"La importancia de los republicanos na guerra mundial va más allá de la toma de París"
(RPA, 27-8-2019)
Monchi Álvarez: Segunda
hora de La buena tarde, Arantza
Margolles, dispuestos a dar un paseín pela historia.
Arantza Margolles: Vamos
dar una vuelta pela historia y, no concreto, per un fechu esencial pa entender
la historia del sieclu XX.
M.A.: Deme más pistes.
A.M.: Nun ardía París,
nun ardía París el día nel que La Nueve entró na capital francesa pa poner
embaxo arrestu a Dietrich von Choltitz metanes la sublevación popular. Nun
ardía lliteralmente pero sí nel corazón de los parisinos que, cuando atapecía
aquel 24 d’agostu de 1944, víen nos cascos de los blindaos qu’entraben nomes
como Guadalajara, Guernica o Ebro, topónimos que remitíen a la guerra perdía un llustru atrás al
otru lláu de la frontera sur de Francia. Esti fin de selmana conmemorárase en
París el 75 aniversariu de la lliberación, pero nunca dexó de tratase d’un
asuntu espinosu. Tenemos pa falar d’estes coses a David Rivas. Bona tardi.
David M. Rivas: Bona
tardi.
A.M.: Hai una primer
entruga cuásique obligada. Hebo polémica hai unos díes por un twit del ministeriu de xusticia nel que
dicíen qu’España tuviera un papel crucial na lliberación de París. ¿Puede
falase d’España pa referimos a aquellos republicanos de La Nueve?
D.M.R.: Evidentemente,
non. Si lo de París fora una victoria del exércitu español diba ser la primera
dende Lepanto, porque les demás fueran en guerres civiles o con sofitu de
tropes estranxeres. El casu ye que nun cabe falar d’España, como seguramente
tampoco cabría facelo si mos referimos, por exemplu, a la División Azul. La
guerra civil ta recién terminada oficialmente y hai tres Españes: la vencedora,
la vencía y la que resiste. Por eso falo de que la guerra ta finalizada oficialmente, porque miles de
combatientes siguen lluchando nos montes, especialmente nel norte. Y a los de
La Nueve hai qu’entendelos nesi contestu. Pa ellos la guerra europea ye la
mesma que la española y combaten contra lo mesmo, contra’l fascismu, y con una
idega central: que Franco caiga con Hitler y con Mussolini. Munchos d’ellos
yeran soldaos del exércitu regular, del exércitu de la república. Y polo que
toca a los vencedores tamién hai que diferenciar dalgunes custiones. Munchos
vencedores nun yeran más qu’homes reclutaos a la fuerza, riba tóo campesinos de
Castiella, Galicia o Navarra que poco tiníen que ver con aquello, anque
dalgunos llograran progresar por ganar la guerra. Y si mos ponemos en sitiu,
vamos recordar qu’el volfamiu que los nazis emplegaben salía de les mines d’Asturies
y de Galicia. El metal de los tanques alemanes contenía volframiu suministrao
por Franco. Lo que sí ye verdá ye que nada de lo de Francia se supiera,
sacantes ente una minoría, durante’l franquismu. De fechu, lo de La Nueve namás
se conociera tres la muerte de Franco ya otres custiones siguin siendo
prácticamente desconocíes. N’España seguimos teniendo un problema cola
república y colos sos símbolos. Hai como una llerza a molestar al rei. Y, la
verdá, a min paezme que Felipe VI ta notres coses. Si lu manden a rendir
honores al presidente Azaña lo más seguro ye que diría. Nun ye tan tontu como dalgunos
pìensen. Nun sedrá un progresista del copón, nin un illustrau… pero ye
intelixente y sabe del mundiu nel que vive. Yo teo claro que Felipe VI rendiría
la espada ante Azaña. Pero’l PP ya’l PSOE son otru asuntu, como escenificó
Pedro Sánchez poniendo la roxigualda na tumba del presidente de la república
hai unes selmanes.
M.A.: La verdá ye que
fuera bastante llamentable la cosa.
D.M.R.: Ye que lo del
PSOE ye de patoloxía. Nun lleves, si nun te peta, les tres collores
republicanes, pero lleva flores blanques de la paz, azules de la llibertá,
roses del amor… ¡pero bermeyes y marielles! Ye que nun me paez razonable. Nun
voi nin tansiquier censuralo. Namás que digo que nun me paez razonable, que ye
una torpeza impropia d’un gobiernu democráticu, nun voi dicir yá
socialdemócrata. Pero tenemos una esquierda con munchu miéu a determinaes
coses, son muy cagones. Yo comprendo que la tradición del PSOE ye
accidentalista, que lo mesmo-y da república que monarquía. Sé qu’inclusive
gobernaron con un dictador como Primo de Rivera pa salvar la corona d’Alfonso
XIII, un home de lo más nefasto que tuvo España, sólo al nivel de Fernando VII.
Pero ye que tamos entrando na tercera década’l sieclu XXI…
M.A.: Pero l’homenax a
los de La Nueve dalu París, danlu los franceses, mientres qu’el gobiernu
español llimítase a un twit y pa
enriba enquivocándose, porque la España oficial yera la de la División Azul,
que combatía nesos mesmos díes embaxo mandu alemán.
D.M.R.: Ye que los gobiernos
españoles tienen un auténticu síndrome cola república. Vamos ver. Yo nun teo
que ser republicanu pa saber lo que pasó. La mayor parte de los católicos
reconocen que lo de la Inquisición fora una barbaridá y siguen siendo
católicos. Nun ye mester ser d’un bandu concretu pa saber quién tinía la
llegalidá y la llexitimidá en xunetu de 1936. Los gobiernos españoles
espavorien colo qué pensaría el rey. A min eso paezme tocho. Si Felipe VI ta
preocupáu por estes coses ye que ye más tontu de lo que piensen los que dicen
que ye mui tontu. Cosa que yo nun pienso. Ye un rei ya yo d’un rei espero coses
propies d’un rei. Dicen que ye mui conservador ya un tanto niñatu porque-y
falta l’instintu de supervivencia del padre.
M.A.: La Nueve entra en
París y son republicanos españoles los que detienen al altu mandu alemán.
D.M.R.: Prestaríame
aprofitar esti asuntu pa falar de dalgo más xeneral. L’episodiu de La Nueve
tomando París ye’l más conocíu o, meyor dicho, el menos desconocíu. Pero la
historia de los republicanos na guerra mundial ye muncho más amplia, ye muncho
más importante, por más que tomar París seya, evidentemente, un finxu inescaecible.
Los primeros republicanos que participen na llucha contra los nazis son los
maquis, los guerriyeros, qu’anden pelos caminos del sur de Francia, lo mesmo
nes tierres vasques del norte que na Occitania. Son los que, nel so día,
persigue Petain ya’l gobiernu títere de Vichy, entregando a la Gestapo a
bastantes d’ellos. Ehí ta, por exemplu, l’asturianu Cristino García Granda. Son
milicies irregulares, ensín rellación colos mandos angloamericanos, aplicando
táctiques daprendíes a güelpes nos tres años de guerra defendiendo la
república. Son valientes, homes bragaos, pero munches vegaes ensín estratexa y
siempres mal armaos. Pero hai otra parte del esiliu que ye menos conocía: la
del norte d’África. Son munchos los españoles que lleguen al Marruecos francés
y más entá a Alxeria. Cuando lleguen nun son trataos tan mal como los que
aportaron a la Francia europea, pol simple fechu de que son menos, pero tampoco
son mui bien vistos. La cosa cambia cuando los angloamericanos desembarquen en
África pa frenar la marcha de Rommel. Son les tropes que manda Montgomery.
Entóncenes los republicanos dexen de depender de Vichy y pasen a ser vecinos de
la Francia llibre, un imaxinariu namás pa un De Gaulle que nun yera naide. Los
alliaos ufierten-ys tres opciones: quedar ellí en trabayos poco menos que
forzaos, en semiesclavitú, devolvelos a España o ingresar na Llexón Estranxera
francesa. La mayor parte de los homes, que yeran mozos y que tiníen esperiencia
de combate na guerra civil, prefieren entrar nel exércitu. Estos homes formen
parte de les primeres columnes qu’entren en combate con Rommel, col raposu’l
desiertu. Y son republicanos españoles los que tomen la ciudá de Teniza, el
puertu de Túnez pel qu’entraba tol avituallamientu del exércitu alemán
d’África. La so participación ye vital pa que Montgomery gane la batalla
d’Africa y la guerra entame cambiar y los vientos rolen a favor de los alliaos.
Pasen los menses y dalgunos republicanos participen nes victories sobro los italianos
en Llibia, mientres qu’otros, integraos nel exércitu nortiamericanu pasen la
mar haza Sicilia y, a partir d’ehí, lluchen na liberación d’Italia. Mentanto en
Francia sigui la llucha de los irregulares, de los maquis. A partir del
desembarcu de Normandía la cosa cambia. De Gaulle, que yá tien reconocimientu como
representante de Francia, una Francia, nun lo escaezamos, mayoritariamente collaboracionista
colos nazis y mui preñada de fascismu, organiza un exércitu regular. Munchos
maquis republicanos, los del sur ya’l centru de Francia, intégrense nesi
exércitu y pasen a ser soldaos regulares de la Francia llibre. Otros
republicanos, los del norte y l’oeste, entren nel exércitu angloamericanu. Y
ehí surde La Nueve, que queda a les ordes del xeneral Leclerc. La Nueve ta
compuesta por 160 homes, de los que 142 son republicanos españoles. Los otros
son rumanos, polacos, portugueses, daneses y uruguayos. Pero ye qu’hai más nesta historia escaecía.
Dalgunos republicanos esiliaos nel Reinu Uníu yá intervinieren dos años enantes
en Noruega, vistiendo l’uniforme británicu. Con tóo esto quiero facer notar que
la intervención de los republicanos fuera mui importante ya en munchos frentes,
magar que la toma de París, llóxicamente, tien un simbolismu bárbaru.
A.M.: Esto que cuenta
d’África ye perinteresante y bastante desconocío.
D.M.R.: Y hai más coses
que lliguen a los republicanos con África. El comandante de La Nueve, el mandu
más directu y que tamién lo ye de la 10 y la 11 ye Josep Puig. Anque tien nome
catalán ye un francés que tuviera nes brigaes internacionales na guerra civil,
concretamente nel batallón La Marselleise. Pero ye que taba n’África cuando
entamó la guerra mundial. Elli almiraba a los milicianos españoles, que con mal
armamentu ya escosa preparación, resistieran tres años a Franco, aidáu por
Italia y Alemaña. Ye ún de los militares que reclama pa lluchar contra Rommel a
los republicanos. Son homes de 27 o 28 años, que tiníen 20 nel 1936 y que,
ensín ser soldaos, lo meyor de la so vida entregáronla al combate.
M.A.: Ya eso nun mos lo
contara’l cine, nin tampoco la historiografía oficial española. Ye qu’entá paez
que sigui habiendo un miéu, un pudor, a cuntar estes coses, lo mesmo pola
drecha que pola esquierda.
D.M.R.: Ye qu’inclusive
la Francia oficial tardara en facer esi reconocimientu. Fora’l primer ministru
Jospin el primeru qu’entamó la reparación d’esa inxusticia histórica, pero
tímidamente. El presidente socialista Miterrand nun quixo facelo. Tuvieron los de La Nueve qu’esperar a qu’Anne
Hidalgo, alcaldesa de París, pegara un puñetazu na mesa y glayara al
altulalleva la verdá de la lliberación de la ciudá. De xuru que dalgo tien que ver
el fechu de que l’alcaldesa ye de familia española republicana. Pero ye qu’hai
na historia d’Europa, de la Europa contemporánia, una constante: toles guerres
les ganaron los bonos. Napoleón
perdiera frente a la democrática Inglaterra, la imperial Prusia frente a la
república francesa, los imperios centrales frente a los alliaos na gran guerra…
Pero n’España perdieron los bonos. Camús escribiera que “España demuestra que
pués tener razón y perder la guerra”. Y Camús tinía razón.
A.M.: Perdiérase la
guerra.
D.M.R.: Sí, asina fuera.
Cuando acabó la guerra civil norteamericana Lincoln dixo una frase llapidaria: “que
los rapazos vuelvan a casa”. N’España los vencedores promulgaron una llei de
responsabilidaes polítiques. Taba claro. Mataran poco ya yera mester matar más.
Si ye que Franco díxolo claro nuna entrevista: “impondré una nuea España a
cualisquier preciu, anque tea qu’acabar cola metada de la población”. Falo de
memoria y la frase nun ye testual.
A.M.: El casu, David
Rivas, ye que La Nueve toma París.
D.M.R.: Sí, ye una gran
victoria. Nun me cuesta muncho suponer lo que significó p’aquellos homes
derrotaos por Franco y traicionaos por Francia y por Inglaterra entrar pelos
Campos Elíseos, la gran avenía de la revolución, col arcu triunfal del suañu: liberté, egalité, fraternité. Pero La
Nueve, anque mandada a distancia por Leclerc, va nel exércitu nortiamericanu,
al mandu directu del xeneral Patton. De Gaulle propón que l’ataque entame al
norte de París. Lo que intenta ye que la ciudá quede aisllada y que los alemanes
se rindan ensín comabatir, pa entrar elli colos lloreos de la victoria y al
mandu de franceses. Pero Patton, que yera un soldáu en condiciones y tamién un
ególatra sublime, dase cuenta y nun-y quier dar esi gustazu a un francés al que
menospreciaba militarmente. Ya ordena tomar París pa mayor gloria suya y de los
Estaos Uníos. Y pa ello allanza les sos tropes más arreches. Y meses tropes
taba La Nueve. Cuando La Nueve entra na ciudá y llántase escontra la ca’l
conceyu los parisinos piensen que son yanquis pero, sosprendentemente, ven que
lleven nos tanques la cruz de Lorena, la cruz sacrada de Francia, la que
llevaben los soldaos de Leclerc. Entóncenes piensen que son franceses, que
París ye lliberada por compatriotes. Y los que taben entrando yeran asturianos,
catalanes, aragoneses, vascos… España la gayola, la xente xube a los blindaos,
les muyeres besen a los soldaos… Hai una anécdota, igual ye mitu, mui guapa:
una rapaza besa apasionadamente al francés
del tanque Guadalajara, el qu’encabeza la columna, ya elli diz que “mui
prestosu’l besu pero yo soi d’Estremaúra”. Nun yeran franceses sinón españoles
a les ordes de Patton. Curiosidaes de la historia.
A.M.: Siempres se
cuenten, nestes citcunstancies, munches histories. Hai quien diz qu’el mariscal
Von Choltitz desobedez la orde de Hitler de destruyir París. El mariscal ye
inacapaz a acabar con toa aquella ciudá que lu tién namoráu y nun da la orde y
queda nel despachu esperando la so detención. ¿Esto ye verdá?
D.M.R.: Nun lo sé pero si
sé lo que pasó en Heidelberg porque me lo contó de primera manu un ñetu del coronel
alemán que mandaba na ciudá. Heidelberg taba a mediu camín de Berlín y Hitler
ordenó resistir ata’l final, anque la ciudá, una de les ciudaes más guapes
d’Europa, una maraviosa ciudá medieval, quedara en ruines. Eisenhower ordena al
teniente coronel atacante que pase perriba de cualisquier ciudá que torgara la
marcha. Cada día que los angloamericanos perdíen pel oés yera un día que
ganaben los soviéticos pel es. Heidelberg taba condergada. Pero diérase la
circunstancia de que l’alemán ya’l nortiamericanu que manden nes tropes yeran antigos
alumnos de Heidelberg. Decidieron desobedecer durante un par de díes y nun
amachucaron la so ciudá, la so universidá. La película ¿Arde París?, como’l llibru na que se basa, igual diz la verdá. Nun
lo sé. Ye mester remembrar qu’una de les coses que más llama l’atención nos
años trenta ye que la nación más culta d’Europa, la patria de Beethoven y de
Kant, llegara a la llocura más xabaz de la historia. Los militares nazis igual
yeran mui pollinos, pero non los militares de carrera. La mayor parte de los
altos mandos alemanes yeran cultos, mui cultos, dalgunos criyaos nos palacios
prusianos onde predicó el mesmu Voltaire, abellugáu pol emperador Federico,
onde disertó Hegel, onde Nietzsche punxera escuela. Nun tamos falando de Mola,
de Saliquet, de Queipo de Llano, unos inorantes sanguinarios, non. Dietrich von
Choltitz yera un aristócrata cultiváu, amante del clasicismu, entusiasta de la
pintura flamenca. Ye mui posible que nun tuviere dimpuestu a quemar París, nel
supuestu de que la orde de Hitler fora esa, que tampoco ta mui claro la cosa.
A.M.: Esa novela, esa
película, nun fala de los republicanos, nun tan nesi momentu épicu nel qu’arresten
al mariscal alemán.
D.M.R.: Nun me recuerdo
de los detalles de la película, pero supongo que sedrá cosa de norteamericanos,
franceses y alemanes. Nun creyo qu’apaezan españoles. Pero tampoco rumanos,
portugueses o irlandeses, que tamién taben ellí. Francia, la que vendió de mala
manera a la república española, siempres quixo escaecer l’asuntu. Francia, como
Inglaterra, pagaron con sangre’l desdexe que tuvieron. Dixéralo Churchill:
prefirieran el deshonor a la guerra y tuvieran guerra y deshonor. Francia nunca
podrá pagar la traición, la indignidá, que fixo a la república española.
Viérase dempués: la vieya república fuera la más acomodaticia con Hitler de toa
Europa.
M.A.: ¿Y qué ideoloxía
teníen los de La Nueve?
D.M.R.: Había de tóo pero
la mayoría yera anarquista, homes de la CNT y de la FAI. Lleven amachucándomos
dende hai cincuenta años col asuntu de que l’antifascismu yera el PCE. Ya ye
mentira. Nun voi espreciar la llucha de los comunistes, por supuesto, pero lo
suyo ye propaganda. De fechu, cuando La Nueve entra en París, arrecíbelos
Federica Montseny, de la CNT, y ministra del gobiernu republicanu. Ye la única
dirixente importante que ta na Plaza de la Villa. Nun hai naide del Partíu
Comunista. Montseny va saludar a los suyos. Esto ye mui importante porque tal
paez que tola llucha antifascista yera cosa de los homes de Stalin, ya eso nun
ye verdá.
M.A.: David Rivas, el
nuesu profesor, siempres no incorrecto.
D.M.R.: Hai más. Ye La
Nueve la que toma Estrasburgu, la que llibera la güei capital parllamentaria
d’Europa. Y hai una cosa llamativa: entraron con blindaos orniaos con banderes
tricolores, republicanes. Entóncenes llevaben la estrella blanca nortiamericana
nos cascos pero poníen la suya nes antenes. Yera lo que falábamos enantes: pa
esos homes la guerra entamara en 1936 y diba acabar en 1945, Pero la historia
dexáralos na cuneta. Pero hai entá una historia más: son los que tomen la Kehlsteinhaus, el Ñeru
l’Aigla, la casona de Hitler nos Alpes bávaros. Cuando entren na casa de
Hitler namás que queden 16 de los 160 que yeran. El sangre que vertieran
aquellos homes fora muncho. Drenon, un coronel francés que mandaba la 9, la 10
y la 11, diz que los de La Nueve yeran homes mui difíciles de mandar porque
custionaben siempres l’autoridá. Eso llévamos a la enorme presencia
d’anarquistes. Pero diz que, siendo indisciplinaos, cuando se comprometíen
yeran fieles ata’l final, que nunca retrocedíen, que se presentaben a les
misiones más arriesgaes. Diz el coronel francés, nuna entrevista munchos años
dempués, que con mil homes como aquellos cien él tomaríe Berlín. Pensando
naquellos homes me recuerdo de Quevedo: “mester ye ver cómo se da la vida pola
honra, ya’l que nun lo entienda nin tien vida nin tien honra”.
M.A: ¿Y lo militar,
estrictamente? D’eso poco se sabe.
D.M.R.: Pues préstame
esto que m’entruga. Ye llamativo qu’haiga mui pocos estudios sobre la guerra
civil dende un puntu vista militar. Salas Larrazábal, un militar franquista y
bastante obxetivu por otra parte, debe ser, sinón l’únicu, el que más se dedicó
a l’asuntu. Nes academies militares del mundiu namás que, de los españoles,
estudien a Rojo, el defensor de Madrid. En West Point estudien a Rojo. A Franco
nun lu estudien pero tiénenlu como ún de los peores militares de la historia.
Franco ye l’exemplu de mal militar, de lo más incompetente, precisamente porque
planificaba los movimientos ensín siguir una máxima universal, la de perder el
menor númberu d’homes posible. A Franco nunca-y dieran más les vides de los
soldaos. Si van vustedes al muséu de West Point, que ye bien interesante, verán
la batalla de Madrid y cómo despliquen nos paneles la táctica de Rojo y, al
empar, la incompetencia de Franco. De fechu, sólo cuatro españoles figuren nos
planes d’estudiu de les academies del Reino Uníu y d’Estaos Uníos: Blas de
Lezo, Cosme Churruca, Vicente Rojo y Cipriano Mera; dos marinos, ún
d’infantería ya un milicianu. Tamién estudien a Millán-Astray, pero a esti más
polos sos sistemes organizativos, que yeran deldores de la tradición xaponesa,
del códigu bushido. Millán-Astray ta
na memoria xeneral como un descelebráu histriónicu pol so asuntu con Unamuno na
universidá de Salamanca, pero a min paezme de lo más interesante de la historia
militar española.
M.A.: Tenemos, Arantza Margolles,
que poner en nómina a David Rivas.
A.M.: La mio llista
encabézala el profesor Rivas.
D.M.R.: Yo encantáu. Amás
el primeru setiembre paso a ser pensionista. Tendré tiempu. Y, con tal de que
nun me paguen más de 30.000 euros al añu, nun entro n’incompatibilidaes.
A.M.: Nun va ser el casu.
M.A.: Non, nun va ser.
Munches gracies, David Rivas.
D.M.R.: A vustedes. Pero
a una xanta espero que me conviden dalgún día.