La democracia ye mui complicada

(El Fielato)

Llama l'atención la manera d'entender la democracia que tienen dalgunos, por más que seyan de colores diferentes. Nos últimos díes pudimos velo atendiendo a tres sucedíos que tal paecen dar la razón a un cínicu Flaubert cuando, nuna carta a George Sand, decía que la democracia consistía en facer qu'el proletariu llegara al nivel d'estupideza del burgués y que, visto lo visto, consiguiérase en parte.

Na pasada campaña elleitoral andaluza hebo una polémica protagonizada pol obispu José Villaplana, que pidiera a los votantes cristianos lleer bien los programes de los partíos y optar polos que siguieren los principios de la Ilesia. Armárase, dende la esquierda, la de coller. Porembargo, la postura l'obispu onubense respuende a la llóxica, como llóxico ye qu'el secretariu de Comisiones Obreras pida coherencia a los trabayadores y que voten en función de los programes sociales y llaborales, y como llóxico ye qu'Amigos de la Tierra llame l'atención sobre los programes ambientales. El problema pa la democracia nun ye esi, sinón el qu'alcontramos cuando'l presidente Barbón cellebra'l Día d'Asturies con una misa, na que, pa más coña, aguanta estoicamente un discursu insultante del obispu Sanz Montes; o cuando un antigu presidente como De Silva, nel funeral por Díaz Merchán, abángase nun besamanes a Ángel García Rodríguez, que tien como únicu títulu el de ser cura.

Siguimos n'Asturies y siguimos con elleiciones, cola apaición d'una candidatura, o de lo que puede llegar a ser una candidatura, nel occidente. Les reacciones son llamatives. El PSOE y'l PP tan ofendidísimos, como si una candidatura cualisquiera distinta de les suyes fuere illexítima. El PP piensa, anque nun lo diz, qu'esa candidatura busca sofitos de votantes suyos, mientres qu'el PSOE, amosando que piensa lo mesmo, diz que los promotores nun quieren decir qué ideoloxía tienen y que, polo tanto, son de dreches. Adriana Lastra dixit. Puede que tean razón los dos partíos pero ye una peculiar forma d'entender la democracia. Anque seya verdá que, polo xeneral, ye la xente de dreches la que más recurre a dicir que ye apolítica, mientres que la d'esquierda tien menos complexos pa definise, cualisquiera persona y cualisquiera organización tien drechu a declarase como-y dé pola gana. Al fin y a la postre vivimos embaxo una monarquía constitucional, na que, por definición, el xefe l'estáu nun ye de dreches nin d'esquierdes, nun tién preferencies partidistes y ye neutral dafechamente. Y a tol mundiu-y paez dalgo normal, esto ye, qu'el rei, apolíticu por desixencies del guión, sedrá de dreches, colo que ye enemigu del PSOE y'l PP pierde un votu que debería ser suyu. Tamién puede ser que teamos como soberanu a un serafín y non a un home, un espíritu puru.

Un tercer apunte. L'alcaldesa de Santander vino a Asturies, concretamente a Xixón, pa promocionar les corríes de toros de la so ciudá. Dixo unes cuantes patochaes sobro l'entendimientu y la comunicación ente dirixentes y gobernaos, básicamente censurando a l'alcaldesa de Xixón, anque, ¿cómo non?, ta nel so drechu a deciles, como Ana González tien drechu a lo mesmo. Si los políticos nun tuvieren drechu a decir tontaes taríen callaos la inmensa mayoría. Pero quedeme con un argumentu que me paez llamativo. Diz Gema Igual, del PP, que gusten o non los toros hai que mantenelos porque una parte de la sociedá lo quier. Con esi criteriu gobierna Santander. Si la cosa ye asina, ¿pa qué votamos partíos distintos con programes distintos? Si yo gobierno un conceyu y llegué al sitial diciendo que nun me gusten los botellones, por decir dalgo, ¿por que voi quitalos si hai ciudadanos que los quieren? Y si llevo nel programa reducir el consumu de carne nos comedores escolares, ¿por qué lo voi facer si hai ciudadanos que quieren que los sos neños coman filetes tolos díes? En definitiva, si llevo'l programa del PSOE, ¿por qué lu voi aplicar si hai xente que prefier el d'Equo o'l de Foro?

Esto de la democracia resulta ser una asignatura mui complicada, polo menos pa los políticamente subdesarrollaos.