"Lo razonable ye tener tol añu l'actual horariu d'iviernu"

 

Alejandro Fonseca: Suena Pink Floyd, la so canción Time, cuando mos disponemos a falar con David Rivas sobro esto del cambiu d'hora, Monchi Álvarez.

Monchi Álvarez: Esta historia, esta verdadera milonga que mos imponen dos vegaes al añu, que, creyo yo, nun tien xacíu. A ver qué mos cuenta'l profesor Rivas, especialmente polo que toca a lo económico, pero tal paez que nesti país los cambios, por mínimos que seyan, son de difícile puesta en marcha.

A.F.: Sentimos a David Guilmour cuando mos ponemos a la fala con David Rivas. Son güei dos davices, el nuesu ya'l foriatu.

M.A.: Y los dos con munchu talentu.

A.F.: Bona tarde, David Rivas.

M.A.: Hola.

David M. Rivas: Hola, amigos, bona tarde. Encantáu d'entrar acompangáu por Pink Floyd.

A.F.: ¿Hai, profesor, dalgo bono qu'alcontrar nesti cambiu d'hora?

D.M.R.: Esti cambiu d'hora que padecemos dos vegaes al añu nun tien dengún sentíu, nun hai denguna desplicación, nin la más mínima. Na madrugada d'esti domengu pasáu volviéramos a la ceremonia de la estupideza y de la inutilidá d'esi baille de que a les 2 son les 3. ¿Por qué?: naide nun s'acuerda; ¿pa qué?: naide nun lo sabe; ¿qué beneficios tien?: nun tan cuantificaos. Yo recuérdome perbién de cuando entamó esti asuntu. Fora nel cursu 1973-74, cuando la gran crisis petrolífera. Entóncenes teníamos una estructura económica basada nuna industria arcaica, mui presente riba tóo n'España y nel Reinu Uníu y mui especialmente n'Asturies. Esi modelu industrial yá nun esiste dende hai más de dos décades. Naquellos setenta la ellectricidá xenerábase con petróleu y carbón, dalgo de saltos d'augua y un poco de centrales ñucleares. Güei tamos notru modelu y nun procesu aceleráu de descarbonización, con un incrementu estraordinariu de les fontes renovables. Nos años ochenta hebo una verdadera revolución teunolóxica nesi campu, entamando por una reducción de consumu enerxéticu por unidá fabricada o tresportada. Pensemos nun coche utilitariu mediu d'aquellos años, un Seat 124 o un Simca 1200, por exemplu, y comparemos el so consumu col d'un Renault 5 o un Ford Fiesta de cuatro o cinco años dempués. Tamién d'aquella la illuminación, lo que ye estrictamente la lluz, yera un rubru mui importante del consumu enerxéticu, mientres que güei tien una proporción mui pequeña. Los que tenemos yá una edá recordamos a la güela apagando les lluces pel pasiellu y habitación por habitación, una costume que tenemos munchos tovía, mientres que lo cierto ye que güei una bombiella consume menos nun añu qu'una vitrocerámica en diez minutos. Nun digamos de cuando n'aldea teníamos qu'apagar les lluces pa poner la catadora: nun aguantaba nin la instalación. Polo que toca a les industries ellectrointensives, nun varía en nada'l consumu sigún les hores porque tán en continu funcionamientu, tán actives les venticuatro hores del día. El cambiu horariu a estes altures del XXI nun respuende a nada, nin a la escasez, nin a la inflación, nin al emplegu, nin a la competitividá, nin a nada. Incluso podríamos ver aspeutos negativos, nel casu del horariu branu, porque parte del sector servicios, col allargamientu de les tardes, consume enerxía durante más hores, pagando más nesti momentu concretu, anque pueda ser coyuntural, y provocando contaminación primaria na xeneración elléctrica y secundaria nel consumu.

A.F.: ¿Ye l'horariu de branu'l que debería quedar o meyor el d'iviernu?

D.M.R.: Lo llóxico, dende un puntu de vista de tratar de vivir más alcordies cola naturaleza, sedría seguir l'horariu solar, que nun coincide con dengún de los dos: n'iviernu vamos una hora per delantre y nel branu dos. Pero, si nun queremos llegar a tanto, pa que nun seya de nueche a les cuatro la tarde nel iviernu, lo razonable sedría l'horariu que tienen el Reinu Uníu, Portugal y les Canaries. Ye lo que normalmente se conoz como UTC+1, esto ye, una hora más de la solar del meridián de Greenwich. Pero ye que, a mayores, España va una hora más per delantre, lo que significa dos con respeutu al Sol. Ata los años trenta tiníamos la hora inglesa, pero Franco, con aquel caráuter tan servil que tenía pa con Hitler, adoutó l'husu horariu de Berlín. Asina que güei y ata ochobre-payares a les 12 solares y la 1 inglesa y portuguesa cuerresponden les 2 n'España. Eso llévamos a coses tan llamatives como que les 5 de la tarde, la hora taurina de la que mos fala la lliteratura o mos canta la copla, nun esiste. Güei les corríes de toros, llóxicamente, empiecen a les 7 de la tarde. Yo soi antitaurín pero non por eso me dexa de llamar l'atención l'asuntu. Esa decisión de Franco modificó la cuotidianeidá, mui visible nos horarios de la xinta y, especialmente, de la cena. Y más lluéu, cuando la gran emigración a Europa d'obreros y campesinos, que sumaron unos dos miyones d'almes, ya'l confinamientu domésticu de les muyeres casaes, el pluriemplegu masculín multiplicó la cosa. Munchos paisanos trabayaben nun sitiu ata la 1 o les 2 de la tarde y notru sitiu ata les 8 o les 9 de la nueche. Y, asina, la cena a les 10, el cine a les 11, el cacharru de sábadu yá de madrugada... 

M.A.: Añu 2022: ¿por qué ye tan difícile facer cambios nesti país?

D.M.R.: Anque mos presta muncho falar d'eso de que Spain is diferent, nesti asuntu tampoco ye tan estraordinaria la nuesa situación, sacantes lo de la hora alemana, que fora una barbaridá dende el primer día que lo decidió su excelencia. Supongo que na transición l'husu horariu diba nel paquete de la bandera, la corona, l'himnu, el concordatu y la paella los domengos. Pero güei son munchos los países que siguen col cambiu d'hora dos vegaes al añu, tola Unión Europea, ensín dir más lloñe, y tamién los Estaos Uníos. Nun ye, polo tanto, dalgo específico de, como diz con coña Monchi Álvarez dalguna qu'otra vuelta, Españaza.

M.A.: Españaza, hehehe...

D.M.R.: El senáu de los Estaos Uníos acaba d'aprobar la supresión de los cambios d'horariu. Queda por ver qué votará el congresu, porque nun ta la cosa nada clara. Nin tansiquier sabemos cuála ye la opinión personal del presidente Biden. Pero, contrariando tolos conseyos de científicos, investigadores, espertos, etcétera, el senáu votó que quedase como horariu l'actual de branu. Tolos estudios ya informes aconseyen adoutar el d'iviernu, como pasa tamién n'Europa. Una sociedá non gubernamental de gran prestixu nos Estaos Uníos, Save Standard Time, tien un estudiu amplísimu sobro los beneficios d'un horariu únicu y qu'esi, de nun ser el solar, seya'l d'iviernu. En primer llugar fala de la salú, tolo rellacionao colos biorritmos, la consonancia de les constantes vitales, les cardíaques y les del sueñu especialmente, col cosmos. Yo d'esto poco puedo dicir porque nun sé más de lo que sabe cualisquier persona que llee periódicos. Pero sí incide l'estudiu nos beneficios socioeconómicos, falando de seguranza pública, defensa, productividá, enseñanza, salarios, mediu ambiente, llibertades civiles... A tou esti complexu de variables respuende favorablemente l'horariu solar o'l alministrativu d'iviernu. Y, evidentemente, lo que val pa Estaos Uníos valmos pa nosotros, pol fechu de tar nel mesmu hemisferiu, nel hemisferiu norte. Evidentemente, nel hemisferiu sur les rellaciones son inverses.

M.A.: Na Unión Europea tamién llevamos tiempu con esti debate y tampoco tien pinta de solucionase.

D.M.R.: Hai cinco o seyes años realizose una encuesta na Unión Europea sobro estes custiones. La muestra fue de unos cinco miyones de cuudadanos consultaos y les conclusiones nun dexen llugar a duldia denguna: el 84 por cientu amosó una posición favorable a que se dexara de cambiar la hora cada semestre, y, del total de los que contestaron esto, el 98 por cientu optaba pol horariu d'iviernu. Oseya, que los europeos tiénenlo mui claro, los que paecen nun saber qué facer son los políticos y los eurócrates. La propia Comisión Europea aprobó una directrice nesi sentíu nel 2018, hai cuatro años, pero debe tar durmiendo'l suañu los xustos nalgún caxón de Bruxelles o d'Estrasburgu. Eso sopelexa que la inoperancia nun ye sólo española, sinón de tola Unión, sólo que nel casu español la cosa ye más peliaguda por esa hora de más del franquismu.

M.A.: ¿Por qué esa reticencia a cambiar les coses entós?

D.M.R.: Hai razones diverses. Hai una primera razón de caráuter popular que se tresllada a la política, cada vuelta más populista. La xente asocia'l cambiu d'horariu al branu y a la primavera, al bon tiempu, a ver atapecer na playa, una visión mui vacacional. Ya eso influi na toma de decisiones. La mayor parte de los que defenden la variación d'horariu fala de que-y presta tar na playa o nuna terracina viendo caer el Sol. Nun alcontramos otres razones.

A.F.: Como rempuesta nun ta mal o, polo menos, ta muncho meyor, ye más razonable, que decir que prefieren esos cambios pa aforrar enerxía.

M.A.: Más poético sí que ye.

D.M.R.: Seralo guapamente, pero nun entiendo por qué hai que ver atapecer enfrente la mar enantes de cenar y non dempués de cenar. Y, por otra parte, ¿a naide-y presta ver amanecer? ¿Por qué ye meyor qu'el riscar del Sol mos garre durmiendo y l'atapecer col chupetín de dempués de comer? Y que conste que yo soi más noctámbulu que madrugador. Y nun escaezamos una contaminación mui poques vegaes considerada pero que ye creciente y, sigún los últimos estudios, de consecuencies fatales, la llumínica. Prestará muncho tar tiráu nuna sablera de les ríes baxes gallegues viendo marchar el Sol, pero pocos podrán ver les estrelles. Tamién hai dalgunos intereses económicos. La mesma organización de la que-ys falaba enantes, Save Standard Time, diz que nos Estaos Uníos hai tres o cuatro seutores que presionen con muncha xixa a los gobiernos: los propietarios de campos de golf, el turismu de baxa calidá, que ye'l más abondosu, y los fabricantes de dolces y de refrescos. N'esprexón de la propia asociación, son sectores que querríen que "nun atapeciere nunca". Tamos falando de seutores mui potentes na economía actual, mui terciarizada. L'asuntu de la calidá del serviciu ye mui visible, dándose una rellación clara de a calidá más baxa, mayor demanda d'hores de sol al final del día. Na mesma España, con unes hores pa cenar mui avanzaes, podemos velo: mientres que la hora punta na hostelería más masificada anda ente les 10 menos cuartu y les 10 y cuartu, nel casu de la más reputada en cuanto a calidá ta ente les 9 y les 9 y media y, amás, descendiendo. Por otru lláu, como pasó col franquismu nun sentíu, la pandemia llogró lo mesmo pero al contrario: les cenes en casa adelantráronse en media hora y nos restoranes en cuásique una hora completa. Agora, col primer branu, si non de normalidá, sí de postanormalidá, veremos si esa tendencia se caltién o quiebra.

A.F.: Amás, n'España tamién hai movimientos pa una racionalización d'horarios, algunos cercanos a los gobiernos.

D.M.R.: Sí, ye verdá. Hai una comisión que lleva trabayando dende van años y que, dacuando en vez, apaez nos medios de comunicación. L'intentu más seriu paez ser el del gobiernu catalán, que pretende una modificación importante pal añu 2025. Pocu marxe me paez, pero ver veremos. La idega ye que los despertadores suenen polo xeneral a les 7 y cuartu, la xinta seya de media hora y la cena sobro les 8 la tarde. Cuenten tamién con afitar el prime time televisivu ente les 9 y les 10, non como agora, que ta alrodiu les 11. Y equí dase la paradoxa de que ye Cataluña la pionera nesti asuntu cuando, quitando Baleares, ye la comunidá cola hora solar más cercana a la oficial actual de toes, mientres que les más occidentales nin faen xeitos nesi sentíu. Cataluña sí que ta más cerca del meridián de Berlín que del de Llondres. Hai quien piensa que sedría razonable qu'España tuviera dos husos horarios, el británicu en Galicia, Asturies, Llión, Estremaúra y l'Andalucía bética, además de Canaries, y nel restu'l continental. Esa propuesta fíxola nel so día Beiras, del BNG, con sobrada razón, pero que, como yera d'esperar, calificáronla como un disparate nacionalista. Equí sí que furrula esa Españaza de Monchi Álvarez, Españistán dicen otros y Carpetovetonia suelo decir yo. Políticos y medios salieron como tropa ensín capitán contra los que quieren "dividir España".

A.F.: Nos prósimos díes volveremos a falar de la racionalización d'horarios, que va más allá del asuntu de los cambios estacionales que güei tratamos con David Rivas, al que damos les gracies pol so analís.

M.A.: Un abrazu.

D.M.R.: Talluéu, amigos.