L'avecuentu de la llechera

(El Fielato)

Tovía nun abrieren les víes del Ave y yá ta puestu en marcha'l cuentu la llechera. Sigún el conseyeru de fomentu, Alejandro Calvo, va llegase a 600.000 viaxeros al añu, lo que va suponer un impautu de 30 miyones d'euros. Será verdá, nun hai por qué duldialo, pero lo llamativo ye que nun conocemos dengún estudiu metodolóxicamente xustificáu que mos permita concluir qu'esi será l'impautu, nin otru mayor, nin otru menor. Y la metodoloxía ye cenciella, mui esperimentada en teoría económica de los servicios y particularmente nel tresporte: la valoración continxente. Nunca se fixera una valoración completa pal Ave n'España. ¿Por qué? Porque l'Ave ye un fin ensigo mesmu y mui particularmente na comunidá autónoma más provinciana, que ye Asturies.

La FADE va más allá qu'el mesmu gobiernu y diz que col Ave, si incrementamos la productividá, el PIB va engromecer nun 20 por cientu. ¿Pero son conscientes de lo que ye un 20 por cientu d'incrementu'l PIB? Sería tres veces el millagru alemán de los cincuenta, cuatru l'español de los sesenta y cincu 'l xaponés de los setenta. Pero ye que, amás, diz la patronal qu'eso pasaría si "medra la productividá". Pero, ¿si medra cuánto? ¿Tienen estudios proyeutivos? Pero si tolos datos mos lleven a que l'Ave va ser básicamente pal seutor turísticu, onde les economíes d'escala son tan irrelevantes que afleuten poco o nada a la productividá.

Eso sí, Gimena Llamedo, vicepresidenta'l gobiernu, vuelve a lo de siempres: que l'Ave va conseguir desestacionalizar el turismu. Pero vamos ver: el turismu nun se desestacionaliza por cambios nel modelu de tresporte, sinón por cambios na oferta que aprovechen el modelu de tresporte. Ye más: si nun hai una rede bien engrasada, da lo mesmo qué tren llegue a les estaciones. Que se llegue de Madrid a Uviéu en tres hores envede en cincu nun diz nada sobro desestacionalización. Si dende Uviéu nun hai trenes de cercaníes nin autobuses que te saquen del mesmu Uviéu, de Xixón, d'Avilés o de cuatru villes concretes, ¿qué más dará la cosa? ¿O ye que va haber más visitantes en Somiedu o en Colunga n'iviernu sólo porque los madrilanos tarden menos en llegar a Uviéu o a Xixón? El viaxeru d'Ave nun tien coche... ¿cómo va dir a Cangues d'Onís o a Castropol a les nueve la nueche o a les siete la mañana? Agora, si desestacionalizar ye que tolos madrilanos queden n'Uviéu y Xixón...

Diz tamién el gobiernu que los precios del tren van baxar un 66 por cientu. Nun sé de ónde saquen la cifra, tan grande y reonda, pero tolos estudios indiquen lo contrario. Dempués d'un períodu de rebaxes y ofertes, el preciu va subir, el númbero de trenes quedará nel mesmu, igual ún o dos más, que los Alvia d'agora, y desapaecerá la posibilidá de viaxar más barato. Tóo ye una confusio confusionum porque'l mesmu conseyeru Calvo decía unos díes enantes que l'Ave a Madrid, dempués d'una campaña de promoción, costará 90 euros. Hai dos o tres años yo fixe un cálculu mui perriba y llegué a la conclusión de qu'el preciu diba ponese nunos 120 euros. Igual nun sube a tanto, pero'l conseyeru apunta. Col Alvia, el tren normal, dempués de facer la variante, el viaxe costaría 50 euros de media. Esto ye, dempués de la variante, 50 euros por cuatru hores y media de viax n'Alvia y 100, pongamos, por tres y media n'Ave. ¡Un gran negociu!, ¿pero pa quién? La única reflexón coherente que lleí fuera la de José Manuel Zapico, secretariu de Comisiones Obreres: "ye un desatín impulsar inversiones públiques y que vengan cuatru amiguetes a facer negociu". Al tiempu. Y de pasu, destrozu ambiental y perda d'espaciu pal tren convencional.

Ye más, Adif yá comunicara que nun va seguir la política de poner trenes nocturnos como tan faciendo Italia, Austria, Francia y Alemaña, que permiten precios baxos y maximización de los antiguos espresos, mui eficaces y poco llesivos pa col mediu ambiente.

La saga del petromochu continua: muselmochu, mineromochu, museomochu, calatravamochu, mineromochu, hai poco amazonmochu y agora, ye de temer, avemochu.