Trenes a denguna parte

 

(El Fielato)

La rede ferroviaria de cercaníes d'Asturies ye de les más completes de cuantes hai n'Europa, namás comparable a la qu'históricamente tuvo y caltién en bona medía Inglaterra. La rede fue dexada de la manu de Dios dende hai décades mientres l'alministración apostaba pol tresporte per carretera que, nel casu del de persones, contribuera a la despoblación y al abandonu de dos terceres partes del territoriu. Actualmente, la política europea, mesmo la de tresportes que la enerxético-ambiental, tien como llínia principal la potenciación del ferrocarril convencional.

Los datos son mui significativos y responden a esa estratexa antiferroviaria, fácilemente entendible: dexamos deteriorase'l serviciu, favorecemos el tresporte per carretera, la xente pasa en masa al autobús y decimos qu'el tren nun ye la opción preferida pola ciudadanía. Les cifres asturianes son contundentes: el númberu de viaxeros de Feve y de les cercaníes de Renfe cayera a menos de la metada en namás que tres décades, ente 1991 y 2021. Pero, si analizamos con cancallu, veremos qu'el ferrocarril pasara de 3,3 miyones de viaxes en 1991 a 4,8 en 2004, subiendo tolos años, y caera a los 1,3 ente 2004 y 2021, baxando tolos años. Nun hai desplicación posible dende un puntu de vista estadísticu y tamos escontra un casu únicu nel tresporte d'un país desarrolláu. Evidentemente, la desplicación ye de caráuter políticu.

Pol contrario, creárase la necesidá del AVE a Madrid, pa lo que l'argumentariu yera l'históricu aisllamientu d'Asturies, un aisllamientu que nun ye talu con respeutu a la metrópoli dende hai polo menos tres décades. Agora planteguen un ferrocarril a Sevilla, el que llamen de Ruta de la Plata, una vía comunicación que nunca esistió y que vuelve xustificase con base a criterios turísticos.

El verdaderu problema ye la nula conexón interna d'Asturies, particularmente nos conceyos rurales que, entregaos al tresporte priváu por carretera, sufren agora criterios de rentabilidá, del mesmu mou que los sufren col sistema bancariu: la disminución de llínies, de frecuencies y de paraes ye un fenómenu paralelu a la desapaición de sucursales y caxeros. 

Ya'l otru problema ye la desconexón d'Asturies de los grandes corredores ferroviarios, como el de Lisboa-Oporto-Bilbao-París-Berlín, que va ser fundamental, agora má que nunca, pa la integración europea de les décades vinientes. Tamién apunten haza otros dos trazaos: el Xixón-Valencia y el Xixón-Alicante. Les tres llínies nun son necesaries nin muncho menos estratéxiques, dempués del AVE con Madrid, que, dicho seya de pasu, ye de duldiable impautu nel desendolcu económicu. Mentanto, col pretestu de la pandemia de covid, suspendieran la llínia con Barcelona, que mos uniría al exe Barcelona-Marsella-Turín-Milán. 

Tolos proyeutos tan pensaos pal turismu, precisamente un sector que va camudar radicalmente nel horizonte d'una economía descarbonizada y na que de les dos concepciones del tresporte, la de la movilidá y la del accesu, primará indudablemente la segunda. Trenes a denguna parte mientres dexen a Asturies al marxe de los grandes corredores económicos y conderguen al país al despoblamientu, a la desatención y al subdesarrollu.

David M. Rivas