Programar ensín "areté"

(El Fielato)

Na reciente FITUR, la feria'l turismu que se cellebra en Madrid, Asturies presentárase como un destín pal viaxeru européu básicamente rural y ambiental, lo que se conoz xeneralmente como ecoturismu y que se basa n'aplicación d'un modelu de desendolcu sostenible pal seutor, na idega de ser emblema de la marca parayisu natural. La conseyera'l ramu, Berta Piñán, insistiera nello na so disertación: "la sostenibilidá ye la piedra angular del nuesu modelu". Y pa ello nada meyor que dedicar dos miyones d'euros a l'alta velocidá y a les conexones aéries porque, decía, "qu'Asturies tea más cerca ye una ventaxa que tenemos qu'aprovechar al máximo". Pues resulta que l'alta velocidá terrestre y les llínies aéries son modos de tresporte altamente insostenibles ambientalmente.

Lleven años reclamando un AVE que nun ye prioritariu, amás de suponer un error económicu, social y ambiental. Cuando tea fechu, cuando eso decidan los hados, los viaxeros llegarán a les ciudaes del centru, si ye que para en toes, colo que, por otra parte, dexará de ser alta velocidá, porque malamente se va a 250 por hora parando en La Pola, Mieres, Uviéu, Xixón y Avilés, sinón a unos 90. Una vegada na ciudá, pa prauticar ecoturismu tendrán que dir n'autobús o en coche d'alquiler per autovíes de tres carriles por sentíu, otra forma de viaxar insostenible. Pa entós yá nun quedará ferrocarril convencional y les zones rurales tarán más aisllaes.

L'AVE ye un modelu tresporte pa coneutar ciudaes de tamañu, cuando menos, mediu, útile pa distancies de más de quinientos kilómetros y con problemes de comptencia col avión en trayeutos de más de mil. Como escribía la selmana pasada el mio compañeru de páxina Vicente González Bernaldo de Quirós, va ser un tren pa ricos que tienen aerofobia. Los demás, ensín ferrocarril convencional, a l'autovía y, mayoritariamente, al vehículu priváu. ¿Y asina van facer ecoturismu?

Tampoco hai d'escaecer una realidá que puede dase, y dase en bastantes ocasiones. Los grandes corredores de comunicaciones, non sólo sirven pa llevar turistes haza un lláu, sinón tamién pa sacar xente haza l'otru lláu, perdiendo población y seutores económicos. Qu'el balance seya positivu sumando turismu y nuea población, esa que agora llamen nómada dixital, nun ta claro. Hai un casu que sí tuviera gran repercusión na teoría y na política rexonales d'Europa. Históricamente'l sur d'Italia, la zona de Nápoles, tenía gran dificultá pa colocar los sos productos nel norte, precisamente poles sos males comunicaciones. Llucharon les alministraciones y animaron a la xente a ello pola que se llamó autostrada del sole, una autovía que llevara a les zones de Turín y Milán. La vía'l sol fixérase y tuvo una inmediata repercusión: la industria del norte creciera y la del sur menguara, perdiendo población tola zona. La razón yera clara: las empreses del sur teníen viabilidá porque vendíen nel so mercáu territorial y, cuando ésti comunicó fácilemente col norte, treslladáronse porque seguíen teniendo'l mercáu del sur y ganaben otros al norte de Los Alpes.

Na mesma Asturies tenemos un bon exemplu. L'AS-1, la llamada minera, ¿a quién beneficiara fundamentalmente, a Llangréu, Samartín,  Llaviana, Ayer y Mieres o a Xixón? ¿Qué conceyos ganaron y perdieron población en función de la posibilidá de tener la vivienda y'l puestu de trabayu del home o la muyer a venti minutos, mientres los neños teníen más posibilidaes educatives o d'ociu?

Pero ye qu'el desendolcu sostenible tién otru aspeutu que nun se puede separtar del ambiental: el económicu, nel que ye mui importante'l llaboral. Pues resulta que ún de cada cincu asturianos tien unos ingresos perbaxo'l salariu mínimu interprofesional, esto ye, menos de 878 euros al mes. Esi ye'l salariu mínimu mediu ente los mil de la xornada completa y los 756 de la parcial. Y esa situación nun se modificara, sinón más bien al contrario, cola figura cosmética del contratu fixu discontinu, que son agora 22.000 de los 88.000 xeneraos. Ye esta una figura particularmente presente ente camareros, llimpiadores y dependientes de comerciu, la columna vertebral del turismu. Tampoco alcontramos muncha sustentabilidá nesti epígrafe.

Per otra banda, cada vuelta que falen de turismu dende les nueses alministraciones refiérense a la desestacionalización. Tienen razón, tola razón, pero lleven décades cola mesma matraca al tiempu que publiciten y venden una Asturies braniega, onde, por exemplu, nunca llueve. En tolos estudios realizaos, nes encuestes a turistes que lleguen abunden les rempuestes de que van alcontrar osos, caballos trotando, playes y, los más enteraos, bona gastronomía. Y los que marchen salen encantaos col paisax, tan verde, y arrenegando de que llueva tanto.

Tamos entrando nuna situación onde se da una paradoxa: l'alministración lleva años vendiendo una política que nun practica pero resulta que, un tiempu dempués, son los propios vecinos los que se dieron cuenta de la importancia del territoriu nel que vivíen. Hai un tiempu que Calo Soto, el conocíu palista del Seya y agora empresariu, dicía qu'había buscar visitantes que valoren el paisax y la cultura ensín priesa, non los que lleguen, faen un par de semeyes, tomen una botellina y marchen. Decía tamién que, pesie a lo del parayisu natural, "siguimos cola mayoría la clientela nel mes d'agostu y yá vemos a qué situación mos lleva eso: a la incomodidá pal habitante llocal". La so conclusión yera meridiana: nun se trata de gastar en promoción xenérica, porque esa política significa traer más visitantes n'agostu, sinón n'ofrecer una Asturies en toles temporaes, l'Asturies de "la tranquilidá, la naturaleza, la cultura y la xente".

Y cuásique nun paga la pena referise a los conflictos, cada vuelta más irresolubles, ente el turismu rural y sostenible y la población llocal. Les astracanaes de protestar porque canten los pitos, suenen les motosierres, fieda la pila cuchu, etcétera, ata les últimes del pieslle de cuadres, multes por llevar una guiada, considerada arma, horarios de chigre, normes urbanístiques, modelos de llimpieza de montes..., normes pensaes pa un país que nun ye'l nuesu y nun reinu incapaz d'entender la máxima de que ye mester tratar de forma diferente lo que ye diferente.

Equí lo que falta ye una alministración que tea prudencia, sensateza y bon xuiciu, lo que los clásicos denominaben cola pallabra griega areté.