¿Por qué toles tochaes pasen nel oriente?

Tochada primera. Unos turistes que tan nun hotel rural, hotel rural, apuntemos, protesten porque los pitos canten cuando alborez y despiértenlos. Notru llugar otros turistes protesten porque pela mañana hai ruíu de tractores y de motosierres. Otros, nun vamos decir de ónde porque paqué, protesten porque fiede a cuchu o porque les vaques caguen xunta'l so coche. Son coses que conocemos d'estos menses pasaos nos conceyos de Los Picos d'Europa.

Tochada segunda. Unos turistes, ellos otra vuelta, protesten porque los bufones de Pría tan apagaos. Llegaran con marea baxa y nun pudieran ver aquello tan guapo de les promociones turístiques. Y dempués subieron a los llagos de Cuadonga, con mui mala estrada, "nun cabíen dos coches", pa llegar a un llugar con fríu árticu. Ye que lo de que yera una carretera de montaña y que facía fríu nun taba nel folletu turísticu.

Tochada tercera. Ellos protesten porque ye tóo mui caro y que nos chigres ponen mala cara porque piden un menú pa cinco persones, augua'l grifu y cubiertos pa tóos. Lluéu van a la playa y resulta que ta la mar alta y reclamen porque naide los avisó de que l'océanu furrula d'una manera diferente a la piscina'l so barriu. Y, pa encima, enciérrase a llover, una imax que nun apaez nes campañes turístiques qu'el gobiernu y los ayuntamientos principescos nunca nun dan. Ye que, en viendo les campañes turístiques d'Asturies, nesti país nun llueve nunca.

Pero hai una cosa llamativa. Toes estes tochaes pasen nos conceyos del oriente. Dalguna se da en Xixón, dalguna en Valdés, dalguna en Cuideiru... Denguna o mui poques en Cangas del Narcea, nin en Santalla d'Ozcos, nin en Teberga, nin n'Ayer... ¿Será casualidá? ¿Tién l'oriente asturianu dalgún xeitu ancestral que lleve a que tolos fatos acaben llegando?

Yo, que soi de Villaviciosa y casáu en Cangues d'Onís con muyer de raigañu n'Amieva, creyo que non. Nun ye dalgo ancestral, nun ye dalgo conxénito, sinón dalgo político. L'oriente asturianu ta rexíu por inorantes, que ye muncho decir nuna Asturies que ye mayoritariamente dirixíu por inorantes. La oferta turística asturiana ye llamentable y ye particularmente llamentable la del oriente. Los turistes, y especialmente ellos, son clientes, non marqueses, y son ellos los que tienen qu'entender como funciona un país y non los paisanos los que tienen qu'adaptase y obedecer a los señoritingos. Una cosa ye'l bon tratu y ser dilixentes y profesionales, y otra perdistinta poner toa una sociedá al serviciu d'otros. 

Tenemos dalguna forma de resistir, tamién ye verdá. Yo, por exemplu, hai años que nun gasto un perru en Piloña. Y duelme. Pero decidieron facese sevillanos y, como Sevilla tien tanta xente como cuásique toa Asturies, supongo que podrá Piloña vivir de les rentes de los sevillanos. Yá sé qu'esto ye una boutade que nun va a denguna parte, pero... Porque, ¿ónde se-ys ocurriera a los rexidores facer una feria d'abril?

¿Ónde se fixera una corría toros esti branu? N'Onís. ¿Ónde montaron la campaña sobro que lo de Cuadonga yera una escaramuza ensín importancia y qu'aquello nun fuera nada na historia? En Cangues d'Onís. ¿Qué conceyu plantegó que poner el nome de la so capital n'asturiano despistaría a los turistes? Parres. Y sólo yera cambiar una a por una e, colo que taben reconociendo que reciben un turismu con enormes problemes cognitivos. Los que lleguen a Girona o a Ourense nun se pierden. Y los que van a London saben en qué ciudá tan ¿Qué conceyu decide que Fabar ye mal nome pa un túnele porque tol mundiu, dende Corea a Nebraska, lu conoz como Ordovícico? Ribeseya.

La demanda turística de mala calidá tien cierta correlación cola oferta turística de mala calidá. Toles tochaes pasen nel oriente asturianu porque lo tenemos merecío.