Xunta de Repunantes, Piarnu, 24 de mayu de 2024
Amigos, correlixonarios, compadres y repunantes tóos:
Llevábamos munchu tiempu ensín cellebrar un congresu, anque esto de güei ye un acoceyamientu de petit comité, posiblemente porque la pandemia consiguiera tresformar munchos usos sociales, incluso ente repunantes, modificando munches rutines. Pero, en fin, equí tamos aconceyaos otra vuelta, dao que, afortunadamente, somos tan repunantes que nin tansiquier el bichu aquel mos diera demasiaos quebraderos de cabeza. Equí siguen los repunantes que nin se vacunaron nin tomaron en serio aquello, y tamién siguen los otros, que nun paecen tener un chip implantáu nin síntomes d'infertilidá, o eso piensen. Caro que igual lo piensen porque'l chip-ys lo ordena. Anque l'illustre repunante Xuan Nel Gonzali, últimu repunante d'honor. asegura que pal 2025 cuásique tolos vacunaos van tar dando xeranios.
Nesti tiempu presenciamos un notable retrocesu del caráuter repunante de los asturianos. Ya empezamos a comer cualisquier cosa que mos echen. Llevamos baillando tres o cuatro músiques ensín sacar el palu de romería nin medilu nos llombos de dalgún qu'otru manguán.
Recuérdome de cuando yera neñu d'un baille que se llamaba la yenka. Tocábenlo muncho nos merenderos y nes fiestes de práu, y por eso yo baillábalo anque tuviera unos siete años. Supongo que los más mozos tamién lu conocen: "izquierda, izquierda, derecha, derecha, adelante, atrás, un, dos, tres". Dabes tres saltinos y quedabes nel mesmu sitiu.
Agora ta de moda otra vuelta pero cambiáron-y'l nome, Anguaño yá nun ye la yenka, sinón la oficialidá. Hai poco más d'un añu un entusiasta presidente, franciendo cola tradición glotocida socialista, plantegó una oficialidá amable. Ata munchos ente nós creyeron na posibilidá, por más que siempres fuimos más partidarios d'una oficialidá repunante, que pudiera ser incluso una oficialidá antipática. porque l'amabilidá ye una virtú que yo, personalmente, valoro muncho, pero que la pita seya amable col raposu, l'ucrañanu col rusu o'l falante minorizáu col falante que lu marxina nun lo teo yo mui claro. Pero, vaya, aceutemos pol bien común poner al chopped dalgo del pan de los que comen xamón, qu'esi yera'l programa amosáu nel parllamentu.
Esquierda, esquierda. El presidente Barbón sumó y vio que podía tener mayoría: al PSOE diba sumase Podemos ya Izquierda Unida, faltándoi un votu que bien podría venir de Foro. Como nel rellatu del Xénesis, el presidente miró y vio que yera bono. ¡Gran gayola y voladores ente los partidarios de la oficialidá! Dende l'Academia a los escolinos había muncho fe y muncho esperanza, mientres poníen cirios pa remover el corazón del llexislativu pa que ficieran la caridá. Ye verdá que dalgunos de los más reputaos repunantes, y nun miro a naide, nun les teníen toes consigo. La frase yera: "dalgo pasará". Y pasó.
Drecha, drecha. Foro mareó la perdiz durante díes y selmanes. Nun podía decir que non pero tampoco que sí. Ye'l problema de nun tener programa pa práuticamente nada. Cuando Vox sacó un cartelu soviéticu con frai Barbón y'l padre Pumares besándose al mou torniellu, incluso dalgún repunante d'estriuta observancia pensó: "yá ta, si a min me saquen un cartelu como esi, anque namás seya que por encabrone, doi esi votu que falta". Pero non, nun pasó nin eso. Foro punxo como condiciones pa votar la oficialidá la rebaxa'l IRPF y del IVA de los pañales, el soterramientu del Narcea y qu'el Sporting xubiera a Primera.
Allantre y atrás. Con un PSOE glotocida qu'agora cambiaba la so posición y con un Foro que nunca tuvo posición en nada, nun diba ser menos Izquierda Unida. Y, puestos a ello, tamién cambiara de posición. Aceutaben la oficialidá, como veníen diciendo dende tiempu atrás, pero condicionábenlo a subir el IRPF a los ricos, el soterramientu del Seya y que fuera equipu de Primera l'Oviedo.
Un, dos, tres. Los socialistes taben felices: taben poniéndo-yslo a güevu. Ellos, a los que nunca-ys preocupó la oficialidá, nin amable nin antipática, quedaben como Dios nuna tenada: taben pol asuntu pero los otros torgaron la oficialidá. Y un añu dempués vuelven cola oficialidá, llevándola a la Xunta Xeneral cuando yá nun tienen mayoría posible. A esti respeutu, Izquierda Unida diz que ye una patochada y Foro que meyor Barbón se aclaraba. ¡Pero si Barbón tienlo mui claro y sabe perfeutamente lo que ta faciendo! Los que nun saben lo que faen son los otros, que yá deben tar buscando dalguna transacional como, por exemplu, soterrar el Navia, poner un tributu especial a les madreñes y que seya l'Avilés el que xuba a Primera. Puede qu'incluso'l Partido Popular vote a favor de la oficialidá a cambio de que los diputaos socialistes por Asturies pasen al grupu mistu del Congresu, sofiten una moción de censura a Sánchez y pelegrinen a Cuelgamuros.
Dimos los tres saltinos y yá tamos onde tábamos. Esto ye como lo de Palestina: pasaron años y años, los argumentos fueron de toa triba, nuevos, vieyos y recurrentes. Agora reconocen al estáu palestín, xustamente agora, cuando esi estáu nun esiste y'l país ye irreconocible y va camín de ser un solar en poco tiempu. La oficialidá acabará llegando, pero van esperar a que naide nun fale asturiano y a qu'el país seya un parque temáticu pa turistes, que nello yá tan trabayando. Y en cincuenta años el discursu será: "¡si equí siempres se faló inglés, vasco y madrilán!". Y volverá'l debate la oficialidá: "¡euskara da Asturiasko hizkuntza!".
Yá yera yo mayor cuando apaeciera otru baille, el bimbó. "Bailemos el bimbó, que está causando sensación". Tamién taba mui presente nes fiestes de práu. Y agora vuelve, pero non como el bimbó, sinón como l'ave. Por fin Asturies dexa atrás la so incomunicación histórica. Tábamos sin comunicación col mundiu. Caro que pa l'Asturies sensata y pensante, ¿suena de dalgo'l conceutu?, el mundiu ye Madrid y la comunicación ye que vengan en tropel turistes del llugarón.
Asturies nunca tuvo incomunicada y forma parte del mundiu dende la edá'l bronce. como poco. Cobre procedente d'Asturies alcontramos, y en bona cantidá, ata nes tierres más al norte de les islles britániques. La mar ye la gran vía de comunicación dende hai miles d'años. Y asina siguió siendo durante tola historia, col procesu d'emigración a les Amériques del XIX y XX y col comerciu con Inglaterra. Como escribiera Colón, "la mar dará a cada home una nuea esperanza, como'l durmir da suaños". Tampoco tuviéramos incomunicaos per tierra. Dende los tiempos del reinu asturianu y, más entá, col camín de Compostela, el trasiegu de persones, mercancíes, cultures, idées..., fuera grande y constante. Son precisamente los corredores que tan paralizaos n'Asturies, mesmo per tierra que per mar.
Ye más: tampoco tábamos incomunicaos con Madrid. ¿Cómo puede ser dalguién tan papanates y cosmopaletu pa decir que l'ave mete a Asturies na historia? Cola meseta y, polo tanto, con Madrid, hai carretera desde'l XVIII, autovía dende hai más de trenta años; ferrocarril dende'l XIX; varios vuelos diarios; autobuses cada dos hores... ¿Eso ye incomunicación? La incomunicación ye la qu'hai cuando un ciclista tarda menos en viaxar de Ribadeo a Xixón que'el tren, qu'esi mesmu tren eche más d'una hora ente Xixón y Avilés, que decenes de miles de persones nun tean más posibilidá de movilidá qu'el coche particular.
Yo soi dende hai muncho ún de los repunantes a los que nun-ys gusta l'ave y que siempres plantegaron una velocidá alta pero non l'alta velocidá, que son coses estremaes. Munches vegaes paecía l'unicu, a lo menos ente los economistes. Ye verdá que pensaba como yo, o yo como elli, un falanxista como Velarde. Amás, tolos cálculos se faen d'una mesma manera: l'ave con Madrid va traer turismu y nómades dixitales, atrayíos pol abellugu climáticu. ¡Caro que tamién hai que tener un Mundial, desfiles militares, feries d'abril, coros rocieros, toros...! ¿Pues pa qué queremos l'ave si podemos dir a Piloña o a Llaviana envede a Andalucía? ¿Tardarán muncho en cellebrar san Isidro con chotis, mantones y gorres de cuadros? Nun daré más idees porque hai alcaldes y hosteleros capaces de cualisquier cosa. Tovía me recuerdo d'aquella moda de facer concursos de destrozar taces de retrete a mazazos, que se retrasmitíen na televisión pública autonómica.
Esto enllaza con otra de les canciones emblemátiques d'Españistán, Macarena: "dale a tu cuerpo alegría, Macarena, que tu cuerpo es pa darle alegría y cosas buenas". Música digna de Debusy y lletra digna de Leonard Cohen.
Y escaecen, los mui inorantes, que l'ave nun sólo trae xente, turistes, sinón que tamién lo lleva, emigrantes. La diferencia ente un madrilanu y un asturianu que tan nel puertu Payares ye que ún vien de vacaciones y otru marcha a buscar trabayu. Ún dexa renta, más bien poco, durante unos días y l'otru va crear bayura lloñe de casa. Si un mozu puede tar n'Asturies en dos hores y media, ¿por qué nun va marchar pa Madrid y seguir saliendo colos amigos de siempres nos fines de selmana? Eso sí, ata que canse o case.
A un tiempu, alcontramos otra canción d'aquellos gloriosos años, la de Bellotero pop, "quito los zapatos, quito la chaqueta y me desbelloto en la discoteca", Equí que siguen quitándomos la boina pa ponemos un sombreru cordobés. Muncho más elegante, ¿aú vamos parar?. Nun me voi meter col cachopu porque nun quiero repetime tanto y tampoco colos rapitos de Castañón. Pero hai munches coses: las sardinillas, la crema de nécoras, los erizos de mar, la sidriña... Tamién asistimos a una persecución en toa regla de la u final de les pallabres, tando los bares y yá munches pescaderíes llenos de potarro, tiñoso, golondro, una triba de traducción a la llingua única, grándica y llíbrica. ¿Acabaremos comiendo lámparas?
¿Y lo de la sidra? Dempués d'aquella prohibición, que quedó en nada porque naide nun obedecía y la policía llocal facía la vista gorda, d'echar sidra na cai, como ficieron los ayuntamientos socialistes de Mieres y Xixón, la cosa sigue. Asina, a los festivales de sidra aplíquen-yos normes antibotellón, cuando lluéu promocionen la oktoberfest, de cerveza, que, como'l so nome indica, oktober-fest, cellébrase en Xixón a finales d'agostu y primeros de setiembre. Bono, Uviéu cellebra l'antroxu durante la cuaresma. ¡Debe ser que na heroica y benemérita gobiernen los anticatólicos! ¿Y qué decir d'esa conceyala d'Izquierda Unida que criticó qu'una copa deportiva tuviera la forma d'un vasu sidra porque eso promocionaba l'alcoholismu? ¿Ye que les copes que tienen forma de copa nun recuerden a la bébora? ¿Por qué siempres molesta la cosa cuándo se refier a la sidra?
Eso por nun falar de les fiestes de práu, acosaes por una normativa que trata a una comisión vecinal como si fuera una patronal hostelera? Bono, no, qu'Otea ye, con Alsa, la diseñadora, executora y beneficiaria del turismu y de les cites festives. ¡Y quexábamosmos d'Hunosa y Ensidesa! Nun me paez que tuvieran tantu poder como los hosteleros. Nun hai eventu importante organizáu pola alministración nel que nun haiga dalguién d'Otea. ¡Son como Víctor Belén y'l padre Ángel!
En fín, voi terminar porque paezme que va sentamos mal la cena. Entá hai esperanza. Entá Asturies puede tener futuru. ¿Conocen l'himnu de la infantería española? Pues vamos adautalu. "Y por vete temía y honrada, los tos fios xuntos dirán ata'l chigre; y al cayer de borrachera, ver flotar, airosa l'azul bandera; con esa misión postrera arguyosos cantarán. El to rellumu y gloria d'otros díes, la to celestial figura va volver, pues enta quédente los repunantes, que por saber faltar sabrán vencer".
