"N'Asturies el cristianismu calistrara poco o caló d'otra manera"

David Castañón: Ye'l momentu de falar de sidra con David Rivas, el nuesu profesor favoritu, que lleva munchu tiempu falándomos del mundiu cultural asturianu venceyándolu a la sidra. Faláramos de la nuesa tradición, de les nueses lliendes, de los nuesos mitos, poniéndolo tóo en rellación col restu d'Europa y d'otres partes del planeta. Fae maxistralmente la referencia a esos pegoyos culturales, unos ancestrales y otros más modernos, nos que los asturianos mos vemos identificaos. Tamos falando nos últimos programes de la simboloxía, d'un ciertu esoterismu, que ye como la espluma nel vasu, cuando'l gas endóxenu despierta al echar un culete. ¿Qué tal, amigu?

David M. Rivas. Mui bien. Eso de ser el profesor favoritu nu sé yo. Pamidea que nun tién vusté otru.

D.C.: Non, non, ¡qué va! Na universidá tuve dalgunos profesores mui bonos. Sé de lo que falo. Y dalgunos, anque yeran del ária informática conocíenlu a vusté y, por cierto, falaben bien, teníenlu en bona consideración. Cuando falo de profesores y de la so calidá falo con conocimientu de causa.

D.M.R.: Val, val...

D.C.: Acaba Rivas d'engordar un par de kilos.

D.M.R.: ¡Hahaha...! La verdá ye que voi acabar como un xatu culón si sigo viniendo a esti prau.

D.C.: Nel anterior programa yá entamara a falar de la mitoloxía y les lliendes asturianes venceyaes al mundiu de la mazana y la sidra. 

D.M.R.: Toes eses lliendes que, como decía, nun hai que confundir con supersticiones porque pertenecen a una cosmovisión, que son visiones reales, yeren les maneres de desplicar les coses nuna sociedá antigua, nun mundiu diferente al nuesu. François Jacob, que fuera Nobel de melicina en 1965, desplicaba qu'el mitu y la ciencia cumplen funciones similares: representar el mundiu y les fuerces que supuestamente lu gobiernen. Nesti sen, mesmo'l mitu que la ciencia afiten les demarcaciones de lo que se considera posible. Amás, como dicía Jung, son manifestaciones d'un inconsciente colleutivu. Yo nun soi un junguianu forofu, non, pero'l so plantegamientu paezme mui interesante y creyo que desplica munches coses.      

D.C.: La verdá ye que la teoría de Jung, que yo metime por ello dempués de les referencies que vusté fizo, non hai un par de selmanes, sinón dende l'entamu d'estes charres, ye mui interesante. La verdá ye qu'engancha.

D.M.R.: Jung ye una figura fascinante, contradictoria, llena de claroscuros. Morriera en 1961, con 85 años. A la hora la so muerte un rayu franciera l'árbole embaxo'l que se sentaba a descansar y ller. Eso diera muncho de falar. Na so tumba hai tres frases en llatín: "llamésmolu o non, Dios tará presente", "el primer home vien de la tierra y ye terrenal" y "el segundu home vien del cielu y ye celestial". Puru gnosticismu. Ye'l fundador de la psicoloxía analítica, tamién conocía como psicoloxía profunda. Incorporó a la so disciplina llínies procedentes de l'antropoloxía, l'alquimia, l'arte, la mitoloxía... D'esta forma, fizo una relleutura contemporánia del gnosticismu y del neoplatonismu, con una estraordinaria revisión del Rosarium philosophorum, escritu en 1550. Tamién estableciera una rellación ente l'eros de Freud y la voluntá de poder de Nietzsche, dalgo mui inspirador. Con tóo ello saca la idea de qu'esiste un procesu de tresmutación arquetípica qu'evoluciona durante los siglos, dalgo suprapersonal, colleutivo, un mundus arquetipus. Desplícalo mui bien nel llibru Psicoloxía y alquimia, de 1944. Viaxó per mediu mundiu, particularmente per África, La India y les tierres fronterices de México y Estaos Uníos. Fue precisamente l'estudiu de la cultura árabe lo que lu llevó a reondear la so tesis del inconsciente colleutivu. Eso plasmáralo nel llibru que se titula, concretamente, Los arquetipos y lo inconsciente collleutivo. Cuando'l nazismu, que capeó pol fechu de ser suizu, anque aidó a dalgunos xudíos a salvar el pelleyu, dixo que Hitler yera un home insignificante, un mal políticu, pero que contautó col inconsciente colleutivu de los alemanes. Ye un analís interesante. El nazismu llograría como mui pocos movimientos políticos, na visión de Jung, una movilización masiva con base na esperiencia subxetiva de los símbolos. Amás Jung yera un home un tanto antiestatista, entendía l'estáu como una personalidá que paez viva pero que ye un trampantoxu d'individuos que saben manipulalu, falando d'ello como d'una forma d'esclavitú.

D.C.: Pero agora nun paez tener munchu predicamentu.

D.M.R.: Na ciencia más formal, académica, non. Nes facultaes de psicoloxía ye estudiáu dientro de la materia d'historia. Pero tien y tuvo muncha influencia nel arte, nel cine, na lliteratura, na música: Hermann Hesse, Herbert Wells, Priestley, Mircea Eliade, Borges, Joyce, Ursula K. Le Guin, David Bowie, Sting, Peter Gabriel, Fellini, Ingmar Bergman, Buñuel, Kubrick, Jodorowsky, Moebius... y munchos más. Tamién ye perimportante pa dalgunos grupos iniciáticos, como los masones, los rosacruces y los mesmos xesuites. 

D.C.: ¿Y vusté?

D.M.R.: Vamos ver: yo de psicoloxía teo cuatru rudimentos. Pero dalgo lleí. Ye verdá que lleí de psicoloxía mientres tuve estudiando, especialmente de psicoloxía evolutiva porque taba rellaicionada cola estructura económica. Intereseme muncho por Piaget. Lo mesmo me pasó cola llingüística, onde tuve dalgún tratu col estructuralismu xenerativista, el de Chomsky. Nesi tiempu metiérame miéu pela cabeza el conductismu de Skinner, non tanto la so teoría, sinón lo que podía significar en dalgunes aplicaciones. Oseya, qu'en psicoloxía igual toi más desfasáu qu'un camión qu'arranca con manivela. Pero siempres tuve estes orientaciones como sofitu pa dar forma a la mio visión de la estructura económica, anque nunca fui estructuralista. Sí tuve y teo una visión estructural, que ye cosa diferente. Nos años más recientes volviera un poco a la psicoloxía'l comportamientu, porque volví a estudiar microeconomía, que dexara aparcao a metada la llicenciatura. Y la microeconomía nun ye, como creyen munchos, la economía doméstica, la individual. Hai quien piensa que la macroeconomía ye la suma de munches microeconomíes. La microeconomía estudia les decisiones individuales nel mercáu, delantre los precios, delantre la incertidume..., embaxo'l paradigma de la racionalidá, que mos llega de Mill y de los positivistes ingleses anteriores. Y eso toca muncho cola psicoloxía. Polo que respeuta a Jung, lleílu yá d'otra manera y más sero. Y sigo recurriendo a la so obra en dalgunes ocasiones, anque, como-y dicía, tampoco soi un junguianu. Pero pienso qu'hai un inconsciente colleutivu, una memoria común o dalgo asina. Lo que nun sé mui bien ye cómo funciona.

D.C.: Vamos baxar el pistón teóricu.

D.M.R.: Epistemolóxicu.

D.C. Val, nun se ponga más repunante de lo que ye normalmente.

D.M.R.: Yo neses coses soi particularmente repunante, inclusive antipáticu.

D.C.: ¡Val, ho! Vamos seguir colos mitos asturianos.

D.M.R.: N'Asturies hai una calterística mui importante: ye un país mui poco romanizáu y cristianizáu mui de seroño. Entá güei somos un pueblu con bastante sincretismu. La mayor parte los llugares de cultu yá lo yeran enantes de que llegaren los romanos y, detrás d'ellos, una relixón como la cristiana. Equí nun hubo barbaridaes como les de Roma o Alexandría, ente otres coses porque nu yera una sociedá estatista y urbana. Por cierto: yo tiendo a creer a Nerón y a pensar que los cristianos incendiaron Roma.

D.C..¡Nun me diga!

D.M.R.: Ye una suposición mía, evidentemente. Pero na tradición cristiana más estremista la idea de purificar pol fuéu ta mui enraigonada, dende quemar biblioteques a quemar herexes, bruxes o xudíos. Los cristianos más cultos saben perfeutamente que la purificación pol fuéu ye dalgo simbólico, como saben que l'apocalipsis ye un rellatu cargáu d'esoterismu y visiones, pero dalgunos emplegaron tóo eso pa consolidar el poder temporal de la Ilesia y espardir el terror per Europa. Esa visión terrorífica malapenes llegara a Asturies, anque paez ser que dalgo d'ello hebo durante'l reináu de Ramiro I. N'Asturies el cristianismu fuera más amable. Los seutarios llegaos de recién nun destrueron los vieyos cultos. Lo que ficieron fuera adautalos. Nun había una teoloxía anterior, sinón que yeren ritos naturalistes, dioses del llugar, serpientes, muertos que volvíen, homes como llobos, dragones, personaxes de la viesca... El cristianismu, non siempres en bona convivencia, fuera adautando y adautándose. D'esta manera, los mitos antigos fueron suplantaos por virxes, mui potentes na tradición asturiana. Al fin y al cabu ye'l mitu de la Tierra, de la madre, del amor y la proteición, pero tamién cristos y santos. Esos santos son de los más antigos del cristianismu, munchos d'ellos de duldiosa historicidá. Nun hebo n'Asturies un personax como Patriciu, el gran san Patriciu, cellebráu polos celtistes nos pubes de Xixón y Uviéu, que dedicó la vida a destruir los centros relixosos ya iniciáticos de los irlandeses.

D.C.: Ya sé que a vusté nun-y gusta muncho lo de san Patriciu.

D.M.R.: Nun me gusta nada. Falo d'Asturies. Lo que faigan n'Irlanda o nos Estaos Uníos nun ye problema míu más que de como analista. Pero qu'unes persones que refuguen a la santina de Cuadonga, una diosa madre na que creyíen los asturianos de la mui primera edá media, cellebren a un obispu que destruyera cuásique tolos cultos antigos, y, pa encima, vaigan de lo que van, ye pa min incomprensible. Bono, lo que ye comprender, compréndolo, pero ye estúpido. Puedes ser más de Guinnes que de Viuda d'Angelón, pero eso... 

D.C.: Nun tira vusté con bales de foguéu precisamente... Pero sigamos cola nuesa particular relixón.

D.M.R.: Hai una custión que perviviera ata los nuesos díes y, amás, con muncha vitalidá: les romeríes de prau. Hai dalgo que llama l'atención: nos pueblos cellebren el día d'un santu determináu cuando resulta qu'el patronu católicu ye otru. Voi poné-y tres exemplos que me son mui familiares: en Quintueles cellebren a san Bartolo, cuando'l patronu ye san Clemente; en Quintes a Santana, cuado ye san Fabián; y en Candanal cellebramos el Carme, cuando la patrona ye la Candelera, anque ésta cellébrase tovía n'Argañosu, na mio aldea. ¿Por qué pasa eso? Porque san Bartolo ye n'agostu, y Santana y'l Carme en xunetu, en branu. ¡Caro!, la Candelera ye'l 2 de febreru, colo que queda en fiesta familiar, de mui pocos vecinos, a cubiertu y, si ye posible, con un bon llar. Anque la Candelera tien un raigambre mui poderosu, ye la madre purificada, la muyer que pasó pel fuéu, que por eso ye negra. Les de branu son fiestes de collecha, vieyos ritos rurales naturalistes, ritos solares. Los oficiales, por asina decilo, tamién se cellebren, pero son más clericales y con poca afluencia. Eso llevó a la Ilesia a instituir la fiesta sacramental, pa dotar a la romería de branu de dalgún rasgu católicu. Asina qu'el cura, embaxu paliu, procesiona cola hostia, el sacramentum, metía nuna custodia y detrás los del pueblu con Santana o cola virxe'l Carme. Acaba la procesión, el cura retírase, faese la puya'l ramu, heredá de la cellebración de los frutos de la tierra y entama la folixa. Y ye corriente qu'esa fiesta de prau se cellebre nuna carbayera, al delláu d'una fonte o un rigu, cerca d'una cueva..., ellementos que queden como reminiscencies máxiques o relixoses de les vieyes creyencies.

D.C.: A min lo que me fascina ye que toes estes coses, que lleven con nosotros de tola vida, de tola historia, nun sepamos d'aú vienen. Por eso ye tan importante tener esta seición nun programa que, en principiu, deldícase a la sidra.

D.M.R.: Esos ritos son de collecha, solares o llunares, que tamién los hai llunares. San Xuan, por exemplu ye un mitu doble, solar y llunar, con dos tipos de rituales enforma estremaos. La xente sigue prauticándolos nel mesmu sieglu XXI pero nun sabe l'aniciu, el fundamentu. Pero bono, tampoco la xente sabe lo que ye un ritu sacramental. Dende'l XVII la Ilesia llama sacramental al signu col que se prepara una persona o un grupu pa recibir un sacramentu, nesti casu la eucaristía, y pa santificar la so mesma vida. Pero, dende mui atrás na historia, ye una pallabra o un signu d'una ceremonia consagrada pola llei o la tradición. Y ehí ta'l busilis: consagrada pola tradición.

D.C.: Por eso yo repuno tanto a los católicos cuando nun se rebelen frente a coses copiaes de la selmana santa castellana o andaluza, teniendo equí una bayura impresionante de ritos, unos ritos con identidá propia dientro'l mesmu catolicismu.

D.M.R.: Son ritos, estos que vienen del sur, que non namás que choquen cola nuesa tradición, sinón que tan poniendo en pelligru la so propia cultura, la d'ellos. Voi poner un exemplu claru. El Rocío ye una fiesta de marisma, na que se cellebra l'esporpolle l'augua, cuando'l rigu medra en primavera poles lluvies y'l derretir de la ñeve nes montañes. Ye la fiesta'l Guadalquivir, una fiesta pa ribereños dende, más o menos, Sevilla a Almonte. Incluso la xente de la ciudá de Sevilla participaba poco porque na ciudá teníen la mesma fiesta cuando la lluna d'abril. Pero nunca fueron rocieres les xentes d'Almería, Málaga o Granada, les de la Penibética, que vienen d'otra cultura, más de tierra alta y costa dura. Agora, en cambio, toa Andalucía ye rociera. A la virxe'l Rocío llámenla blanca palomba, que ye'l nome que fenicios y cartaxineses daben a Astarté, la de les cien tetes, la so diosa madre. Y cuando eso llega a Asturies, yá nun ye que subvierta l'orde cultural, sinón l'orde mental. Ye la gran patochada. Amás, como siempres comento, puede que lo dixera yá equí, que si eses fiestes d'abril o rocieres les montaren andaluces que viven ente nosotros paeceríame mui bien. Cuando yo yera neñu diba col mio güelu a la fiesta de los gallegos de Xixón por Santiago: ribeiro, pulpu, llacón, gaita, empanada, nabiza... Pero yera una fiesta gallega montada por gallegos. Pero les analuzaes estes mónteles los ayuntamientos y les patronales hosteleres. Si los andaluces que viven n'Asturies monten esta bolera, pues mui bien. Y non namás que pueden montalo, sinón que tamién, como ciudadanos asturianos, tienen drechu a recibir subvenciones del departamentu correspondiente. Y yo seguramente diría, a una fiesta d'ellos pa cellebrar con ellos. Pero dir a Piloña a ver al alcalde en calesa y a Ramona la de Sebares o de Coya vestía de faralaes, o dir a Llaviana a ver baillar sevillanes a Pin el de Llorío o de Villoria con un sombreru cordobés, pues non.

D.C.: Agora yá lo faen ata n'A Veiga.

D.M.R.: Pues agora col Ave llego enantes a Sevilla que a Veigadeo cola Feve. ¿Pa qué voi dir ver el sucedániu d'A Veiga si puedo ver l'orixinal?

D.C.: Vieron un filón pa sacar perres, alcaldes y hosteleros. Tóo ye comedia.

D.M.R.: Yo nun creyo qu'haiga denguna mala intención.

D.C.: Yo sí que lo creyo: una aculturación, un intentu d'uniformidá, una españolización...

D.M.R.: Vamos ver. La minusvaloración de la cultura asturiana ye un programa que tien munchos años y hai xente que sigue'l programa, como los buenistes de la universidá, güei desprestixaos y escaecíos, de los que namás queden tres o cuatru columnistes d'una prensa que nun sabe que tamos nel XXI y na Unión Europea. Hai xente y partíos que lo tienen programao, seguramente. Pero yo nun creyo que l'alcalde de Veigadeo, que nun sé de qué partíu ye, tea la idega d'aculturizar al conceyu. Supongo que ve que la cosa, como vusté dicía, trae perres, y tira pallantre. Pero ye verdá que participa nel asesinatu cultural del so conceyu. Mire pa Piloña: la meyor fiesta l'ablana dende hai décades, les meyores feries de ganao... y busque n'internet agora.

D.C.: Vamos volver a lo que trayíamos porque, como siempres, andamos a lo lloco. Falaba vusté de la poca cristianización d'Asturies como desplicación de dalgunos estremos de les nueses creyencies y fiestes.

D.M.R.: Sí, sí, que siempres ando peles rames. Yá yera asina cuando daba clase. Anque, la verdá, a los miós alumnos, normalmente, prestábais. Paezme que voi falar de dalgunes coses de les que falamos hai bastantes menses. L'obispu Aponte de Quiñones, na última década'l XVI, dicía que la fe cristiana n'Asturies aguantaba de millagru. Tóo lo que voi contar ye testual y documentao, vaiga per delantre. Y añadía l'obispu qu'esa fe taba arrodiada d'una "común inorancia". Ser inorante, evidentemente, yera nun conocer la doutrina católica. Dicía que los asturianos blasfemaben. Y, una bona observación, dicía que teníen vecindá marítima con Inglaterra, país pol que teníen muncha simpatía, y que mandaba herexes nos sos barcos. Pero ye que, a primeros del XVIII, un clérigu de prestancia, Tomás Relluz, diz que n'Asturies hai munchos cures y munchos párrocos, pero qu'una gran parte son filli presbyterorum, oseya, fíos de cures. 

D.C.: ¡Hahaha...!

D.M.R.: Sigún dicen los testos arzobispales, la lluxuria yera'l pecáu capital fundamental de los asturianos. Y agora, col informe de Relluz, danse cuenta de que nin tansiquier los párrocos cumplen coles normes eclesiales. Esto siempres me recordara aquel chiste tan vieyu: "-vusté por qué se fizo cura; -por tadición familiar, mio padre yera cura, mio güelu yera cura...".

D.C.: ¡Hahaha...!

D.M.R.: Tamos falando de 1701. Yá avanzáu esi sieglu XVIII, l'obispu González Pisador, ellaborando unes synodiales pa Uvíéu, falaba de dos prioridaes: erradicar les costumes sexuales de los asturianos, alloñaes de cualisquiera moral cristiana, y'l paganismu qu'entá sobrevivía. Tamos en 1762. Nesa mesma dómina l'inquisidor de Lima pide al rei más cures y frailes porque hai que catequizar a los indios y nun ponelo tóo en manes de lo penal. Y'l rei de les Españes contesta qu'abondo tien colos "indios d'Asturies".

D.C.: ¡Los indios d'Asturies!

D.M.R.: Tamién ye verdá que González Pisador diz que l'asturianu ye un pueblu "inclináu a la piedá", anque blasfema muncho. Ehí tamién hai un sustratu históricu: los pueblos panteístes son piadosos. Amás, son piadosos nel doble sentíu: porque so fonderamente relixosos y porque exercen la piedá inclusive escontra l'enemigu. Pero blasfemen porque los sos dioses nun los castiguen por eso, como sí que faen los dioses del monoteísmu. González Pisador, un home de gran cultura y formación, matiza al so antecesor Aponte de Quiñones, que trata a los asturianos como "xente fiero". Mester ye saber qué significa esi apellativu nel XVI. Podemos maxinalo: cruel, amoral, xabaz... Y ye una custión a considerar el fechu de que l'alcoholismu nun figura como problema de los asturianos en denguna comunicación episcopal. Eso quier dicir que la sidra, daquella práuticamente la bébora alcohólica única, nun causaba problemes, cuando nesa época sí que l'alcoholismu yera siñaláu como importante notres diócesis. L'alcoholismu llegó a Asturies como problema social cola industrialización, la proletarización y la urbanización. Entraran el vinu, los destilaos más fuertes, al empar d'una sociedá de clases na que los probes alcontraben na botella un abellugu.

D.C.: Sí, sí. Lo de llamamos indios siempres me llamara l'atención. Quedé ablucáu la primera vegada que lo viera, que fue nun llibru suyu precisamente. Pero ye que nel reciente llibru de David Guardado hai un capítulu enteru dedicáu a les Indies d'España, que somos nosotros, Asturies.

D.M.R.: Yo nun soi a entender cómo los españoles y los sos reis pretenden descender de nosotros y, al tiempu, consideramos unos salvaxes. Ye qu'ata Cervantes, el gran español, sigún dicen, cosa que yo duldio y creyo que fundamentadamente, tira d'esi prexuiciu. El reinu d'España tien tres archipiélagos: les Baleares, les Canaries y les Asturies. 

D.C.: ¡Hahaha...!

D.M.R.: Somos como un archipiélagu.

D.C.: A min estráñame que teamos tan poco conciencia de la nuesa singularidá.

D.M.R.: Por cierto, ¿sabe vusté cómo se puede definir lo que ye un archipiélagu?

D.C.: Home, un grupu d'islles cercanes, pero supongo que vusté va contame otra cosa.

D.M.R.: Un archipiélagu ye un conxuntu de tierres uníes polo que les separa.

D.C.: Mira qué guapo.

D.M.R.: Sigamos cola historia. Llega la industrialización y vien impulsada polos capitales acumulaos por asturianos, especialmente, como yá faláramos un día, con base na mazana, na sidra, nel maizu y nos cítricos; pero tamién por capital foriatu, fundamentalmente belga, inglés y francés. L'obispu Díaz Caneja anda espavoriáu porque piensa que van llegar masones y protestantes, y que los asturianos van ponese de parte d'ellos, porque los asturianos, diz testualmente, "nun amuesen firmeza na fe". Pero, nota importante, escribe dempués qu'esa firmeza na fe ye, polo contrario, "carauterística de los españoles". Tamos nel XIX. Poco dempués l'obispu que lu sucede, Sanz Fornés, diz que tan mui divulgaes lleutures que ponen en pelligru la fe católica. ¡Caro!, tamos nel últimu terciu'l XIX, yá calara la illustración, diera Asturies la mayor y meyor camada d'economistes lliberales d'Europa, con Xovellanos, Campillo, Canga-Argüelles, Flórez Estrada... Esa lliteratura perniciosa llega al gumial con La rexenta de Clarín. Pero repite l'obispu que los vicios dominantes son la lluxuria y la blasfemia. Nostante, tamién fala de la borrachera. Hai un cambiu nel consumu popular, pasando de la sidra a otros productos, tal y como yo lo interpreto.

D.C.: Tien tola pinta.

D.M.R.: Lo importante, na mio opinión, ye que la sociedá asturiana d'entóncenes, yera tan tolerante como les sociedaes democrátiques europées y mui distanciada de lo que pasaba normalmente n'España. Esto dícenlo tamién, con de xuru que más conocimientu que yo, Salvador de Madariaga y Pérez d'Ayala. Por eso diz Martínez Vigil nel 1893 y sin citar a naide, pero refiriéndose a Leopoldo Alas induldiablemente, qu'hai muncha tolerancia con profesores y escritores poco "respetuosos", señalando al empar que la "irrisión" de la relixón ta castigada pola constitución, oseya, pol ordenamientu'l reinu d'España.

D.C.: ¡Vaya!, qua la Ilesia costárai muncho metemos en vereda.

D.M.R.: El cristianismu calara poco n'Asturies, o calara d'otra manera. Pocos pueblos alcontramos n'Europa, ye posible que dengún, quiciavis los gallegos, los irlandeses y yá los que tan más al és del Rin y del Danubio, qu'en plenu sieglu XX creyeran que los dragones, los cuélebres, yeran cosa verdadera o que, muncho más espardío, una bruxa podía malengüeyar a una vaca o a una persona. Y nesti XXI, como yá falamos dalguna vegada, muncho xente sigui pasando l'augua pel alicorniu, un cuernu que supuestamente ye d'un unicorniu. A mín, que naciera n'avientu de 1957, pasáranme l'augua cuando tinía dos o tres años, na década'l sesenta. Y la mayor parte la mio familia yera d'un estatus académicu y social mui superior a la media.

D.C.: ¿Que-y pasaran l'augua?

D.M.R.: Sí, sí, pero yo nun me recuerdo. Yá-y dicía que yera mui pequeñu. Pero contáronmelo y supe de la persona que fizo la ceremonia, una muyer que se llamaba Adosinda, como la gran reina praviana. 

D.C.: ¡Ablucante!   

D.M.R.: Eso nun ye nada anormal. Cuando tinía unos díes de vida tamién me ficieron lo mesmo, pero llámenlo bautismu. ¿Hai dalguna diferencia?

D.C.: Viéndolo asina...

D.M.R.: Tamién ye verdá que, aparte de qu'el paganismu y'l panteísmu fueran les espresiones más propies de los asturianos, los católicos, na so prédica, alfrentaron una tierra dura, un país con difíciles comunicaciones, con una población dispersa na discontinuidá de picos y valles. Aponte de Quiñones, a finales del XVI, dicía que yera conveniente que l'obispu d'Uviéu fuera sanu y fuerte porque tol entornu yera xabaz, montañosu y que taba ñeváu más de la metada l'añu. Dicía tamién que parte'l país nun yera visitable nin tansiquier a caballu. ¡Bono!, la xente viaxaba en caballu, pero pa un español mesetariu la cosa taba complicada. Y termina con una fras preciosa: "nun quinqueniu la diócesis acaba col obispu".

D.C.: ¡Hahaha...! Una entruga de repunante: esos obispos, ¿d'aú yeran?

D.M.R.: Yá veo per onde va. Los más antigos son castellanos. Aponte de Quiñones yera de Villarejo de Salvanés y González Pisador de Nava del Rey. Sanz Fornés yera de Gandía, valencianu. Pero los otros dos son asturianos, Díaz Caneja d'Oseya, del conceyu de Sayambre, y Martínez Vigil de Tiñana, del conceyu de Siero. Pero podemos observar una cosa: los asturianos faen crítica social ya ideolóxica, mientres que los otros falen mal de la mesma identidá de los asturianos ya incluso despotriquen del mesmu terrentoriu, de la orografía. Aponte temía a los asturianos, miéu que tuvieron tolos obispos foriatos ata que llegara Díaz Merchán, un manchegu, qu'entendiera más allá de lo esperable, yá nel últimu terciu los setenta'l XX. ¿Será casualidá? Puede ser.

D.C.: Llamen l'atención estes coses.

D.M.R.: A min gústame muncho la lliteratura eclesiástica porque los clérigos documenten mui bien, especialmente cuando, emburriaos por un afogín ortodoxu, pónense a censurar. Cuando censuren, cuando critiquen lo que consideren paganismu o disviación, tan desplicando con detalle lo que pasa. Tolos ritos antigos, d'ensalme, de bruxería, de cultu, de vezos pervieyos mui enraigonaos, descríbenlos mui bien. Eso permítemos agora conocer munches coses qu'el pueblu, de tradición oral, escaeciera. Por exemplu, un párrocu de San Pedro de Xixón, un tal Boide, desplica nun informe, mui esmolecíu, que la xente entra nos cementerios na nuechi d'antroxu, cuerriendo, con culmiellos y espardiendo buyarra. Esi, evidentemente, ye un ritu de pasu primaveriegu, de fertilidá, nel que p'algamar bayura convócase al espíritu de los antepasaos. Esta práutica tovía se viera nel suroccidente ata hai mui poco, puede que se siga faciendo en dalgún sitiu, pero qu'en Xixón perdiérase muncho enantes. Si esi cura nun escribe esi informe cola intención de que les autoridaes reprimieran eses aiciones, güei nun lo sabríamos. Como muncho pensaríamos que yera un ritual, o una superstición, rural y namás que del occidente. Gracies a la santa indignación d'aquel clérigu, sabemos qu'en Xixón, una villa industrial costera y abierta al mundiu, facíase lo mesmo. 

D.C.: ¿Y persiguieron estes costumes?

D.M.R.: Si por persecución entendemos un sumatorio d'arrestos, xuicios, condergues, hai que decir que non, que nun la hubo. Pero si entendemos por ello prédiques mui dures, amenacies de condergues eternes, penes nel infiernu insoportables y eses coses, sí, caro que lo hubo. Y ye que la Inquisición nunca tuvo importancia n'Asturies. Eso vese con claridá nel fechu de que, en cuatru sieglos, namás que se sustanciaron tres procesos por bruxería. Dos d'ellos acabaron n'absolución y ún con pena d'amonestación.

D.C.: Muertes, denguna.

D.M.R.: Non, nin tampoco prisión, nin castigos corporales, nin procesiones col sambenitu y'l capirote. Y tampoco dengún d'esos casos provocara dengún tumultu popular contra los acusaos. Y tóo se sabe bien porque, como dicía, los cures, y mui especialmente la Inquisición, tolo apuntaba. Sabemos de los procesos más espeluznantes de la Inquisición, non d'Asturies sinón d'otros países, porque daben fe ata del más cruel métodu y de más espantible glayíu del acusáu. Sólo los nazis fueron tan puntillosos cuando anotaben concienzudamente lo que pasaba nos campos de concentración, a lo mesmo ata los menses del desconciertu final. Esi escosu númberu de procesos por bruxería llama l'atención porque sabemos que yera un fenómenu estendíu. Hai que tener en cuenta que la diócesis, la xurisdicción d'Uvién ata'l Conciliu Vaticanu II, que ye de 1965, antiayeri, abarcaba Asturies, la entós Santander, el norte de Llión, un cachín de Zamora y l'occidente de Llugo. ¿Y tres procesos en cuatru sieglos? Por cierto, qu'el terrentoriu episcopal concide col terrentoriu central d'Adefonso II. 

D.C.: ¿Y por qué podría pasar eso?

D.M.R.: Supongo que les razones son unes cuantes y yo, que nun soi espertu, nun sabría qué dicir. Hai dos que sí conocemos porque, como vimos, cuéntenlo los mesmos obispos: el problema d'accesu a los pueblos y cierta tolerancia por parte de los cures. Eso nun se daba nes tierres llanes de más al sur del Esla. Pero hai otru ellementu: la xente d'equí nun delataba, nun yera chivato. Esto, que ye una hipótesis mía, carauteriza a les sociedaes tribales en tol mundiu, que nun entreguen a ún de los suyos a naide, anque puedan ser mui crueles nel interior de la so mesma comunidá, inclusive pa col mesmu dellitu.

D.C.: Eso paez mui interesante.

D.M.R.: Podemos ver tóos esos componentes nel casu de la llobera de Llanes, Ana García. Esta muyer naciera en Posada en 1623 y más lluéu viviera un tiempu en Bricia. Yera una bruxa nel sen más cenciellu ya inocente de la pallabra: sabía de plantes, de remedios pa enfermedaes, de sustancies alteradores de la consciencia... Pasó munchu tiempu colos pastores d'El Cuera, siendo mui mocina, lo que mos da la idea de que venía de tradición, de madre o de güela. Nes mayaes fuera, por decilo asina, la  mélica de cabecera, sanando firíes, poniendo emplastos, iguando güesos, dando ferviellos, asina como faciendo tamién d'albeitre pa col ganao. Dicíen que se comunicaba colos árboles, coles fontes y colos animales, pero especialmente colos llobos. De ahí viniera'l so calificativu de llobera. Paez ser que ye cierto que tinía un llobu en casa, como otros tienen un perru o un gatu. Nun sería nin la primera nin la última persona que tien un llobu. Ensín dir más lloñe, tinía más d'ún Rodríguez de la Fuente y salía con ellos pola televisión del nacionalcatolicismu. Pero la tradición popular diz que tinía siete.

D.C.: Yá vamos al númberu máxicu...

D.M.R.: En parte, seguramente ye eso. Pero hai más. La tradición dizmos, y puede que seya verdá, que la mayor eficacia de los llobos cuando ataquen dase cuando son siete: "dos equí, dos ehí, tres ellí". Dos déxense ver per una banda y otros dos pela otra. El venáu, o'l xabaril, o'l curciu, cuerre p'alantre, onde, escondíos, tan tres que lu ataquen, un per una banda, otru pela otra y l'ultimu de frente. El venáu frena y trata de dar la vuelta, pero ye alcanzáu polos cuatru que-y van al ráu. Qu'Ana la Llobera tuviera siete llobos quería dicir que podía mandalos a un ataque con munches posibilidaes de tener ésitu. Pero'l llobu tamién ye un pelligru pa les oveyes, tamién pa otros animales domesticaos, pero especialmente pa les oveyes. Inclusive puede ser pelligrosu pa la xente. Nun ye normal, ye mui improbable, que los llobos ataquen a los humanos, pero podría pasar y, de fechu, dalguna vegada pasó, anque haiga demasiada llienda sobro neños comíos por llobos. Nun escaezamos que ye un animal totémicu. El casu ye que tar a bien con Ana yera una garantía. ¿Pero si a Ana-y daba por perxudicar a dalguién en pueblu? Seguramente mientres Ana vivió colos pastores más d'ún perdería oveyes polos llobos, cosa qu'ella nun podía evitar, pero qu'ellos pensaben que sí, o inclusive pensar dalgo peor, como qu'ella diera la orde a los sos siete llobos. Pues nos años que pasó n'El Cuera nunca naide la molestó nin, muncho menos, naide la denunció. Nunca la culpiaron de dengún ataque de los llobos. Había una deficiente cristianización, una mínima collaboración colos cures y una desconfianza total haza la Inquisición. Amás, Ana García yera una d'ellos y, pa enriba, yera la so sanadora. N'Asturies nun había acusaciones y, al nun habeles, la Inquisición nun intervenía. Y si quería investigar d'oficiu yá sabía lo que-ys tocaba a los sos esbirros: acabar la vida en cincu años, como dicía Aponte de Quiñones.

D.C.: La verdá ye qu'el profesor Rivas, además de saber munches coses, plausibles dalgunes vegaes, como siempres mos recuerda, ye que les cuenta mui bien.

D.M.R.: El casu ye qu'Ana García tenía un fíu, del que nun conocemos la filiación paterna, que marchara pa Toledo al servicíu d'un noble, Gabriel Niño de Guzmán. En 1648, cuando ella tinía 25 años, decidió dir a vivir con él a la ciudá castellana. ¿Cuántos años tendría cuando lu parió? Al poco de llegar a Toledo denunciáronla a la Inquisición.

D.C.: ¿Ellí?

D.M.R.: Sí, ellí, en Toledo y al poco de llegar.

D.C.: ¡Hahaha...!

D.M.R.: Denunciárala una tal María del Cerro, una muyer mui católica y mui influente na ciudá, una terrateniente. Ye posible que llegara a los sos oyíos dalgún comentariu qu'el fíu d'Ana García fixera en dalgun sitiu. L'espediente acusatoriou conta la llanisca ye d'un detalle impresionante, con una meticulosidá ablucante. Vese nes sos páxines que mandaron investigadores a Asturies, 700 kilómetros y a mediaos del XVII, recoyendo tola vida y millagros d'esta muyer. Nin Conan Doyle pondría a Sherlock Holmes a una xera como esa. Al final, el tribunal condergola a recibir instrucción cristiana durante cuatru menses porque consideró que nun yera culpiable quien nun conocía la verdadera fe. Pasáu esi tiempu volviera p'Asturies, posiblemente a los sos montes, pero nunca más nada se supo d'ella.

D.C.: ¡Vaya historia, tan guapa como tráxica!

D.M.R.: Asina ye. Pero yo fáigome una entruga: ¿qué pasaría si una manada llobos mata a toles oveyes d'una collación o si un lobu mata a un neñu y Ana, envede por un tribunal inquisitorial ye xulgada por un tribunal de pastores y aldeanos? Pues, seguramente, ente'l pánicu y la inorancia, acaba colgada d'un carbayu o quemada viva. Puede que fuera xulgada nun ambiente d'histeria colleutiva, como pasara en Salem unos años dempués, a principios del 90. Lo que pasó en Massachusetts difíilemente pasaría n'Asturies porque equí nun había fundamentalismu cristianu y lo qu'ellos, los protestantes anglosaxones, llamaben bruxería, equí yera dalgo mui natural, y la figura'l demoniu qu'ellí tanto atormentaba equí nun tenía denguna importancia. ¿Por qué? Porque'l cristianismu namás que diera una pequeña capa superficial.

D.C.: Muncho daprendemos col profesor Rivas. Esto último de la Inquisición llevo tiempu sintiédoilo a vusté pero nun acababa de convenceme muncho. Pero esta historia de la llobera de Llanes dame que pensar. 

D.M.R. Los homes de la Inquisición nun yeren unes hermanines de la caridá, evidentemente, pero los tribunales civiles nun yeran diferentes, y muncho más brutales yeran los populares, onde nun había nin normes nin defensor llegal. Y los métodos d'interrogatoriu yeren los mesmos en toles xurisdicciones, la eclesiástica, la señorial, la real, la municipal... Pero siempres l'acusáu, salvo que fuera por custión teolóxica, de doutrina, tenía meyor horizonte nun tribunal compuestu por homes de lletres, que conocíen les escritures sagraes, la filosofía, la teoloxía, el drechu natural... Eso por nun falar de los xueces psicópates populares d'Alemaña, Olanda, Inglaterra, Escocia..., que llevaron per delantre a miles de persones, muyeres fundamentalmente, en cincuenta años, como nun pasara en cuatrocientos en Castiella, Portugal y Aragón. En tres años, Calvino, sólo en Xinebra, llevó al patíbulu a más persones que les inquisiciones aragonesa, castellana y portuguesa en cuatru sieglos, gobernando un imperiu de más de mediu mundiu.

D.C.: La verdá ye que eso son fechos reales.

D.M.R.: Lo malo d'España ye que la Inquisición duró cuatru sieglos y eso convirtiera a los españoles nun pueblu de chivatos, un pueblu nel que naide confía en naide, onde la delación ye virtú. Ye la sociedá de lo del "cuando'l rigu suena...", de lo del "nada faigas y nada temas" y de lo del "dalgo fairía". Y la delación ta mui lligada al so motivu: la envidia. Y eso pagárase mui caro nes guerres civiles, especialmente nes posguerres. Esa ye la llarga herencia de la Inquisición. Cuando dicen que la envidia ye'l pecáu capital típicu del español, la clave ta ehí. Tamién ye l'unicu llugar onde esiste'l conceutu de sana envidia. Por cierto, a mín condergaranme por otru par de pecaos capitales, pero non pol de la envidia.

D.C. Falaremos de pecaos n'otra ocasión. Munches gracies, profesor. Fuera un placer, como siempres.

D.M.R.: Un saludu a los oyentes.