"L'espardimientu de la sidra ye paralelu a la proletarización"

David Castañón: Suenen vigulines, ponémosmos de pies y quitámosmos la gorra, o'l sombreru, porque elli suel venir con sombreru. Vamos recibir al profesor David Rivas, que ye un home d'esos del Renacimientu, que sabe d'una montonera coses. Saben vustedes que ye catedráticu d'estructura económica y tamién presidente del Conceyu Nacional de Repunantes. Y, sobro tóo, ye la persona que mos vien falar equí de la historia de la sidra, una historia de munchos sieglos. ¿Qué tal, profesor, cómo andamos?

David M. Rivas: Bien, ¿qué tal vusté?

D.C.: Mui bien y meyor cuando vien vusté porque sé que voi pasalo bien.

D.M.R.: La verdá ye que sí lo pasamos bien. Pero vusté pásalo bien con tolos sos convidaos, polo que sigo del programa. ¡Que lu sigo! 

D.C.: Eso ye verdá. Pero ye que, yá que tamos equí, hai que facer coses agradables pa la xente.

D.M.R.: Sí, sí. Como la vida ye curtia, faigámosla a lo menos un poco allegre. Escribe Stoker na so novela Drácula, que los amigos nun cambien la vida pero que la faen más llevadera. Y ye verdá.

D.C.: Igual nun ye cosa de ponemos intensos.

D.M.R.: Pa eso yá ta'l Congresu los Diputaos.

D.C.: Aquello paez más un patiu colexu.

D.M.R.: A min dame vergoña, de verdá. Y non namás el Congresu español sinón cualisquier cámara, l'asturiana, la gallega, la madrilana... Pero ye que nel restu d'Europa tampoco anden mui aquello.

D.C.: ¿Non?

D.M.R.: Perdieron muncho si encomparamos colo que teníen.

D.C.: Como nun los entiendes igual llibren.

D.M.R.: Non, non. Y nun falo de Poloña, d'Ungría o de Croacia, con mui poco pedigrí democráticu. Falo de lo que podemos llamar democracies clásiques. El parllamentu británicu, paradigma dende van dos sieglos o más, ye agora un piteru.

D.C.: ¿Perdiérase'l conceptu l'honor?

D.M.R.: L'honor ye dalgo mui discutible, mui controvertío. Ye un conceutu polivalente y depende de tiempos, de cultures y de circunstancies. Hai un honor subxetivu, el qu'una persona percibe como suyu, y otru social. Pero siempres mos remite al deber, al méritu, a la virtú. Yo teo l'honor como una custión importante y, seguramente por herencia, veolo más d'una forma medieval que burguesa. Por eso, anque procuro guardalo, nun lo valoro escesivamente. Prefiero, puestos a dir a valores absolutos, el conceuto d'integridá. Pero, diendo a lo importante, a min paezme que se perdiera'l conceutu de la sensateza. Tóo ye insensato. Nun ye sensato, y nun faigo una crítica partidista, qu'un gobiernu autonómicu aprebe una reducción d'impuestos a los más ricos d'unos 900 miyones d'euros y al día siguiente pida al gobiernu central una tresferencia de 1.000 porque hai sequía. Eso acaba facelo l'executivu andaluz, una comunidá que lleva recibiendo renta de otres dende hai cuarenta años. ¿Y d'aú van salir esos miyones?: pues del fondu común y, especialmente, de les comunidaes que nun indulten a los sos miyonarios y cobren de los asalariaos, funcionarios y autónomos. Hai razones y argumentos teóricos pa caltener impuestos altos, tamién práuticos, y puede discutise l'asuntu. Tamién los puede haber pa baxar impuestos, evidentemente. Pero lo que ye complicao ye baxar impuestos y subir gastos. Y peor entá ye baxar impuestos y pedir tresferencies a otros, que significa que tas pidiendo que te financien cuando tu decidiste nun poner nada o poner menos. A partir d'ehí cualisquier discusión ye absurda, tóo ye una estupideza. Hai un tiempu yo sentábame a la radio o delantre la tele pa seguir los debates sobro los presupuestos y estes coses. Como taba dando clase víame obligáu a saber del debate. Dalgún alumnu podía preguntame al respeutu y dalgo yo tenía que conocer. Por eso escuchaba lo que decía'l presidente y los principales grupos de oposición, como el PP, evidentemente, pero tamién Esquerra Republicana o'l PNV. Y alcontrábame con unes coses que... ¡Menos mal que yá nun teo que seguir esa astracanada por disciplina y pa cumplir colos estudiantes!

D.C.: Eso que ganara vusté na vida.

D.M.R.: Yo echo muncho de menos dar clase. Siempres lo digo. A min gústame dar clase, tratar cola xente mozo, la que quier daprender de verdá. Pero ye cierto que gané dalgo neso, en nun tener que soportar coses poles que nun teo dengún interés o mui poco. Hai custiones de la economía que nunca me motivaron pero, si das clase, dalgo tienes que conocer. Siempres hai un alumnu qu'entruga. Puedes decí-y que nun lo sabes y que lo vas consultar, o remitilu a dalgún compañeru que sepa más que tu d'esa custión, pero dalgo debes contar. Incluso pa decir "nun lo sé" tienes que saber argumentalo metodolóxicamente.

D.C.: Vusté tuvo que ser un bon profesor.

D.M.R.: Creo, sinceramente, que sí que lo fui.         

D.C.: Y yá que tamos equí, ensín que se mueye muncho, ¿ye vusté optimista?

D.N.R.: ¿En qué sentíu?

D.C.: En sentíu económicu. Tamos pasando por un momentu d'inflación, colos sueldos que nun suben alcordies, unos dicen que va venir l'armageddon, otros dicen que nun ye pa tanto...

D.M.R.: Yo creyo que la espiral inflacionista va parar y que los precios van amenorgar, seguramente yá a final d'esti añu, pero ensín duldia nel primer trimestre de 2023. Pero, caro, tamos nuna incertidume total. Tamos con una guerra n'Europa, que nun ye dalgo ayeno, que ye mui cercano. Nun sabemos lo que va pasar cola guerra d'Ucraña. Yo guardo recortes de prensa pa dempués escribir artículos, preparar intervenciones en meses reondes, incluso pa falar con vusté, Castañón, y, nun tiempu, reviso la carpeta y tiro lo que paeciera importante un día pero nun lo ye y guardo otro. Resulta que teo artículos onde grandes espertos afirmaben que nunca Putin diba invadir Ucraña, o lleo a un xeneral norteamericanu que ye'l copón de la baraxa de la estratexa decir, hai siete menses, qu'Ucraña diba ser derrotada en diez díes. Agora unos dicen que Putin tirará la bomba ñuclear y otros que non. Pero puede tirala. Hai coses a les que yo nun llego porque nun soi espertu en tóo. Igual nun soi espertu en nada. Yo, la verdá, ye que sé de cuatru coses. Cada día que pasa doime más cuenta de que sé menos y cada día que pasa, por vieyu, me descoyono más cuando escucho a los analistes de la radio y de la televisión. Yo sé cuatru coses, malapenes les tendencies económiques. Pero pienso que la curva inflacionista va dir caendo. Pero'l problema ye otru. Hai grandes capes de la población que les tan pasando putes y van seguir pasándoles putes. Esi problema ye lo que mos lleva a la política llocal, a la de la Unión Europea, a la del reinu, a la de les comunidaes autónomes. Falamos siempres del repartu la riqueza, pero tamién hai que falar de la otra cara, del repartu la crisis. La economía, globalmente, seguramente nun va dir tan mal como dicen dalgunos agoreros, pero hai un 30 por cientu de la población, o un 20 si hai un repunte, que va quedar nel argayu, y eso ye intolerable nun país capitalista avanzáu y miembru d'una Unión Europea llíder n'esporpolle económicu y social. Pienso que nun vamos entrar nuna recesión como la que tuvimos en 2008. Y, anque diga lo contrario el Fondu Monetariu, a min paezme que la economía española espoxiga. Ya sé que ye una herexía, pero nun sedría raro ver un crecimientu interanual del 4 por cientu o más.

D.C.: ¿Ven, oyentes, que mos ponemos serios cuando ye mester? Y toi seguru de qu'a los oyentes, los que sigue la historia de la sidra, présta-ys esta discusión. Pero a David Rivas tenémoslu pa falar, precisamente, de la historia de la sidra.

D.M.R.: La verdá ye que yá nun sé mui bien pa que me tienen equi. Hehehe...

D.C.: Ye que vusté val pa tóo.

D.M.R.: ¿Cómo yera aquello de valir pa tóo y nun servir pa nada?

D.C.: Non, non, nun ye asina la cosa. La xente que se pon en contautu con nosotros dizmos frecuentemente que daprende munches coses con esi profesor que fala de la sidra y de tantes otres coses. Y munchos dícenmos que saber eses coses val-yos pa valorar más lo que tienen, lo que tenemos.

D.M.R.: Munches vegaes, nesto de la sidra como, en xeneral, de la historia d'Asturies y de la cultura asturiana, la clave ta en que la xente sí que sabe coses que, por munchos motivos, quedaron atapecíes nun rinconín de la memoria. Dacuando, les persones, toes, sospechamos coses, tenemos medies idegues, somos víctimes d'una historia oficial que nun fala de determinaos asuntos o que los cuenta al revés de como fueron. Pasa frecuentemente lo que-y pasaba al neñu del que falaba Orwell en la novela 1984: "dicen que los aviones inventolos el hermanu mayor pero a min paezme que mio padre me cuntara qu'enantes yá los había". La xente sabe munches coses pero dalgunes tienles metíes ehí, ente les telarañes d'una tenada. Y cuando les cuentes prodúcense tres tipos de reacción. Una ye la estrañeza por frente a una novedá, la de conocer dalgo que nun sabíes y que te paez interesante o non. Hai otra de refugu, de considerar que lo que te tan contando ye una chorrada ensín más interés qu'entetener a cierta audiencia de sábadu al meudía, como ye'l nuesu casu. Pero hai una tercera que paezme mui frecuente: la de quedase pensando y decir: "¡meca!, esto contábalo mio güelu..., yá mio madre me decía..., pues yo recuérdome de cuando yera pequeñu...". Y eso puede vese con claridá nes mesmes charres que tenemos nesti programa. Yo cuento la historia de la sidra, la historia en xeneral d'Asturies, acudiendo a documentos, a llibros, a escritores, a lliendes y cuentos, a munches y diferentes fontes; pero tamién tiro de memoria, de la mio propia vida o de recuerdos de vecinos o familiares. Y, aunque yá teo unos años, nun soi de cuando reinó Carolo. Toi seguru qu'el noventa por cientu los oyentes tienen la mio edá o son fíos d'homes y muyeres de la mio edá, colo que xugamos tóos nun campu de la mesma memoria... ¿Ve?, yá nun sé qué yera lo que me preguntaba...

D.C.: Nun-y entrugaba nada en concreto, pero vamos dir, como ye lo propio, a la historia de la sidra asturiana. Tábamos falando de los grandes pegoyos non que s'afitó la evolución de la sidra moderno, la d'anguaño, que son la botella, el vasu y la caxa. El últimu día falamos precisamente de les caxes, de cómo sirvieron pa espardir el consumu nuna urbanización creciente, saliendo la sidra definitivamente del reductu rural. ¿Con qué podemos seguir?

D.M.R.: Podemos seguir polo que vusté apunta, pola evolución del consumu actual de la sidra, considerando como actual el sieglu XX y lo que va del XXI, y atendiendo más a lo social, a la evolución soioeconómica del país, y non tanto a lo técnico como ficimos colos vasos o les botelles. Yá falamos dalguna qu'otra vuelta de qu'el procesu d'afitamientu de la sidra nes ciudaes cuerre en paralelo al procesu de proletarización. La evolución de la sidra, la so salida de l'aldea, ye un ellementu propiu de la industrialización y de la emigración. Tamos viendo un procesu de cambiu nel consumu: la sidra dexa de ser una bébora namás que campesina y pasa a xeneralizase na tabierna urbana, nel chigre de la villa o de la ciudá que tol mundiu conoz. Nel fondu, la clas obrera nun dexa de ser la clas campesina que va emigrando. Puede haber un proletariáu suburbanu nes grandes ciudaes, formáu por fíos del seutor de servicios, artesanos por exemplu, que tuvieron que pasar a vender la so fuerza trabayu a otres empreses, pero la gran masa proletaria pocede de families campesines emigrantes. N'Asturies, concretamente, la emigración ye interior. Namás qu'hai una cierta inmigración de xente de fuera cuando abre la minería, a finales del XIX y principios del XX, precisamente porque la sociedá rural asturiana sigue nuna fase tradicional y espulsa a poco xente, además de que lo que marcha faelo pal otru lláu de la mar. La segunda fola d'inmigración va ser la de los años sesenta, exemplarizable nel casu d'Avilés. Yera cuando se decía aquello de "Estremaúra son tres: Cáceres, Badaxoz y Avilés". Ye la época de los coreanos, una forma despreciativa de falar de los inmigrantes. Por cierto, el significáu nun tien nada que ver col color de la piel, como hai quien piensa, sinón coles retafiles de xente con maletes abarrotando trenes y autobuses cuando la partición de Corea tres la guerra. Nesos años la sociedá rural asturiana nun ye yá tradicional sensu stricto pero tovía ta lloñe d'una nueva agricultura, sacantes dalgunes ganaderíes llecheres. Como resultao de toes estes circunstancies, el gruesu de la emigración a les villes y ciudaes ye interior, ye nacional, y va produciéndose rellativamente despacio a lo llargo'l sieglu. Eso quier decir que ye una población que consume sidra y que llega a ciudaes que yeren villes pequeñes ata tres díes enantes, centros urbanos de grandes territorios rurales, colo que tamién teníen tradición sidrera. L'exemplu que ye más afayaizu ye'l de Xixón, que ye la ciudá más grande d'Asturies y, a un tiempu, la más aldeana. Esto de que Xixón ye una aldeona ye tipica chancia de carbayones y d'otros pero hai que velo dende un lláu positivu. Xixón espoxiga yá a finales de los sesenta, con Uninsa, l'autopista Y, l'ampliación d'El Musel y otres coses. Entós ye cuando ta produciéndose, precisamente, la gran crisis de l'agricultura tradicional asturiana, mientres que la gran emigración del sur d'España va frenando. A Xixón lleguen masivamente campesinos del país, fundamentalmente de conceyos cercanos como Gozón, Villaviciosa, Carreño, Siero, Colunga, pero tamién munchos del occidente. Y los que lleguen de fuera son como de casa porque son, básicamente, de Llión o del oriente de Galicia. Por eso hai que falar positivamente del aldeanismu de Xixón, porque conservó meyor qu'Uviéu y Avilés los vezos tradicionales y la mesma llingua. Y fue tamién onde meyor resistiera la cultura sidrera nos peores años, cuando pesllaben chigres y llagares tolos menses. Pero, pa poner más en claro esti procesu, pensemos n'Uviéu, que ye una ciudá mui diferente. Poques capitales d'Europa tienen un entornu rural como'l que tién Uviéu. El mundiu rural del conceyu d'Uviéu ye impresionante y, amás, ta mui vivu, siendo un conceyu rellativamente industrializáu y con una ciudá que ye capital burocrática, política, bancaria, de servicios, eclesiástica, dende hai muncho, pongamos que dos sieglos y mediu, por namás que referimos a la modernidá. Un entornu rural como'l d'Uviéu namás que lu alcuentres en dalgunes ciudaes alemanes, Bonn por exemplu. De les ciudaes que yo conozo, salvando dalguna distancia qu'otra, a min Bonn ye la que más me recuerda a Uviéu. El casu ye qu'Uviéu, la ciudá capitalina, siempres tuvo y sigue tando arrodiada por una sociedá rural mui potente. De fechu, anque fora cuásique desaniciada y agora resurde más o menos, la feria de ganáu de l'Ascensión yera fecha pintada de collorao en media Asturies, muncho más importante que cualisquier mercáu de Xixón, de Pravia o de Cangues d'Onís. El casu ye que, nesti contestu, la sidra, que fuera bebida campesina, diaria o pa fiesta, sigún la época y les rentes, fue convirtiéndose n'urbana y básicamente en proletaria.

D.C.: El profesor Rivas acaba de despachar nun santiamén media historia económica del sieglu XX.

D.M.R.: Ye que soi asina d'echáu palantre, de, ¿cómo yera aquello?, d'arriesgáu concursante.

D.C.: ¡Hahaha...!

D.M.R.: El casu ye qu'el chigre urbanu, especialmente'l chigre de los barrios periféricos, ye'l centru social de la foceta y'l martiellu. Non por ser un centru comunista precisamente, sinón porque escontra unes botelles de sidra reuníense obreros y campesinos.

D.C.: ¡Hahaha...! ¡Esto sí que ye mui bono! Nunca lo sintiera enantes.

D.M.R.: Ye que ye una ocurrencia mía. Yo faigo míes coses qu'escucho perí, garro otres de lo que lleo, cito siempres que puedo, eso sí... Pero esto de les ferramientes del materialismu históricu chigreru ye cosa mía. Fizo muncha gracia cuando lo escribiera nel llibru sobro la sidra d'hai venti años y más d'ún diz eso de "como escribe'l mio amigu Rivas...". Va ser la mio contribución a les grandes frases de la historia, col sudor y llárimes de Churchill, les pirámides de Napoleón, el Rubicón de Xulio César...               

D.C.: Chiste aparte, ye verdá qu'eso que cuenta fora una característica del procesu d'urbanización asturianu. Los campesinos que van a la ciudá caltienen la casería o compártenla col hermanu que quedó en pueblu, conservaben la güerta, dalgo de ganao, que daba pa en casa, y esa doble actividá yera mui xeneral.

D.M.R.: Ye'l día de güei qu'entá, con tres o cuatru xeneraciones na ciudá, munches families conserven la casería o, polo menos, dalguna faza de tierra pa unes pataques, unes cebolles, unes berces, o tamién un piteru o una coneyera. Igual yá vaques o cabres non, pero sí tres o cuatro oveyes o unos truébanos. Bono, hai una montonera d'anéudotes de cuando la pandemia, concretamente de cuando'l confinamientu. Concretamente yo sé que la guardia civil de Llangréu, cuando anotaba los incidentes de tráficu de xente que rompía la obligación de quedar en casa, alcontraba como primer motivu el de "dir dar comer a les pites". Lo mesmo dalgunos conductores taben contando una trola a los tricornios pero la cosa indica que munchos vecinos de La Felguera o de Sama, tienen reciella y tierra nos pueblos de los que procede la familia. Y lo mesmo son yá bizñetos de paisanos que trabayaron na Duro nos años venti o ñetos de picadores d'Hunosa. Tamos falando d'un conceyu del centru d'Asturies, mineru, metalúrxicu, mui urbanizáu. Y mui sidreru, tamién eso.

D.C.: Mui sidreru. Y xente bono. A min aguántenme y quiérenme abondo.

D.M.R.: Yo, porque sé que vusté naciera n'Avilés, pero paez más de la cuenca qu'el pozu Sotón.

D.C.: Sí, puede ser. Seguimos falando la selmana que vien, amigu Rivas.

D.M.R.: ¡Venga!