Indemnización transitoria: el poder del boletín

Nel últimu plenu de la Xunta Xeneral va aprobase un cambiu nel reglamentu qu'inclui una propuesta que yá presentara'l PSOE al iniciu de la llexislatura pol que se pretende que los diputaos que dexen de selo cobren una indemnización transitoria que, en principio, será l'equivalente a un mes d'emolumentos por cada añu de llabor y con un máximo de doce. Eso llevaríamos al equivalente a 66 pagues, entá nun sabemos si tomando una media, aplicando como base la última retribución o por un sistema de cómputu ponderáu. En principio paecería más razonable qu'esi cambiu lu decidiera la próxima corporación pero la cosa vien con priesa, dalgo mui desplicable. Ye de suponer que, dao qu'hai práuticamente unanimidá en favor de l'aprobación, podríen les sos señoríes esperar a les nueves elleiciones, pero'l problema ye qu'entóncenes nun beneficiaría a los actuales diputaos. Y la cosa tien el so interés, puesto que'l viniente mes de mayu la mortalidá, metafóricamente falando, va ser mui alta.

Argumenten los promotores de la norma que los diputaos nun tienen drechu a la prestación por desemplegu, como tien el restu los trabayadores, pero eso hai que matizalo, y muncho. El drechu a recibir una renta por quedar ensín trabayu ye una consecuencia de les lleis llaborales que se basa en dos principios, ún activu y otru pasivu. Per una parte, los trabayadores coticen a la segurida social ante la eventualidá de perder l'emplegu, lo mesmo que faen lo propio pa tener una pensión dempués de la xubilación. D'otra banda, ye un deber del estáu democráticu, del modelu social de mercáu del que solemos falar ente nosotros, protexer les rentes d'aquellos que son más vulnerables y que tienen menos poder pa incidir, precisamente, nel funcionamientu les lleis que condicionen eses mesmes rentes. Les rentes del trabayu, tanto les ganaes na vida activa como les tresferíes en casu de desemplegu y, más sero, na xubilación, formen parte del modelu llaboral y requieren un contratu determináu entre demanda y oferta de trabayu, col estáu como garante de drechos.

Por eso, precisamente, ye polo que falen nesti proyeutu como d'indemnización, porque bien saben qu'el so llabor nun puede equiparase al d'esi restu de trabayadores. Pero resulta qu'una indemnización ye lo que recibe una persona pol fechu de sufrir un perxuiciu, seya por un accidente, por una mala práutica alministrativa, pol incumplimientu d'un contratu, por un error xudicial, por un despidu improcedente... y ye evidente que, cuando un diputau cesa na so función o dimite por propia voluntá, nun ta sufriendo denguna lesión nes sos formes contractuales, nin tien un accidente, nin tampoco fuera despedíu, por simple fechu de que nun hai una rellación contrautual de caráuter llaboral. 

De toles formes, hai sistemes que permiten a cualisquier persona asegurar una cierta tranquilidá en casu de quedar ensín una fonte de renta, seya llaboral o non, y que tan presentes nel mercáu. Cuenta'l sistema económicu con fondos de seguridá, seguros de nómina, fondos d'inversión, inclusu con fondos corporativos que cualisquier grupu puede suscribir colleutivamente. Con eso los diputaos taríen cubiertos y faeríenlo d'una forma asemeyada a la los trabayadores: restando una cantidad de la so renta presente pa facer frente a una hipotética necesidá futura. 

La portavoz de Ciudadanos, Susana Fernández, anunciara que diba oponese al cambiu del reglamentu en varies coses, señalando particularmente, a la intención socialista de facilitar l'usu l'asturianu na cámara, pero que sofitaría esta indemnización transitoria porque los diputaos nun quieren tener más privilexos que los demás trabayadores pero tampoco menos. La razón de la priesa de Ciudadanos en que la norma seya aplicable agora y non na siguiente llexislatura ye tan comprensible como bochornosa. Por cierto, ¿qué querrán decir colo de transitoria? ¿Añadirá'l Partido Popular tamién lo de difería? El casu ye que, siguiendo colo anterior, los diputaos nun coticen por desemplegu, colo que nun ven mermaos los sos ingresos brutos, como si que los ven los demás trabayadores. Podríen recurrir al fondu privao o a llegar a un alcuerdu col ministeriu cuerrespondiente, si ye qu'eso pue facese. Pero non, la opción ye nun cobrar menos en términos netos y cargar la so renta diferencial positiva a los presupuestos, esto ye, a los que paguen relixosa y obligatoriamente cola so renta salarial. Pues si nun ye un privilexu, y bien notable, el fechu de financiate a través del Boletín Oficial que redautes tu mesmu, nun sé lo que será un privilexu, del que sí sabía l'enciclopedista Diderot cuando escribiera que ye "un atentáu contra la llibertá xeneral". 

Alejandro Suárez, d'zquierda Unida, coincide con Dolores Carcedo  n'argumentar qu'esta ye una midía qu'aplica'l Congresu y la mayoría de los parllamentos autónomicos y que ye una garantía democrática. Sigún él, eso permite que pueda exercer la política cualquier ciudadanu, independientemente de la so situación socioeconómica, además de que evita la esistencia de puertes xiratories. Paez ser que quien sal diputáu cobra menos que la mayoría de los trabayadores o que, por selo, cuando lo dexa va ser represaliáu y nunca va volver ser contratáu pa nada y por naide. Pero, amás, ¿ye que nun se puede facer política pagando un seguru de nómina o constituendo un fondu?, ¿sólo se puede facer política cobrando íntegramente y cargando la llamada indemnización al contribuente? Y sobro lo de les puertes xiratories, ¿ye que tolos diputaos d'Asturies, van ser conseyeros d'Arcelor, Iberdrola, Acs o Iberia? Pero, a mayores, si como diz la socialista Carcedo, les Cortes y cuásique toles comunidaes tienen esta norma, ¿cómo ye qu'entá esisten les puertes xiratories?

Pa pesllar esti asuntu, nun escaezamos la realidá na que vivimos. La mayor parte de los beneficios de los políticos provienen d'una perversa llectura de ciertes circunstancies que se dieron nos entamos de la transición. Los beneficios económicos a representantes nacieran p'atender a persones mayores que veníen del esiliu, tuvieran encarcelaes, trabayaran poco tiempu y nun cotizaron nel so día y que diben ser diputaos tres o cuatro años como muncho. Y aquello acabó no que acabó, nuna vergúenza institucional. Lo mesmo pasó col aforamientu. Tratábase d'evitar procesos xudiciales fáciles contra ministros de Franco por episodios negros de la dictadura o contra políticos d'esquierdes sobre los que pesaben acusaciones del tiempu la guerra. Y aquello acabó igual: diez mil aforaos frente a dengún, frente a cero, n'Alemaña o'l Reinu Uníu. En fin, esto ye normal ente nosotros. Hai unos años ficiérase una llei mui beneficiosa fiscal y llaboralmente pa atraer o retornar a persones qu'andaben per universidaes y centros de mediu mundiu. Aquella llei pa potenciar la ciencia, el conocimientu, la educación y la innovación, acabó, en vista de quienes l'aprovecharon, col nome popular de Llei Beckham, n'honor del que fuera  reputáu espertu en mecánica cuántica que recaló na Universidá Santiago Bernabeu.