Otra temporada turística

(El Fielato)

Balance de situación con breve interpretación: asina va l'añu.

13 d'agostu. Una parexa camina pela canal d'El Texu, ente Bulnes y Poncebos, con un neñu nun carricoche y con otru neñu de cuatru o cincu años caminando delantre d'ella. Esi camín de Los Picos d'Europa nun ye, precisamente, un paséu de parque urbanu, sinón una ruta con ciertu pelligru na que l'añu pasáu morrieran tres persones. Ye d'esperar que l'alministración asturiana, que llegara a provocar la muerte d'un gallu montés, en pelligru d'estinción porque molestaba a los turistes, y que permite invadir espacios oseros a zopencos que quieren fotografiar úrsidos, dalgo fairá. Conforme a la política de defender el turismu como seya, la solución podría ser asfaltar la cordalera, instalar escaleres mecániques en pendientes de más del 5 por cientu, poner talanques bien altes en tolos caminos y asignar un acompangante por turista pa llevalu a xocostrines cuando canse.

14 d'agostu. Otru gran éxitu de los gobiernos asturianos, otra preba del bon usu de les perres que llegaron d'Europa, otru llogru de la política turística como única política posible. Con fondos mineros dedicáronse 1,4 miyones d'euros pa facer el Muséu de la Quesería, o Muséu de los Quesos, en Morcín. Nunca abriera y ta na ruina física más absoluta. Agora piensen meter otros 1,5 miyones pa facer un centru polivalente.

16 d'agostu. Nel concursu carroces de Valdesoto, nel conceyu de Siero, gana con contundencia El xaréu rural de la Peña Cotiellos, una parodia de los turistes y urbanites varios que mos lleguen a estes tierres. Ellí apaecen coses como la protesta porque los pitos canten, les vaques caguen, el cuchu fiede, los trautores meten ruíu y que nun hai cobertura. Eso sí, con munchu ciñu, como diz Pergentino Martínez: "tóo desaxerao y ensín querer decir que tóos seyan asina". Una mui asturiana forma de dicir que ye lo que pasa de verdá y que la mayoría d'ellos sí que ye asina. Y, seguramente, de que tan fartos d'ellos. Si nun fuera asina, ¿asantu de qué que premiaran esa carroza?

19 d'agostu. Acaba la feria taurina de Begoña  El Juli saca de'El Bibio ochu oreyes y un rau. ¡Un verdaderu héroe! Un home a l'altura d'El Cid y d'Hernán Cortés, incluso de Viriato y d'Indíbil y Mandonio. Bono, con ocho oreyes y un ráu, unes pataquines, un par de cebolles, unos pimientinos, con sal y pimentón picante y un chorrín de sidre, come una aldea y sobra dalgo pa los gochos. Pero ye que tolos toreros salen con oreyes, les de los toros, que les d'ellos nunca peligraron. Ye más, l'últimu día salieron tóos pela puerta grande. O mui estraordinario ye lo de Xixón, porque eses ratios nun les da nin places como Las Ventas o La Maestranza, o ye que tóo ye una pijería y una afición que nun sabe nada del arte de Cúchares. Nun para ehí la cosa: un toru fuera indultáu, el primeru en 135 años. Igual ye significativo que se llamara Caritativo.

20 de agostu. La prensa fae balance de la selmana grande de Xixón. El titular mos cuenta que los turistes consideren que la oferta de la Selmanona debería ser mayor. Falamos d'un turismu cada vuelta más abundante y con menos gastu per cápita cada añu que pasa, típico del turismu de baxa calidá, que ye'l que tenemos n'Asturies y'l que potencia l'alministración y la patronal seutorial. A un tiempu, los vecinos divídense: hailos que piden más folixa mientres qu'otros, paez que mayoría, dicen sufrir masificación, ruíu, basoria, incomodidá, diciendo dalgunos que, si pueden, marchen de la ciudá esos díes.

24 d'agostu. El turismu lleva al colapsu a Los Picos d'Europa. Son más de 4.000 les persones qu'anden peles caleyes y troches de pastores. Acaben con tóo, espavorien al ganao, pisen plantes endémiques... Y, pa enriba, provoquen 250 intervenciones de rescate cada xunetu y agostu, poniendo en pelligru, y matando como yá pasó, a sanitarios y guardies civiles.  

28 d'agostu. Los empresarios del turismu rural dicen que pueden dir al desaniciu si siguen medrando los pisos d'alquiler. Los empresarios dicen non a la ecotasa y piden gravar les viviendes turístiques. Y Álvarez Almeida, el padrín, diz qu'hai que desestacionalizar. ¿Cómo qu'hai? Dalgo tendrá que facer vusté, señoritu bien forráu y bien sofitáu polos poderes públicos. Pero si vustedes son la peor oferta turística d'Europa. Paguen mal a los trabayadores, dan esllava pa comer, nun respeten les tradiciones asturianes... Son vustedes un cáncanu d'esti país.

29 d'agostu. Los empresarios refuguen la posibilidá d'una ecotasa al turismu. En parte tienen razón: añadir un coste a hoteles y hostelería nun resuelve gran cosa, anque sí dalguna que otra disfunción. El problema ye que los apartamentos y los pisos turísticos, con tasa o ensín ella, atenten contra los drechos más fundamentales de la población llocal. Nun llegaremos seguramente a lo d'Ibiza, onde nin los mélicos quieren esi destín porque, pesie a que tienen salarios altos, nun son a pagar la vivienda. Pero dalgunos llugares d'Asturies o barrios de ciudaes como Xixón yá entamen tener problemes: ¿cómo podemos permitir qu'un vecín, a causa de la demanda turística, acabe destinando tres cuartes partes de la renta a tener un techu embaxo'l que vivir? 

Balance de situación con breve esmolición: ¿Que gran pecáu cometimos los asturianos pa que tóo salga mal? ¿Qué dios o diosa mos condergó a ser como Sísifo, que cada vuelta que llogramos subir la piedra al gumial pasa dalgo y faela rodar pendiente abaxo pa tener que volver a entamar? ¿O ye cosa de lo que preferimos cuando votamos?