"La muyer fue fundamental nel resurdimientu la sidra"
David M. Rivas: Mui bien, tocayu, y encantáu como siempres de tar equí. Ye verdá que tamos entrando yá na historia común mía y suya, y tamién de la mayoría los oyentes. Cola estructura demográfica qu'Asturies tien, ye seguro que los nuesos oyentes anden, mayoritariamente, ente los trenta y los sesenta años, y seguramente son más los del tramu altu que los del baxu. Esi asuntu de les anéudotes personales, si tan bien trayíes, ye mui interesante y da pa muncho. Tampoco puedes convertir, o yo nun quisiera facer eso, un programa como esti nes historietes de güeli escontra'l llar, pero l'anéudota personal, si la incardines bien na historia xeneral y colleutiva, si la filvanes bien colo xeneral, ye bien interesante. Yo siempres insistiera muncho a los mios alumnos qu'hai que tener procuru con absolutizar les dos grandes interpretaciones de la historia. Tovía hai una selmana, con motivu d'una conferencia que diera en Xixón sobro la vida y la obra de Flórez Estrada, insistía nello. Hai una historia de base idealista, que ye la que a min me tocó nel bachiller, na que tóo lo facíen los reis, los papes, los grandes guerreros, igual dalgún científicu, y que tal paecía que yera independiente de lo material, de cómo se producía, de quién producía y de quién se beneficiaba del productu. Y hai otra, la que me tocó na universidá, nuna facultá d'economía mui tomada polos marxistes, de base materialista. Esa ye la historia de les víes de tren, les tonelaes de trigu, el valor y la plusvalía, les contradicciones y la llucha de clases. Resulta que les dos visiones son ciertes en parte, pero falses si les asumimos n'esclusiva. Sabel la Católica necesitaba solucionar problemes demográficos y de distribución de renta con la busca de nueos espacios, pero, de nun contar con Colón, nunca diba llegar a América. Al final llegaríase, pero más tarde, ya igual llegaben los portugueses o los olandeses. La mesma revolución rusa desplícase poles grandes contradicciones del capitalismu imperial y atrasáu del zarismu, pero naide puede duldiar de que la figura de Lenin ye determinante. A lo meyor la revolución aquella o una asemeyada diba producise, pero igual n'España o n'Italia, o venti años dempués. La historia siempres ye la suma de la vida d'ún, entendía como personal, les creyencies ya eso, más toles circunstancies materiales que lu arrodien. Los individuos nun modelamos la nuesa historia llibremente, pero tampoco somos piedres de molín que mueve una historia ayena que, por mui materialista que mos la presenten, paezse muncho al destín, a la voluntá de los dioses.
D.C.: Amás la sidra dase muncho a eses anéudotes, a esa historia personal compartía.
D.M.R.: Sí, porque la sidra ye, por decilo de dalguna manera, una bebida mui sentimental. Al ser una bébora colleutiva, que se toma en círculu, compartiendo vasu, normalmente de pies, tien montones d'acasos y d'historietes. Tol mundiu, tolos sidreros d'Asturies tienen milenta histories pa contar y milenta personaxes que conocieron delantre d'unes botellines o embaxo los toneles del llagar, esa xente que compartía vasu nel barriu, n'aldea, en pueblu... Si tóo eso yes a filvanalo coles grandes corrientes de la historia da munchu xuegu, como en xeneral dalo la historia oral como auxiliar de la historia documental. A min gústame muncho lo que llamen historia mínima, por más que dalgunos consideren qu'eso de mínimo ye sinónimu d'intrescendente. Lo qu'Unamuno llamaba intrahistoria o lo que, simplemente ye anéudota, recuerdu personal o tradición llocal o familiar, ye perinteresante. Ente otres coses permite dalgo fundamental, lo que Josep Fontana, un materialista, por cierto, definía como pensar la historia.
D.C.: Amás ye dalgo que mos toca dende mui guah.es porque la sidra, a diferencía d'otres bebíes, ta mui venceyada a la infancia y caún tien unes vivencies distintes, dende dir a pañar mazana cola familia, o'l llagarín que tenía'l to güelu, o la romería a la que dibes colos tos pás, o'l chigre'l to barriu. Cuásique tolos asturianos tenemos una historia na que ta presente la sidra y dende bien neños.
D.M.R.: Ye verdá. El mio casu igual ye un tanto particular. Yo vengo d'una familia rural de Villaviciosa, el conceyu sidreru por escelencia, y, d'otra parte, del conceyu de Nava, que nun queda mui pertrás. Pero, amás, la mio familia de Xixón, de Cimavilla concretamente, yera mui sidrera y chigrera. Nesti sen, nun tuviera influencies culturales diferentes, falando de lo que ye la cultura tradicional. Evidentemente, tuve dende mui rapacín accesu a la cultura universal y traté d'aprovechar bien esa conocencia, pero la vida mía, el día a día, por exemplu lo que bebía y comía, nun yera mui diferente a la de trenta años enantes o más. Cuando tomé contautu con otres formes de vivir, incluso nel mundiu rural, vía que les coses yeran diferentes. Yá-y falé un día de que yo diba tolos años a Cebreros, una zona de gran tradición vinícola, y ellí los neños de la mio edá, ata yá los quince o diecisiete años, nun andaben atravesaos peles bodegues como equí andábamos pelos llagares, y tampoco pelos bares como equí pelos chigres. Yo supongo qu'una razón estriba en que la casería ye una unidá vivencial, lo mesmo habitacional que productiva, mientres qu'en Castiella les tierres tan fuera'l pueblu, lloñe de la casa, y les bodegues tamién. Sí había cases que teníen cueva, bodega soterraña, pero normalmente pisaben la uva notru sitiu y treslladaben dempués el mostu. Anque, quiero decilo, yo tamién soi un bon bebedor de vinu y valoro muncho tola cultura al rodiu d'ello, que ye impresionante. Tamién ye verdá que la sidra, al tener menor graduación, dábase enantes a los chavales, seguramente demasiao temprano. Ye'l día de güei que munchos mélicos asturianos, especialmente los rurales, dempués d'entrugar al paciente si bebe alcohol añade la pregunta de si bebe sidra, porque la xente estrema l'uno de l'otro.
D.C.: ¡Hahaha...! Ye verdá.
D.M.R.: ¡Si, ho! Yá sabemos eso de que "si nun fuera que bebemos menos augua, tábamos como'l ganao".
D.C.: ¡Hahaha...!
D.M.R.: Amás hai una cosa qu'igual a munchos-ys llamaría l'atención si pararan a pensalo. Yo siempres, dende neñu, fíceme preguntes rares, como la de por qué los inseutos nocturnos, siendo nocturnos, van a la lluz. Coses d'eses. Pues siempres me causara estrañeza qu'a los neños-ys gustare la sidra, una cosa tan ácida. Yo teo un sobrín que de bien pequeñu andaba a gates pel práu la romería llambiendo la sidra que moyaba la herba.
D.C.: ¡Hahaha...!
D.M.R.: El casu ye que me contó ún que sabe d'eses coses, qu'el sentíu'l gustu nun desenrrolla armónicamente y que lo ácido percíbese más tardíamente, mientres que lo dolce nótase dende mui ceo. Entós, caro, los neños perciben los zucres de la sidra pero non l'acéticu. Yo siempres me fío de la xente que sabe de lo que yo inoro, anque igual nun ye asina, que tamién ye posible, y resulta que ye qu'el xen asturiensis vien programáu pa disfrutar de la sidra.
D.C.: Quedamos nel últimu programa cola llegada al chigre de los del babyboom nos años ochenta, esa gran cantidá de ventiañeros que naciera nos años sesenta, cuando'l desarrollismu. Esos mozos únense al procesu de resurdimientu de la sidra qu'entamara cola xeneración anterior, la de David Rivas, una xeneración que tamién participó notros resurdimientos qu'impulsaron tolo que ye la cultura asturiana.
D.M.R.: Asina fora la cosa. Hai un indicador qu'igual la xente más mozo nun viera nel so momentu pero que sí vimos los que yá enfilábamos pa la trentena. Vimos como pesllaben chigres y abríen bares modernos, especialmente cafeteríes. Fora un fenómenu sociolóxicu y urbanu mui propiu d'esa dómina: los chigres morríen a manos de les cafeteríes y los grandes cafés a manos de los bancos. Nos ochenta empezamos ver el fenómenu contrariu, un desandar lo andao no que toca a los bares. Eso diérase mui especialmente nel centru les ciudaes, entamando en Xixón, siguiendo n'Uviéu y un poco dempués n'Avilés. Como venimos falando dende hai tiempu, nos barrios obreros el chigre caltúvose meyor nos sesenta y setenta, y, evidentemente, nos pueblos. El cambiu fue talu que les cafeteríes que sobrovivieron son güei yá establecimientos tradicionales, llugares históricos. Teo que reconocer que pa min fora particularmente reconfortante ver cómo en la Cimavilla de Xixón pesllaba un tablao y convertíase en chigre, en sidrería. Porque tamién ye'l tiempu nel qu'esparde la denominación de sidrería, emplegada pa un llugar que yá nun ye'l chigre clásicu, porque queda nuna situación intermedia ente ésti y'l restorán. Taba arrepostiando la sociedá asturiana a les observaciones crítiques d'aquel secretariu'l sindicatu franquista, amosando tanto penoriu pola crisis de la sidra y de los chigres frente a les bebíes d'importación, el vinu y los combinaos. Recuérdome d'un rapaz, un rapaz cuando entós, Rubén Reza, que tuviera un tiempu na hostelería en Zaragoza y volviera p'Asturies pa poner en Xixón un chigre onde enantes había otra cosa. Y decía que diba ser como Pelayo: "si Pelayo echó d'equí a los moros yo voi echar a los norteamericanos".
D.C.: ¡Hahaha...!
D.M.R.: Yera una reflexón mui bien trayía. Los bares de los sesenta, mui americanos, representaben l'imperiu, la conquista, que yá nun yera árabe sinón norteamericana.
D.C.: Fuera una época de serrín, de charres nos chigres, de munchos críos pellí danzando, cola normalización de les nueses madres, de la mía, qu'empezaron dir a los chigres y nosotros con elles. Vaya, que tola familia andaba nello, que yá nun yera namás que cosa de paisanos. La sidra y'l chigre abrieran a tol mundiu.
D.M.R.: Yo toi seguru de qu'el papel de la muyer fue fundamental nel esporpolle la sidra y'l chigre dende finales de los setenta, y yá d'una manera mui acusada nos ochenta. Y ye fundamental por dos razones. La primera, dalgo ellemental, porque les muyeres son la metada la población, mera estadística. Siempres hebo muyeres sidreres, especialmente nel mundiu rural, onde yera la bebida de casa, anque tamién diben al chigre, pero en díes señalaos y col paisanu. Nes ciudaes tamién les había, pero yera menos normal, sacantes que fueran de la familia propietaria'l chigre. Esa afluencia de la muyer, sólo por custión aritmética, fizo subir el consumu y tiró, polo tanto, de los llagareros. Pero ye que, amás, normalmente, cuando la madre va al chigre lleva con ella a los neños. Evidentemente, les moces de la edá mía nun necesitaben dir del brazu d'un paisanu pa tomar sidre, qu'aquello yá nun yera la sociedá escura de los cuarenta o cincuenta. Les mios amigues diben al chigre con homes o ensín ellos. Pero les muyeres de cuarenta o cincuenta, la xeneración de mio madre, tovía taben un tanto encorsetaes y diben al chigre col so home. Y, caro, al dir el padre y la madre, con ellos diba tola reciella. Los neños vuelven al chigre como cuando diba yo, sólo que yo diba col mio güelu y agora van en comandita, col padre y la madre, y, fundamentalmente, porque los lleva ella. Y asina siguiera siendo ata güei. Yá comenté que paezme que, anguaño, les muyeres son más sidreres que los homes. Nun creyo qu'haiga estudios, pero yo yá teo cierta esperiencia n'analizar indicadores indireutos y toi por apostalo.
D.C.: Y mal güeyu nun tien vusté, non. Cuando la mayoría falaba de qu'el crecimientu económicu español nun pasaría del 2 por cientu, vusté dixo nesti programa que podría llegar al 4 y acercase al 5.
D.M.R.: ¡Ah, sí! Nun me recordaba d'eso. Pues yo emplego les estadístiques oficiales y los informes que tan a la manu de cualisquiera. Y nun teo nin programes sofisticaos de proyeiciones y correllaciones y faigo los cálculos a mano, poco más que con porcentaxes y cola régula de tres. Pero yá teo un pocoñín de viciu. Dalgo daprendí cola edá. Y sí, el crecimientu del PIB español fuera del 4,6.
D.C.: ¿Quién diba decir que la meyor predicción económica del 2022 diba dase nun programa como Les Fartures?
D.M.R.: Ya eso que fue enantes de comer. Si lo facemos a la sobromesa, con un bon auguardiente sidra, igual falamos del doble de crecimientu. De toles formes, como-ys digo munches vegaes a Monchi Álvarez y a Alejandro Fonseca cuando me conviden a La Buena Tarde, y rinse, dalgunos valimos pa tóo anque nun sirvamos pa nada.
D.C.: ¡Hahaha...!
D.M.R.: Hehehe...
D.C.: Fuera aquella una época d'afitamientu de llagares, de nacimientu d'otros, con un rellevu xeneracional que paecía difícile unos años enantes. Ye'l tiempu d'espoxigue, de los pegoyos de lo que güei conocemos nel mundiu la sidra asturiana.
D.M.R.: Paezme que yá diera dalgún qu'otru datu nun programa anterior. Nos años cuarenta había n'Asturies unos 800 llagares y nos sesenta ya yeran unos 400. Falamos de llagares industriales, evidentemente, porque cuéntense por miles los de les caseríes. Pero, anque yeran llagares que vendíen a los chigres de les villes y les ciudaes, yeran pequeños la inmensa mayoría, d'ámbitu mui llocal. Nos ochenta andaba la cifra polos 200 y polos 90 yá nos noventa. Nesti momentu tan censaos dalgo más de 100, creyo que 119, anque nun sé la cifra esauta. Pero unos nun producen tolos años, otros sí pero con cantidaes mui pequeñes. El casu ye que deben ser unos 80-85 los que tan activos de verdá. Lo que pasa agora, qu'antes nun pasaba, ye que tienen marques diferentes. La puesta en marcha de la denominación d'orixe alterió les coses, de manera qu'una bona parte tien, cuando menos, dos etiquetes. Y si yá falamos de sidra ensín filtrar, ecolóxica, brut, y de destilaos, sidra xelu, vermús, vinagres, gasificaes, dulces, multiplicamos les marques. Los llagares grandes presenten nel mercáu cincu marques o más y raru ye'l llagar que nun ufierta, cuando menos, dos. Amás el llagar mediu creciera en tamañu, aplicó munches llínies d'innovación y ta completamente profesionalizáu. El llagar más pequeñu y artesanal d'agora dá-y mil vueltes al meyor de los años setenta, quitando los mui grandes, como podíen ser les xampaneres y dos o tres de sidra d'echar.
D.C.: Esi fora un pasu perimportante. Pasar de la mayanza tradicional, coles prenses de madera, innovando, debió ser un esfuerzu grande pa munchos llagareros, pero ficiéronlo, cosa mui raro nel empresariu mediu asturianu.
D.M.R.: Ye verdá. Metiéranse nesi matu con valentía, con inversiones mui perriba de lo que arriesgaba la empresa media asturiana y tamién la media española. Ye verdá que fuera un esfuerzu sofitáu dende l'alministración, con aídes pa modernización, pa comercialización, p'ameyoramientos na calidá, lo mesmo que con una política de precios alcordaos, forciando dalgunes vegaes les lleis naturales del mercáu. Pero sí que vieron dalgunos llagareros, pocos nun primer momentu, que la demanda nun medraba coyunturalmente, sinón qu'aquello yera un cambiu sustancial nel mundiu sidreru. La nuea xeneración sidrera, vustedes, amigu Castañón, los del babyboom, les muyeres, un turismu que medraba claramente, tóo eso incentivó a los llagareros más avispaos o meyor informaos. Y más lluéu furruló la emulación: los demás vieron que yera rentable lo que taben faciendo otros. Eso sacó al llagareru asturianu de l'apatía por desgracia carauterística d'esti país, ancláu nun pasáu d'industries estrautives y perbásiques ensín dengún futuru, como yá vimos d'una manera llaceriosa.
D.C.: Van cambiando muncho les coses.
D.M.R.: Y tanto que camudaron. Enantes un llagareru yera un llagareru y puntu. Agora nun ye asina. Hebo n'Asturies una potente integración vertical nos últimos años. Hai mazaneros, empresarios que tienen pumaraes, normalmente esplotaciones familiares, la vieya casería. Hai llagares que faen la sidra y hai empreses, chigres, restoranes, hoteles, que la venden al consumidor. Esa ye la cadena producción-distribución-consumu de la que mos fala la teoría económica clásica. Pero agora les coses empiecen a ser diferentes. Un llagareru llanta pumares selleicionaos en tierres suyes o notres con alcordaes colos propietarios, maya y vende sidra, tien un restorán y un hotel rural, comparte con otres empreses puntos de venta nel centru d'Uviéu, en Cangues d'Onís, en Llanes, en Taramundi, en Madrid, en Barcelona, en Llondres o en Nuea York... ¿Ve la diferencia colo anterior, el gran saltu? ¿Pertenez la sidra al seutor industrial? ¡Non! Abriera la sidra un mundiu multifuncional. Eso ye fundamental pal mundiu rural asturianu. Namás qu'el llechi diera esi pasu, pero al coste, mui llamentable pal mio entender, d'una concentración práuticamente completa, la que llevara a que namás queda la Central Lechera Asturiana, un monopoliu con cara de cooperativa.
D.C.: L'etiquetáu d'aquella época supuso un enantes y un dempués.
D.M.R.: Bono, aquello fora un pandemonium.
D.C.: Una crisis, qu'enllenó páxines y páxines de periódicos.
D.M.R.: Fue terrible. Lo de la sidra n'Asturies, a estos respeutives, ye de traca. Yo, que lleo habitualmente prensa británica, nunca viera grandes debates en primera páxina porque n'Escocia subiera'l preciu la botella whisky una llibra esterlina. Tampoco hai un debate nacional porque una destilería de les Highlands pon la contraetiqueta en gaélico y un par de columnistes armen la de Dios argumentando que nun lo van entender los turistes o los parrorquianos de los pub de Llondres.Y equí tóo ye una traxedia. Sube'l preciu 50 céntimos y la de coller, un productor pon Asturies o llagar y yá tan los palurdos inorantes y cosmopaletos, incluyíos alcaldes, sacando'l so fégadu al aire. Lo de la sidra ye una gran traxedia siempres.
D.C.: El debate l'etiquetáu fue de campionatu.
D.M.R.: ¡Sí, sí! Yo nun lo llograba entender. Yo, amás de ser más xoven, yera profesor d'economía y pescanciaba mui bien les coses. Etiquetar yera fundamental si queríamos sacar a la nuesa sidra del consumu de pa en casa y pa los parroquianos d'un chigre y dotala del caráuter que merecía. La discusión fuera tremenda. ¿Y qué decir de cuando llegaron les sidres diferentes? "Esto nun ye sidra, esto ye pa que lo beban en Madrid, esto nun sabe a nada". Ye que los asturianos, un pueblu bastante repunante, sómoslo particularmente con estes coses. Delantre unes botellines nun hai santu que mos aguante.
D.C.: ¿Qué me va decir el presidente soberanu de los repunantes?
D.M.R.: Yá, yá... Pero sí que teníen razón en dalguna cosa aquellos repunantes. El nuevu modelu de sidra, la sidra de güei, siendo bona cuásique tóo, ye práuticamente lo mesmo, venga del llagar que venga y seya del añu que seya. Güei denguna sidra que te dan nun chigre ye malo, pero ye lo mesmo, nun hai palos. Pocos llagares corchen sidra estremao. Deben ser dos o tres, y nun quiero dar nomes, que mos ufierten sidra de la qu'enantes llamaben macho, potente, con un secante en condiciones. Agora tóo ye sidra de lo que llamábamos muyerina. Los términos igual son incorreutos políticamente, pero, a min, dame lo mesmo. Asina se decía dende'l XIX y asina lo daprendiera yo. Neso sí teníen razón los contrarios a la homonexeización comercial. Podemos facer una comparativa col vinu. A min cáfiame muncho que'encomparen la sidra col vinu, porque son coses diferentes y, perriba tóo, mundios diferentes. La tresllación de lo vinícola a lo sicérico ye una babayada propia de cosmopaletos de baxa cultura, mui de la prensa asturiana coles sos patochaes vinateres. Pero podemos facer comparances col vinu dalgunes vegaes, como tamién cola cerveza. Por exemplu: si tomamos un vinu de cabernet-sauvignon lo más seguro ye que seya un bon vinu, porque ye una uva escelente y mui adautativa a cuásique toles condiciones climátiques y edáfiques, pero resulta práuticamente igual si ye Cariñena, Chile, California o Burdeos.
D.C.: De toes estes coses, como yá vamos entrando en materia sidrera actual, calentando puquiñin a puquiñín, seguiremos falando nel prósimu programa. Prestara falar d'estos primeros años ochenta. Munches gracies, profesor Rivas.
D.M.R.: A vusté. Un placer.
.jpg)
