"O llantamos pumares en bon númberu o vamos tener serios problemes"

David Castañón: La verdá ye que ye alucinante lo que puede dar una bébora. Nun hai nada que tea de tanta autualidá como la sidra asturiano nin qu'ocupe tantes polemiquines y tantos titulares. Por eso préstame esti camín que vamos faciendo col profesor Rivas porque él siempre va poniéndomos les coses en contestu y daprendiéndomos la historia d'esta bebida pa qu'entendamos la importancia que tien pa la nuesa cultura. ¿Qué tal, cómo andamos?

David M. Rivas: Mui bien, como siempres.

D.C.: Ye lo que dicía. Yo nun atopo tantes polemiquines o titulares al rodiu'l vinu o la cerveza, nin equí nin notros sitios onde eses bébores tean más raigañu.

D.M.R.: Ye verdá. Los asturianos pueden pensar qu'en Baviera pase cola cerveza lo que pasa equí cola sidra. Si la xarra de cerveza sube cincuenta céntimos la prensa ponlo y hai debate nes cerveceríes, pero nun pasen díes y díes con polémica, artículos, columnes, debates na radio... Tampoco ellí, nin nes vinícoles Borgoña o Emilia sal un representante políticu armando un cafarnaún porque se dé una copa nun premiu. Eso sólo pasa equí, onde una conceyala ponse al monte porque un premiu deportivu ye un troféu con forma de vasu sidra y eso incita al alcoholismu. Eses patochaes sólo pasen equí. Tamién ye verdá que la calidá de los nuesos políticos y xestores ye la que ye. Ye xente atrabiliario qu'anda siempres buscando tonteríes y sacando les coses de madre. La copa fubolística d'Europa y la del Mundiu ye eso, una copa, que la suelen llenar de xampán y beben tóos o meten la cabeza nella, como pasa nel Tour y en toles competiciones de tolos deportes.

D.C.: Ye'l premiu más universal.

D.M.R.: La copa y'l vasu tienen un caráuter simbólicu mui antigu y mui xeneralizáu. Por dir a la nuesa tradición, na cultura celta, cuando un home yera elleváu al tronu, non tantu coronáu como unxíu y alzáu, recibía d'una moza un vasu que contenía cerveza, sidra o hidromiel. Yera un símbolu de soberanía. El cristianismu garró esa tradición y fizo del cálice, de la copa, del grial, un símbolu de poder. Chrétien de Troyes, na so obra Perceval, desplícalo perbien, porque'l grial ye un vasu grande, representáu como una copa pero tamién como una bandexa de munchu fondu y como un vasu mui apaecíu al nuesu de sidra. Trátase d'una cristianización del calderu de los celtes, el que vemos, precisamente, en Xixón, onde taben los cilúrnigos, nome qu'en llingua celta significa caldereros. Pero tóo esto ye demasiao complicao y demasiao culto pa los nuesos políticos.

D.C.: ¡Cuánto daprendemos! La conceyala dixo que se quexaron los mesmos deportistes. Nun sé. Pero nun la viera reburdiar cuando bebíes gasificaes y enerxétiques, cargaes de zucre y cafeína, patrocinen otres comperticiones, nin porque les medayes tuvieren feches con metales de países con gran esplotación llaboral. Namás que reburdien cuando la cosa tien que ver cola sidra.

D.M.R.: Esi ye un mal endémicu d'Asturies y yo, que cuásique tol mundiu sabe cómo pienso políticamente, llamento decilo, pero ye que tien particular inquina histórica a la sidra la esquierda. Cuando falo d'histórica refiérome de los sesenta pacá.

D.C.: ¿Y eso por qué?  

D.M.R.: Nun sé. 

D.C.: ¿Pol choque del internacionalismu cola identidá?

D.M.R.: L'internacionalismu nun tien nada que ver con dexar de beber sidra. Puedes ser internacionalista y beber sidra, como puedes beber tamién xinebra, anís y benedictine. Supongo que pa entrar nel PCE nel añu cincuenta nun obligaben a la xente a beber vodka. Beberíen lo que teníen y yera propio de la so tierra, de manera que los comunistes asturianos bebíen sidra como los comunistes manchegos bebíen vinu. Nun veo yo a la Pasionaria ordenando a la militancia beber vodka ruso o ron cubano. Aquella xente yera  serio y una patochada como esta de la que falamos nun-ys cabría na cabeza. Falando con menos coña, yo pienso que responde a la suma de dos coses: un complexu d'inferioridá y una descomamada falta de cultura. Ye cosa de cosmopaletos, qu'abundaron na esquierda asturiana. Agora les coses tan cambiando. Toi por asegurar que los compañeros d'esta muyer de la fatada nun la respalden. Yo nun creyo qu'Izquierda Unida aplauda esa patochada.

D.C.: Esperemos que quede n'anéudota.

D.M.R.: Va quedar neso. Pero ye conveniente qu'estes anéudotes se recuerden cuando lleguen otres elleiciones municipales, y que lo faiga la organización en custión y los votantes si esta muyer se vuelve a presentar.  

D.C.: ¡Hehehe...! Nun voi añadir más nada. Sí que tenemos bones noticies sobro la sidra de denominación.

D.M.R.: Nes últimes selmanes tenemos dos noticies en cuantes a la sidra de denominación. Una ye regular y otra ye mala. La regular ye qu'en 2023 vendiéronse cuásique cuatro miyones y mediu de botelles de sidra con denominación, que ye una cifra mui a considerar. Pero ye que la collecha ye la del 2022, añu de poca collecha pola vecería. Si la tendencia continuara, esti 2024 debería ser espeutacular. L'añu 2023 apuntaba a collechona pero la seca, les pedriscaes y la irregularidá de les lluvies acabaron por damos una collecha escosa, non tan baxa como nun añu par pero mui reducía. Amás, les ventes de 2023 fuera d'un 15 por cientu menos que les de 2022, la collecha d'un impar como 2021, teóricamente bona. Eso puede ser un síntoma de que dalgo va mal. Los datos son mui bonos, la sidra de denominación medra y la xente paga un poco más porque yá la prefier, pero queden en regulares porque los problemes climáticos tan empezando a notase. La noticia mala ye que tenemos poca mazana. Llantárase muncho nos años ochenta, que son los árboles que dieren bones colleches nes dos primeres décades d'esti sieglu, pero que van avieyando. La vida útile d'un pumar anda polos 35 años, igual dalgo más gracies a la teunoloxía agronómica. Pero tamos na frontera. Si nun volvemos a campañes como les de los ochenta y primeros noventa podemos tener serios problemes. Y equí volvemos a lo que yá comentamos otres vegaes: si seguimos perdiendo población nes parroquies, vamos mui mal. Los que rexeneraron la pumarada nos ochenta son persones de la mio edá, xente que vio a los fíos marchar de l'aldea. Ta mal l'asuntu del reemplazu. Podríamos solucionalo con grandes llagareros que concentren tierres y les trabayen industrialmente con manu d'obra ayena al mundiu rural y mecanización, al estilu de Normandía. Igual salvaríamos la sidra pero non la cultura sidrera nin, con ella, la cultura asturiana, porque camudaría'l paisax y les rellaciones sociales. A lo meyor ye la solución, como lo fizo'l seutor vinícola, que fue a un mercáu homoxeneizáu y, evidentemente, calteniéndose les bodeguines caseres. Eso sí, el ritual quedaría pa llugares mui glamurosos onde echadores mui bien pagaos caltengan la tradición.

D.C.: L'otru día Carlos Rubiera dicía qu'Asturies ye ún de los pocos sitios que tien una industra, la sidrera, desendolcada, con productu de cercanía, y onde nun se curia la materia prima. Y dicía dalgo que vusté lleva diciendo dende hai tiempu, que ye mester un plan a venticincu años p'afitar esi futuru pa la sidra y pa que la sidra seya de mazana asturiana.

D.M.R.: Hai que facer esi plan y, amás, introduciendo parámetros de cambiu climáticu nel modelu, si ye que n'Asturies empresarios y alministración trabayen con modelos prospeutivos, porque, viendo lo visto, tóo paecen ocurrencies en función de si vienen perres de Bruxelles Lo del seutor, como vusté dicía, ye pa estudialo. Yo ponía'l casu la sidra en clase, na universidá, como una anomalía, como una rara esceición, dientro de la economía industrial y la economía de la llocalización. Los alumnos, que yeren de Madrid y que-ys cayía lo de la sidra basatante lloñe, entrugaben muncho. Si salimos de lo pequeño, si tomamos el mercáu mundial de la sidra, Asturies ye la única productora de sidra nel reinu d'España. Producimos más del noventa por cientu'l total. Y dientro la produición mundial somo los primeros en sidra natural. Pero ye que, amás, ente'l 90 y'l 95 por cientu d'esa sidra natural que producimos consumímoslo nosotros mesmos, ye mercáu interior. Y resulta que tenemos que traer mazana de fuera. Pero ye que tamién importamos les botelles y los vasos, anque son singulares y sólo emplegaos pa la sidra asturiano. Lo de los corchos puede entendese que seyan de fuera porque la sufrera nun ye mui abondosa n'Asturies, un "quercus" que más bien se conoz col nome occidental de "sufreira" porque les mases, normalmente relictes, tan nel suroccidente, onde'l clima tien asemeyances col estremeñu o col del interior portugués, onde ta la mayor produición del mundiu. De toles formes, el corchu de güei ye de conglomerao, de materies mecíes, colo que podía haber dalguna fábrica anque nun haiga sufreres. El casu ye que lo de la sidra asturiano ye un casu únicu porque contradiz toles principios de la economía agraria, de la economía industrial y de la economía de la llocalización. Pero tampoco ye d'estrañar na estructura económica actual. Mire sinón lo que ta pasando: mientres les empreses europées fabriquen ropa de mala calidá y pocu valor añadíu en China, los chinos abren fábriques de coches n'Europa. Con tóo esto, empiezo a pensar que tolo que daprendí y gran parte de lo que conté na facultá nun val pa nada.

D.C.: ¡Hahaha...! ¿Será porque, al final, les perres embaxo manga pueden más que los resultaos a fin d'añu?

D.M.R.: Nun sé. Será mester esperar a les conclusiones d'una comisión del Senáu.

D.C.: ¡Hahaha...!

D.M.R.: Quédamos otra noticia sobro la sidra que, en principiu, ye bona, pero que yá veremos cómo se desenrrolla. La Unión Europea tomó la decisión hai unos menses de que se pudiere comercializar sidra con sólo un cincuenta por cientu de sidra dulce, de sidra natural, y que la otra metada pudieren ser concentraos. Eso dexa a la sidra asturiano nuna situación mui mala, porque la so base ye sidra dulce nun cien por cien. Cuando lleí la noticia quedeme perpreocupáu pero, dempués de pensalo un poco, ví qu'aquello igual daba p'atrás. ¿Por qué?: porque n'Europa hai otra sidra que tamién tien la mesma base de sidra dulce que la nuesa, la bretona. ¡Ai, amiguín!, Bruxelles taba amolando a Francia. Y tocar a Francia en política agrícola ye mui gordo. Total, qu'en custión de selmanes la Unión Europea cambiara de criteriu pa protexer a eses sidres tradicionales. Nos medios asturianos vimos la noticia como un gran trunfu propiu y si nun andabes avispáu paecía aquello un llogru de los llagareros y del gobiernu asturianu. ¡Nomenón!, fue, como nun cabía otra, una custión del gobiernu francés. Lo que queda por ver ye cómo se desenrolla l'asuntu porque, en principiu, la marcha atrás de la normativa ta pensada pa la sidra con denominación, lo que provocaría una situación insólita n'Asturies. Pero, en fin, de momentu ¡vive la France!

D.C.: Tu vas a cualisquier supermercáu de la zona turística española y ves estanteríes de cider, dao que la llexislación impide llamalo sidra porque igual ye un cincu por cientu sidra y lo demás concentraos varios. Pero con esi cambiu de la normativa europea podía llamase sidra, si non a esa del cincu por cientu sí que cuásique a tolo demás.

D.M.R.: Tamién ye verdá qu'esa bébora ye gasificao y práuticamente ta a mediu camín de los refrescos y les cerveces. La sidra fecha a base de concentrao ye una bona cosa en ciertos casos y situaciones. Por exemplu: tu viaxes en cualisquier llínia aéria británica, francesa, alemana o estaounidense y tienes esa sidra, como tienes cerveza, vinu o destilaos. Agora, por exemplu, tan mui de moda los gintonic y los cacharros con bourbon enllataos, pa evitar el vidriu, ¡que lo mesmo faes un atentáu yihadista col cascu rotu'l botellín...!

D.C.: ¡Hahaha...!

D.M.R.: Evidentemente, eso nun ye sidra. Pero bien podríen les compañíes españoles, les aéries pero tamién los alvia y los ave, tener sidra con base en concentraos, pero asturiano, o gallego o vasco, o fabricao en Murcia, porque beneficia al seutor. A mí paezme bien qu'una empresa enllate sidra gasificao que ye de concentraos, como tamién me paez bien si añade canela, pimienta, cereza o lo que seya. Soi partidariu de qu'el seutor abra fronteres en tolo posible, pero la sidra natural, seya d'echar o seya brut, nun se puede tocar, tien que proceder de sidra dulce al cien por cien. Eso ye dalgo sagrao.

D.C.: Va haber otru problema, del que seguramente falaremos más pausadamente, y ye que con estes nueves llexislaciones pueden llegar modes del mundiu vinícola, como los vinos naturales, o de garaje, que tamién tienen esi nome. Yá llegó esa idea de la sidra de garaje y, como equí nun tenemos oficialidá, acabaremos viendo etiquetes con esi nome. Y entós si que va haber que matar munchos gatinos.

D.M.R.: Puede que sí porque los asturianos, cuando mos ponemos a ello, somos los más fatos del mundiu. Y nun ye porque nun haiga oficialidá. Si l'asturiano fuera oficial la babayada llegaría igual porque dalguién lo copiaría y a naide-y puedes obligar, con oficialidá o ensín ella, a que ponga nuna etiqueta propia lo que tu-y digas. Pero paezme qu'eso va ser de difícile aceutación. Lo de garaje suena mui mal, mesmo pal vinu que pa cualisquier otru productu primariu. El garax remite a industria y a contaminación. ¿Dalguién consumiría un aceite de garax? Suena como a aceite de cigüeñal o a querosenu.

D.C.: Tamién podría entrar lo de sidra de parcela, pa falar d'una pumarada pequeña y un llagar pequeñu.

D.M.R.: Lo de parcela igual entra meyor, como cuayó nel vinu lo de pago. Pero nun sé. Eso de parcela suena a xalé. Y tamos nun momentu onde vende más lo natural, anque munches vegaes nun lo seya tanto. Pero igual.

D.C.: Ye que tamos nun intentu constante de sacar a la sidra del so vocabulariu, que ye l'asturianu. Nes marques alcontramos nomes n'asturiano pero les etiquetes y contraetiquetes van toes n'español, pudiendo dir nos dos idiomes perfeutamente.

D.M.R.: Como munchos vinos españoles tienen etiquetes n'español y n'inglés, y munchos caves tamién en catalán. Por eso yo, si vamos al monollinguismu defendo l'inglés o'l llatín. 

D.C.: ¡Hahaha...! O en chino.

D.MR.: Home, en chino diba ser muncho. Amás yo nun lo entendería. Pero yo nun teo problemes col inglés nin col llatín. Bono, ye que yo soi favorable a que la llingua oficial d'Europa fuera'l llatín. De fechu, formé parte d'una iniciativa de varies universidaes que llevó una propuesta a Bruxelles: el llatín oficial, cincu llingües de trabayu y toles d'Europa nos plenos.

D.C.: Ver a los diputaos españoles falar llatín n'Estrasburgu diba ser pa nota. Ellos, que tampoco falen bien l'español.

D.M.R.: Eso ye verdá. Los grandes contrarios al plurillingüismu n'España suelen falar sólo español y suelen, amás, falalo mal. Pero tamién hai xente culto ente ellos. Y siempres habrá dalgún de dreches educáu por cures que siguió cultivando les llingües clásiques, como yo, non por de dreches, sinón pol llatín. Anque nunca fui molancín.

D.C.: ¡Hahaha...!

D.M.R.: ¡Hehehe...! 

D.C.: ¿Seguimos con estes coses o pasamos a falar de l'actualidá?

D.M.R.: Como quiera, a min dame lo mesmo. Si llevamos cincuenta programes podemos llegar a los cien y quedaría tovía pa falar de la sidra y del mundiu.

D.C.: ¿Qué-y paecieron les elleiciones vasques?

D.M.R.: Hai delles coses importantes nel País Vascu y que quedó clariquino nestes elleiciones. Lo primero ye que ye un país normal, cuando, dende fuera, munchos quieren vendelo como una anormalidá. Ye un país normal nel qu'hai nacionalistes que son mayoría, como hai otros nos que son minoría y hai otros, ensín mirar a naide, onde hailos pero son marxinales. Pero hai una  custión que me llama muncho l'atención tres estes elleiciones: la consistencia que tienen los partíos políticos. Si mos damos cuenta, el PNV presentó a un puntu que nun conocía naide, nin fuera nin dientro'l país, el PSE fizo lo mesmo y Bildu lo mesmo, y caltuvieron la posición, anque fuera con variación de porcentax de votos. Son precisamente los partíos que tan al marxe de la vertebración d'Euskadi dende hai cincuenta años los que dependen de cares concretes y los que menos collechen nes urnes. Eso que vemos nel País Vascu nun lo vemos, por exemplu, en Cataluña. En Cataluña, incluso los partios más potentes (PSC, Esquerra, Junts) dependen pal trunfu de líderes mui consolidaos o mui mediáticos, como ye'l casu paradigmáticu de Puigdemont. Yo atribuyo esto, a lo menos en parte, a esa tradición peneuvista de que quien preside'l partíu nun ye candidatu a lehendakari. Y tamién a la so tradición comunalista, qu'eso sí que lo comparten colos asturianos pero ente nosotros desapaeciera en política cuando la transición. Yo maravíome col País Vascu. Gana una esquierda abertzale, como ye Bildu, el PSE mantiense y la drecha que gobierna ye una drecha un tanto rara nel contestu'l reinu. Son la comunidá con más fuelgues de toes, pero mui por delantre de les siguientes, que son Madrid y Asturies, y ye la que tién menos paru, menos probitú, más renta per cápita, salarios más altos y un llargu etcétera. Pero, vamos ver, esto de protestar, de salir a la cai, de votar partíos a la esquierda de la socialdemocracia, ¿de verdá que ye una torga pal crecimientu económicu? ¿Y nun dicen qu'el crecimientu económicu conlleva frecuentemente desequilibrios sociales?: pues Euskadi amuesa que non.

D.C.: Y la meyor política social.

D.M.R.: Neso van perdiendo puntos, anque siguen a la cabeza de les comunidaes autónomes. Tampoco son ayenos al cansanciu democráticu. Por eso Bildu sube y por eso insiste más n'asuntos sociales que nel soberanismu. A esti respeutu, falando a bote pronto porque, evidentemente, nin esmigayé los resultaos nin tampoco voi facelo, hai una custión importante. Bildu arrasa nos municipios onde hai más población mozo. Eso quier decir que nuna o dos décades el PNV puede tener un problema mui grave. Tamién lu puede tener el PSE, pero más el PNV.

D.C.: El PNV paez el partíu de los pas y Bildu'l de los fíos.

D.M.R.: Yá ye más de güelos y ñetos. La xeneración de los fíos, que ye la xeneración suya, Castañón, ye la que vivió los tiempos duros d'ETA, nun lláu y nel otru. Los güelos nun lo vieron venir y los ñetos nun lo vivieron. 

D.C.: A mín sospréndeme muncho que notres elleiciones de les comunidaes que van soles faénse estrapolaciones, considérense los resultaos como síntoma de lo que va venir nes xenerales, pero eso nun pasa coles elleiciones vasques. Hebo elleiciones en Galicia y la mayoría absoluta del PP lleva a debates públicos y discusiones parllamentaries de que Sánchez ta acabáu y de qu'el ciclu cambiara. En cambio, con Euskadi naide diz nada al respeutu.

D.M.R.: Puede que nun-ys interese, pero tamién ye porque lo tienen mui claro. Por exemplu, Feijoo sábelo bien y demostrolo: el PP ta cola matraca d'ETA un día sí y al otru tamién y na campaña vasca nun tocó la asuntu. Si nun llega ser la polémica dempués de la entrevista na radio d'Otxandiano, el tema nin sal. La sociedá vasca va asimilando el que ye pa ella un problema grave y dolorosu, unos meyor y otros peor, unos dieron los pasos necesarios y otros non. Personalmente creyo que Bildu debería ser más valiente y facer una conderga clara. Falo de Bildu en xeneral porque dientro hai munches corrientes y, eso sí, yo nun sé cuánto de fuerza real tien Sortu, el seutor más reaciu a camudar el discursu. Pero ehí ta la xente d'Amaiur, d'Eusko Alkartasuna...

D.C.: Seguramente la cara más visible pa la mayoría de xente que nun ye vasco ye Oskar Matute y tien una posición clara de conderga y reconciliación.

D.M.R.: Porque Matute vien d'Amaiur y siempres fue un pacifista.

D.C.: Lluéu hai otros que dan vueltes y vueltes y deberíen ser más claros.

D.M.R.: Bono, dexémoslo equí, porque van pensar que soi un espertu en Euskadi, van entamar a entrugame y voi meteme nun xardín. ¡Hehehe...!

D.C.: Quédamos mui poco tiempu. Pero creyo qu'hai un estudiu sobro los páxaros y les pumaraes asturianes del que sabe vusté dalgo.

D.M.R.: L'estudiu yo nun lu lleí. Vilu na prensa y entré na páxina web onde ta publicáu y miré un poco la metodoloxía y con más detalle les conclusiones. Trátase d'un estudiu de la Universidá d'Uviéu y del Conseyu Superior d'Investigaciones Científiques, paezme que financiáu pol gobiernu d'Asturies, nun me recuerdo agora pero pamidea que sí. L'estudiu determina que los páxaros que controlen les plagues de la pumarada y esparden los biltos de la mazana son unes mui concretes: la barbuda, el corbatín, el raitán, el malvís, el ñerbatu, el carbonerín, el tordu, la temblerina, el reyín... Son los páxaros que, más o menos, tolos asturianos conocen, igual con otros nomes porque los páxaros más comunes tienen munchos nomes, incluso dos o tres na mesma zona. Lo que me dexa esmolecíu d'esti estudiu ye que tóos estos páxaros, o la mayoría, añeren nos matos, y hai una práutica sistemática d'acabar colos matos. Me recuerdo d'un paisanu representante d'un pueblu qu'aspiraba a premiu Princesa argumentando como timbre d'honor que yá nun había matos. Aquel home taba diciendo que nun teníen páxaros, que machacaran la biodiversidá y que teníen los pumares ensín depredadores d'orugues que los parasiten. Pero lo d'esa parroquia nun ye único. Vas caminando o en coche pela carretera y ves que nun hai matos. Pues si desapaecen los matos desapaecen los páxaros que curien la pumarada, que controlen les plagues y esparden los biltos. Esto último nun ye mui importante porque la pumarada ye un cultivu y básase en llantar árboles de cincu-siete años o n'enxertar, pero lo de les plagues ye fundamental. Podemos acabar polinizando a manu, como yá pasa en China, por exemplu, porque nun hai abeyes, y metiendo insecticides porque nun tenemos controladores naturales de plagues.

D.C.: Vusté, vese nel so blogue y nel so facebook, siempres ta mui atentu a los tiempos de la naturaleza, observando la rodolada la so casa diariamente.

D.M.R.: Siempres observé a los páxaros. Por exemplu, acaba de llegar a la mio casería la temblerina, que vien de más allá del Sahara. Ye una de les especies más eficaces contra les plagues del pumar. Siempres, dende neñu, me gustó. Conozo mui bien a los mamíferos, distingo les sos fuelgues, si veo un cagayón normalmente sé de qu'animal ye. Lo mesmo me pasa colos páxaros: identifícolos con facilidá y a dalgunos reconózolos pol cantu, anque hai grandes imitadores. Tamién sé d'anfibios y reutiles. D'inseutos y aráunidos se poco, namás qu'un par d'arañes, tres o cuatru camparines, dalgún qu'otru escarabayu, saltapraos y grillos, abeyes y avispes... Pero lo que más m'interesen son los páxaros, non sólo por guapos y porque son los dinosaurios vivientes, sinón porque son un indicador de calidá ambiental. Amás, por frente a lo que la xente piensa, la mayor biodiversidá nun ta nos espacios d'alta montaña nin nos espacios más de viesca primixenia, sinón nesa frontera ente la tierra xabaz y la tierra humanizada. Por eso mio casa ye un bon sitiu, pesie a que l'ocalito ocupa bastante espaciu, pero na ribera drecha'l rigu, cuando yo vivo na esquierda, con mui poco ocalito y onde hai praos de siega, praos de diente y viesca autóctona.

D.C.: Güei l'actualidá pudo cola simboloxía, pero'l profesor Rivas ye a cargar l'actualidá de simboloxía. Un abrazu.

D.M.R.: Igualmente y un saludu a los oyentes.