mesma conclusión de que nun hai solución posible.

Decir que los llocalismos nun esisten sedría tanto como nun reconocer la realidá, pero nin son endémicos d'Asturies nin mayores nos conceyos que na rexón central. De fechu, la ciudá policéntrica con metrotrén, plantegada yá en 1979, sigui ensín afitar la primera piedra porque la desconfianza de Xixón haza Uviéu y d'Uviéu haza Xixón torgara cualisquier posibilidá. Últimamente aporta col so llocalismu Mieres, precisamente sobro un asuntu vital pa una adaptación a la sociedá que yá nun ye tan nuea, sinón plenamente desendolcada, como ye la universidá. La griesca ente Uviéu, Mieres y Xixón pa llevar determinaes especializaciones, con argumentos de toa triba menos científicos y docentes, ya con un rectoráu calláu como si l'asuntu nun fuera con él, sí que fora un alderique de campanariu.

No que llevamos de democracia y d'autonomía reforzárase'l modelu de concentración territorial, ente otres coses porque toles polítiques se fixeron dende'l centru urbanizáu, ensín atender pal mundiu rural, colo que nun se produxo una necesaria cohesión campu-ciudá nin esistiera una verdadera política territorial pa los conceyors rurales, frutu del desconocimientu del propiu país y de l'ausencia d'un complexu científicu ya una alministración independientes del poder políticu. Por exemplu, ye toa una declaración d'intenciones, y d'ignorancia a un tiempu, lo que declaraba en 2006 el presidente Álvarez Areces a un periódicu: "Asturies va ser un parque temáticu vivu d'oriente a occidente". Escribía Sánchez Vicente hai un tiempu qu'Ángel Expósito entrevistaba na radio a una responsable de turismu del gobiernu d'Asturies: "¿a vustedes nun-ys da rabia cuando sienten falar de  nacionalidaes históriques, y a vustedes escaécenlos, vustedes que son el primer reinu d'España, que tienen el  prerrománicu, l'arte rupestre...? Y la rempuesta de la benemérita ye como si nunca reparara nello o como si, reparando, nun quixere molestar a naide por dalgo no que nosotros sobresalimos".

Tener la vocación política pa solucionar una custión como ye la supervivencia del mediu rural nun ye, evidentemente, una condición suficiente pero, ensín duldia, ye necesaria. Y bona parte de la posibilidá d'esitu ye contar cola xente y cola so opinión, lo mesmo que colos profesionales que tan a pie d'obra nun territoriu. Les decisiones deberíen tomase adoptando puntos de vista de cercanía a los problemes, y non tanto dende los despachos de la capital, en particular, y de les ciudaes en xeneral. Pisar el tarrén ye lo mínimo que tien que facer quien tien la responsabilidá de dirixir el mundiu rural y llexislar sobro ello. En Francia lleven faciéndolo dende siempres y nel Reinu Uníu de más recién, polo qu'ellí entrar nel mundiu rural nun ye pasar el túnel del tiempu nin cruzar l'espeyu d'Alicia.