"Nos productos primarios hai una correllación ente calidá y preciu"

David Castañón: Esto ye Les fartures y tamos nel últimu programa de la temporada. Llevamos yá un añu faciendo un percorríu pela historia de la sidra con David Rivas, ún de los grandes sabios que tenemos nesti país, que conoz de munches coses y muncho del mundiu la sidra. Fuera un añu bien prestosu porque fuimos enllazando tou esi mundiu sidreru cola historia, la cultura, el mesmu ser d'Asturies. Falamos de demografía, d'historia, d'economía, de los problemes y del futuru. Y vamos mirar pa esi futuru. Los dos, Rivas y yo, somos realistes pero igual pecamos dalgunes vegaes d'optimistes. ¿Qué tal, profesor?

David M. Rivas: Bien, como siempres, amigu. Puede que, como venimos d'úna época rellumante, d'unos años florecientes, seyamos un pelín más optimistes de lo que deberíamos. Yo nun creyo que la sidra asturiana vaiga tener problemes gravísimos pero sí qu'hai dalgunos ñubarrones qu'hai qu'encarar. El primeru, el más cenciellu, ye la falta de mazana. Tenemos poca pumarada. Y eso llévamos a atender pa un problema más grave y global: el despoblamientu, la perda de población. Amás, tamos viendo una creciente presión urbanística, especialmente nes zones costeres, sobro los espacios agrícoles. La nuesa pumarada ye estensiva, nun ye una horticultura como la de Cataluña, Tirol o Normandía. Y eso va llevamos a grandes problemes cola sidra de denominación, porque podríamos llegar a un tope de mazana nacional. Lo de la vecería, anque sigue dándose, paez que se va iguando, pero tampoco ta resuelto. Pero, ¡bah!, podemos salvar el problema con más sidra ensín denominación nos años pares y más con denominación nos impares. Eso ye un problema de marketing, de que los llagareros sepan vender. En Francia, por exemplu, el beaujolais nouveau, un vinu de la uva gamay, llega a les tabiernes el tercer xueves de payares y consúmese ata les navidaes. Ye un verdaderu acontecimientu y un referente cultural en media Francia. Por exemplu, n'Estrasburgu, na cervecera Alsacia, ye una llocura popular. Ves cartelos con la fras "le beaujolais nouveau est arrivé". Y pa xineru acabose. Pero lo qu'a min más me preocupa ye que se pierda, a un plazu mediu o incluso curtiu, lo que ye la cultura de la sidra, especialmente lo que ye'l chigre. Evidentementemente, los chigres de güei nun son como los d'hai  cincuenta años. La mayoría son sidreríes, restoranes, y bonos restoranes munchos d'ellos, y con un aquello turístico munchos, especialmente los del centru de Xixón, d'Uviéu y d'Avilés, y les de les villes costeres más promocionaes. Entá queda'l chigre clásicu en dalgunos barrios y nel mundiu rural, qu'a min préstenme pola vida. Puede que vaigamos ganando en consumu ya incluso que teamos cada vegada meyor sidra, pero que nun te la echen o que nun te dexen cantar. Yo recuérdome d'un chigre de Cimavilla al que diba col mio güelu Manolo onde había un cartelu nel que se lleyía: "prohibío cantar mal".

D.C.: Y agora igual mos prohiben cantar n'asturiano, particularmente en Xixón. ¿Qué diría Manolo, el so güelu playu y anarquista?

D.M.R.: Nun sé qué diría, pero igual-y salía l'alma faísta y tiraba de pistola, anque yera un home mui pacíficu. Pero teo entendío que l'alcaldía sólo va prohibir l'asturiano si forma parte d'una plataforma en favor de la oficialidá. Si cantes la del paxarín parleru y nun pides oficialidá nun tienes problema. Paez mentira qu'en Xixón tean una alcaldesa que pasó pola universidá.

D.C.: Hai más Asturies. Si nun te contrata l'ayuntamientu de Xixón podrá contratate otru.

D.M.R.: ¡Home!, espero que los de les cuenques reaicionen faigan coses. Son vustedes la resistencia, igual yá non tan proletaria, pero sí sidrera.

D.C.: Seguro que va ser asina. Tenemos d'alcalde en Llangréu a un cura, comunista y moteru. Yo toi encantáu.

D.M.R.: A min eso de que seya moteru encántame. Yo yá dexé la moto. Toi mayor. Pero fui moteru dende chaval y tuve siete motos. Y, pola contra, siempres anduve con coches de segunda manu y de baxa gama, o, los meyores, heredaos de mio padre.

D.C.: Pero tien vusté un descapotable clásicu mui chulo.

D.M.R.: Sí, eso sí. Cuando me fice un poco mayor dexé la moto y cambié de palu. Pero sigo conduciendo dándome l'aire y ata me puede llover encima.

D.C.: Yo, la verdá, col cura moteru toi encantáu.

D.M.R.: Seguro que ye un bon puntu. Equí van volver gobernar los cures, pero pola otra banda,

D.C.: Hahaha... 

D.M.R.: Hai más cures na esquierda que na drecha.

D.C.: Ye verá. Ye qu'eso de sermonear ye mui de la ilesia y tamién de los comunistes.

D.M.R.: Nel PCE siempres hubo munchos cures, seguramente más que na drecha. Pero, volviendo al nuesu asuntu, lo que nun me preocupa ye la calidá de la sidra. La calidá ta asegurada. El mio miéu ye que ruempan cola tradición, los llagareros y, especialmente, los chigreros. Yo nun sé si son conscientes de que la escena más fotografiada polos turistes ye la d'un echador de sidra nel chigre. Faen más semeyes de camareros echando sidra que de la ponte románica de Cangues d'Onís.

D.C.: Yo vengo diciendo dende hai tiempu que l'echao resiste pol turismu porque si fuera polos hosteleros, que miren namás que pol rendimientu económicu, y tamién por munchos asturianos, yá taríamos tóos tomando sidra con maquinines. Igual acabamos salvando la tradición porque los turistes busquen ea diferencialidá y nun-yos va prestar d'otra manera. 

D.M.R.: Hai otra circunstancia que puede aidar y muncho. Si se llogra que la sidra asturiana seya patrimoniu cultural inmaterial de la humanidá en la Unesco, que paez que la cosa pinta bien, la perda del mundín sidreru y chigreru puede parar. Dellos seutores van tener que cumplir determinaos requisitos y l'alministración tendrá que regular d'una vegada lo que ye un chigre, lo que ye una sidrería y lo que ye un restorán. Y podría haber bares que nun puedan llamase sidrería si nun cumplen cola norma y cola tradición. Porque si la nuesa sidra algama esa consideración mundial nun ye pol zusmiu fermentáu de la mazana sinón, precisamente, por tolo demás. La sidra, como productu, hailo en docenes de países.

D.C.: Ye verdá. Si queremos conservar la cultura sidrera ye perimportante, igual imprescindible, ganar esa denominación de la Unesco.

D.M.R.: Como-y decía, paez que la cosa va bastante bien, pero hai que ser prudentes y esperar. Y ye mester reconocer el llabor de Luis Benito García, que dende la cátedra sidrera de la universidá ta faciendo dalgo perimportante. Esperemos que tóo salga bien.

D.C.: Sí, sí, porque somos tan fatos los asturianos que lo mesmo acabamos armando dalguna y, como ye mui normal ente nós, cagándola nel últimu momentu.

D.M.R.: Sí, eses coses pásenmos. Yá tuvimos a puntu d'armala. Al poco de presentar la candidatura saliera l'ayuntamientu d'Uviéu declarando la guerra a tolos demás con aquello de ser capital de la sidra, qu'encabronó a Nava, a Villaviciosa y, como ye habitual, a Xixón. ¿Nun podía l'alcalde Canteli tar calláu, tirar pol mesmu carru y dexar de facer tontaes? Al final la cosa calmentiara. Y hai que tener en cuenta otra cosa na que la xente nun arrepara. Siempres andamos con que los vascos faen nun sé qué y los gallegos nun se cuánto, que vamos acabar tomando llechi de nun sé onde y comiendo fabes de cadiós. Ye normal ente nosotros afogamos nun vasu, nun vasu sidra nesti casu. Pues resulta qu'el mayor problema que la nuesa sidra tenía pa la so candidatura yera pasar el corte español, porque España podía presentar la sidra o tamién otru productu o figura cualesquiera. Pues si la cultura sidrera asturiana ye la propuesta española a la Unesco ye porque toles comunidaes autónomes lo aprobaron, ente elles la vasca, que tien gran pesu en tóo, como sabemos bien. Y ye que nun hai tantu conflictu como pensamos porque, anque la sidra seya, téunicamente, lo mesmo, non toóo ye lo mesmo y, especialmente, la cultura sidrera asturiana ye única. Eso ye lo qu'España presenta a la Unesco y eso ye lo que valoraron los vascos y los gallegos, anque faigan sidra y tamién, eso sí, en muncha menor cantidá. Agora, si nosotros perdemos tolos rituales tradicionales, entós sí que tóo ye lo mesmo y dará igual una sidra asturiana que vasca o bretona. Amás los vascos, que saben lo que faen, son conscientes de que si la sidra asturiana consigue esi reconocimientu, que si a la sidra asturiana-y va mui bien, a la d'ellos tamién. Ye evidente que cuanto más suba l'apreciu pola sidra en xeneral con respeutu al vinu o a la cerveza, por exemplu, tóos se beneficien. Si los asturianos salimos pel mundiu cola vitola de la Unesco, eso tira de los demás y, particularmente, de la sidra vasca porque produzse poco. Tola sidra se beneficia en xeneral, a lo menos la natural. Puede qu'a les grandes industries d'espumosa, britániques y norteamericanes, nun-ys afleute porque xueguen notra lliga. 

D.C.: Pero equí ata El Gaiteru, por ser asturiana, va beneficiase. Y tien razón en que la sidra vasca ye poco, pero yá se arreglarán pa vendelo meyor tovía.

D.M.R.: Evidentemente. El País Vascu, mesmo los ciudadanos que l'alministración, tien un componente nacionalista mui potente. Ya sé que ¡menudu descubrimientu que toi faciendo!. Hai unos díes lleía que nun folletu turísticu de Bilbao falaben d'un pueblu pesqueru qu'el visitante nun debía dexar de visitar y que taba "sólo" a tres hores en coche. ¡Taben falando de Cuideiru! 

D.C.: ¡Hahaha...!

D.M.R.: ¡Tres hores! Nun sé como nun anuncien El Pilar, que ta más cerca.

D.C.: Ye que son asina. Tienen una política agresiva en tóo y véndense mui bien.

D.M.R.: A min estes coses danme la risa pero la verdá ye que los almiro.

D.C.: Y, pol contrario, ves a un puntu d'Uviéu que diz: "¿cómo vamos dir a Taramundi, que ta a hora y cuartu?". Tuve l'otru día per Cantabria, pela zona de Liencres y Laredo, y tiénenlo tomao completamente.

D.M.R.: La zona ente Castro Urdiales y Laredo ye dende hai munchos años, cuásique mediu sieglu, ária d'espansión brañega de los bilbainos. Pero agora ya lleguen más pal occidente, como pasa en Llanes y yá ta pasando en Ribeseya. Nun sé yo si al final van tener un problema territorial na zona ente vascos y madrilanos. Y a lo meyor vamos ser nosotros los que mos sentemos a miralos como dalgo esótico.

D.C.: ¡Hahaha...! Igual lleven les de perder los madrilanos.

D.M.R.: Ye que los de Bilbao son mui suyos y paezme que sedría como esos partíos de fúbol que se xueguen nuna ciudá o nun país terceru pero ún xuega de llocal. Veo más a los vascos xugando de llocales.

D.C.: Los amigos cántabros suelen quedar, o vémoslo asina munchos, en medio. Son, como los llamamos cariñosamente, los cazurros de mar.

D.M.R.: Pa Cantabria, de soltera Santander, siempres fuera difícile definise. Tienen a cada lláu a un país mui marcáu culturalmente dende siempres y sobro tóo pel oriente ahora, con un País Vascu tremendamente más potente en tolos sentíos qu'Asturies. Amás, como pertenecía históricamente a Castiella, tampoco se llibraben del pesu históricu pel sur. Anque Revilla trabayó muncho en cambiar les coses y, acertadamente, siempres trató de xuntase lo más posible a Asturies, tovía nun llegó Cantabria a ser un referente fuerte, por munches gaites propies qu'inventen. Intentó seguir otra llínia aquél presidente que tuvieron, Hormaechea, que basaba la diferencialidad en la finura y nel falar bien de los santanderinos, porque elli yera namás que santanderín. Pa elli la so diferencialidá ye que Cantabria tenía unos burricones al occidente y otros burricones al oriente. Nun sé si los oyentes lu recordarán. Yo tratelu cuando los cursos de branu de la Menéndez Pelayo, una universidá internacional na que fui profesor unes cuantes vegaes, cuando aquelles probes foques qu'encerró nun pedreru de La Madalena. 

D.C.: Yo sosprendiérame a mi mesmu defendiendo la sidra cántabra porque les Asturies de Santiyana ficieron siempres la mesma sidra, que nunca tuviera denguna distinción cola del oriente asturianu. Y fícelo con motivu de qu'esi llagar de Somarroza ganara'l pleitu sobro l'usu de la botella asturiana. Na mio opinión hai que ser cafre pa denunciar al únicu llagar que queda d'un territoriu que fizo siempres la mesma sidra que tu.

D.M.R.: Soi de la mesma opinión y asina lo publiqué cuando entamó l'asuntu. Pero veremos ver cómo acaba la cosa. Hai un recursu contra esa sentencia y dame qu'el llagar de Somarroza va perder. Ye lo que falábamos enantes: los asturianos, polo xeneral, nun somos mui fatos, pero cuando mos ponemos fatos somos mui fatos, perfatos, los más fatos. Ye que nun sé por qué nun podemos convidar a esa zona a participar, non ya na botella de molde fierru, sinón na mesma denominación d'orix. Ye una fastera históricamente asturiana, ensín por ello falar de revindicaciones territoriales qu'agora tan de más, que tien pumares coles mesmes variedaes que les de toa Asturies, anque con mayor cantidad d'unes que d'otres, tamién como pasa en toa Asturies, que maya igual y corcha nel mesmu momentu. Ye más, como tienen poca producción, la sidra de los chigres d'esa zona ye mayoritariamente de Xixón y dalgo de Villaviciosa y de Nava, porque ye la mesma sidra. 

D.C.: Esi sedría un camín de futuru.

D.M.R.: Amás ye posible llegalmente. Ye posible una denominación con productores en dos comunidaes autónomes collindantes, como hai un vinu de Cangas qu'abarca Cangas del Narcea y dos conceyos más. ¿Pero nun tenemos un parque nacional que compartimos con Cantabria y con Castiella y Llión? Eso ye muncho más complicao, con lleis de caza diferentes, normes urbanístiques diferentes, criterios turísticos diferentes en cada comunidá pero, que más o menos, van armonizando nel territoriu de Los Picos. Si somos a xestionar una cosa tan complexa como un parque, ¿nun vamos ser quién a tratar diez hectáries de pumarada y un llagar más?

D.C.: Ye verdá. Y, volviendo a lo anterior, préstame ver que ye vusté optimista con respeutu a la declaración de la Unesco.

D.M.R.: Sí, soilo. Y quiero volver a falar de Luis Benito García Álvarez, que nun ye amigu míu, nun vaigan pensar qu'echo flores a un collaciu. Tamos falando d'un home xoven, un aidante doutor d'universidá, que nun ye un pesu pesáu. Pero ta llogrando lo que nunca pensáramos hai quince o venti años. Evidentemente hai un equipu pertrás, nun sé si mui grande o mui pequeñu, pero centro n'elli la custión porque ye impulsor y direutor d'un trabayu encomiable, amás de ser home discretu y que nun sal de los marxes académicos. Porque una cosa ye venir a la radio y, anque procures nun decir bobaes, permitite ciertes llicencies y salíes de tonu, y otra caltener el métodu científicu.

D.C.: Pa cuando volvamos de vacaciones tendré que traelu a Les Fartures.

D.M.R.: Ye una bona idega. Va ser mui interesante.

D.C.: Lo que diba preguntái enantes d'esto yera sobro tolos nueos tipos d'espresiones de la sidra, la brut, la de mesa, la de xelu, la rosé, refrescos con dalgo d'alcohol... toa esa montonera qu'hai. ¿Prestái? Yo sé que ye vusté mui dáu a prebar tolo que-y ponen.

D.M.R.: Préstame muncho esa variedá. Ye verdá que yo soi dau a prebar de tóo. Per esos mundos de Dios, a llargo y enancho de los viaxes, como dícía'l capitan Tan cuando yo yera neñu, bebí y comí les coses más rares. Si comí inseutos, reptiles y cobayes, ¿cómo nun voi beber cualisquier sidra o deriváu de la sidra? Lluéu, eso sí, unes coses gústenme más qu'otres. Por exemplu, yo nunca fui mui bebedor de sidra axampanao, la espumosa de siempres. Gústame pero nun la tomo muncho. Si lo pido ye como refrescu y, caro, al nun haber el vezu de ponela por copes, pues nun lo bebo normalmente. Falo de los bares. Por facer la comparanza que normalmente se fae, nes navidaes yo siempres preferí el cava o'l champagne a la sidra gasificao. Nostante, en casa siempres hai dalguna botella pa abrila cuando somos tres o cuatro persones. Agora sí lo tomo dacuando nel bar porque cuento con una variedá específica en botella pequeña, d'esi tamañu de quintu o media que conocemos de la cerveza. Dalgunos, cada vuelta menos, anden colo de que "eso nun ye sidra" y coses asina. Pero, vamos ver, si yo teo sede y entro nuna cafetería, ¿por qué nun puedo tomar una sidra d'esi tipu envede una cerveza que ye, normalmente, muncho peor? ¿Nun ye preferible una media d'El Gaiteru qu'una media de Cruzcampo? El casu ye que nesa eclosión de productos y variedaes que vemos anguaño les coses van cambiando. Por exemplu, la sidra rosao que sacara El Gaiteru hará dos años ta teniendo muncho ésitu y a min gústame. Nun ye tan dulzona, tien una graduación baxa y tien un preciu mui competitivu. Esa sí la teo en casa habitualmente porque, anque namás que lo beba yo, cerrando adecuadamente la botella, nel día acaba caendo. Evidentemente, nun lo pido si voi con amigos al chigre. Nel chigre yo siempres bebo sidra natural, la d'echar, y normalmente con denominación. La sidra de mesa, qu'arrastra la probe una historia llamentable de calificación, pasando de sidra de nuea espresión a sidra tranquilo, que nun sé qué cosa ye peor, nun la tomo práuticamente nunca. ¿Por qué? Porque la sidra normal puedes tomalo ensín escanciar, echándolo a culinos pa qu'oxixene un poco más y tomándola d'un güelpe. Nun acabo de ver la virtú de la sidra de mesa. Y na sidra brut hai dos o tres impresionantes, que sobropasen a la mayoría de los caves catalanes. A otres entá-ys falten un fervorín. 

D.C.: Y tienen bon preciu.

D.M.R.: Eso yá lo falamos dalguna vegada. Mire: si compres un cava de tres euros tas comprando puxarra. Los teóricos de la economía, yá dende los tiempos de Smith, siempres taben preocupaos pola diferencia ente valor y preciu. Pero nos productos primarios, como la carne, el pescao, el vinu, la cerveza, la fruta, la sidra, hai una gran rellación direuta ente calidá y preciu. Dalguna esceición habrá, seguramente, pero mui poques. Cuando falamos d'una bona sidra brut tamos falando de 8 o 9 euros y nun restorán nun te lo ponen por más de 12. Yo la sidra brut que pagué más caro nun restorán d'Asturies fuera 17 euros, en Castropol. Y paezme que la más cara que pagué fue en Tenerife, creyo que 20 euros. Y yeren de la meyor marca.  

D.C.: Los llagareros dicen que ye un productu pa fuera y que n'Asturies cuesta horrores vendelo.

D.M.R.: Nun sé lo que pasa pero dame que dalgo tan faciendo mal. Volvemos al asuntu del que yá falamos de que nun hai tradición de tomalo por copes.

D.C.: Ye verdá. Nos chigres la xente toma sidra de la de siempres y nun pide otres formes. Entós los llagareros piensen: "¿pa qué voi poneme a invertir pa facer coses que nun controlo mui bien?".

D.M.R.: Los llagareros tienen razón. Ye evidente que non tóos van ponese a facer sidra brut o refrescos. Los grandes productores de vinu o de cerveza non tóos se metieron en coses nueves. Si nun-y pido a Vega Sicilia o a Osborne que faiga refrescos, ¿por qué-y lo voi pedir a Roza o a Canal? Pero vamos ver una cosa: lo de tomar cava por copes ye de bien recién, non más de quince años. Cualisquier bar de postín tien cava por copes. Yo soi veceru de dos cafeteríes emblemátiques de Xixón. Soilo dende munchos años y sigo yendo porque rara ye la selmana que nun baxo a Xixón un día. Por ver a mio madre, que tien 88 años, y de pasu facer compres. ¿Puedo decir les cafeteríes?

D.C.: Equí puede decise tóo, anque seya publicidá encubierta. Hehehe...

D.M.R.: Voi al Bariloche, n'El Parchís, y al Mayerling, na cai Corrida. Yá sabe, Castañón, que soi de ranciu abolengu.

D.C.: Vusté ye más de pueblu que les panoyes. La so autocalificación ye la de ser aldeanu illustráu. Pero tamién tien esi puntín...

D.M.R.: Pijo, dígalo, Castañón, que nun me molesta. Pero eso acabó, ta más caduco que los zapatos Castellanos de flequillo y qu'el yerséi collor pastel atáu al pescuezu. Por nun falar de peinase patrás y colos rizinos na ñucla. Esa estética capilar siempres me paeciera, dende chaval, horripilante. Pero'l casu ye que dalgunes vegaes de les que baxo a Xixón, dependiendo de la hora, tomo una copa de cava. ¿Por qué nun alcuentres sitios nos que tomar una copa de sidra brut?

D.C.: Yo creo que ye un problema de comercialización. Cuando'l llagareru llega al chigre ve claramente qu'ehí nun ta el mercáu pa otra sidra que nu seya la d'echar. Les cafeteríes, los restoranes... significa abrir un mercáu nuéu. O nun pueden invertir más o nun tra-yos a cuenta. L'asuntu requier una inversión importante y un gastu fuerte en comerciales que trabayen en llugares y ambientes nada avezaos a otra sidra que la natural. Colocar sidra brut o rosao nun chigre requier un esfuerzu grande pa que, como muncho, lo pidan pa cenar unos turistes o unos de casa un poco esceicionales. El casu ye que tan ocupaos, especialmente nestos menses de branu, en vender sidra natural y nun-yos compensa otra cosa, nun-yos trai a cuenta.

D.M.R.: Sí, tien vusté razón, pero lo del cava por copes ye bien de recién. Dígame tres sitios d'Uviéu o de Xixón que dieran cava por copes hai más de quince años. Pero nun me paez que seya un problema d'inversión. A min los problemes paécenme más primarios. Si yá tenemos problemes pa cubrir la sidra d'echar con mazana nacional, ¿cómo alfrentar una brut o unes semiseques con denominación? La demanda cubre tola oferta de la sidra de siempres, cuásique tola oferta de mazana... ¿qué puede facer el productor? Ye verdá qu'ahi otra vía: sidres brut o axampanes ensín denominación. Ye otra vía. Por cierto, tampoco pasaría nada. En toles rexones vitivinícoles hai categoríes a mamplén. Si yo quiero facer sidra brut en Cabranes con mazana o sidre dulce de Rumanía, ¿qué pasa? ¿Nun fae yogures una empresa d'Aquitania con llechi de Noruega? Yo sé qu'hai un espaciu pa esta sidra nuevo, pero nun sé si hai capacidá pa ello.

D.C.: Pero, en fín, yo siempres digo que tienen qu'echar maxinación. Si hai demanda d'esa sidra diferente a la tradicional, pues que lo resuelvan o que dexen sitiu a otros.

D.M.R.: Lo que yá ta pasando. Hai chigres, incluso en zones rurales, nos que yá vemos anunciándose na barra sidres brut d'esos otros, gallegues, por exemplu. Y pasa porque una marca concreta, Maeloc, ye la sidra brut, ensín denguna denominación, d'Estrella Galicia. Y cuando lleguen al chigreru cola cerveza traen la sidra, gratis al principiu, como promoción. Pues yá la viera yo en dalguna mesa na que tan xintando o cenando, polo xeneral xente de fuera.

D.C.: Ye un datu significativu: otros de fuera tan abriendo mercáu.

D.M.R.: Pero la cosa nun ye nuea. Yá pasó colos refrescos. Cuando yo yera neñu había un refrescu de mazana, Manzajú, de la empresa Escanciador, mui publicitáu: "¿qué tomas tú?, ¡un Manzajú!". Y los rapacinos tomábamoslo. Y acabó ganando l'espaciu'l Trinaranjus de mazana, que nun yera zusmiu natural de mazana, sinón concentráu de mazana con augua.  

D.C.: Yo nun conociera Manzajú.

D.M.R.: Vusté nun taba entós nesti mundiu tovía. Pero voi contái dalguna cosa más qu'illustra mui bien cómo fuera la evolución del seutor naquellos setenta y ochenta, yá pa los noventa. Vino a Asturies María Teresa Costa, una gran profesora d'economía catalana, y convidáronla a una espicha y a conocer un llagar. Paezme que fuera'l d'Herminio, en Cualloto, pero nun toi mui seguru. Yo nun taba. Esto contómelo Xosé Alba, el mio colega y amigu de la Universidá d'Uviéu. Ella entrugó que por qué nun envasaben en llata sidra gasificao. Costa vió rápidamente qu'había un nichu mercáu. Pero'l llagareru fizo una reflexón mui en condiciones: "mire, ye que yo nun quiero nin puedo competir con Cocacola". Pamidea que ye comprensible: competir nel mercáu de los refrescos nun yera posible nin tampoco-y prestaba al paisanu. Vino más tarde Ruiz Mateos, cuando entró na operación de la cervecera Águila Negra, sacando sidra gasificao en bote, cola marca Lagar. Entá hai dalgunos bares que tienen el nome na fachada col iconu de Lagar. Los tiempos yá yeran otros y hebo discusión de que si lagar o llagar. Pero la cosa taba clara: Ruiz Mateos o quien-y fixera les campañes diérae cuenta que la sidra yera un productu esportable. Nesa situación, lagar sedría visto como lager fuera del dominíu llingüísticu llatinu. Pero aquello duró poco y acabó col final del imperiu de pies de barru de Rumasa. 

D.C.: Foncueva sacó un tiempu un refrescu mazana en llata. 

D.M.R.: D'eso nun me recuerdo.

D.C.: Vamos dir acabando. Llevamos con esti programa un añu y mediu, y David Rivas pieslla con nós un ciclu. Pero vuelve en setiembre. Dalgo tenemos pensao y medio preparao. Pero prestaríame que ficiera vusté de colofón, destos quince menses que nun tendríen sentíu ensín el nuesu profesor d'economía y de milenta coses más. Yo daprendiera munches coses y na cai y nes redes aponderaben a esti renacentista cosmopolita y de pueblu. ¿Cómo pesllaría esta aventura?

D.M.R.: Lo primero, caro, ye agradecer a esti equipu y a vusté, Castañón, el convide a venir. Yá se que vusté quierme muncho, nun sé la razón, y, la verdá, la cosa ye recíproca. Ficimos un bon percorríu, parándomos igual muncho en coses mui marxinales y escaeciendo otres más centrales. Cuando discutimos daprendemos, sacantes que seyamos contertulios de televisión, que nin discuten nin daprenden. Yo salía del estudiu y diba pensando nes enquivocaciones, nes cites mal daes, nes coses mal desplicaes. Reutificaba dalgunes coses na trescripción al mio blogue escritu y arreglaba dalgo. Dalgunes vegaes alcontraba datos y documentos nueos y guardábalos, que pa eso teo una carpetona, en cartón y papel, que yo soi mui tradicional. Yo nun soi historiador, como dixe munches vegaes, nun buceo en fontes primaries. Nesto de la sidra soi un divulgador. Permítome llicencies pero procuro ser rigurosu, y cuando llanzo hipótesis non contrastaes dígolo. Siempres traté, non de falar de la sidra, sinón de la savia d'un pueblu más que bimilenariu, de falar de la sidra como ún de los filos colos qu'abordar la historia d'Asturies como nación. Porque, amigu Castañón y amigos oyentes, si una comunidá cumple toles condiciones, sigún toles escueles, pa ser nación, esa ye Asturies. Y la nuesa sidra tien un ritual únicu nel mundiu. A esa custión vamos dedicar el cursu viniente, a tola simboloxía, a tol esoterismu y a toles lliendes al rodiu de la mazana y de la sidra. Pero vamos facelo ensín salir de la historia, volviendo a lo que yá falamos pero quedó a medio facer. Y, evidentemente, el presente y'l futuru seguirán ehí. Puede ser inclusive un añu más divertíu. Si yá salté ensín rede falando de lo material, ¿qué nun voi facer cuando entre no simbólico y no mitolóxico? Y, pa terminar, quiero dar les gracies a los oyentes. Polo que sé, resulta que caigo bien y que perdonen los mios patinazos y esbardies ensín xacíu.

D.C.: Munches gracies, profesor, y equí taremos en setiembre pa falar de lo nueo y lo vieyo de la sidra. Y abriendo colos acordes del mayestru Mozart, el músicu col que vusté comparte dalguna qu'otra idea.