Cuadonga: 1.300 años
(El Fielato)
Esti añu cúmplense 1.300 años de la batalla de Cuadonga y, como ye normal ente los cosmopaletos, paez qu'el principal obxetivu ye demostrar, con razonamientos xeográficos y militares, qu'aquello fuera como muncho una escaramuza, una engarradiella de cuatru pa cuatru como les clásiques de les fiestes de práu. Ye evidente que nos escobios y beyos d'eses tierres altes nun cabía un exércitu medianu y que, seguramente, a dengún xeneral, y menos a un árabe avezáu a combatir a campurrasu, se-y diba ocurrir metese naquel embudu. Pero hai dos custiones a tener en cuenta.
La primera, xeneral, ye que la mayor parte de lo que conocemos como grandes batalles de la dómina nunca fueron de miles de combatientes, sinón d'unes cuantes docenes, con poca caballería y ensín ardiluxos. Sacantes tres o cuatru batalles, los sieclos d'alfrentamientos ente cristianos y musulmanes na península ibérica nun vieron más que glorioses escaramuces mui bien cantaes épicamente munchos años dempués. La segunda custión ye que, conforme a la tradición popular, l'Auseva yera'l referente sacráu, pero la batalla entamó nes lladeres del Priena y finalizó nes bárcenes de los Seya y Pigüeña, nos llanos de Contranquil, onde sí cabíen exércitos más grandes y podía actuar la caballería, si ye que la hubo.
Dalgunes batalles, como otros fechos, tienen na historia una importancia muncho más grande de lo que significaron coyunturalmente. Cuadonga, l'amarrazuca de pueblu que mos quieren cuntar, fora una gran batalla y los sos tambores repilaron en toa Europa, anunciando qu'aquello de que los musulmanes yeran invencibles yera una lleenda, non una realidá.
Y tamién nesti aniversariu vuelve la vieya entruga: ¿quién yera Pelayo? Los medievalistes de tol mundiu dicen que, pesie a que dalgunos autores españoles, anclaos nun nacionalismu decimonónicu, afirmen que yera un visigothic nobleman, tóo indica que yera un asturian prince. Ye verdá que poco o cuásique nada se sabe de Pelayo, de nome romanu, Pelagius, que significa el que vien de la mar, colo que puede qu'esi nun fora'l so nome, sinón un apellativu. Podría ser espatariu d'un rei godu como Witiza y amigu de Rodrigo porque nel réxime feudal el vínculu yera personal, non étnicu. Pero paez complicao que fora visigodu y que, afuxendo de los árabes, buscara abellugu ente xente enemiga de los visigodos, non cristianizada na so mayoría, y que menos entá lu nomaran princeps. O yera de raigañu astur, lo más probable, o, cuando menos, taba casáu con una asturiana. Cuando nun hai prebes concluyentes, la historia, como toles ciencies, emplega la plausibilidá.
¿Y qué yera lo que defendíen aquellos asturianos en Cuadonga, en Contranquil o notru llugar? Paez evidente. Tratábase d'un pueblu que resistiera a toles invasiones dende'l sieclu I enantes de Cristo: romanos, godos y agora árabes. Pa ellos yera indiferente la raza, la relixón o la organización política. Yeran invasores de la so tierra y con eso abastaba pa oponese. ¿Dalguién puede creyer sensatamente qu'un pueblu de les tierres de Los Picos d'Europa, ente'l Piloña ya'l Deva, diba tar pensando en reconstruyir el reinu de Toledo? ¡Pero si seguramente nos actuales Parres o Amieva nun sabíen de Toledo nel sieclu XIX! ¿Diben, tamién, tar pensando nuna cruzada cuando nin tan siquier esistía esi conceptu?
Cuadonga ye'l berciu d'Asturies, un berciu míticu, como lo son tolos anicios de toles naciones d'Europa. Pero tien una diferencia con otros casos: nun ta na nebulosa, anque tea la so borrina, porque diera aniciu a un reinu, a una realidá política y social, a una nación con bases materiales, non namás que simbóliques. Podrán decir misa, nunca más apropiada la frase porque bien que la Ilesia vampirizó Cuadonga, pero la escaramuza, col abellugu de la diosa madre de la cueva, ye la cuna d'Asturies y asina lo saben los asturianos de toa condición. Nun creyo qu'alcuentren nes peñes del Auseva los sos referentes nin valencianos, nin andaluces, nin aragoneses.... Sicasí, colos asturianos puede que lo piensen dalgunos llioneses y dalgunos gallegos. Cuando el reinu se consolida de Cangues a Pravia y de Pravia a Uviéu, el restu la península pertenecía al emiratu, más lluéu califatu, de Córdoba.
.jpg)
