Una güeyada al seutor de la sidre por dos doctores n'economía

(La Sidra)

Llucía Fernández Marqués: David M. Rivas, profesor d'estructura económica na Universidá Autónoma de Madrid, y Xosé Alba, profesor d'economía aplicada na Universidá d'Uviéu, dambos doctores n'economía pola Universidá Autónoma de Madrid, valoren ente otres custiones l'efeutu de la emigración nel mercáu sidreru. David Rivas y Pepe Alba son un pozu ensin fondu d’anéudotes, hestories con conteníu ya informaciones relevantes y sentilos falar ente ellos ye una esperiencia intensa. Falamos d’economía, d’emigración, del fenómenu vascu, d’oportunidaes perdíes y polítiques enquivocaes, de la caltenibilidá y de muncho más, polo que nun podemos más qu’ufrir un resume de toles idegues vertíes nesti conceyu. Asturies carez d’una descomanada emigración, cola correspondiente perda de población, en xeneral, y de población mozo, en particular. Brevemente, como economistes, ¿cuálos son los motivos d’esta sangría poblacional?

David M. Rivas: Hai un elementu que ye fundamental, y ye que tenemos una economía que tien mui baxa productividá, namás hai tres o cuatru sectores que tienen un ciertu pesu y son sectores que, o bien creen pocos puestos de trabayu o puestos de trabayu mui poco cualificaos. El turismu seguirá creciendo, non porque crezca muncho, sinón porque la so importancia proporcional dientro la economía asturiana va a más. Con esti modelu de mercáu llaboral los chavales que valen un pocu, qu’estudien o que tienen un pocu talentu pa lo que seya, incluso pal turismu, van colar. Amás ye que tenemos una población moza más preparada que la media española, un sistema educativu meyor que la media española, lo que permite que la xente mozo tope trabayos fuera, y normalmente, que yos vaiga bien allá onde van, colo que nun hai retornu. El problema demográficu que tenemos ye tremendu, va cayendo la demografía y nun hai dengún visu de que vaigan facer na al respeutu.

Xosé Alba: Son munches coses les qu’infuyen. Daqué que nun se tien en cuenta ye que munches veces, por nun tomar determín, na sociedá van tomándose decisiones seliquino, individuales o grupales, que van llevándola nuna determinada direición. Ye necesario ser cosciente de que les decisiones que se tomen en ca momentu tienen consecuencies sociales y económiques a llargu plazu. Nun momentu dau coses que paecen superficiales van camudando la sociedá y too va sumando o, nesti casu, restando.

L.F.M.: ¿Cómu inflúí esto nel consumu de sidre?

D.M.R.: La mocedá agora nun sé cuénta sidre tomará, pero tómala, más que cuando yo entré na ventena, pero claro, el problema ye que consume sidre comu consumiría cualquier otru productu, colo que lo que cuerre pelligru de perdese ye’l mundiu la sidre. Sidre seguirá bebiéndose tola vida y de xuro meyor sidre que la que tomábemos nosotros, pero la rotura sociocultural ye evidente, primero porque la mocedá que marcha importa modelos de consumu propios de fuera y aplíquenlos equí, segundo porque mengua la sociedá rural y tercero porque los chigres nes ciudades tan mui pensaos pa un ciertu turismu que ta siendo asumíu polos propios asturianos; los que son d’equi faen ya les mesmes coses que los que vienen d’afuera, asina que puedes topar a asturianos comiendo "rapitos” con sidre. La mocedá, que ye como una esponxa, nun ve ninguna razón pa seguir una tradición cola que ya nun tien venceyu. Na mocedá n’Asturies hubo una ruptura pergrande nos caberos años, una desconesión cultural grande. Somos una sociedá que pasó de families troncales mui grandes a una familia nuclear mui piqueña y a un allonxamientu importante. La evolución foi mui rápida, la ruptura completa. Per otru lláu tamién ye verdá que conservamos munches coses que notros llaos se perdieron. Tenemos una identidá mui fuerte.

X.A.: Sí, hai una identidá fuerte, lo que pasa ye que llueu nun se da puxu a les coses. Ves que los vascos tan ehí naguando por facer una hestoria de la sidre como seya, aunque veas qu’hai llagares asturianos que llevaron pallá y tan presentándolos como vascos. Equí, que sí lo tenemos, de verdá nun se valora. Alcuérdome, por casu, de Robin Walker, orixinariu de la frontera angloescocesa, que quedare impresionáu cuando vieno equí y vio a la xente canciando nos chigres: “eso allí perdiérase nel sieglu XIX”. Ye una cultura que pa nós ye lo normal, pero que pal que ye de fuera decátase de la fuercia que tien.

D.M.R.:  Eses son les coses que se van perdiendo al nun tar la mocedá viviendo la sidre nel so día a día. Va perdiéndose tóo. Yo nun culpo a la mocedá. Los vieyos tenemos esa manía. Nun ye problema d’ellos, sinón de que la sociedá funciona comu funciona y somos un país que se da mui pocu a valer. Otru tema qu’afeuta al consumu ye que n’Asturies marquen los umbrales de renta dalgunos salarios y pensiones mui altes. N’Asturies con mil euros nun se vive, en zones del sur d’España, sí. Equí el que tira p’arriba de los precios ye’l prexubiláu del metal, el prexubiláu de la mina, de la naval, los funcionarios... pensiones altes de paisanos que cotizaron munchu munchu tiempu y que suben los precios a un nivel que los chavales que van entrando en mercáu nun pueden aceder. Si les pensiones anden de media polos 2.000 € y los sueldos por 900 €, trabayar nun permite mantener el ritmu, hai un desaxuste completu. Na sidre pasa menos que notres coses porque la sidre ye un productu relativamente baratu, en proporción, pero claro que se nota. Los chavales equí nun consumen como los paisanos, nun pueden, y cuando digo chavales digo ya la xente de trenta años, que nun puen permitise salir de chigres, tienen que quedar en casa... o marchar. Los que permanecen equí, con trabayos de miseria, nun tienen perres pa tomar sidre; los que tan cualificaos van a la Universidá d’Uviéu, que tien una bona calidá de formación y cuando lleguen al mercáu ven que la única forma d’aprovechar esa formación ye marchar.

X.A.; El de la formación ye un tema importante, porque les coses tienen que ser compensaes. Cuando se fala de desendolcu hai definiciones mui guapes que falen d’esi medre acompasao de les coses. Lo que pasa equí ye que la formación va per delantre de la sociedá. Si tu tienes xente que sabe facer les coses y lluéu nun ties una estructura empresarial y gubernamental que dexe qu’esa xente faiga lo que sabe, nun van quedar equí. Y non solo poles cuestiones económiques, sinón porque nun tan dimpuestos a inorar lo que saben y seguir faciendo les coses como nos años sesenta, como pasa en munches coses d’Asturies, mesmu nel sector priváu que n’alministración. Hai munches inercies que nun dexen espoxetar a la xente mozo.

L.F.M.: ¿Ye demasiao optimista camentar qu’esta emigración pue derivar nun xorrecimientu del consumu de sidre fuera d’Asturies?

D.M.R.: Una oportunidá perdía nesi sen foron los centros asturianos fuera d’Asturies, agora yá menos importantes por mor del acurtiamientu de les distancies. Asturies, si a principios de los años 80 hubiere aprofitao tol entramáu de los centros asturianos fuera, que teníen una potencia tremenda, hubiera garrao muncho más puxu. Yeren auténticos centros de poder, una rede qu’esiste y esistía y nun se utilizó, como podría facese, pa buscar una identificación cultural potente.

X.A.: D’hai mediu sieglu pa equi ties un montón de sidreríes en Madrid, pero d’un tiempu p’acá ta habiendo menos asturianes y sin embargo ves más vasques. Ta relacionao colo que diz Rivas, el soporte d’aquelles sidreríes de Madrid venía de los emigrantes asturianos, pero taben lligaes a unos vezos, a una identidá a la que nun se-y dio valor, a una forma de consumu. Ehí taba Casa Mingo, que se fundó por xente asturiano que fuere a Madríd. Llevaben la sidre d’Asturies, pero d’aquella picábase, agora ya s’estabiliza y ye otra cosa, pero en 1880 aquello nun yera pa bebelo, asina que buscaron la forma de gasifícalo y hai una fábrica de sidre achampanao en Madrid y una llei fecha espresamente pa ellos.

D.M.R.: Non solo eso. Como nun había espaciu, punxeron un llagar en vertical, l’únicu que conozo...

X.A.: Sicasí, daqué ta faciéndose bien cola internacionalización. Teo un trabayu d’un alumnu sobre comerciu con Xapón nel que dedica bien d’espaciu a analizar el xorreciente mercáu de la sidre asturiana nel mercáu nipón, perinteresante. Una de les coses que destaca ye cómu Mayador vien vendiendo sidre nos mercaos internacionales.

L.F.M.: ¿El sector sidreru podría apurrir una salida a la situación económica y llaboral, y per ende, a la poblacional?

D.M.R.: Mire. tolos años hai unes xornaes na Universidá n’Uviéu nes que’l periódicu siempres entrevista a los estudiantes y recueye lo que piensen. Los estudiantes retrucaben, añu tres añu, que la solución d’Asturies ta nuna política ambiental, una política agroindustrial y n’I+D+I, les tres polítiques que’l gobiernu d’Asturies nun sigue. Los estudiantes, d’económiques y empresariales, veíenlo clarísimamente. ¿Cómu ye que’l gobiernu nun ye cosciente de que per ehí van los tiros? El sector agrariu en xeneral n’Asturies ye mui viable. Nun hai falta siquiera inventar una política mediuambiental. Por exemplu, los acuíferos d’Asturies nun tan contaminaos, porque nunca s’abonó con abonu industrial. Convertir les pumaraes y l’agricultura asturiana n’agricultura caltenible, con toles comines que pongamos, nun ye una xera complicao, porque ya ta mui cerca de lo que ye una agricultura caltenible.

X.A.: Na economía asturiana falta un fin xeneral, planificación. Siempres tamos buscando una solución pa mañana, o p'ayer, hai que buscar soluciones a más llargu plazu. Un turista llee un artículu sobre Asturies, o ve un están nuna feria, gusta-y, entra n’interné, busca información y alcuéntrase con que venir a Asturies ye complicadísimo, asina que pasó a la hestoria l’artículu que vien de lleer. Pasa lo mesmo coles propuestes pa que vengan empreses. Nun se trata de facer llabor nun momentu determináu, ye cosa de que tou vaiga a una, que nun dixebremos les distintes rames, el conxuntu de lo que se fae un y otru díi.

D.M.R.: Equí tóo se fae a golpe de publicidá y d’ocurrencies. Por poner un casu, llega’l mes de mayu y una selmana toles mariñes de Villaviciosa faen les Xornaes de la Llámpara. Llueu vas n’ochobre y igual namás hai un bar que tien llámpares. Nun hai continuidá.

L.F.M.: ¿Qu’estratexes podría siguir el sector sidreru p’adautase a los nuevos mercaos? ¿Tan aprofitándose les oportunidaes que brinda a la sidre la tendencia “bio”, “eco”, “saludable” y demás?

X.A.: Hai inercies que nun dexen que se faiga por aprofitar les coses. Yo llevo munchos años falando del tema esti con xente de la sidra. Productu más d’economía circular nun lo hai. Ties unes botelles que s’utilicen 50 vegaes de media, y nun hai nin una información que lo desplique. La última vegá que falé d’esto con un llagareru díxome “a veces cuasi nin merez la pena, sal más barato mercar otres que pasar a recoyeles”. ¿Cómo sedremos tan zotes? Llevamos faciendo una cosa años y años y agora que munchos quieren facer daqué paecío ¿vas dir tú al contrario? Nun son nin a ponese d’alcuerdu siquiera pa poner una etiquetina ehí desplicándolo pa beneficiase de tol cambéu social y de les midíes al rodiu la economía circular.

D.M.R.: Cierto, hai oportunidaes que nun s’aprovechen. Tando yo tovía estudiando, nel añu 79, fice un articulín onde decía que la pectina yera ún de los componentes fundamentales pa les conserves. D’aquella, el comerciu de la pectina taba monopolizáu por dos empreses norteamericanes. La meyor pectina ye la que sal de la magaya áceda, y equí la magaya como muncho echábase a les vaques. Sí ye verdá qu’hai tamién cuestiones positives. Hai dalgunos empresarios, nuevos, suelen ser xente mozo, qu’entamen a dase cuenta de qu’estos subproductos tienen salida. Hai llagareros y empreses sidreres con una evolución perbona, pero nun yos ponen más que torgues.

X.A.: Ta nidio que podíen facese munches más coses. N’Uviéu, teniendo muncho menos tradición sidrera que nes cuenques, xúntense unos cuantos empresarios d’ehí, de la cai Gascona, punxéronse d’alcuerdu y agora nun hai turista que nun lo conoza. Tien un movimiento impresionante. ¿Y por qué? Por un movimientu, una collaboración, un compromisu, una defensa de la cultura sidrera, faciendo coses como los cantares de Gascona. Promover estes coses ye fundamental, tendría que fomentase iniciatives asina pa destacar les coses valoratibles que tenemos. Hai munches coses n’Asturies que nun facemos por aprovechales, Esto de la sidra, por exemplu, cuando se ve qu’hai una organización, funciona. D’otra miente, bono sedría que se cuidara la cadena de valor entera, dende eses mazanes que son les que tienen d'aprofitar la denominación d’orixe hasta les sidres de mesa, llicores, etcétera. Un conxuntu bienes que nun son poca cosa güei, pero que de xuru precisen midíes, ver cómo se tornen problemes de vecería, de caltenimientu de precios acordaos, de pocu réditu pa les pumaraes o del tamañu los llagares y l’usu de “química”.