"Privatizaron el país, la sidra y la botella"

David Castañón: Llega'l tiempu de la sidra, llega'l tiempu'l profesor David Rivas, llega'l tiempu la repunancia, llega'l tiempu de sentase y escuchar, de daprender. Tamién podemos repunái dacuando, metéi ehí un poco de cizaña. Yo sé que-y presta que-y llevemos la contraria pa que tovía se suba más. ¿Qué tal dempués d'esta pausa braniega?

D.M.R.: Mui bien, Castañón, mui bien. Pero yo nel branu nun faigo nada nin voi a denguna parte. Si nun fuera porque vinieron les mios fíes, una de Tenerife y otra de Barcelona, y que normalmente nun suelen coincidir n'Asturies nos mesmos díes, nun saldría práuticamente de casa y de los chigres cercanos. Tuvi en marzu en Rabat y Casablanca y pa finales de setiembre y primeros d'ochobre pasaré unos díes en Roma. Lo bono de la mio profesión y más agora, de xubiláu, ye que puedo viaxar cuásique cuando me pete. ¿Voi meteme en barullos innecesarios? Falando d'otra cosa: ¡vaya calor que fae!

D.C.: Esto nun ye nin medio normal.

D.M.R.: Como yo vengo de casa, que ta n'aldea más alta de Villaviciosa, cuando llegué a Xixón quedé sosprendíu del calorón. Ye tremendo, con tanta humidá a un tiempu. Mire que Xixón tien la ventaxa de que siempres hai vientu, o brisina cuando menos, pero ye que nin res. Nun se movía nin la bandera de La Escalerona.

D.V.: La de Canteli tampoco, qu'además yá ta mui foliada y medio desfecha.

D.M.R.: Bono, ye qu'esa ye mui pesada.

D.C.: Ye que yo vengo de la cuenca y ellí ye tovía peor. Yo que soi de costa, d'Avilés, costome la cosa al principiu y nel branu andaba afogáu. 

D.M.R.: Yo viaxé muncho y tuve trabayando, y tamién faciendo coses distintes a lo que ye trabayar, en bastantes países tropicales o subtropicales. Pues el día que más calor pasé, con una humidá tremenda, fuera ún en Sama. Y nun yera plenu branu, non, sinón finales de mayu o entamos de xunu, dende lluéu enantes de san Xuan. Yera un actu oficial, nun me recuerdo con qué motivu. Yo diba d'americana y tarabica y, caro, la cosa yera peor. 

D.C.: Eso pásai por clásicu.

D.M.R.: Puede ser, puede ser. Yo nesto siempres siguiera les observaciones de mio padre. Elli decía que, si te conviden a un llugar con xente que nun conoces y nun te dicen nada sobro la indumentaria, si vas de clásico y la mayoría ta en mangues de camisa y sandalies, nun pasa nada; pero si llegues de camiseta y chancles y los demás van de traxe, quedes como la gocha. Pasa lo mesmo al contrario: si te conviden a una boda y nun piden etiqueta y tu vas de frac, quedes como la gocha tamién, amás d'inorante y snob. 

D.C.: La parte bona ye qu'hai chigres solombriegos con sidra bien fresquino y bien tratao. Ellos llévenlo bien.

D.M.R.: Sí, eso ye verdá. En Llangréu nun son fatos precisamente.

D.C.: ¿Por qué piensa qu'acabé yo ellí?

D.M.R.: Sí, sí, que vusté ye yá más de La Felguera que Pedro Duro, que tampoco naciera en Llangréu.

D.C.: ¡Hahaha...! Tenemos varios temes de los que falar porque tuviéramos un branu con polemiquines al rodiu la sidra. Una d'elles veníamos tratándola yá al final de la temporada pasada y qu'acabara resuelta y bien resuelta, que yera la de si un llagar de Cantabria podía o non usar la botella de tipu asturianu. Al final el Tribunal Supremu dictara sentencia.

D.M.R.: Nel últimu programa del cursu pasáu díxelo: el tribunal d'instancia falló en favor del llagar Somarroza pero yo pensaba qu'el Supremu diba dictaminar en contrario. Yo nun soi espertu nestes coses pero ún va sabiendo, más por vieyu que por diablu.

D.C.: Van yá varies predicciones qu'el profesor Rivas fae nesti programa y que da na diana.

D.M.R.: Yera una sensación. El tribunal d'instancia valoró la botella namás que dende un puntu vista téunicu, colo que rexistrar una botella como marca ye mui difícile. Al fin y al cabu una botella ye un recipiente pa envasar llíquidos que permita vertelos, que se sostenga con una manu y dalguna carauterística más. Toles botelles del mundiu cumplen eses condiciones, especialmente les botelles que contienen llíquidos pa consumu humanu. Y, concretamente, les botelles de bebíes alcohóliques cumplen colos mesmos criterios, menos les magnum y supermagnum de vinu, que xueguen notru contestu, más de regalu o de representación. La botella molde fierru tien ellementos téunicos mui singulares, como bocal troncónicu engrosáu, pa resistir l'incrementu de presión consustancial a una bébora que sigue fermentando dempués de corchao, pero tamién ta pensada pa otra téunica que ye cultural, como echar, y que mos ofrez un pescuezu tipu ladies leg y llombu de cuartu bocel. Pero, amás d'eso, yo suponía que los abogaos de l'Asociación de Sidra Asturiana, en viendo per onde diba la cosa, diben argumentar qu'hai otra custión pa facer d'un ellementu material una marca, que ye la identificación, especialmente la identificación popular, la de la xente. Lo que ficieron fue presentar escontra'l tribunal varies botelles ensín etiquetes, que valíen pa bebíes alcohóliques y con una mesma capacidá, 70 centilitros o, lo que ye lo mesmo, 700 centímetros cúbicos. Y resultó que la botella sidra asturiana yera la única identificable. La xente identifica el conteníu pola forma de la botella. Cuando pides una botella vinu, sabes que lo que contién ye vinu porque lo pon la etiqueta, pero podría contener cerveza, o ron, o un llicor, o mesmamente sidra. Pero la botella de sidra asturiana, la molde fierru, identifícase perfeutamente, ensín falta d'etiqueta. De fechu, durante 150 años, la sidra de nueso nun llevaba etiqueta y tol mundiu, al vela, sabía que yera sidra. Incluso los de fuera identifiquen esa botella como la de sidra. Ye más, cuando entres nel bar y pides una botella, nun te pregunta naide que de qué: una botella ye una de sidra. Eso ye lo que se conoz como secondary meaning, signos que nun son distintivos pero que l'usu a lo llargo de la historia fae que la xente los estreme con claridá. Yera evidente que nel tribunal d'instancia eso nun lo vieran y qu'esa yera la baza nel Tribunal Supremu.

D.C: Paez ser qu'esi trunfu de la botella asturiana nun lu tuviera nin tan siquier el cubu de Rubik nin les pieces de Lego.

D.M.R.: Los tribunales, nesti casu europeos, argumentaron que yeran pieces non significatives nin identificables por sigo mesmes, sinón pola so función téunica, pola forma'l productu p'algamar un resultáu téunicu. El Tribunal de Xusticia de la Unión Europea consideró que tóo quedaba resumío en téunica, que les pieces yeren pieces y el cubu un cubu, un paralelelípedu que nun podíen considerar marca. Tolo contrario fuera lo que determinara el Tribunal Supremu nel casu la botella.

D.C.: A mi veníame dalguna duldia porque esti llagar, anque alministrativamente ta en Cantabria, culturalmente ye asturianu. Per esi camín ye pel que yo sospechaba qu'el llagareru podía ganar. 

D.M.R.: Neso, na custión cultural, toi d'alcuerdu con vusté. A min paezme qu'el problema pa esti llagareru, pa esti concretamente, tuvo en que la iniciativa contra elli yera privada. Si lo fixere'l gobiernu d'Asturies, alcontraríamos seguramente soluciones amañoses. Nada impide permitir amparar, inclusive integrar na denominación d'orix, a un llagar que ta fuera'l to territoriu, máxime cuando falamos d'una empresa del to mesmu ámbitu históricu y cultural. ¡Home, que Renéu de Piélagos nun ta en Mallorca! ¡Que ta nes Asturies de Santiyana! Nun sé mui bien cómo se podríen facer les coses, que son de téunica llegal, pero sé que ye posible. Cuando acabábamos el cursu anterior yo ponía como exemplu lo del Parque Nacional de Los Picos d'Europa, xestionáu conxuntamente por tres comunidaes autónomes y nel que, con dalgún problema, ye verdá, van saliendo les coses medianamente bien. ¡Equí falamos d'un llagar y dos hectáries de pumarada!

D.C.: Si tuviéramos que resumir, con nesta sentencia, ¿les coses cambien a meyor o a peor?

D.M.R.: Esto tien munches aristes. De manu, la sentencia protexe a la nuesa botella tradicional, nel sen de que dengún embotellador puede emplegala fuera'l país. Eso ye mui positivo. Pero tamién mos alfrentamos a otres entrugues. La primera ye evidente: ¿qué pasa colos productores asturianos, dalgunos más que centenarios, que nun pertenecen a l'Asociación de Sidra Asturiana? Ye qu'el pleitu ganáralu una asociación, una entidá privada, non Asturies nin un xenéricu llagareros asturianos. Agora resulta qu'esos productores tan nes manes d'una entidá privada, de la bona voluntá d'un grupu concretu. L'asociación yá sopelexara que tolos productores asturianos podrán utilizar la botella clásica ensín que diga nada. Mui bien, pero ye que los non asociaos dexen de tener un drechu pa pasar a depender d'una concesión de gracia. Y falamos d'una entidá privada con fines de llucru. Y les circunstancies económiques pueden cambiar. Mañana puede llegar una direutiva con otros criterios y nuna situación económica más complicada, con situaciones peores pa la sidra, porque los mercaos tienen ciclos, y que decida, porque puede facelo, que la botella molde fierru nun pueden utilizala los demás o facelo pagando un canon. Caro que queda la posibilidá de que tolos llagareros se unan a l'asociación, pero eso sería una obligación, aunque indirecta, contraria a los principios d'una democracia. Pareceríase dalgo a la protección a los tenderos que vemos na película de Coppola El padrín. Pero ye más: podría dase la paradoxa de qu'un productor de fuera d'Asturias pero asociáu a los propietarios de la marca pudiera corchar con esa botella y productores asturianos non si ye que nun tan asociaos. 

D.C.: Ye verdá. Nun cayera yo neso.

D.M.R.: Nun país normal esto yá lo tendría previsto'l gobiernu, pero n'Asturies, que ye'l parayisu de la ocurrencia, nun lo teo nin medio claro. Paezme a min que tóo esto vien de la inacción del gobiernu d'Asturies y de que nunca a los nuesos gobernantes-yos importara la sidra ata hai cuatru o cincu años. Y tamos falando del productu más emblemáticu d'Asturies y el más espardíu per tol país. Bono, ye que lo mesmo-yos da Asturies que Mongolia. Ata hebo un presidente que dixo que la so misión nun yera defender los intereses d'Asturies. ¡Bono, otru presidente dixo que lo de la emigración de los mozos yera una llienda urbana! Nunca ata cuásique ayer tuvieron los gobernantes asturianos dengún interés por estes custiones. Agora tan cambiando, o eso paez. Bienllegaos seyan, anque seya la cosa con cuarenta años de retrasu. Y volvemos a l'asuntu de lo que ye una marca. Na sentencia'l Supremu lleemos que podíen presentar la cosa como marca colleutiva, y non como marca d'una asociación. Y digo yo: ¿qué más colleutivo qu'el gobiernu asturianu? La llei diz qu'esi recursu colleutivu ye posible pero non obligatorio. ¡Caro!, ye que les marques son, normalmente, individuales, d'una persona o d'una empresa. Pero, ye evidente, lo de la botella sidra ye otra cosa.

D.C.:  Pero'l Supremu nun entró nesi debate.

D.M.R.: Non, nun entró porque la llei permite qu'esi recursu lu presente una entidá privada. Y agora llegamos a lo más llamativo del seutor sidreru y, ye más, d'un aspeutu importante de tol complexu cultural de la sidra. Agora resulta que la botella ye propiedá, como marca, d'una asociación, lo que vien a xuntase a qu'el nome mesmu de sidra" ye marca propiedá de les xampaneres y a que el nome sidra d'Asturies ye marca propiedá de la DOP. En resume: que los asturianos nun podemos utilizar llibremente el términu sidra, nin el términu Asturies, nin la botella tradicional, porque son marques privaes protexíes poles lleis civiles y mercantiles. Entós resulta que lo qu'aparentemente ye un trunfu puede acabar notra disfunción. Yo, que soi..., diba decir prudente pero prefiero decir que mui roceanu pa coles coses que pasen equí y que soi más de defender el fueru qu'el güevu, quédome un poco preocupáu polo que pueda pasa. Almito, de manu, que la bona voluntá esiste, pero de bones intenciones ta empedráu l'infienru.

D.C.: De fechu, yá hebo dalgún problema llegal con un llagar asturianu por emplegar el nome sidra d'Asturies, al que la DOP denunció.

D.M.R.: Fue'l casu de Mayador d'hai unos menses. 

D.C.: N'últmu términu, son intereses económicos.

D.M.R.: Asina ye. Puede haber un llagar que xuegue a la confusión porque la marca vende bien, puede que la DOP se ponga dura pa mantener un monopoliu de facto, puede que se dea una mezcla de les dos circunstancies.

D.C.: Ye'l mercáu, amigu...

D.M.R.: Y entá queda un últimu asuntu: ¿qué pasa cola sidra casero?, ¿puede corchar una familia en botella molde fierru o non? Pa la sidra propio, cuando la faes pa en casa, emplegues cualisquier botella, siendo mui apreciaes les de cava o sidra brut, pero val cualisquiera que seya escura. Nostante, la mayoría prefier la botella tradicional asturiana y, si nun la emplega, ye porque nun tien cientos d'elles. Además, agora que tienen tanto éxitu, en decenes de pueblos, los certámenes y concursos, lleven la sidra corchao na botella tradicional, precisamente porque ye la meyor pa echalo correutamente. ¿Qué pasa si llega al festival de Carreño l'asociación propietaria de la marca y decide solicitar al xulgáu que suspenda l'eventu? Teóricamente podría facelo y seguramente ganar con facilidá. Ye verdá qu'esa sidra nun se comercializa pero más ceo que sero llegará a comercializase. N'Asturies urxe una normativa pa productos tradicionales artesanales. Nun se puede tener a la xente en casa faciendo quesu, marmelada o sidra y que nun la pueda vender. Como tampoco, anque seya otru asuntu, tener El Sueve a dolor de paletos, de gamos, permitir cazalos y prohibir el so consumu nos restoranes y chigres de la zona. El primer argumentu qu'empleguen agora ye qu'esos productos nun se pueden vender porque nun cumplen la normativa sanitaria. ¡Rediola!, ¿entós que ta faciendo l'ayuntamientu de Villaviciosa dando sidra casero n'El Güevu esta selmana? ¿Ta poniendo en riesgu la salú de la xente? ¿Ve, Castañón, como nesti país nada tien xacíu?

D.C.: Yá veo, yá veo.

D.M.R.: Tamos pagando'l preciu de que l'alministración asturiana nun tomó en serio la cosa ata hai cuatru o cincu años. Si esto entamare hai venticincu años tóo diba ser d'otra manera. Si los llagareros entamen entóncenes a presionar, especialmente los más potentes y los pequeños más activos, y l'alministración toma en serio l'asuntu, nun taríamos como tamos. Estos sectores suelen tener una carauterística común: siempre tiren d'ellos les empreses grandes y les pequeñes que producen mui bien y que busquen na calidá el so sellu diferencial. Los intermedios tienden a desapaecer o, pol contrario, a una concentración o a seguir l'exemplu de los pequeños na llucha por un mercáu d'alta calidá. Pero equí naide fizo nada dende l'alministración. Por exemplu, tuvimos qu'esperar años y paños pa ver a los gobiernos y los ayuntamientos dando sidra nes receiciones y nos actos oficiales. Por cierto, que daben un vinu español, despreciando tamién a les denominaciones de la propia España. 

D.C.: Sería pa nun molestar.

D.M.R.: Sí, posiblemente. Los gobiernos d'Asturies siempres fueron de poco molestar.

D.C.: Podíen recurrir al vinu de Cangas.

D.M.R.: Si hai trenta años nun sabíen nada de la sidra, ¿qué creye vusté que pasaría col vinu? Y eso que la sidra produzse en Xixón, nos conceyos centrales, nel mesmu Uviéu..., pero el suroccidente, ¿qué ye?, ¿una zona de Texas de les películes?

D.C.: ¡Hahaha...!

D.M.R.: Ye que tóo ye una suma de despropósitos. Paez ser que tamos condergaos a que cada vegada que damos un pasu alantre, surda un problema y tóo acabe en nada. Tamos a tiempu de revertir la situación y, como-y decía, paez que l'alministración ye anguaño d'aquella otra manera. Tóo esto paezse a aquella llei que fixeron nel Congresu pa que volvieran a les universidaes españoles los científicos, investigadores y profesores que taben pel mundiu. L'incentivu principal yera un meyor tratu fiscal. Volvieron cuatru mal contaos y la llei empezó a conocese como "llei Beckham" porque fue a la qu'apeló David Beckham y detrás tolos grandes xugadores del Madrid, del Barcelona y d'otros equipos. Ye'l modelu romanofrancés que tenemos y un poco de calvinismu y de formes anglosaxones nun mos vendría nada mal.

D.C.: ¡Curiáu, que yá se mos vien arriba!

D.M.R.: Hehehe...

D.C.: Surdió hai poco una polémica más porque un chigre d'Uviéu, pensando nos turistes que nun queríen tomar una botella, ufiertaba un culín, bien echáu, por un euru. ¿Vusté qu'opina?

D.M.R.: Bono, doi por supuestu que sabe lo que yo opino. A min paezme un disparate. De manu, eso sí, cualisquier propietariu d'un bar pue facer lo que quiera y buscar los clientes que quiera. Yo a esi sitiu nun voi dir porque tamién los clientes decidimos a onde vamos. Ye un disparate tan grande que nun hai dengún seutor del mundiu sidreru que lo defienda. Los chigreros, que cuásique nunca tan d'alcuerdu en nada, tiénenlo claro, lo mesmo que los llagareros. Ye una forma d'amachucar un productu estrella y, de pasu, la cultura asturiana. A esti tenderu igual-y vien la cosa bien. ¡Ye que saliera na prensa y na televisión! Pero en poques ocasiones viéramos tantu consensu. Saúl Moro, que ye'l presidente de l'Asociación d'Escanciadores, diz que ye una forma más de desperdiciar el productu estrella d'Asturies. Y diz eso, atentos, de que ye "una forma más", colo que ta amosando qu'esto ye un procesu y non una biscatada d'un puntu. Pela so parte, el profesor Luis Benito García, del que falamos nel últimu programa, diz qu'esto nun aporta nada culturalmente. Y ye que tamos xugándomos dalgo mui importante: lo de la Unesco. Tamos peleando porque la Unesco declare a la sidra asturiana como patrimoniu de la humanidá, sobro la base del complexu cultural, que poco tien que ver con que si ye meyor o peor que la bretona, la vasca o la normanda, y agora salimos con esto. Hai tiempu comentaba yo equí que la mesma selmana na que se presentaba la candidatura asturiana l'ayuntamientu d'Uviéu abría la guerra sobro la capitalidá de la sidra, nun actu bochornosu d'inutilidá y de mala fe. Y agora, en namás qu'un mes, otra patochada. Estes coses salten a la prensa y, tea la seguridá, lleguen a conocimientu de la comisión específica de la Unesco y tamién a los equipos de les otres candidatures, que suelen tener lobbies importantes dalgunes d'elles.

D.C.: Vusté conoz bien el proceder de les organizacioines internacionales.

D.M.R.: Trabayé con varies y, concretamente, ye la segunda vegada qu'unvío documentación o criterios a la Unesco por asuntos de patrimoniu cultural, y puedo decir con claridá que son mui escrupulosos y mui severos coles tonteríes. Por exemplu, siguiendo col asuntu, hai una cosa perllamativa: el presidente de la DOP, Víctor Ramos, diz que nun-y paez qu'esto afleute a la tradición sidrera. Esti home representa a esa llínia de pensamientu que da por fecho que tóo va bien y que lo de la sidra nun puede dir patrás. Tola producción de denominación ta vendío de manu pero nun tien porqué ser siempres asina. Esti home ye un autocomplaciente. ¡Echen el pigazu, échenlu, y a ver qué pasa! Ye llamativo que tolos seutores de la sidra vean l'asuntu con tarrecimientu menos el presidente de la DOP. Pero ye qu'el conseyeru de mediu rural, Marcelino Marcos, diz qu'igual nun ye mala idega lo del culete porque anima a prebalo al que nun conoz la sidra. La cosa ye llamentable. Y esi conseyeru, en viendo la so trayeutoria, a min dábame bon aquello. Total: a tol mundiu-y paez mal lo del culín a euru menos a los de la DOP y al gobiernu. N'Asturies hai una desconexón completa ente l'oficial y lo ciudadano. Un exemplu: pa un ciudadanu normal el so país ye Asturies y el Principáu ye'l gobiernu. Los hosteleros tan dividíos: pa unos ye dalgo chabacano y pa otros una barbaridá. Inclusive Javier Fernández Díaz, delegáu d'OTEA en La Felguera, una llamentable patronal que con tal de ganar perres dá-y lo mesmo tóo, diz qu'eso desvirtúa la cultura sidrera y qu'hai que preservar la identidá.

D.C.: Sí que paez qu'hai unanimidá nel asuntu. Pero los turistes igual lo valoren bien y'l turismu da bastante ganancia.

D.M.R.: Los turistes que lleguen a Asturies pueden ser unos inorantes pero non tóos son idiotes. Munchos danse cuenta, saben y comprenden. Los chigreros de Gascona, seguramente el llugar de mayor concentración turística al rodiu la sidra y onde podríen sacar cincu euros, como poco, por botella, son contrarios a lo del euroculete. Ye más, ún d'ellos dixo qu'eso yá se fixera en Gascona, con unos aparatos que teníen un contador y echaben dende la paré la sidra. Tóos mos recordamos. Yo fui un día, sabiendo de manu que yera una aberración. Pero quería velo. Nun volví, evidentemente, pero ye que nun volviera naide. Aquello morriera. Ye que si tas en Gascona, con una docena chigres en condiciones, ¿vas dir a la maquinina del zoquete?

D.C.: Ye verdá. Tóos fuimos ver lo de los grifos y nun volvimos. Pero voi facéi un apunte repunante: el chigreru véndete un culín por un euru, échalo bien, nin chisqueru nin taponucu, y ta. Hai xente que nun puede beber, que tien que conducir...

D.M.R.: Con esi criteriu llegaríen poner vinu por dedales. ¿Por qué teo que pagar dos euros, o cuatru si ye reserva? Que me pongan un dedalín y llisto.

D.C.: Yo falé con chigreros, munchos, que me cuntaben que llegaba xente de fuera mui despistada y q'elli mesmu-ys daba un par de culinos gratis de la botella que taba tomando.

D.M.R.: Hai vegaes que tóo ye más cenciello. El turista nun sabe lo que cuesta una botella, que son 3,50 euros de media. Eso ye una copa de Rioxa maltratao na mayor parte los chigres. Y ye normal que, si'l turista ye simpáticu, entruga, pon interés, cualisquier parroquianu lu convida a un par de culinos. Mire, Castañón, voi contái una anéudota. Hai tiempu, nos últimos ochenta, tábamos na romería de san Bartolo, en Quintueles, que ye la mio collación d'aniciu. Llegaron unos ingleses, padre, madre, un fíu y una fía. Los paisanos cuarentones y los neños adolescentes. Averaron a la barraca y nun pescanciaben res. Yo, amás d'entendeme con ellos,  convidelos a unos culinos. Acabaron xintando la fabada en casa, cola mio familia, que daquella aconceyábamos cuarenta persones.

D.C.: Ye guapo eso d'abrir la tradición a otros.

D.M.R.: Durante años, diez o doce, mandábenme dende Yorkshire una semeya del so pueblu, Doncaster, cellebrando'l nadal. Dempués perdiéramos el contautu. 

D.C.: Hai quien critica eso del euroculete porque va subir el preciu de la sidra.

D.M.R.: A min lo del preciu nun me paez importante. De tola vida una botella vinu cuesta menos que les copes que da. Allá caún. Tampoco me preocupa si la botella sidra queda abierta venti hores. Ye problema de los turistes inorantes y del chigreru aprovechau.

D.C.: ¿Vusté paga lo que seya sigún la circunstancia?

D.M.R.: Sí. Yo pagué la hostia por un manhattan, el coctel más norteamericanu, nel bar que ta no alto l'Empire State. Pero ellí, de nueche, con Nuea York debaxo y cola copa na manu, víame como Bogart o como Cary Grant. ¡Fora grandioso! Aquel cóctel supuso comer cuatru díes hot dog y kebab. Nun tenía munches perres yo entós. 

D.C.: Esti branu acabó cola polémica del cartelu del concursu de sidra casero de Piloña. El cartelu, fechu por una muyer, yera una especie d'Eva mui a lo Botero, desnuda y colos pezones atapaos con unes mazanes, y echando un culetín de sidra. El casu ye que retiraron el cartelu. Nun sé qué piensa David Rivas del asuntu.

D.M.R.: Toi encantáu. El resultáu fue un enorme éxitu d'esi cartelu y de la fiesta. Voi pensar que lo armó tóo la artista, que se llama Covadonga Casado. Esti follón ta poniéndola n'órbita y va vender cartelos y camisetes a tutiplén, amás de salir en tolos medios de comunicación. Vamos ver, falando yá en serio, a mín esi cartelu gústame. El que vea dalgo reprochable ye que tien una mente mui sucia. Creyo que la cosa saliera por una cosa nuna rede d'eses d'nternet. ¿Tan imbéciles son los piloñeses como pa dar patrás nuna decisión porque lo manda nun mensax de twit un puntu de cadiós? Yo nun seguí la polémica más que pola prensa. Paezme más llamentable lo del cartelu de les fiestes de Villaviciosa, con una muyer vestía de la Sección Femenina y baillando un nunsequé.

D.C.: Nun ví esi cartelu.

D.M.R.: Ye llamentable. Pero, volviendo a lo de Piloña, ¿qué pasaría si n'internet apaecen opiniones contra la folixa porque consideren que tan faciendo, incluyíu'l mesmu ayuntamientu, promoción del alcoholismu? ¿Suspenden la convocatoria?, ¿prohiben beber sidra na cai? Y otra cosa: paezme qu'hai más crítiques nes redes y, en xeneral na sociedá asturiana, contra la paconada cosmopaleta de la feria d'abril y na ca'l conceyu de L'Infiestu naide se da por enteráu.

D.C.: Neso nun son tan dilixentes.

D.M.R.: Non. Pero diendo a lo importante, ceder a presiones como les qu'hubo contra esi cartelu, especialmente cuando son anónimes nuna rede dixital, ye fomentar la nuea inquisición. Ye que la custión nun ye un cartelu o una canción en concreto, sinón la renuncia a la defensa de la mesma idea de la llibertá y l'aceutación de la censura. De fechu, hai una capa d'autocensura mui grande, con munchos creadores preocupaos pola hipotética reaición d'una de les miles de minoríes qu'esisten. Les coses son más cencielles y más fáciles de llevar. Les lleis, les normes, tan pensaes pa les mayoríes y, sigún van apaeciendo esceiciones, van adautándose, unes vegaes exitosamente y otres vegaes con problemes y disfunciones. La sociedá actual ye un mosaicu de minoríes y yelo porque eses minoríes, aisllaes social o territorialmente enantes, agora tan interconectaes. Los que falen asturiano son una minoría, como los xitanos, los homosexuales, los estremeños, los sordos o los que tienen hepatitis. Y munchos pertenecen a tres minoríes a un tiempu. Ye inevitable que nel arte, na lliteratura, na creación, nel humor, dalguna vuelta haiga un negru, un asturianu o una lesbiana que cumpla un papel ridículu o faltosu. Otra cosa ye volver al estilu d'Arévalo, especializáu en contar chistes de mariquitas y gangosos. Eso sí ye censurable, como ye de mal gusto tener un repertoriu de chistes namás que sobro Xesucristo. Hai chistes perí que ridiculicen la forma de falar de los asturianos y a mi unos faenme gracia y otros non, pero pol mesmu chiste, non por otra cosa. A min, que faigan chanza del mio pueblu nun me molesta. Otra cosa sería qu'un arévalo saliera tolos sábados en televisión contando chistes sólo d'asturianos. Creo que ye fácile de comprender la cosa.

D.C.: Entiéndese tóo a la perfeición, como suel pasar coles argumentaciones qu'el profesor Rivas da nesti programa.

D.M.R.: Ye más: frecuentemente los meyores chistes sobro una minoría, los más crueles polo xeneral, son fechos por persones que pertenecen a esa minoría. Yo teo tratu habitual con hebreos y los meyores acasos d'humor negro, xugando inclusive col holocaustu, son los qu'ellos cuenten. Tamién aceuten un chiste fechu por un xentil pero, evidentemente, nun consentiríen un arévalo monotemáticu antisemita cada sábadu en televisión. Yo, personalmente, furrulo como estos xudíos y métome en problemes con frecuencia porque faigo coña de lo más cercano, faigo mofa más de les coses qu'amo que de les coses qu'odio.

D.C.: Ye una preba d'intelixencia.

D.M.R.: Volviendo a Inglaterra, asuntu col que tanto-y presta a vusté metese comigo, la mofa más grande haza la cultura inglesa ye una que fixo Oscar Wilde. Diz que los ingleses pueden presumir de tres coses: el té, el whisky y un autor como Wilde. Lo malo, añade, ye que "el té ye chinu, el whisky escocés y yo irlandés". ¿Qué ta faciendo?: convertir culturalmente a los ingleses nuna minoría a la que ridiculizar.

D.C.: Nun cabe meyor pieslle. Daprendiendo siempres coses con David Rivas que, a partir del próximu día, entama cola nuea temática. Diba facelo güei pero les noticies sidreres d'esti branu aconseyáramos otra cosa. Un abrazu.