Cambiu climáticu
(El Fielato, esta selmana)
Ye verdá lo que dicen
dalgunos: siempres hebo cambiu climáticu, el clima va camudando dende los
orixes d’esti planeta nel que vivimos. Ye verdá, sí. Puede que parte de los
cambios que tamos viendo seyan evolución natural del nuesu ecosistema pero
l’aceleración de les coses ye llamativa. Ye posible que lo que llamamos “efectu
ivernaderu”, con mala definición, seya natural, pero, por un principiu de
prudencia, tenemos que tar sollertes. Sabemos yá que l’actividá humana, el
nuesu modelu productivu, ye l’ellementu fundamental d’esa aceleración del
cambiu.
Nun ye de nuevo, anque
agora ye más brutal. Les tablines d’Asurbanipal, que son del 612 enantes de
Cristo, más o menos, yá mos cuenten cómo una seca de sesenta años acabó col
imperiu asiriu, el más grande del Asia antigua dempués de la Babilonia de
Nabucodonosor. La falta d’augua acabara con aquel imperiu guerreru, dicen qu’el
más potente de la historia enantes de Roma.
Pero ye que tamién
l’imperiu romanu sucumbiera por un cambiu climáticu, una pequeña glaciación.
Los estudios más recientes falen de que los xérmenes asociaos a la baxada les
temperaturas foran muncho más mortíferos pa los romanos que les incursiones de
los bárbaros xermánicos y asiáticos. Con un imperiu mui urbanizáu, 75 miyones
de persones, la peste bubónica diezmara, más que diezmara, a la población. Esa
pequeña glaciación y la erupción volcánica del Etna y del Vesubiu, acabaron col
clima mediterrániu de la dómina. Nel imperiu sobrovivieran los de les
provincies atlántiques, los ástures ente ellos.
Más alló l’Atlánticu, no
que güei ye Guatemala, Hondures, El Salvador, Belice ya’l sur de Méxicu, dalgo
asemeyao pasara nel sieclu IX, no que se conoz como períodu final de la cultura
maya clásica. Tamos falando de seyes sieclos enantes de la llegada de los
europeos. Una seca de décades acabó col maíz y col augua potable. Los mayes,
que vivíen de la viesca seca en sociedaes urbanes, tuvieron que marchar haza la
viesca húmida en asociaciones tribales. Por eso los españoles tuvieron ventaxa
na conquista.
Vamos venir más al
presente. Napoleón abandonó Rusia en 1812 por varios motivos pero ún fora
porque n’ochobre, contra toa predicción, l’iviernu adelantró y Kutosov ya los
sos cosacos masacraron a los franceses. Esa mesma seronda los pintores
holandeses dexaron cuadros de xente patinando nes canales d’Amsterdam, cosa
impensable. Ye más, na primavera de 1811 el mariscal Ney escribe que tien
munchos problemes pa dominar Asturies, la “nación irreductible” (asina diz el
so asistente), porque hai más de mediu metru ñeve nos pasos del oriente, cosa
que confirma Leclerc cuando fala de Payares y Dupont cuando fala de Ventana.
Y agora, que tóo ta peor,
que sabemos más, que tenemos más tecnoloxía, ¿cómo ye posible qu’haiga
políticos que digan que nun pasa nada?