Economista, patriota, revolucionariu y profesor d'Oxford
(Xixón, 14 de febreru)
Bona tarde, dames y caballeros, amigues y amigos.
En primer llugar quiero agradecer a l'asociación Ástura y al Atenéu Obreru de Xixón esta invitación pa falar de Flórez Estrada, con motivu'l so 170 cabudañu.
Pero, en segundu llugar, quiero recordar, como faigo siempres que me conviden a falar nesta vieya Escuela Comercio de Xixón, a mio madre, Aurina Infante. Ella estudió equí, nesti edificiu, nos primeros 50, práuticamente na posguerra y pocos enantes años de que me diera la vida. Nun yera tiempu de que les muyeres llegaran a bachilleres o a la universidá. Ehí que sigue, sola, na so enorme casa d'El Parchís. Tien 88 años. Si miren pela ventana pueden ver la lluz de la so sala, onde tará sentada, adormilada con un llibru o siguiendo una tertulia televisiva de la que dempués va despotricar. Aquellos 50 eran malos años pa les muyeres. Yeran años duros, especialmente pa una rapaza como ella, de familia derrotada na guerra. El so destín yera ser modista como muncho. Pero'l so padre, Manolo Infante, un anarquista kropotkinianu discípulu de Quintanilla, dedicó gran parte de la so renta a la neña. Y ella cumpliera. Trabayó n'empreses químiques y alimentaries pero Franco decretó metela en casa. Pero, paradoxes de la vida, pa mín fora una suerte. Educárame una muyer estraordinaria.
Pero nun vamos falar equí d'un estudiante madrilanu que, polo menos, reconocía la so inorancia y avergonzábase d'ello. L'asuntu ye que Flórez Estrada, como la mayor parte de los grandes pensadores, artistes, escritores, políticos y científicos asturianos, ye un perfeutu desconociu n'Asturies, inclusive pa les persones que taríen ata obligaos a saber d'elli y de la so obra. Consideráu na Universidá d'Oxford cómo ún de los sos grandes profesores, tién dende hai más d'un sieglu un aula col so nome, la Flórez-Estrada Classroom. Mentanto, nin la Universidá d'Uviéu nin denguna universidá española lu recordó ata hai tres díes. Fora en 2019 cuando, por iniciativa de Xosé Alba, entós ocupando un vicedecanatu de la facultá d'economía, la universidá asturiana-y dedicara un panel desplicativu.
Álvaro Flórez Estrada naz en La Pola, nel conceyu de Somiedu, en 1765, l'añu nel que Henry Cavendish descubre l'hidróxenu, y, dempués de les primeres lletres col so padre, estudia humanidaes en Grao y drechu na Universidá d'Uviéu. Interésase mui ceo por una ciencia nuea que pretende interpretar la realidá social y, al mesmu tiempu, cambiala: la economía. Ye complicao decir cuándo naz esta disciplina y yá los griegos clásicos mos falen d'ella, pero convenimos en que tres son los iniciadores, Petty, Quesnay y Smith, siendo esti últimu el más reconocíu, igual non mui xustamente.
Naquellos años, durante cuásique mediu sieglu, Asturies da, por decilo un tanto de coña, más economistes por día de güés que la mesma Inglaterra: Campillo, Canga-Argüelles, Xovellanos, Flórez Estrada, Ibáñez... La importancia d'estos homes diba ser tala que durante más d'un sieglu Asturies siguiera siendo patria d'economistes de renome: Mon, Valentín Andrés Álvarez, Velarde, Rafael Anes, Cuervo, Martínez Cachero, Naredo...
La entruga surde de sópetu: ¿por qué un país básicamente rural, con dos ciudaes relativamente pequeñes como Uviéu y Avilés, ye cuna d'una nuea ciencia, d'un nuea manera de ver el mundiu? Cuando un fenómenu se repite tien qu'haber una desplicación. Pa entamar, hai dalgo que llama l'atención: sacantes Xovellanos, que ye de Xixón, por otra parte una villa pequeña, poco más qu'un puertu pesqueru, tolos grandes economistes son de los confines del país: Campillo de Peñamellera Alta, Flórez de Somiedu, Ibáñez de Santalla d’Ozcos, Canga-Argüelles de Ribeseya... Cualisquiera que güei viaxe a Somiedu o al corazón de Los Picos d’Europa puede maxinar cómo yera la cosa a finales del XVIII, cuando Flórez Estrada o Campillo lleíen a Quesnay, Smith, Ricardo o Say embaxo les ñebles del monte.
La primer razón qu'alcontramos ye la revolución agraria que se produz a lo llargo'l XVIII, una revolución que tuvo l'aniciu nel gran incrementu de la productividá. El saltu haza la industrialización diérase n'Asturies con una bona aportación de capitales foriatos, belgues, franceses ya ingleses, pero tamién tuvo un enorme pesu'l capital asturianu. La clave tuvo nos cultivos del maizu y de la mazana, asina como nel incrementu de la producción de sidra, esta última dedicada en gran parte a la esportación, como atestigüen los apuntes de l'aduana de Xixón.
Fuera otru asturianu d'aquel tiempu, Méndez de Cancio, del conceyu de Tapia, quien introduz n'Europa el maizu de les Amériques. El clima'l país fizo posible grandes colleches con grandes rendimientos con respeuto a la escanda y al centén, los cereales más abondosos ata entóncenes, asina como'l trigu. Ye un fenómenu asemeyáu, anque non lo mesmo esautamente, a lo que Marx llamó acumulación orixinaria de capital. El maizu, que permitía aumentar la ganadería, xunto col complexu mazana-sidra, relegando a los cítricos, permitió incrementar les esportaciones. Tóo ello contribuyó a crecimientos de renta ente'l campesináu y, llóxicamente, a crecimientos importantes ente les families con mayores posesiones, les vieyes estirpes de la fidalguía'l país.
Alcontramos una referencia mui llamativa nun poema de la dómina. Bruno Fernández Cepeda, refiriéndose a les mazanes y a la sidra na so llarga composición Bayura d’Asturies, fala de cómo l'incrementu de les rentes llevó apareyao una proliferación d'horros, casones y palacios, escribiendo lo siguiente: "¡Qué sidre d'elles se fai!/¡Qué sabrosa, qué dorada!/¡Y cómo el cuerpu calienta!/¡Cómo refocila l'alma!./El que emburrió dos pucheres/quedóse como una pascua,/falatible y gayasperu,/sin sede n'una semana./Y non piense: qu'ella sola/enriquez al que la faga,/da don al que non lu tien/y horros y cases llevanta."
Esta acumulación de capital y l'ameyoramientu de l'artesanía (metalurxa, forxa, testil, cerámica, vidriu) permitiera dar el saltu haza una economía industrial sobro la que yera posible afitar les estructures del naciente capitalismu. Pero eso tamién sucedía notres zones d'España, como'l País Vascu, Cataluña, Valencia o rexones d'Andalucía. ¿Por qué sólo n'Asturies apaecen teóricos de la nuea ciencia económica? Ye equí onde entra en xuegu una calterística, si non esclusiva, sí que mui particular d'Asturies o de los asturianos.
La historia suel estudiase como una sucesión de reis y papes o como un devenir de fuerces productives que lleven a unes contradicciones y alfrentamientos que terminen, delles vegaes violentamente, nun cambiu tres otru. Sedría una historia idealista por frente a una historia materialista. Sigún la primera, Sabel la Católica fizo posible, pola so confianza en Colón, el descubrimientu d'América. Sigún la segunda, la reina castellana necesitaba buscar una vía atlántica pa contrarrestar la vía aragonesa del so esposu Fernando nel Mediterrániu y, a un tiempu, alliviar de población y, sobro tóo, de xente armao campando per Andalucía tres la guerra de Granada. Lo cierto ye que les dos razones confluin. Si la reina nun tuviere a Colón, por muncha necesidá, por muncho que las condiciones materiales la forzaran, nun podía fletar tres naves rumbu al occidente. Podríamos falar d'un principiu cairolóxicu, estirando'l términu griegu tardíu kairós, que vien ser momentu oportunu: les condiciones materiales tan daes y coinciden coles persones adecuaes.
Eso fue lo que pasó n'Asturies. Les condiciones materiales taben dándose, lo mesmo que notros llugares, y los propietarios comenzaben a tener rentes altes, pero tomaron una decisión peculiar: envede quedase n'unviar a los sos fíos a Salamanca a estudiar teoloxía o a Uviéu a estudiar lleis, mandáronlos a Llondres a estudiar aquella nuea ciencia que paecía desplicar la realidá y los conflictos d'otra manera. La rellación secular d'Asturies con Francia, Irlanda ya Inglaterra, la gran vía marítima cantábrica, el mare nostrum de los celtes, facía que les idegues circularan constantemente y los pocos qu'entós lleíen y entendíen otros idiomes taben al tanto de lo que se discutía en París y en Llondres, poniendo más atención a Llondres por la histórica rellación comercial y política que Asturies tenía con Inglaterra.
Cuando los fíos de los fidalgos enriquecíos lleguen a Inglaterra taba entamando la industrialización y naciendo la ciencia económica moderna, un nuéu métodu que trataba de desplicar, precisamente, por qué sucedíen esos cambios. Aquellos mozos empapáronse de la fisiocracia francesa y del naciente lliberalismu inglés, amás de ser conocedores del más vieyu mercantilismu español.
Ye nesti momentu cuando Flórez Estrada llega a Llondres, tomando contautu colos más reputaos economistes lliberales, Adam Smith, David Ricardo, James Mill, cultivando amistá col fíu d'esti últimu, John Stuart Mill, más famosu qu'el padre andando'l tiempu. Queda mui impactáu cola llectura de La riqueza de les naciones de Smith. La idega básica del moralista escocés yera que, asina como les ciencies naturales partíen de qu'esistía un orde natural y que los científicos debíen descubrir les lleis que lu gobiernen, asina los estudiosos de la sociedá deben interpretar el so orde a traviés del descubrimientu de les sos lleis. Eso y non otra cosa ye la famosa manu invisible, y non una conceición metafísica de la economía o del capitalismu. Flórez Estrada decide qu'estos vientos tamién deben circular per España y ponse a la xera.
De toles formes, el somedán ya yera un lliberal dende enantes de dir a Oxford. Como la mayoría de los homes de la so época y condición, llegó a la teoría'l llibre comerciu dempués de ser lliberal no político. Tenemos una preba definitiva d'ello. Dempués d'acabar drechu n'Uviéu treslladose a Madrid onde exerciera de maxistráu, un tanto apadrináu polos sos compatriotes Xovellanos, amigu personal del so padre, y Campumanes. Ellí, con namás que trenta años, Godoy nomáralu tesoreru xeneral del reinu, cargu al que renunció bien pronto porque lo que desixíen d'elli yera incompatible colos sos principios lliberales. Regresa a La Pola, entamando cola so obra teórica, y ellí permanez ata que, en 1798, la Xunta Xeneral ellíxelu como procurador xeneral.
Hai que tener en cuenta qu'España nun yera una nación sinón un imperiu, yá con un enorme agotamientu, un imperiu nel que cabíen mayes, quechues, tagalos y somedanos. ¿Por qué son aborixes los del Amazones y non los del Piles o los del Narcea? Nun había cortes comunes, nin moneda común, nin códigu civil común, nin códigu mercantil común, nin llingua común, nin sistema métricu común, nin bancu central… Sólo la corona yera nexu d'unión entre toles Españes de, como llegara decir la constitución de 1812, “ambos hemisferios”. Alcalá Galiano escribió que “España nun ye una nación nin lo fuera nunca y por eso a los lliberales tócamos construyila, torgando al mesmu tiempu que la garren pa sí les fuerces de la reacción”. Tamos falando de políticos que falaben de la nación como una construcción política volitiva, na fola del plebiscitu cuotidianu del que falaba Renan. Pola so parte, Flórez dase cuenta de qu'el comerciu internacional, sigún les bases sentaes por Smith y Ricardo, nun permitiría la supervivencia de los imperios.
Por estes razones la obra de Flórez Estrada ye de caráuter político y non sólo académico. Los sos mayestros ingleses trataben d'interpretar, yeran investigadores y profesores. Flórez, como enantes Xovellanos, nun puede detenese sólo na interpretación y entiende qu'hai qu'actuar, qu'hai qu'intervenir direutamente p'algamar la modernidá. Por eso, anque güei podríamos tildar a Flórez como radical, nel sen más estrictu, atacar a les coses de raíz, él y'l restu los economistes asturianos nun yeran particularmente revolucionarios. Flórez, pesie a tóo, ye l'unicu de tóos que tien dalgún qu'otru plantegamientu revolucionariu, pero, igual por talante pero de xuro que tamién pola so educación inglesa, creyía más na evolución que na revolución.
Nostante, nun hai qu'escaecer qu'ún de los primeros testos que publica ye un ensayu sobro la propia revolución francesa. Lo que-y sucede a Flórez Estrada, como a otros lliberales y revolucionarios del momentu, precisamente los más rigurosos polo que cinca a la teorización, ye que carez d'un desencantu deriváu de los escesos del directoriu. Munchos revolucionarios cayeron embaxo la guillotina, como un entóncenes perinfluente Babeuf, güei bastante escaecíu, autor de La conspiración de los iguales, obra considerada por dellos autores como un antecedente'l comunismu. Volveré a esti asuntu más alantre pa desplicar la posible rellación ente los dos homes. El casu ye que quiciabis Flórez Estrada refuga'l terror de Robespierre, mientres que, per otra banda, ve cómo'l frutu más direutu de la revolución nun fuera otru que l'imperiu napoleónicu.
A una vegada mesma, Flórez creyía qu'el modelu a implantar yera un modelu basáu en clases medies, ensín grandes diferencies de renta, cosa que, entendía, la revolución industrial torgara, creyando dos clases sociales que podíen llegar a ser irreconciliables. Ye equí onde apreciamos la radicalidá del economista somedán, una radicalidá que lu llevaría a posiciones que munchos autores consideren protorrepublicanes ya inclusive protosocialistes.
Cuando Napoleón invade España, un reinu que nun yera una nación nin tenía mecanismos como talos, ye la estructura tradicional la que respuende. Les provincies, que tienen como únicu nexu d'unión la corona, alcuéntrense ensín rei, ensín esi nexu. Nesi contestu, les que tienen mayor pesu históricu porque fueran reinos y gozao d'independencia fiscal, respuendieron con mayor celeridá y contundencia. A esti respeutu, escribe Pí i Margall en Les nacionalidaes: "Llevantose la primera Asturies, que tamién fora la primera contra los árabes. Ensín entrugar a denguna les sos vecines, ensin oyer otra voz que nun fora la de los sos ermunos sentimientos, encadarmó un gobiernu, declaró-y la guerra a Napoleón, organizó tropes y nun tuvo miéu pa despachar embaxadores que marcharon a solicitar el sofitu d'Inglaterra. Taba entóncenes aconceyada n'Uviéu la Xunta Xeneral del Principáu, ayalga, diz el conde de Toreno, dichosamente salvaguardada del cuásique xeneral esfarrape de los antigos fueros. Asturies invistiérala cola suma autoridá y enfotó nella los sos destinos".
Flórez preside la Xunta Suprema y, el 25 de mayu de 1808, declara la guerra a Francia, recluta un exércitu popular a traviés d'una proclama xeneral y unvía a Llondres al conde de Toreno como embaxador, acompangáu por Álvarez de Miranda y Vega Escandón. Toreno lleva una carta personal de Flórez Estrada a Xurde III qu'el rei tresllada al parllamentu, de resultes de la que, previa llarga discusión, lores y comunes reconocen la soberanía d'Asturies, firmando un tratáu y unviando tropes al mandu de Wellington.
Ye nesos momentos cuando apaez el Flórez Estrada más claramente radical, escribiendo, el mesmu 25 de mayu, que "la llucha contra l’invasor nun tien xacíu si nun ye a un tiempu una revolución política”. Pa elli, que los amos foran los borbones o Napoleón yera indiferente. El posible devenir del esperimentu políticu de Flórez Estrada y del so gobiernu nun podemos nin maxinalu porque un añu dempués el marqués de la Romana disolvió la Xunta, organizando el desorde embaxo'l pretestu de querer poner orde.
Flórez Estrada abandona Asturies y marcha haza Sevilla pa poner en conocimientu de la Xunta Central l'atropellu fechu con Asturies y desixir la restitución de los poderes soberanos a la Xunta Xeneral, atravesando un Portugal alliáu d'Inglaterra, que yera ruta más segura que la española. Más lluéu treslládase a Cádiz, onde redauta un proyeutu de constitución fonderamente lliberal anque monárquica.
En riesgu otra vuelta por causa, paralelamente, d'absolutistes y de franceses, abellúgase en Llondres, siendo amparáu polos sos compañeros d'Oxford. Ye entós cuando escribe Introducción pa la historia de la revolución d'España y Desamen imparcial de les disensiones de l'América con España. Nesti segundu llibru ye nel qu'entama cola so crítica, fondera y descarnada, haza la política colonial española. Oponse frontalmente al proteccionismu impulsáu pola burguesía catalana porque ve cómo ta afogando a Cuba y diz qu’esa política lleva a Cuba dafechamente a la independencia. Elli conocía perbién la esperiencia norteamericana, la qu’impulsaran lliberales de la so llínia, como Jefferson. Nun debemos escaecer qu’el procesu independentista norteamericanu surde por un problema fiscal: pagaben impuestos y nun tiníen drechos elleutorales. El glayíu fora “no taxation without representation”. Eso pasaba en Cuba. Flórez Estrada ye un gran almiraor de la revolución americana, que, mester ye recordalo, ye de mediu sieglu enantes que la francesa.
Participa nes primeres sesiones de les cortes de Cádiz pero non na redaición de la constitución, lo que supusiera una gran perda dende un puntu vista democráticu, puesto que yera partidariu del sufraxu universal, del estáu aconfesional, de retirar privilexos a los prelaos y a los nobles, de reducir los poderes del rei, de permitir el llibre comerciu a les colonies y dar los mesmos drechos a los sos habitantes qu'a los españoles d'Europa, de quitar competencies educatives a la Ilesia, de suprimir la Inquisición dafechamente, no permitiéndo-y nin tansiquier xurisdicción eclesiástica...
Tamién pertenecía Flórez Estrada a la minoría federalista, anque esa definición nun la emplegaba, a lo menos nos documentos importantes que mos llegaran. Pero, igual qu'el meru fechu d'autodefinise nun supón qu'eso seya verdá, asina se puede ser dalgo ensín autodefinise necesariamente. El casu ye que, contra la opinión mayoritaria, la que dexó una pesada herencia xacobina nel lliberalismu y na esquierda españoles, Flórez Estrada defendiera que la soberanía residiera nes xuntes provinciales y non na central, a la qu'entendía como una estructura de coordinación, llegando a plantegar qu'inclusive la defensa, los exércitos, fueran competencia de les distintes alministraciones territoriales.
En Cádiz funda un periódicu lliberal que lleva por cabecera El Tribuno del Pueblo Español, en clara referencia al periódicu francés d'unos años enantes Le Tribun du Peuple, dirixíu, precisamente, pol yá citáu Babeuf, col que, posiblemente, caltuvo rellación. Tamién nesi tiempu asume'l cargu d'intendente militar d'Andalucía, responsabilidá qu'abandona bien ceo porque, otra vuelta, la so función choca colos sos principios y vuelve al estudiu d'economía y entama a interesase pola llingüística.
Acabada la guerra fue condergáu a muerte por Fernando VII, acusáu de republicanu y francmasón. Seguramente yá tenía idegues republicanes, pero siempres sopelexó respetu y aceutación haza una monarquía constitucional. Masón sí que yera, ostentanto altos graos del ritu escocés antigu y aceptáu. Flórez Estrada vese otra vuelta abellugáu polos sos amigos d'Oxford. Ye nesi tiempu cuando entama col que va ser el so Cursu d'economía política. Dende Llondres sofita'l pronunciamientu'l so compatriota Riego y regresa tras la nuea proclamación de la constitución, resultando diputáu por Asturies. Nel Congresu oponse dafechamente al proyeutu d'abolición de les sociedaes patriótiques, en defensa de la llibertá. Nun testu anónimu sobre les calterístiques de los diputaos del que diba ser trieniu constitucional podemos lleer sobre Flórez: "llibertá d'imprenta, llibertá política, llibertá civil, llibertá d'aduanes, llibertá de comerciu, llibertá de falar y llibertá de tóo va ser el so eternu y más dolce cantar".
En 1822 redauta, col uvieín Martínez Marina, el primer proyeutu de códigu penal. En marzu de 1823 ye nomáu ministru d'estáu pero un mes dempués Fernando VII elimina otra vegada l'orde constitucional, sofitáu nes bayonetes de los cien mil fíos de san Lluis, ordena la execución de Riego y firma otres dos condergues a muerte contra Flórez Estrada. El somedán escapa a Xibraltar y esíliase, otra vuelta, n'Inglaterra. Entama la década ominosa, diez años nos que Flórez Estrada reside en Llondres y viaxa per Europa.
Ye cuando escribe la versión definitiva del so Cursu d'economía política, un testu que ye la so gran obra, una obra qu'escribe yá con una edá avanzada. El so propósitu yera facer un tratáu completu d'esa ciencia, una summa na que quedaran recoyíos tolos avances de les últimes décades. La definición que Flórez Estrada mos da de la economía política ye totalmente contemporánea, una definición que nun fora abandonada ata la teoría microeconómica marxinalista y tres la xeneralización en macroeconomía del paradigma de la síntesis neoclásicokeynesiana, sieglu y mediu dempués. Elli fálamos de "la ciencia que desamina les lleis que regulen la producción, la distribución, los cambios y'l consumu de la riqueza". En llóxica consecuencia, el llibru consta d'eses cuatru partes, precedíes por un llargu y detalláu discursu preliminar sobro la historia y'l métodu de la disciplina y una triba d'analís comparativu ente la economía y otres ciencies que ye una verdera aprosimación epistemolóxica a les ciencies sociales.
El llibru tuviera siete ediciones, les tres primeres con poques variaciones pero en distintos idiomes: la primera emprentárase en Llondres n'inglés y español, la segunda en París n'español y la tercera tamién en París pero en francés. Cuando viera la lluz esta tercera edición, el direutor de la École d'Économie de Paris, incluera a Flórez Estrada como padre d'una de les escueles de pensamientu económicu de la historia, que, de ser seyes, pasaben a ser siete. Toles ediciones fueron revisaes pol mesmu Flórez, qu'introduxo cambios en caúna de les cuatru siguientes, y ye mui recomendable, pa quien tea interés, l'anotada por Salvador Almenar, con un más que notable estudiu preliminar y espublizada pola xixoniega Trea. Esa edición, que se correspuende cola de 1852, la séptima, inclui, como introducción, dos estudios d'Ernest Lluch nos que sitúa'l la obra l'illustráu asturianu nel conxuntu'l pensamientu económico européu.
El llibru fuera manual de les universidaes españoles ya iberoamericanes durante cuásique un sieglu, y tuviera gran predicamentu nes universidaes franceses. Anque Flórez Estrada ye consideráu como un profesor d'Oxford, les universidaes anglosaxones nun siguen el so manual porque'l so enfoque vien a coincidir, na parte de la teoría económica y nel tiempu, col llibru de Ricardo Principios d'economía política y tributación. Esa coincidencia desplica que nes universidaes d'ambitu anglófonu, que yá son les principales n'economía y que van dir a más cola consolidación d'un imperiu británicu yá netamente capitalista.
Ye nestos diez años d'esiliu cuando se produz un cambiu nel pensamientu políticu del illustráu. Les vicisitudes y la cerrazón autoritaria de los borbones lleven a Flórez Estrada a un republicanismu yá poco disimuláu y a una radicalidá mayor de la que tenía enantes. Nun sé si se recuerden de les primeres páxines de Los miserables. Víctor Hugo rellata l’entamu de la rebelión nuna manifestación con motivu d’un intierru qu’acaba nun grave episodiu de represión. Nel llibru fálase de los oradores del mitín. Pues ún d’ellos yera Flórez Estrada. Falamos del cortexu fúnebre del xeneral Lamarque, un ídolu del lliberalismu más radical, un republicanu opuestu a Luis Felipe. Tamos en 1831. Esti episodiu desplícalu perbién, contestualizándolu, Juan Uría Riu nun artículu espublizáu na revista Archivum. Na ponte d’Austerlitz toma la pallabra otru lliberal de la mesma triba, tamién militar, el xeneral Lafayette, y da la pallabra o dos o tres convidaos. Ún d’ellos ye Flórez Estrada, qu’arremete contra la Santa Allianza y contra Fernando VII. La xente entama dar vives a la república y la temperatura va xubiendo. Les tropes del gobiernu carguen y acaba la cosa con unos doscientos muertos ya unos quinientos firíos. Ehí arranca la rebelión que narra Victor Hugo na so novela.
Tamién ye cuando reafirma la so posición anticolonial, criticando con dureza la política qu'el reinu caltién sobro la plata americana, rexía polos precios n'España y que, d'alcuerdo con Hume y con Smith, considera un focu de tensiones inflacionistes, abriendo el primer gran debate de política monetaria. Lo mesmo fae cuando critica la política de los monopolios n'América, que obliga a que los habitantes d'aquelles tierres tean que comprar a precios españoles envede a precios internacionales, sensiblemente más baxos. Pa él aquello llevaba a la inflación y, a mediu plazu, a la independencia. Bien clara tenía la esperiencia norteamericana, cuando la política impositiva llevó a la sublevación. D'otru lláu defendió la emancipación de los esclavos de Cuba, pa los que Madrid sólo tenía como rempuesta mandar más guardies y soldaos. Flórez creyía que la situación de Cuba yera una mezcolanza d'un modelu esclavista tan infame como insostenible y d'unos propietarios afogados pol proteccionismu que beneficiaba a Cataluña y que, pa caltener marxes, namás qu'alcontraben la vía de recrudecer la esplotación.
Aquelles primeres observaciones, la de la plata y la de los precios monopolísticos, va retomales Marx na so Contribución a la crítica de la economía política, llibru nel que mete un párrafu copiáu lliteralmente de Flórez Estrada, anque ensín citalu. Trátase de la referencia a Cuba y a la política monetaria tres la cris de la plata y cuando la primer repatriación de los capitales americanos a España de dos o tres décades enantes. Lleí a dalgún autor qu’esi párrafu del que falo ta nel so Cursu d'economía política, pero nun me paecía a min que diba ser tan tontu Marx de copiar ensín citar d’un llibru estudiáu durante un sieclu nuna montonera d’universidaes. Tuvi la humorada de peñerar testos y resulta que ye de la obra Efeutos producíos n’Europa pola baxa na producción de les mines de plata, escritu n'inglés y que va con otra, tamién n'inglés, titulada Desamen de la cris comercial d’Inglaterra. Seguramente que ye Flórez Estrada l'economista primeru que plantegó una teoría monetaria, bastante enantes de qu’esistiera na tradición anglosaxona.
Tres la muerte de Fernando VII vuelve a la política, siendo diputáu en toles llexislatures en representación d'Asturies. Ye la época na que podemos atender pa ún de los rasgos más orixinales de la so teoría económica y que refierse a la visión sobro la propiedá de la tierra y la desamortización. Flórez defiende les idegues desamortizadores de Mendizábal, pero non los sos métodos, desplicándolo mui bien nel trabayu Sobro la enayenación de los bienes nacionales.
La desamortización fue especialmente una reforma xurídica de la propiedá, conforme a un lliberalismu doctrinariu irreflesivu que nun llevó a otra cosa que a un trespasu de tierres dende los conceyos y la Ilesia a burgueses y nobles, arruinando a pequeños propietarios nel norte y condergando a la miseria a los xornaleros del sur. Esti fechu va tener una importancia trescendental na historia dende la metada'l sieglu XIX a la metada'l XX y va ser determinante nos continos confliutos que desembocaron na guerra civil de 1936. D'un lláu, el campesináu separtose del idegariu lliberal que lu arruinara y, d'otru, la vieya oligarquía de raigañu absolutista y clerical apautara col réxime constitucional un modelu políticu caciquil que dexare en nada les reformes impulsaes polos mesmos lliberales.
Esi nun yera, evidentemente, el modelu defendíu por Flórez Estrada, que considera que la tierra nun ye privatizable, que considera que la tierra ye comunal, anque pueda ser usada privadamente, mui en llínea con un socialista como Henry George. Elli ye favoratible a la desamortización pero contrariu a que les tierres se-ys quiten a la Ilesia y a los conceyos pa que les compren de saldu los burgueses que taben sofitando la causa isabelina. Lo qu’entóncenes plantega ye que les tierres puedan ser esplotaes individualmente por families campesines pagando un canon a la comunidá. Equí avérase a la fisiocracia francesa, a la escuela de Versalles, a la que tamién taba averáu Xovellanos, quien, lo mesmo nos sos diarios de viaxes que nel so Informe sobre la llei agraria, desplícalo perbien y apuesta pol sofitu a una clas campesina de pequeños propietarios. Lo que plantega Flórez Estrada ye qu’el propietariu cobre un tanto durante los años de la esplotación media, cobru que podía ser n’especie.
Dalgunos autores ven nesto un avance haza posiciones socialistes o a nuées visiones del mercáu, cuando la verdá ye que Flórez Estrada ta plantegando dalgo que cualisquier asturianu anterior a la guerra civil reconocería: el foru, la mampostería y otres instituciones y normes consuetudinaries que Flórez conocía mui bien. Yera dalgo tan vieyo como la enfiteusis de la baxa edá media, que n’Asturies conservose ata los cincuenta del sieclu XX. Desta manera venía dase la paradoxa de qu'el gran economista lliberal coincidía, naquellos años convulsos, col plantegamientu de los carlistes del norte de la península.
El sistema de los foros yera una heredá del drechu xermánicu colos añadíos del drechu romanu propios de la baxa edá media. Nel casu d'Asturies yá Xovellanos-y dedicara detallaos estudios. Años dempués, Prieto Bances, ún de los principales estudiosos d'eses práutiques xurídiques, tratando concretamente la figura de la mampostería, mui aplicada pa la pumarada, escribe que "ye una solución amañosa na llucha ente'l principiu de la propiedá y'l principiu'l trabayu, ente'l drechu romanu clásicu y'l drechu xermánicu". Nostante, alcontramos formes contrautuales asemeyaes en Galicia, norte de Portugal, Escocia, Irlanda y norte d'Inglaterra, mientres que nun esisten na Europa continental, fonderamente romanizada y más sero sometía al códigu napoleónicu.
De toles formes, tamién alcontramos autores claramente socialistes, nesos años previos a la fundación de la Primera Internacional, que vienen a coincidir con Flórez Estrada. Ente ellos, precisamente, atopamos otra vuelta a Babeuf. Como'l drechu napoleónicu taba basáu dafechamente nel romanu, el modelu de propiedá agraria en Francia poco tenía que ver cola basada na tradición xermánica y colos sistemas enfitéuticos sobrovivientes n'Asturies, Galicia, Portugal, Inglaterra y Escocia. Eso lleva a que Babeuf nun plantegue lo mesmo que Flórez, pero les sos propuestes tienen un ciertu paralelismu. Asina, Babeuf escribe que "la tierra, madre común, nun puede dixebrase namás que pa tola vida y cada parte nun puede trespasase". D'esta manera propón una llei que prohiba que'l propietariu pudiere vender les tierres y que, tres la so muerte, se repartiere en faces iguales ente la comunidá.
Volviendo al Cursu d'economía política, llama l'atención qu'esti asuntu sobro la propiedá de la tierra y la so forma d'esplotación nun figure, como paecería llóxico, en dengún capítulu. Sí qu'espublizara una separata, una triba d'opúsculu, pero ensín incardinar la materia na doutrina central. Cabe entrugase pol porqué. Una primer hipótesis ye de calter estratéxicu: llibrar al llibru de la censura española. Naquella dómina la Inquisición controlaba sobromanera los llibros de ciencies nuées y mui particularmente los que llegaben d'Inglaterra y Francia, nel so afoguín por combatir idegues republicanes, masóniques y protestantes. Tamién hai quien piensa, ya yo mesmu ente ellos, que les posiciones sobro la propiedá de la tierra son les que llevaron a Flórez Estrada, precisamente, al ostracismu académicu y políticu, siendo como yera un gran economista.
Esa hipótesis ye, seguramente, la más defendible, pero hai otra que me paez mui razonable: la so visión de la propiedá agraria chocaba cola teoría'l valor de la escuela clásica. ¿Pudo Flórez temer que la so visión, ente fisiócrata y socialista, de l'agricultura como un don pusiera en custión tol entramáu del Cursu d'economía política? Pues igual. Flórez Estrada, al defender el caráuter comunal de la tierra y que la riqueza sólo podía devenir del trabayu, colo que discrepaba de la idega de la tierra como capital privatizable, francía col lliberalismu inglés y acercábase, por exemplu, a los plantegamientos d'autores como Proudhon o Godwin, precursores del anarquismu, el primeru en Francia y'l segundu n'Inglaterra.
Nostante, mester ye recordar qu'el lliberal Ricardo, padre de la teoría'l valor y güelu de la teoría la plusvalía, tamién pon un exemplu tan problemáticu pa la teoría económica como de total actualidá. Fálamos Ricardo, nel llibru Principios d'economía política y tributación, de que si un rigu nutre les tierres de toa una valle contribui a la renta d'esa rexón, cosa evidente. La verdá ye que la economía ye una ciencia mui simple, la ciencia de lo evidente. Pero, continúa, si'l dueñu del prau onde ñaz el rigu decide poner preciu al augua, la renta ye la mesma pero distribuyía de forma diferente: ún cobra polo que nun cobraba y los demás paguen polo que nun pagaben. Y Ricardo llega a más: ¿qué pasa si la fonte escosa? Entóncenes, diz el lliberal d'Oxford, la renta cada vuelta ta peor distribuyía y, amás, la riqueza xeneral aminorga. Esto pon en problemes a la teoría'l valor, central na visión ricardiana, pero l'economista nun puede evitar falar d'ello. ¿Qué fae entós?, pues poner l'asuntu nuna nota a pie páxina, como Flórez Estrada puso la so teoría sobro la propiedá de la tierra nuna separata.
Decía enantes que la edición de 1852 yera la última del Cursu d'economía política y eso peaz. Pero hai una suposición enforma considerada sobro que Flórez revisara'l llibru enantes de morrer, de qu'esiste, cual lleenda clásica o mistérica, una octava versión que la so mesma familia ocultó. ¿Podríen tar nesa versión, por más que firme na epistémica lliberal, otres idegues menos condescendientes y más radicales? Nun lo sabemos, evidentemente.
En 1846 ye nomáu senador vitaliciu y, enfermu y con 87 años decide retirase a la so casa de Somiedu. Pero la muerte-y llega en Noreña, nel palaciu de Miraflores, el 16 d'avientu de 1853. Sobro él cayó una cortina silenciu porque yera el teóricu asturianu de la economía más incómodu: lliberal, protorrepublicanu, socializante, tradicionalista, demócrata, radical, francmasón, anticlerical, presidente d'una Asturies soberana. Eso sí, a paradoxes nun mos gana naide. Como nesti reinu de los nuesos esmolecimientos tóo ye raro, por nun dicir esperpéntico, nel meyor sentíu valleinclanescu, cuásique l’únicu homenax que tuvo Flórez Estrada fixéralu la dictadura de Franco en 1946, en plena posguerra, cuando emitiera un billete de 25 pesetes col so retratu nel anversu y la so casona de La Pola nel reversu.
En Noreña, nuna fosa común del cementeriu, ente güesos de decenes de persones, tan los de Flórez Estrada, economista lliberal y primer presidente d’Asturies, entendiéndola como una nación moderna. Pero les fuelgues d'aquellos que Ramón Tamames llamó, nun lluminosu artículu, economistes asturcones quedaben afitaes. Tamames diz que los economistes asturianos son recios, austeros, potentes y reflexivos como los sos caballos, unos caballos que, anclaos nel monte siempres miran haza la mar, que firmes sobro la so tierra siempre xixilen l'horizonte.
Nunca los nuesos illustraos dexaron d'allumar a tolos economistes que, como yo mesmu, nacimos ente los montes firmissimos y la mare tenebrorum. Y, na mio modesta opinión, Álvaro Flórez Estrada ye'l más importante de tóos ellos.
Munches gracies y tean tóos la mio mayor estima.
.jpg)
