"El nadal ye una fiesta solsticial cristianizada y de caráuter familiar"

David Castañón: Vino vemos la selmana pasada, contando, como siempres, coses mui interesantes, pero yo quería que volviera esta selmana porque tamos nestes feches navidiegues. De les persones que yo conozo ye la que más sabe de la significancia de fiestes como estes, de la simboloxía, de los ritos, de todo eso qu'hai detrás de costumes que, andando'l tiempu, fuimos banalizando. Y dientro d'esos rituales tamién mos alcontramos cola gastronomía y, evidentemente, cola sidra, que ye la estaya específica pa la que vien al programa. La sidra ye lo central pero acaba siendo una escusa pa que David Rivas mos fale del mundiu enteru, con una cosmovisión como la que tien, que tanto mos presta. ¿Qué tal, profesor?

David M. Rivas: Mui bien y munches gracies por esta presentación tan afalagadora.

D.C.: Vusté, polo que me recuerdo d'una tertulia de repunantes, ye navidiegu. Estes feches son del so gustu.

D.M.R.: Sí, sí, yo soi navidauer.

D.C.: Navidauer, ¡hahaha...! Hai que decilo asina, modernín, como un bimillennial.

D.M.R.: Estes fiestes, especialmente les nueches del 24 y del 31, acaben bien, pal mio entender, cuando la xente pronuncia "Carolina Herrera" igual que nes anuncies de televisión. 

D.C.: Caro, ente polvorones y lo que llevamos chumao... Cuénteme lo que ye pa vusté la navidá y qué significancia tien.

D.M.R.: La nuesa especie ye ritualística, como yá comentamos notres ocasiones. Los humanos tenemos una necesidá, inclusive neurolóxica, de romper cola vida cuotidiana con rituales periódicos, algamando otra calidá de vida, anque seya por unos días, y enllazando con tiempos primordiales nos que tan los anicios de la humanidá mesma.

D.C.: ¿Cuálu ye l'orix de la navidá?

D.M.R.: El nadal, la navidá, ye una fiesta antiquísima, importante na cultura porque n'últimu términu ye una fiesta solsticial. Ye'l solsticiu d'iviernu, que na tradición cristiana identifícase con san Xuan, el Xuan evanxelista, como el san Xuan de branu, l'otru solsticiu, identifícase con Xuan el bautista. El nome de Xuan yá mos da dalguna pista. Remítemos al dios romanu Xanu, que yera una deidá representada por dos homes vieyos, el Duplex Ianus. Ún miraba pal és y l'otru pal oés, ún representaba la revelación, l'apocalipsis, y l'otru la lliberación, la redemptio. Col Xuan d'iviernu entama l'ascensu'l sol y col Xuan de branu'l descensu. ¿Por qué nestos díes solsticiales festexamos el nacimientu de Cristo'l 25? Ye una apropiación por parte'l cristianismu de la figura de Mitra, un dios nacíu d'una virxe que lu pariera esi día 25. Les fabulaciones sobre un nacimientu prodixosu son mui habituales, rellatos comunes a práuticamente toles relixones, incluso a creyencies que nun podemos definir, estriutamente, como relixones. Una creyencia y una relixón son coses distintes. Tamién ye una identificación con Osiris, fíu d'Isis, la principal diosa del antigu Exiptu. Isis y Osiris tan mui representaos na iconografía exipcia y les sos imaxes son sospechosamente asemeyaes a les de la Virxe col neñu, especialmente nel románicu occidental y nel arte oriental, el que güei ye propiu de la ilesia ortodoxa. María ta sentada, mui seria, que nun mira pal neñu, cosa qu'entama facer nel góticu y yá completamente nel renacimientu, y un neñu tamién seriu y en maxestá, bendiciendo colos deos y munches vegaes cola bola l'universu na manu. Hai una gran discusión sobro si esa muyer, esa diosa, ye María o ye Malena, si ye la madre de Dios o la esposa de Dios. Esa discusión llévamos a si'l neñu ye Xesús o un fíu de Xesús, que dicen los magdalenistes que yera una neña y que podría llamase Sara. Pero caro, si la historia canónica tien munches llagunes, esta alternativa nun tien menos. Esa historia diera orix a les virxes negres, como ye la de Cuadonga. La imax orixinal de la Santina nun ye la que güei vemos na cueva. L'antigua quemó pero sabemos cómo yera porque hai una copia en Cillaperlata, un pueblu de Burgos que ye l'únicu fuera d'Asturies que tien como patrona a la virxe de Cuadonga. Y ye una virxe negra, anque, igual pa nun cayer n'herexía, reblanqueciéranla. Ye paecía a la de Montserrat y non a la de Guadalupe. Por cierto, que negra yera Isis, negra la reina de Saba y seguramente negra yera tamién Malena. 

D.C.: Les virxes negres yeren les veneraes polos templarios, ¿non?.

D.M.R.: Sí, asina ye. Los templarios son los grandes impulsores del góticu y, especialmente, enllenaron Europa de templos a notre dame, pero esa nuesa señora nun tien nome. Ye eso, la señora. Por cierto, que Nostradamus, el profeta, nigromante y alquimista, lleva esi nome porque se lu puso elli mesmu: Michel de Notre Dame. La última virxe negra ye la de Candelaria, en Tenerife, y la bandera de Santa Cruz ye'l gonfalón del Temple, la cruzada blanca y negra, que comparte con Ceuta y con Llisboa. Y eso déxamos otra incógnita. Tenerife, la última islla canaria na que resistieron los guanches, concretamente los del menceyatu d'Anaga, cayera nes manes de Fernández de Lugo, incorporándose a la corona de Sabel I de Castiella en 1496. Pues, en puridá, los templarios nun esistíen dende cuásique doscientos años enantes. El magdalenismu siguió vivu y púsose mui de moda últimamente con dalgunos bestseller que, mester ye decilo, con una mayoría de mui poco rigor, y cola película El códigu Da Vinci. Pero, con más seriedá, anque non por eso vamos pensar que ye una historia cierta, tamién lu caltienen dalgunes lloxes masóniques, concretamente les del ritu escocés reutificáu.   

D.C.: Y lluéu ta'l rellatu más conocíu, el de los evanxelios.

D.M.R.: Sí, caro, pero incluso'l mesmu rellatu canónicu tien los sos episodios escuros, momentos que pueden interpretase de maneres distintes. El primeru ye'l de Xosé y la historia que-y cuenta la muyer. A mí paezme esti Xosé una de les figures más interesantes de la historia o'l mitu cristianu. Debía ser un paisanu estupendu. Cuando-y llega María colo de la conceución millagrosa, l'home aceuta la cosa. Vamos ver: si nun creyó lo del palombu y pensó en dalgo muncho más llóxico, amosó un amor pola so muyer impresionante, y eso nuna dómina tan patriarcal como yera la d'aquella sociedá. Pero si, pol contrario, creyó la historia, había que ser un puntu en condiciones pa cargar cola responsabilidá de criar y educar al fíu de Dios. En cualisquiera de les dos hipótesis, creyera la historia o nun la creyera, aquel paisanu tenía les barbes bien puestes.

D.C.: A Xosé vémoslu como mui panchu.

D.M.R.: Sí, normalmente apaez como un vieyu impotente y seguramente un poco tontu. Incluso durante llargos sieglos nun taba representáu na iconografía'l nacimientu y, cuando apaez, siempres viste de marrón, la color más baxa na simboloxía cromática. Yo pienso lo contrario de la so figura. Amás yera de la estirpe de David, la estirpe real, lo que faemos duldiar de que fuera un simple carpinteru. Si desaminamos con procuru les fontes evanxéliques vemos en Xesús a un home qu'aspiraba a tener el poder, como nel episodiu del día ramos, con aquella entrada en Xerusalén. De fechu, qu'el padre yera carpinteru namás apaez una vegada nos evanxelios canónicos, nel de Marcu, y ye en griego, llingua na que carpinteru dizse tekton. La traducción más aceutada ye esa pero tamién significa mayestru construitor. Tamién, col asuntu'l censu, van a censase a Belén, el pueblu de David, igual col envís de cumplir la profecía que decía qu'el mesías, fíu de David, diba nacer en Belén de Xudá. Realmente, los evanxelios, sacantes dalgo nel de Lluques, cuenten poquísimo d'esa familia.

D.C.: Hai trenta años d'escuridá.

D.M.R.: Eso ye. El neñu desapaez cuando tenía unes selmanes y reapaez con trenta años. Nos evanxelios que llamen apócrifos sí qu'alcontramos episodios de la vida de Xesús de neñu y adolescente. Algunos incluso mos falen de que yera malu y vengativu, qu'emplegaba los sos poderes pa putear a los vecinos y que la madre nun podía con él. Estos llibros son los que mos falen de que vivió n'Exiptu, lo que mos lleva a pensar que nun debió ser educáu nun xudaísmu ortodoxu. Pero tampoco sabemos cuántos años pasó n'Exiptu porque, almitiendo que, como dicen los canónicos, regresó a Galilea tres la muerte d'Herodes, eso de tres la muerte nun ye una fecha. Pero hai coses mui llamaderes. La oración que-ys enseña a los apóstoles, polo tanto desconocía pa ellos, el padre nuesu, ye una versión del cantu a Osiris. Y cuando va ser deteníu Malena únxelu con aceites caros, cosa que los demás nun entienden y que consideren un despilfarru. Esi tamién yera un ritu exipciu de preparación pa la muerte.

D.C.: Trenta años son muchos, toa una vida, teniendo en cuenta la esperanza vida de la época.

D,M,R,: Tamién ye verdá que en toa esa zona los númberos y les lletres tienen un significáu esotéricu. El 30 cuerresponde en dalgunes tradiciones al xuez, al xusticieru, al caballeru de la venganza... Eso illumina la interpretación de dalgunos episodios que se contradicen con un Xesús que ye pacíficu y tolerante polo xeneral. Equí podemos volver al Xesús que aspiró, como dicíamos enantes, al poder. Hai estudiosos que sospechen que nel Xesús de los evanxelios xúntense distintes personalidaes, que ye un rellatu sobro varies persones, non d'un únicu home.

D.C.: Acaba'l profesor Rivas de damos unos matices perinteresantes d'una historia, seya más real o menos, que todos conocemos básicamente.

D.M.R.: Bono, la xente más mozo nun sabe muncho d'estes coses, conoz poco del cristianismu y nun digamos yá de la cultura griega o céltica. Esto ye: desconocen les bases de la so mesma cultura. Ye como lo de los nomes. Tolos nomes tienen un significáu. Los indios norteamericanos nun se llamaben Caballu Llocu o Dos Llunes porque yeran una xente mui raro, non. Por exemplu, si vusté y yo fuéramos hebreos, porque hebréu ye'l nuesu nome, llamaríenmos Preferíu de Dios, como Arturo sedría en llatín Guardián de los Osos. Pero agora pónense de moda coses como llamar a una neña con un nome que significa Muyer Infértile, lo que ye enorme putada. Nun voi decir el nome concretu. Vas al muséu del Prado, por poner el más importante que tenemos cerca, y la metada como poco de los cuadros yá nun los comprenden munchos porque amuesen episodios, mitos o tradiciones griegues, romanes, xudíes, cristianes..., coses que desconocen.

D.C.: Eso ye cierto. Nun lo pensara nunca. Lo que mos da vusté a entender ye que tóos estos rellatos tienen una lligazón col saber antigu, que nun son histories que nacieran como nueves, nesti casu col cristianismu, nin que son úniques, sinón conectaes a otres anteriores. La navidá enllaza col solsticiu, colos dioses paganos, griegos, romanos. Llega una nueva deidá que bebe d'eses fontes.

D.M.R.: Si dalgo fizo mui bien el cristianismu fora la manera d'asimilar tradiciones anteriores. Toles relixones ficieron lo mesmo, pero'l cristianismu tien un par de carauterístiques poles que se distingue de les demás y particularmente de les otres dos relixones bíbliques, el más vieyu xudaísmu y'l más nuevu islamismu. Per un lláu presenta una mayor flexibilidá pol fechu de que la so figura central, Xesús, nun escribiera dengún llibru afitando una doutrina, colo que la interpretación de les sos pallabres, si ye que son verdaderamente suyes, puede ser muncho más llibre. D'otra banda, el cristianismu entra en contautu col aristotelismu, col materialismu helenista, y eso llévalu a compaxinar, meyor o peor sigún les époques, la fe y la razón. Por tóo eso los cristianos tienen más contradicciones que los xudíos y que los musulmanes. Eso desplica la esistencia de movimientos terribles, integristes y violentos y otros lliberadores, pacíficos y tolerantes. Y, amás, al mesmu tiempu, non sólo en momentos históricos diferentes. Por exemplu, mientres la xerarquía católica sofitaba ensín reserves a la dictadura arxentina, los cures de la teoloxía de la lliberación incluso pegaben tiros cola guerriya, mientres que los católicos de la cai taben dividíos, anque, normalmente, más en el antifascismu. Eso desplica tamién que sólo los países cristianos llegaren a la democracia y, a la mesma vegada, colonizaben y saqueaben mediu mundiu. Pa los europeos, yá dende los primeros momentos de los navegantes españoles y portugueses, el mundiu yera d'ellos porque contaben col dios verdaderu y tamién cola fuerza de la razón. A min paezme'l cristianismu la relixón más interesante dende un puntu vista antropolóxicu.

D.C.: Pero tien detrás toa una tradición anterior.

D.M.R.: Sí, y por eso ye mui interesante, especialmente'l catolicismu. A munches creyencies o mitos antiguos pudimos llegar porque pervivieron nos ritos cristianos. Seguramente si n'Asturies, por falar de lo cercano, lleguen a tar sieglos los musulmanes o los xudíos güei sabríamos menos de los antepasaos más remotos, porque nin faen imaxes, nin pinten retablos, nin tienen sacramentos, nin tienen romeríes en tolos pueblos... El catolicismu convirtiera en santos o virxes a los vieyos dioses y llevantara templos onde enantes había un llugar sagráu con un genius loci, con una deidá llocal. Y siguiendo la historia d'esi templu puedes llegar dalgunes vegaes al mitu anterior. Por exemplu, toles histories de Malena, anque seyan lliteraries o inclusive falses, revitalizaron los estudios serios sobro la diosa madre y les grandes deidaes femenines.

D.C.: Falemos de les navidaes d'agora. ¿Queda dalgo del mitu?, ¿tien esi interés dende un punto vista antropolóxicu al que se refería?

D.M.R.: Queda poco de lo vieyo y fondero pero sí que tien gran interés. Tovía dalgunos piensen que pa facer estudios antropolóxicos hai que dir a ver una tribu del Amazones. Hai toa una antropoloxía de la vida cotidiana, del fúbol, de la vivienda, de los automóviles... Evidentemente, el nadal actual ye una fiesta de base cristiana. Tamos nun país cristianu, culturalmente falando. Lluéu tan les creyencies de caún, que ye cosa perdistinta. Y de toles tradiciones cristianes ye la que menos molesta a los ateos o a los creyentes d'otres relixones. A la xente, en xeneral, gustái la navidá, anque hai furibundos antinadaliegos. Pero, normalmente, nun son contrarios polo que se cellebra estriutamente, sinón pola música atronante nes cais, con villancicos horribles. Fartos anden munchos, yo tamién, de los peces nel rigu y la burra del xocolate; y del consumismu y l'esbardie que supón; y de que nun hai forma de ver na televisión una película decente, sacantes ¡Qué guapo ye vivir!; y de que somos tóos mui bonos ata'l 6 de xineru pero'l 7 yá podemos ser cabrones otra vegada, Eso ye lo que cafia a la xente. Pero'l fechu concretu non: cellebrar el nacimientu d'un neñu ye bona cosa, ye dalgo allegre. Nun ye como la selmana santa, que ta mui ideoloxizada, amás de ser un tanto macabra o direutamente gore, con tantu sufrimientu, tanto sangre, tanta tortura. La resurreición, que ye'l principal componente de la fe cristiana, como escribiera Pablo, nun tien importancia nes cellebraciones populares y la Ilesia prefirió l'horror, el castigu, el sangre, la muerte, el dolor. A min, que soi navidauer, dame perceguera la selmana santa. Prefiero ver tolos años ¡Qué guapo ye vivir!, la película de Capra, que distintes procesiones cada añu. Amás ye'l nacimientu d'un neñu que va d'una cuadra a un patíbulu, d'un pelsebre a una cruz.

D.C.: Sí, ye una historia tráxica y propia d'un rebelde.

D.M.R.: Podríamos incluso facer una lleutura contemporánia, viendo lo que ta pasando nesti momentu en Gaza y notros llugares. Ye un matrimoniu, ella al borde de ruemper augües, que lleguen a Belén porque tienen que dir a por papeles, siguiendo la orden censal d'Octavio Augusto. Nun falen hebreo, tampoco llatín, menos tovía griego. Ellos, estranxeros, galileos, sólo falen arameo. Nun hai sitiu onde agospiar, nun conocen a naide, y un paisanu déxa-ys pasar la nueche nuna cuadra na qu'hai pollinos y vaques. Ellí la neña, mui mocina, pare y pon al neñu ente paya nun pelsebre. ¿Y quién tien conocimientu del nacimientu?, pues los campesinos, los pastores, los artesanos. Porembargo naide supo nada nin nel palaciu real rei nin na pretoría de les fuerces d'ocupación. Esto nun puede molestar a naide, seya atéu, musulmán, budista o de la congregación del santu ovni. 

D.C.: Yo pienso que lo que más molesta, villancicos aparte, ye lo de tantu consumismu.

D.M.R.: Seguramente. Eso nun pasaba hai tres o cuatru décades. ¡Home!, la navidá siempres fue un poco d'escesos, como pasa col antroxu.

D.C.: Pero lo del antroxu presta más porque ye más paganu, más de vamos a entamala. Esto ye más de vamos gastar perres.

D.M.R.: El nadal siempres fuera una fiesta familiar, como sabe cualisquier asturianu y tamién cualisquier d'otru llugar de base cristiana. Pero'l casu d'Asturies ye particular porque ye de los pocos países d'Europa onde meyor resistiera'l paganismu. Los propios obispos d'Uviéu lo decíen ata cuásique la guerra civil, llegando ún d'ellos a escribir, mediáu'l sieglu XIX, qu'el cristianismu sobrovivía de milagru. Yera un país poco urbanizáu, con un posu panteísta tremendu y que tovía caltenemos. Lo que pasa ye que n'ocasiones hai qu'estudiar un poco pa date cuenta de quién yes tu mesmu. Los solsticios yeran mui importantes, especialmente'l de branu, coles fogueres y tantes otres coses. Pero'l nadal siempres fue una fiesta mui familiar, na que los neños tiníen un papel central. Todo eso cambió nos últimos años. Pasamos d'una familia troncal a una familia ñuclear, pasamos d'unes families onde había, como poco, tres xeneraciones y a vegaes cuatru a otra de padres, dos fíos y, como muncho, un güelu o una güela. Yeran munchos, dalgunos fuera, nun tiempu nel que pa viaxar nun había tiempu nin perres, polo que pol nadal facíen esi esfuerzu. Yo creyo qu'un de los mayores ésitos del marketing que conozo ye l'anuncia d'El Almendro, que ye de la segunda metada los setenta. Esi "vuelve a casa por navidad" reflexaba mui bien la realidá. Daquella incluso los que tábamos na universidá tábamos fuera una montonera, non n'Uviéu, porque nun había titulaciones bastantes. La mio hermana pequeña emocionábase cuando veía al estudiante que llegaba porque víame a min. Esa anuncia güei yá nun ye igual, nun tien el mesmu calao. De fechu, recurre a una imax vieya d'un tren esprés nocturnu d'aquel tiempu, como nel que yo venía de Madrid.

D.C.: L'anuncia d'El Almendro yera un poco odiada nes zones mineres porque rara yera la familia que nun tenía perdes de dalguién y sufríenlo neses feches, especialmente los que teníen muertos con pocos años n'accidentes nel pozu. O, diciéndolo d'otra manera, yera emocionante pa lo bono y pa lo malo.

D.M.R.: Caro, caro. Yo tuve la suerte de nun tener perdes familiares prematures y les qu'hubo fueron enantes del mio nacimientu. Tolos familiares que conocí y morrieron ficiéronlo nun momentu predicible. Pero recuérdome de qu'en nuechevieya la mio tía güela taba amurniada porque mio güela paterna, la so hermana, morriera'l 31 d'avientu de 1939 y enterráronla el primer día de 1940. Lo mesmo pasaba el 24 con mio güela materna, que perdiera al so hermanu nun accidente moto esí día en 1956.                      

D.C.: La navidá asturiana, ¿tién dalgun rasgu peculiar?

D.M.R.: Non. Son unes fiestes como les de cualisquier otru país cristianu y, dientro'l cristianismu, como los demás países católicos, como España, Portugal, Austria, Irlanda... Sí que salimos del grupu grande porque emplegamos l'arfueyu como ellementu ritual, como'l grupu más pequeñu de los países celtes y escandinavos. Puede que lo más orixinal seya l'árbole les veles. Y repito eso de que puede ser porque nun sé si esiste esa tradición notros sitios. Ye un vezu que se taba perdiendo y práuticamente quedó circunscritu a los conceyos occidentales de l'Asturia cismontana. Pero, poco a poco, va recuperando y cada añu vemos más pela Asturia tresmontana. Ye un árbole artificial que se fae con un maderu de metru y mediu, más o menos, que ta rematáu por un triángulu equiláteru, tamién de madera, d'otru mediu metru d'altura, que tien los dos llaos llaterales escalonaos y un cumal planu. Ponse una vela en caún de los cinco peldaños de los llaos. Representen los cincu menses del ascensu'l sol, de febreru a xunu y los cincu del descensu, de setiembre a xineru. Pel so lláu, na parte plana ponense dos veles del mesmu tamañu, que son los menses solares, xunetu y agostu. Ye un símbolu de gran sincretismu porque ye panteísta, anterior al cristianismu y a la mesma época romana, y tamién romana, con Xulio César y Octavio Augusto arriba y en pie d'igualdá. Tamién dalgunos-y cuelguen tires de collores o les típiques boles de navidá, anque, paez ser, lo más antiguo yera colgar mazanes. Ye un casu claru de superposición de creyencies. Hai incluso cases que ponen al pié un nacimientu.

D.C.: ¿Y hai dalgún menú tradicional pa estes feches n'Asturies?

D.M.R.: Bono, teo lleyío nun periódicu madrilanu, ye testual, qu'el platu asturianu tradicional nestes feches nun yera la fabada nin el cachopu, sinón el pastel de cabracho. Yo nun sé d'aú saca les coses dalguna xente. Nun hai un platu propiu del nadal, anque en gran parte de cases ponénse los mesmos  determinaos productos. Lo que siempres pasó ye que cómese más y un poco meyor, delles vegaes coses que normalmente nun se comen o nun se comíen. Equí volvemos a lo mesmo: el nadal n'Asturies ye una fiesta, por mui antigua y solsticial que seya, de base cristiana. El cristianismu, al contrario de les otres dos relixones del llibru, nun tien normes civiles, nin mercantiles, nin penales y, ente ello, nun dicta cómo debes vestir, nin que comer o non, nin que beber o non. Eso fae que nun haiga una gastronomía ritualística. Los musulmanes faen el ramadán y, al acabar, cellebren la fiesta'l corderu, como faen tamién los xudíos cuando'l yon kipur. Y nun pueden comer gochu dengún de los dos grupos, nin guisar carne con lláctios los xudíos, nin beber alcohol los musulmanes. Hai un montón de normes. El cristianismu nun tien nada d'eso. Otra cosa ye lo que fixera la Ilesia, pero lo cierto ye que se llimitó a prohibir la carne en vienres, que dempués yá sólo dexó pa los vienres de cuaresma, o nun poder comer dende les doce la nueche si dibes a comulgar pola mañana, que dempués dexó nuna hora y agora en nada. Entós, caro, nun interfirió pa nada nos vezos culinarios tradicionales, pero tampoco impuso un menú pa les fiestes señalaes. 

D.C.: Algo se comería n'especial.

D.M.R.: Como-y dicía, lo carauterístico de la mesa nadaliega ye comer y beber más y gastando más. Eso tamién se fae, y siempre se fizo, cuando l'antroxu. Y ye porque tamos falando de lo mesmo. L'antroxu, que vien d'introitum, entrada en llatín, yera cuando entamaba l'añu romanu, mientres qu'el nadal ye la entrada l'añu cristianu. Tamos cellebrando lo mesmo. Ye más, tamién hai un tanto de desbardie cuando la nueche los muertos, porque entóncenes entamaba l'añu de los celtes, el samain. Y, por exemplu, nes tres fiestes se llanten árboles de veles. N'Asturies perviven les tres tradiciones, con mayor fuerza la navidá porque'l cristianismu resultó trunfante y lleva vivu más de dos mil años. L'antroxu, anque aparentemente tien munchu tirón, lo cierto ye que pocos son los que lu cellebren como tien que ser. Los ayuntamientos, buscando que la hostelería gane más, cellébrenlu cuando-ys paez, y dalgunos son carnavales, que nun ye lo mesmo, siendo males copies de Canaries o de Brasil, ensín reparar qu'ellí ye branu. ¡Y, hala, bailles tropicales y calderaos d'augua dende los balcones!. Polo que respeuta a la nueche d'ánimes, ta convertía nun ritu identitariu que prautiquen en dalgunes zones rurales y ciertos círculos políticos y grupos culturales, nacionalistes, celtistes, folkis...

D.C.: Pues vamos facer una cena nadaliega o de nueche vieya que pa vusté fuera la típica asturiana, atendiendo a lo que conoz de cocina tradicional, que ye bastante.

D.M.R.: Nun sé qué dicir y teo miéu que me salga'l mayestru Fidalgo, que me riñe por tóo dende que me daba clase de física en La Inmaculada. Sigue riñéndome en facebook, na radio, cuando mos alcontramos, en Colunga polo xeneral. Yo, pondría dalgo de mariscu pa entamar, optando por andariques, o unes ostres, anque seya menos tradicional. Dempués sopa de pescao, guisu de llombarda con pataques y llombu de gochu con castañes, o meyor de xabaril si ye posible. Y de postre mazanes asaes con miel. Esa sería lo más asemeyao a una cena nadaliega bien encadarmada, aunque quitemos el mariscu. Lluéu hai sitiu pal turrón.

D.C.: ¿Blandu o duru?

D.M.R.: Del blando. Y dalguna otra cosa. Na mio casa nun suelen faltar les moscovites. Lo qu'odio son les peladiyes. Dende pequeñu que nun soporto les peladiyes. Tampoco me gusten el mazapán nin el panetone.

D.C.: Bono, pal tiempu nel que tamos paezme una cena que podría ser tradicional.

D.M.R.: Sí, y nun lo saco de la manga. Ye lo que más identifico con estes fiestes. Lo que nunca pondría sería besugu. Como sabe vusté bien, el besugu ye l'únicu pexe que ye azul y blancu a un tiempu. Nel branu ye blancu pero nel iviernu, pa defendese de les baxes temperatures produz grasa y pasa a ser azul. Anque nutricionalmente ye más aconseyable nel iviernu por aquello del omega 3, n'Asturies siempres fuimos más del blancu. Per otra parte, pa los que tomen la decisión por salú, meyor mirar bien porque nun mercáu mundializáu los pexes comercializaos en nadal pueden venir d'augües que tan en branu. Incluso hai una másima que mos diz que "n'avientu pote nel llar y besugu na mar".

D.C.: Esa nun la sabía yo. Y quédamos saber qué vamos poner pa beber.

D.M.R.: Podríamos poner sidra, sidra natural. Seguramente pol nadal yera la sidra lo que taba na mesa, como tolos díes, durante sieglos, ata yá bien avanzáu'l XIX y entráu 'l XX. Más lluéu fuera entrando'l vinu, el vinu de cierta calidá, el cava y el champagne, que, como ye lo habitual, son habituales na mesa los seutores más pudientes y, poco a poco, van entrando nes cases de les clases populares. Y, por supuesto llega, yá nel XIX, la sidra axampanao. Son los años de Zarracina, d'El Gaiteru y de munches otres más pequeñes y más llocales qu'alcontramos per tolos rincones d'Asturies. Ye la estrella del nadal. Esa sidra ye mui familiar, especialmente en navidaes, y tomábenla ata los neños. Yo tomela de pequeñu: "y pal neñu sidre axampanao".

D.C.: Un poquiñín.

D.M.R.: ¿Un poquiñín? Nun sé yo. A min paezme que pasaba les navidaes enfiláu. Pero ye que dibes al café o al bar a la hora'l vermú y vuelta la cosa: "y pal neñu una copina de Sansón". Falamos d'un vinu quinao con 15 graos, cuásique'l triple que la sidra medio actual. Como paráremos en tres sitios el neñu llegaba a casa amoriáu y entá había quien, perestrañáu, entrugaba que qué-y pasaría al neñu que paez tontu.

D.C.: ¡Hahaha...!

D.M.R.: Lo que nun tenemos nel casu la sidra ye una sidra de nadal, una sidra de mayada temprana que venga a cumplir el papel de la weihnachtsbier alemana y del beaujolais francés, y que posiblemente podría tenese.

D.C.: Pero la sidra brut compite cada vegada meyor col cava.

D.M.R.: Hai marques que compiten perfeutamente colos caves catalanes, o d'otres rexones, anque yo sigo prefiriendo, en xeneral, los catalanes, anque nun lo conozo tóo y puede qu'haiga dalgún cava perí verdaderamente bonu. La sidra brut compite perfeutamente con caves de calidá. Nesa cena hipotética de la que falamos enantes, pondría una bona sidra brut. Col champgne francés tienlo la sidra, y tamién el cava, más complicao. Ye que yá nun ye que te guste más o menos, qu'a min encántame, sinón que tamos falando d'otres cuestiones más estétiques, de prestixu, d'estatus, porque poner na mesa cuatro botelles de 70 o 100 euros caúna yá ye otra cosa.

D.C.: Esi ye un pasu qu'entá nun diera'l mundiu la sidra, el de dar un prestixu social qu'agora nun tien, anque tol mundiu reconoz l'avance y la calidá'l productu.

D.M.R.: Eso nun lo sé. El mio conocimientu en siceroloxía nun llega a tanto. Pero sí hai una cosa y dígolo como bon anglófilu: hai que ser francés pa facer determinaes coses.

D.C.: Como siempres, esti home dexa unes frases pa rematar el programa qu'impiden añadir nada.

D.M.R.: ¡Hehehe...!

D.C.: Que pase unes bones fiestes. Estes coses que vusté mos cuenta son fundamentales pa saber más de nosotros, d'Asturies y del mundiu. Si nun sabemos d'estes custiones vamos tirando cegaratos y, al llegar una fiesta, qué ye lo que tamos cellebrando.

D.M.R.: Si yá lo sabemos bien, tenemos una espresión mui espardía: "¡si ye que nun tas no que cellebres!".

D.C.: Eso ye. Un abrazu.

D.M.R.: Un abrazu y un bon nadal a tolos oyentes.