"La mazana ye símbolu d'amor y de poder"

David Castañón: Ye momentu d'afondar nel conocimientu'l mundiu la sidra col profesor Rivas que, como yá saben, aparte de sidreru, ye un estudiosu que lleva munchos años faciendo trabayos, dando conferencies y escribiendo sobro ello, y viniendo a la radio pa que sepamos un poco más. Como yo digo siempres, cuanto más conozamos más valoraremos lo que ye la nuesa bébora y más esfrutaremos d'ella. ¿Qué tal, profesor?

David M. Rivas: Perfeutamente, amigu.

D.C.: Asina da gustu.

D.M.R.: ¿Pa qué voi decir otra cosa?

D.C.: Ya sé qu'insisto muncho. Igual los oyentes tan fartucos yá, pero ye que toi podre de tanto xente que se quexa por nada.

D.M.R.: Amás siempres hai que decir que tas bien, salvo que teas mal de verdá y atopes a un amigu que ye mélicu, qu'entós igual te soluciona daqué. Pero cuando das con un amigu que ye, nun sé, pongamos que funambulista, o con una amiga que ye inxeniera de telecomunicaciones, ¿pa qué los vas preocupar inútilmente? Y, per otru lláu, diciendo que tas bien, a los amigos allégreslos y a los enemigos fastídieslos. 

D.C.: ¡Perfeuto!  ¿De qué quier que falemos güei?

D.M.R.: Vamos entrar yá no que sería la parte mitolóxica, en delles ocasiones esotérica, de la mazana y de la sidra, fundamentalmente de la mazana. Dempués, nun par de programes, vamos ver cómo esi simbolismu, más o menos estriutamente y tamién con variantes mui propies, apaez nel casu concretu d'Asturies. Entraremos en dalgunes lliendes y cuentos de la tradición asturiana, yá non cuentos infantiles o cancionines, como víamos l'otru día, sinón les formes nuestres qu'entronquen colo qu'en simboloxía se conoz como la gran tradición.

D.C.: La gran tradición.

D.M.R.: Sí, veremos lliendes asturianes, dalgunes mui llocales, tanto qu'igual sólo tan recoyíes nuna zona mui pequeña, qu'enllacen colo que ye la cultura xeneral. Esa cultura ye, básicamente, la occidental, pero tamién hai formes asemeyaes o comunes con otres grandes rexones, como puede ser Asia y África. Ode nun hai esa tradición antigua ye n'América y Oceanía, aú llegara la mazana colos europeos. Anque, nostante, hai lliendes asemeyaes con otra fruta como protagonista, lo mesmo qu'el mitu de la serpiente emplumada de Centroamérica y Norteamérica presenta dalgunos rasgos comunes col cuélebre y col dragón. Primero vamos dir a lo xeneral, nun par de programes, o más porque como siempres salimos por cualisquiera rama d'esti pumar de Les Fartures... 

D.C.: Lo que dea de sí. Yá veremos cómo acaba la cosa. ¿Nun-y da la sensación de qu'esti tema que vamos tratar ye la gran asignatura pendiente n'Asturies y a lo meyor en xeneral? Paez ser que sabemos muncho más de les canciones, de los cuentos infantiles, pero poco d'esi conocimientu más ampliu, d'esa gran tradición, del esoterismu alrodiu la mazana.

D.M.R.: Equí tamos falando d'unes custiones que formen parte de la cultura clásica y seguramente dalgunos oyentes saben d'ello y unos cuantos conocerán dalgunes de les histories de les que vamos falar. Pero nun sé yo si la xente, en xeneral, sabe menos d'esto que de les canciones y los cuentos infantiles. Los mayores saben de les dos coses y los mozos igual saben más de lo clásico porque lo estudiaron y menos de lo popular porque nin lo vivieron nin-ys lo contaron. Pero, en fin, suponiendo que non tol mundiu sabe de filosofía, d'antropoloxía, d'historia antigua, de relixones comparaes... pues cabe pensar qu'igual son pocos los que sepan d'esta temática. Tamién sabrán d'ello los que sepan d'arte. Los mitos de la mazana tan mui presentes na pintura dende un principiu, como tamién na pintura que plasma la vida rural, como ye'l casu, precisamente d'Asturies. La mazana y la sidra na pintura asturiana ye tou un xéneru dende finales del XVIII ata mediaos del XX. Pero tol mundiu sabe coses: lo del pecáu orixinal, lo de la mazana d'Afrodita nel xuiciu de Paris, del que tol mundiu recordará'l cuadru de Rubens Les tres gracies, la mazana de Blancañeves... Otros munchos supieron d'estes coses na escuela hai munchos años y tiénenlo esceacío, pero puede que lo recuerden cuando lo sientan. Bono, si ye que lo vieron. Si son de dempués del bachilleratu vieyu, nun sé yo...

D.C.: ¡Tenía que soltala! ¡Hahaha...!

D.M.R.: Soi consciente dafechu de lo que digo. Yo nun comprendo cómo pudimos llegar a esti puntu nel que tamos. Nun soi un espertu en pedagoxía, anque paezme qu'esa disciplina nun tien paradigmes científicos nin consistencia metodolóxica. Los meyores pedagogos suelen ser los mayestros de primaria y los psicólogos. Amás, siempres diera clase na universidá, que ye mui distinto a la escuela y al institutu, y supongo que lo que yo estudié de neñu tamién tendría munchos defeutos, pero pa min yera mui difícile desplicar dalguna cosa en clase porque los mios alumnos nun contestualizaben nada, nin xeográfica, nin histórica nin culturalmente. Si nun conoces cómo se formó Europa históricamente, ¿cómo vas poder entender la realidá de la Unión Europea del presente? Si nun sabes cómo yera'l Mediterrániu ensín el canal de Suez, ¿cómo vas entender los imperios comerciales y políticos d'España, Portugal, Olanda ya Inglaterra, que son atlánticos? Por exemplu, esi asaltu a la memoria al qu'asistimos ye incomprensible. Ya sé que nun val pa nada saber la llista de los reis godos, pero tampoco debe ser mui útil saber les allineaciones de diez o doce equipos de fúbol, que son bastantes más nomes. D'una manera relixosa contábenmos que les potencialidaes del alma yeren la memoria, l'entendimientu y la voluntá. Pero eses tres categoríes pueden ser analizaes ensín necesidá de relixón. Pa que l'home pueda actuar, poner voluntá, tien primero qu'entender el mundiu; y pa entender tien primero que daprender y recordar lo daprendío. Y la secuencia ye un fluxu circular de causa-efeutu. Memorizar nun ye acumular coses como nun almacén, sinón peñerar y rechazar lo que nun ye útil. Naide se recuerda d'aú aparcó'l coche'l 17 d'abril de 1998, nin tansiquier ónde lu aparcó anteayer, salvo que pasara dalgo mui relevante, pero sí que sabe ónde lu aparcó hai dos hores. Pues pa otres coses tamién podemos educar a la nuesa memoria.

D.C.: Tamos yá nuna época na que tenemos en bolsu un aparatu que mos permite saber cualisquier cosa en minutos o incluso segundos. Cualisquier discusión de chigre yá nun la gana el qu'aparenta más firmeza sinón el que saca un móvil.

D.M.R.: Sí, pero eso val pa recordar quien metió el tercer gol de Brasil nun sé que día de nun sé qué Mundial. Si un inorante discute comigo sobro la crisis del 73 puede que me diga el día d'avientu concretu del discursu del presidente norteamericanu, porque yo puedo nun sabelo, pero difílemente me va discutir sobro la crisis enerxética y les sos consecuencies. Lo más que puede facer, como delles vegaes pasa nes redes, ye lleer la Wikipedia y contala. Tamién puedes apuntar tolos díes ónde aparques y en 2035 saber ónde lo ficiste güei pa venir a la emisora. ¿Y?

D.C.: Pero sirve pa que cualisquiera calle la boca al qu'enantes sabía más que naide porque yera indemostrable.

D.M.R.: Pero, repito, pa coses intrescendentes. Amás a min sácame de quiciu. Pásame col fúbol. Yo pal fúbol teo poca memoria. Sé lo que pasó pero igual cambio los años. Un casu. ¿Cuándo fichó Quini pol Barcelona?... Debió ser en tal añu porque taba yo en tal cursu... Non, fue esti otru porque fue cuando Migueli cambió d'equipu... Non, non, fue esti otru, ¿nun lo voi saber si fue cuando me casé?... Y la discusión acaba cuando un puntu que ta na barra saca'l móvil y te fastidia esi momentu tan divertíu. Yo cuando nun me recuerdo de dalgo doi vueltes y más vueles al asuntu, puede qu'un día enteru, forzando la memoria. Si alcuentro a dalguién que puede sabelo discútolo. ¡Home!, si ye importante y nun doi con ello, acabo recurriendo a la rede. Eso pásame col mio hermanu, sobro tóo nel fúbol, pero nun sacamos el móvil ata que yá nun tenemos más remediu. Él acierta más que yo. Ata me llega a decir que yo nun taba onde creyía que taba y suelo callar porque igual tien razón. La memoria ye mui cabrona y'l mio hermanu tamién.

D.C.: Hai vegaes que-y mete unes contestaciones nel Facebook que yo pienso: "menos mal que son familia".

D.M.R.: ¡Sí, ho! Ye bastante primariu y acaba quitando les coses porque dase cuenta que nun ta falando comigo sinón con doscientes persones. Pero ye bon rapaz, ye bon paisanu, y a min quierme muncho y tienme en gran consideración. L'asuntu ye que la memoria non namás qu'esborria, sinón que graba situaciones que tu nun viviste pero que conoces por sentiles munches vegaes o porque se paecen a otres que sí que viviste. Agora que tóo se puede facer falando cola máquina y, amás, traduciéndolo a cualisquier idioma, ¿pa qué daprender a lleer y a escribir, pa qué estudiar llingües? ¿Pa qué queremos escolarizar a los neños n'asturiano? Eso obliga a memorizar muncho. Con saber falar y conocer los iconos d'un tecláu, y dientro poco nin eso, carretera.

D.C.: Oseya, que la LOGSE, la ESO y eses coses non. ¿La EGB?

D.M.: Yo nun fui a EGB.

D.C.: ¿Tampoco?

D.M.R.: ¡Qué va, ho! Yo fice'l bachilleratu ellemental y'l bachilleratu superior. Lo que nun tuve fueron les reválides, nin tampoco PREU. Yá fice COU.

D.C.: La EGB ye del 78, me paez.

D.M.R.: Si fue nel 1978, taba yo en cuarto de facultá.   

D.C.: Yo sí fice COU. Lo que pasó colos años anteriores ye que yo soi de los primeros del plan y, sigún fueras a un centru o a otru, alcontrábeste con modelos distintos, unos más como'l modelu anterior y otros más en llínia cola nuea llei.

D.M.R.: Yo tuve en COU el segundu añu que yera mistu.

D.C.: Tuvo que ser un cambiu de vida.

D.M.R.: Fue tremendo. Tola vida sólo con neños, colos sos ritos y les sos formes de vivir ensín neñes y de repente apaecen. Tábamos asustaos. Polo xeneral, nes custiones de rellación social y sentimental taben muncho más desenrrollaes que nosotros y víamosles como más muyeres que a nosotros mesmos como paisanos. Queríamos comportamos bien, non a lo burro, que yera lo normal pa nosotros. ¡Nun díbamos tar peleando nel patiu o xugando al fúbol! Amás nosotros llevábamos años nun colexu de xesuites, coles rellaciones tan particulares que se daben, y elles veníen de colexos de monxes, onde nun había COU, coles sos rellaciones tamién peculiares.

D.C.: Les hormones, ¡curiao!

D.M.R.: Sí, pero taben más alteriaes les neurones.

D.C.: ¡Hahaha...! Pero lluéu saliéramos vusté un gran conquistador, que tóo hai que decilo.

D.M.R.: Nun me fue mal na vida nesi asuntu. ¡Y pa les fechures físiques que teo...! Xugué con dos ventaxes naquellos primeros años de shock: yo nun yera mui deportista, en fúbol un maderu, y prefería la biblioteca, colo que coincidía más frecuentemente coles compañeres, anque la mayoría miraba pa los más atléticos. La segunda ventaxa, anque tamién la teníen otros cuantos, ye que yo tenía moto.  

D.C.: ¡Ah, los trucos! Vamos entrar yá na simboloxía.

D.M.R.: Esti espaciu va tener vusté que caltenelu más años si quier que completemos lo que teníamos programao. La mazana ye, básicamente, un símbolu de fertilidá.

D:C:: Falando d'estes coses...  

D.M.R.: ¡Hehehe...! Especialmente cuando ye colorada, la mazana, ye un símbolu de l'amor. Ye la mazana d'Afrodita, Venus na cultura romana. Tamién, por ser práuticamente una esfera, anque nun ye una espera perfeuta, ye un símbolu de la vida y de la eternidá. Tóo ta lligao: la vida, el sexu, l'amor, la fertilidá, la eternidá. Hai otres frutes esfériques, dalgunes inclusive más perfeutes que la mazana, pero nun son de testura consistente, dalgo que ye importante pa cumplir colo anterior, porque representa la constancia. Per otru lláu ye un símbolu del dominiu sobro'l mundiu. De fechu, la diosa griega de la victoria, Niké, representábase siempres con una mazana na manu. Por cierto, agora, por eso de la marca de los playeros, la xente, cuando ve la pallabra nike pronuncia naik. Eso ye tremendo: el nome ye Niké y debe pronunciase niké, el de la diosa. La persona que propuso esi nome pa unes zapatielles deportives, de competición, sabía bien lo que taba faciendo.

D.C.: Escrito con k.

D.M.R.: Sí, con k y con tilde na e, anque yo viéralo en dalgunos testos tamién ensín tilde. Vien del griego clásico y, caro, non tolos estudiosos lo tornen de la mesma manera a les ediciones modernes. Y esa diosa taba asociada a la mazana. Tamién, como víamos l'otru día, munchos reis cristianos son representaos con una mazana na manu, especialmente los reis guerreros y conquistadores, y normalmente una mazana que ta rematada con una cruz, como ye'l casu de Carlomagno. Ye la mazana imperial. Pero ye qu'el dios Marte, el dios romanu de la guerra, tamién lleva una mazana rematada con una cruz.

D.C.: ¿Ah, sí?

D.M.R.: La cruz ye ún de los símbolos más antiguos y universales, porque ye mui fácile de dibuxar y de comprender. La cruz enllaza'l cielu y la tierra col palu vertical y l'oriente y l'occidente col palu horizontal. O, viéndolo d'otra manera, surde de la tierra y algama los cielos dempués de cruzase cola marcha solar. Por eso ye normal ver cruces, yá más ellaboraes, de la edá media pacá, que tienen al pie una calavera, enriba una corona, a un lláu una alfa y al otru una omega. Anque agora identifícase col cristianismu fundamentalmente, los cristianos nun lu asumieron como propiu n'esclusiva ata los sieglos IX o X. El primer símbolu qu'emplegaron fuera un pexe, dibuxau con dos curves mui cencielles que se cruzaben.

D.C.: Incluso marcaben espacios sagraos, como templos o tumbes.

D.M.: ¡Caro! Eso vese mui bien na película El cuerpu, protagonizada por Antonio Banderas. Nun ye mui bona pero dexa vese y fala d'eses coses. Y eso atribuise polo xeneral a que la pallabra pexe en griego ye ichtus y en mayúscules podría interpretase como Xesús Fíu Dios Salvador. Tamién hai otra interpretación, astrolóxica, porque la redención de Cristo cuerresponde cola era de Piscis. 

D.C.: ¡Qué coses se daprenden en Les Fartures!  

D.M.R.: Gracies, ente otres coses, a comprender dende una memoria bien engrasada y selleutiva.

D.C.: Taba por asegurar que diba vusté a facer una reflexón como esa.

D.M.R.: Ye que yá mos conocemos. Sigamos cola mazana. Na heráldica la mazana representa l'espíritu xixilante, atentu a tóo, el corazón fogosu, la valentía. N'Asturies hai unos cuantos escudos d'armes que tienen mazanes como muebles. Mueble ye'l nome que se-y da a la figura na heráldica. Pero na heráldica tamién la mazana incorpora el simbolismu clásicu, el de l'amor y la fertilidá, representando la teta, el senu femenín, Afrodita al fin y al cabu, y de lo que yá Salomón mos fala n'El cantar de los cantares. Por falar de personaxes conocíos, les armes de los Flórez de Somiedu, les del políticu y economista lliberal Flórez Estrada, son una muyer desnuda de mediu cuerpu parriba bañándose o pasando un rigu en campu de sangre. Campu ye el fondu y sangre ye bermeyo, la pasión y la fuerza, tamién el sacrificiu. Pues un sieglu más tarde, los Flores andaluces, apellíu que deriva de Flórez, el de la familia de Flores de Lemus, curiosamente otru gran economista, ye tamién en campu de sangre pero con dos círculos naranxa, color carne, les tetes, y tres barres n'azur. L'azur ye l'azul y representen l'augua. 

D.C.: Yera una censura simbólica.

D.M.R.: Non, non, nun ye eso. Los escudos antiguos son mui realistes y nellos identifiques mui bien lo que ye un aigla, un puñu, un xabaril, una mazana, una cabeza..., pero más cerca nel tiempu esquematizáronse. Por exemplu: comparemos l'escudu oficial d'Asturies de güei col de sieglos anteriores y veremos qu'el d'agora ye muncho más esquemáticu, menos recargáu, con menos prestancia posiblemente.

D.C.: ¿Y cuálu ye'l so escudu?

D.M.R.: El vieyu perdiérase cuando les carlistaes pero sabemos cómo yera. Hebo un xesuíta, Francisco Corteguera, que taba nel mio colexu y se dedicaba a eso y que ye'l que dibuxó los escudos de la Gran enciclopedia asturiana, que diera con ello. Na enciclopedia nun ta porque nun ye atribuyible a un apellíu concretu y'l criteriu editorial yera onomásticu, pero dibuxolu Berto Peña siguiendo los apuntes de Corteguera y conforme a los usos de la época y, nunes navidaes, regalómelu. Ye un escudu partíu. La parte d'arriba ye una torre d'oru en campu de gules y la d'abaxo un xabaril de sable en campu de plata. Oru ye mariello, gules ye verde, sable ye negro y plata ye blanco.

D.C.: Mui guapo.

D.M.R.: La heráldica ye mui interesante como disciplina auxiliar de la historia, como tamién lo ye la vexiloloxía. Asina como la heráldica ye l'estudiu de los escudos, la vexiloloxía ye l'estudiu de les banderes. Hai banderes mui conocíes, dalgunes con unos sieglos de vida, que tan mal feches, que nun siguen los cánones. Una d'elles ye la vasca y otra l'alemana. Falo de banderes vieyes de tradición europea, como les mesmes europées y les americanes, que toes siguen la norma menos eses dos. Lo de los países frutu de la descolonización dempués de les guerres mundiales o les vieyes pero d'otres tradiciones son otra cosa. La base ye que nun se puede xuntar color con color nin metal con metal. Los metales son l'oru y la plata. Ente dos colores siempres hai que poner un metal. La d'España, mesmo la monárquica que la republicana, lleva l'oru en medio; la portuguesa tien una tira de plata en medio de dos colores; la belga ye como l'alemana en vertical, pero col oru en medio, mientres que n'alemana xúntense colores... Inclusive dalguna bandera inventada hai tres díes y multicolor, como la de La Rioxa, ta bien fecha. Sólo una bandera xunta metales, la vaticana, porque lleva'l metal de les dos llaves del reinu los cielos, que nun dexen de ser el sol y la lluna. 

D.C.: ¡Como siempres! Son los que se pasen les normes pel forru.

D.M.R.: Pa eso representen a Dios nesti mundu probe, nesta valle de llárimes. ¡Home, va!

D.C.: Yo supe l'otru día qu'hai unos cures que tan rezando pa qu'esti papa vaiga a vese con el creador lo más pronto posible. Nun lu quieren.

D.M.R.: Esti Francisco ye más apreciáu polos de fuera que polos de dientro. Ye'l papa de los xentiles. Y vuelven sacar coses del arcón podre d'Europa. Dicen que ye masón, lo mesmo que dicen de Felipe VI los ultras españoles. De verdá que yo pensaba qu'eses coses yá yeren argumentos residuales y pa chistes.

D.C.: Bono, volvemos a lo de la masonería y'l comunismu.

D.M.R.: Pero lo del comunismu ye más pa oponelo a tomar cañes de cerveza nuna terraza madrilana, que ye la más alta esprexón de la llibertá. Por eso toi estrañáu: el comunismu sigue vivu, con más o menos fuerza, y'l socialismu podríen consideralu un comunismu moderáu o amatagáu. Nun olvidemos que comunista, a lo menos nominalmente, ye China. Pero la masonería ta integrada nunes sociedaes y ye marxinal notres. Salvo que consideremos a Putin como l'últimu bolchevique. Pero resulta que la mayoría d'ellos simpaticen con él.

D.C.: Nun toquemos a Putin, que mos puede cayer un bombazu.

D.M.R.: ¡Hahaha...! Pero, ¿nun tábamos equí pa lo de la mazana y la sidra? ¡Cómo somos!

D.C.: Ye que vusté da pa muncho. Por cierto, como vusté ye un esportinguista encamentáu y economista, nun quiero dexar pasar la ocasión: ¿qué opina de lo del Mundial en Xixón? ¿Van poné-ys un estadiu gratis a los mexicanos? ¿Cómo lo ve? 

D.M.R.: La verdá ye que nun teo una opinión mui formada porque nun conozo datu dengún. A min prestaríame que n'Asturies tuviéramos un Mundial, porque la cosa nun diba quedar llimitada a Xixón, y, posiblemente, diba ser un emburrie económicu de cierta importancia. Pero nun paez qu'haiga dengún plan. Nun sabemos nada de lo que se quier facer. De manu namás que sabemos una cosa: les condiciones. Pero ye que nada se diz de lo que ponen na mesa nin los propietarios del Sporting nin tampoco la FIFA. Tamos na inorancia total. Hai empreses que duldien de que Marruecos cumpla los plazos. Si eso pasara, llevaría, paez ser, a un aumentu de les ses en Portugal y España. Yo teo más confianza na capacidá de Marruecos de lo que tien la mayoría la xente. Ye un país con una potencialidá estraordinaria.

D.C.: Tamién tien menos proteición llaboral.

D.M.R.: Sí, yá lo sé, pero ye una de les baces d'estos países.

D.C.: Eso ye importante.

D.M.R.: Dempués de lo que vimos y sabemos, ¿vamos discutir eso? Si la FIFA cobra más, igual la final del Mundial se cellebra en Pekín, si ye que China paga lo que tien que pagar. Ye'l fúbol modernu.

D.C.: Xixón nun ye Pekin.

D.M.R.: Les infografíes son guapísimes, eso ye lo de siempres, anque la d'El Molinón recuérdame un aparcamientu californianu. Pero ye que ves que ponen edificios n'El Parque. ¿Cómo ye eso d'edificar nun parque, que tampoco ye mui grande, nuna zona verde d'una ciudá que tien mui poques zones verdes, que respira gracies a la mar y a una rodolada rural mui potente? Un ayuntamientu nun puede permitir eso.

D.C.: El Parque ye pequeñu.

D.M.R.: Pero ye que nun hai estudios. Mire, Castañón: lo del Mundial yá se sabía hai años. Tuvieran tiempu por desobra pa facer estudios d'impautu económicu, que nun son mui complicaos. Son unos modelinos econométricos de segundu de carrera. De manu hai que saber qué selleiciones van venir. Eso nun lo sabemos. Cuando'l Mundial del 82 Xixón tuvo gran beneficiu porque vino Alemaña. Namás. Poco supuso pa la ciudá la presencia de Chile, Austria y Alxeria. Por cierto, El Molinón pasara a la historia pola mayor vergoña d'un Mundial, aquel Alemaña-Austria. Si agora mos llegaren Brasil o Arxentina diba ser la del degorriu, con tolos hoteles llenos, pero de Xixón, d'Avilés, d'Uviéu y de los conceyos más cercanos. Pero si ye Guinea y Filipines les que vienen, nun ye lo mesmo. Los que traen perres son Brasil, Italia, Inglaterra y Arxentina, y tamién dalguna otra selleición europea. 

D.C.: Y España.

D.M.R.: Por supuestu, pero España va xugar en Sevilla porque ye lo suyo. Nunca vendrá a Asturies. Nun somos pueblu entusiasta, anque apostamos pola selleición española. Pero nun ye la cosa igual.

D.C.: Dicen les males llingües que vusté siempres va con Inglaterra.

D.M.R.: Ye que nun me perdonen eso de ser anglófilu. Pero nun ye verdá. Yo nel Mundial soi mui ecuánime y voi col que meyor xuega.

D.C.: Eso de pagar coles perres públiques y namás que con infografíes...

D.M.R.: Vamos ver, vuelvo a lo mesmo. Hai años que la FIFA diera'l Mundial a Marruecos, España y Portugal. ¿Cómo ye que l'ayuntamientu de Xixón o'l gobiernu d'Asturies nun encargara un estudiu? Si ye que nun ye mui difícile. Hai una montonera de profesores y estudiantes na universidá asturiana que lo pueden facer. Y son cuatru duros lo que costaría. Igual ye que nun pasaba la cosa pela peñera política. Mire, Castañón, cuando l'Oviedo salió al campu hai un par de selmanes nel partión ensín sofitar lo d' Asturies 2030 vilo claro. Nun diba facer el papelón l'Oviedo al tuntún y con Canteli, que ye un canchanchán, callau. Taba claro.

D.C.: El "partión".

D.M.R.: Ye cosa del profesor Pepe Alba, un gran amigu y un gran oviedista. El diz que derbi ye una moto. ¡Rediola!, una moto de la mio época de rapazón. La Derbi Fuego, con unos 70 centímetros cúbicos si la trucabes, llegaba a los 80 kilómetros por hora.

D.C.: ¿Hai muncho debate ente la xente?

D.M.R.: Nun lo sé. Últimamente voi poco a Xixón y cuando voi paro siempres nel mesmu par de sitios. Supongo que lu habrá. Los xixoniegos son de muncho discutir, especialmente sobre tonteríes llocales. Amás, el casu del fúbol ye mui particular. Siempres hai una corriente d'opinión antifubolística, mui enraigonada na esquierda por aquello del fúbol como pan y circu franquista. Cuando un ayuntamientu sofita financieramente al equipu emblemáticu de la ciudá, como ye l'Oviedo o ye'l Sporting, siempres salen los de "¿por qué dan perres a un equipu que ye priváu y non a Ferretería Naranco o a Casa Pin de la Chata"? ¡Home!, mester ye tener un poco de visión. El fúbol ye una cosa mui diferente y puede facese una valoración del impautu nel esporpolle d'una ciudá con facilidá, con un impautu que nun tien una ferretería o un chigre.

D.C.: L'alcaldesa de Xixón púsose firme.

D.M.R.: A mi paezme que Carmen Moriyón ye una persona con muncha intuición, igual non de gran conocimientu, pero les custiones económiques percíbeles bastante bien. Notres coses ye mui torpe y comunica bastante mal, pero nes coses de les perres, anque seguramente poco sabrá de finances, emplega bien el sentíu común. Y yo pienso que ta acertada nesti casu. Moriyón tien suficientes argumentos pa parar a Orlegui, que vino a facer negociu, cosa razonable y respetable, ¡faltaría más!, porque ella debe representar los intereses del conceyu, ¡faltaría más!   

D.C.: Como los políticos nuesos son tan cortoplacistes, ella tuvo'l so aquél de plantase.

D.M.R.: Pues l'acusación contra ella fuera precisamente la contraria: que taba hipotecando el futuru por un cortoplacismu elleitoral. ¿Y por qué elleitoral? Nun lo sé. Lo que sí que sé ye qu'el Mundial ta programáu dende hai años y que nes últimes elleiciones municipales dengún partíu llevaba nel programa pedir pa Xixón un sitiu nesi Mundial. ¡Dengún! ¡Coime!, si tanta visión a llargu plazu tienen y tan importante ye ser mundialista, ¿cómo ye que dengún d'ellos lo propusieron a los ciudadanos? Llegué a lleer coses como qu'esto recordaba'l pleitu ente apagadoristes y muselistes cuando l'ampliación del puertu Xixón... ¡a finales del XIX! L'alcaldesa sería, caro, antimuselista, prefiriendo una villina recoleta y provinciana a un gran puertu européu. Facer comparanza d'una ampliación d'El Molinón pa un Mundial cola política portuaria d'una nuea era industrial de carbón y fierru ye, como poco, una patochada. Ye más: la murnia esperiencia de les últimes décades dizmos que n'Asturies nada de lo que diba ser la hostia nel futuru fue verdá, pero sí qu'acabó tóo en fraudes, pelotazos, procesos xudiciales y ridículos espantosos, dende'l petromochu al avemochu, pasando pol mineromochu. Pero esta vegada, emplegando terminoloxía fubolera, la pelota, el pelotazu, saliera perriba'l llargueru y fue a la grada.  

D.C.: ¿Nun ye un estudiu difícile lo del impautu económicu del fúbol?

D.M.R.: Non. La base ye lo que se conoz como valoración continxente, un métodu económicu cuantitativu complicáu na forma pero mui cenciellu na interpretación. Una alumna mía aplicáralu pal casu de Xixón y del Sporting. Ella yera peruana y dába-y lo mesmo'l Sporting qu'el Liverpool. Pero yo, como direutor, invitela a casa, a Candanal, precisamente cuando la fiesta. Anduvo de romería. Tuvo con nosotros, cola mio familia, unos díes y díxome, al marchar na estación de tren, que nunca pensara que n'España diba conocer un pueblu como nosotros, tan diferente. Tovía güei seguimos en contautu.

D.C.: ¿Y qué valoró?

D.M.R.: Valoró la diferencia ente tar en Primera y Segunda. L'estudiu, que yera pa presentar como investigación de final de máster, nun yera esautamente una valoración continxente, sinón lo que sería una prospeición, un pasu previu a una valoración cuantitativa completa. Pero, caro, hai una diferencia básica colo que se faería pa un Mundial: na lliga fúbol sábese, con poques variaciones, qué equipos van tar en cada división. Esto ye, que se sabe si va venir a Xixón el Real Madrid o l'Andorra. La diferencia ye brutal. Por eso dedicar fondos a aidar al equipu ye una bona política, siempres que se faiga bien, caro, siempres que nun seya un despropósitu o que dalguién lo lleve a maconaes, como pasa dalgunes vegaes. Pero esa diferencia ente tar en Primera o Segunda velo tol mundiu, especialmente cuando mires pa los bares, los restoranes, los hoteles... ¿Qué interesa a Xixón? Pues que'el Sporting tea en Primera. ¿Qué interesa a Asturies? Pues que tea en Primera l'Oviedo tamién y que, amás del Real Madrid y l'Atlético de Madrid, tean en Primera Racing, Valladolid, Deportivo, Athletic, Lugo, Ferrol, Real Sociedad, Logroñés, Burgos, Ponferradina... Coincidir en categoría col Almería o col Tenerife importa poco. Inclusive importen poco Barcelona, Valencia, Sevilla...

D.C.: Lo de la simboloxía de la mazana va quedar pal programa siguiente.

D.M.R.: Ya lo vía venir.

D.C.: Tamién tamos pa esto. ¿O non? Como siempres, un abrazu grande.