Los llobos nun decidieron

(El Fielato)

Quieren facemos creer y, lo que ye peor, dalgunos ciudadanos danlo por bono, que les lleis que protexen al llobu determinaran los resultaos elleitotales nos conceyos rurales. El mesmu Barbón, tou un presidente, seguramente queriendo apuntase un tantu contra'l gobiernu central, diz qu'el PSOE perdiera nesos conceyos por esi motivu. De manu, pa entamar, los socialistes perdieran cuásique ventimil votos nel mundiu rural y en tolos conceyos, tamién naquellos que nun tienen llobos.

Pero, ¿ye que piensa Barbón, Diego Canga o quién seya, que los habitantes de los conceyos rurales somos tan fatos que votamos por una única razón? ¿Piensen que somos más bobos que los de les zones urbanes, que, muncho más cultos y preparaos, voten embaxo plantegamientos políticos complexos y sofisticaos, por frente a los de la boina que namás entendemos lo más ellemental o, inclusive, una única cosa?

Pues non. Nes fasteres rurales votamos por razones tan complexes como lo faen en cualisquier otru llugar. Lo que pasa ye que los nuesos políticos lleguen a les ciudaes, a Xixón, Avilés, Uviéu, últimamente mimen tamién bastante a Siero-Noreña-Llanera, y a les vieyes cuenques hulleres, y falen lo de siempres pa los de siempres, pa lo que son los sos clientes, los que permiten la fiesta de la democracia. Quedamos al marxe los rurales, los de la boina y que falamos raro. Nun somos filoetarres o perrofalutes pa unos nin fascistes pa otros. Tampoco tenemos la épica del feminismu, l'ecoloxismu, el patriotismu español, los indignaos... lo que seya importante pa cada partíu políticu. Tampoco somos mui vieyos nin mui mozos, nin ricos nin probes, nin grandes empresarios nin proletarios. Somos propietarios de la casería, tenemos poques deldes y menos necesidaes que los de les ciudaes. Dalgunos ata tenemos augua que nun controla l'ayuntamientu.

Lo malo ye que dacuando envez el votu rural ye decisivu, pero sigue siendo como si nun esistiere. La política especiálizárase tanto en minoríes, mui dignes, dende lluéu, que tolo que suena a pueblu, a comunidá, a país, acaba siendo dalgo irreal, como una pantasía de novela medieval. El mundiu rural vota, sí, pero nun saben lo que ye.

Ye complicao pedir el votu nos conceyos rurales prometiendo dir al cine por dos euros una vez a la selmana, porque nun hai sales; nin viaxar barato en tren por toa Europa, porque nun hai ferrocarril y poques vegaes autobuses; nin dir a la discoteca los martes por cincu euros, que podría ser la prósima ocurrencia.

Porque eses coses ye poles que dalgunos voten una cosa o la contraria, o la de más allá. Los del rural pagamos los mesmos impuestos y nun tenemos los mesmos servicios. Condérguenmos a ser sirvientes de turistes que van acabar obligando, col sofitu de la llei española, a quitar les pites, a matar les vaques y a nun tener gochos. Oblíguenmos a encerrar a los vieyos en casa porque les normes llaborales y fiscales españoles lleven al pieslle de los chigres y de los bares tiendes. Aplíquenmos unes lleis españoles absurdes urbanístiques y viales. Lleguen a considerar una guiada o una navaya como armes y un dellitu llevar la motosierra nel coche. De les escueles yá nun voi decir nada porque ¿pa qué?

Non, queridos ya inútiles representantes. Los llobos nun decidieran el votu de los ciudadanos de lo que vusteden llamen ales, esi oriente y esi occidente que namás qu'esisten un par de selmanes cada cuatru años. Non. Lo del llobu ye custión a analizar y a resolver lo meyor posible, sabiendo que ye complicao. Pero nun somos unos simplayos que nun tamos al altor de los superinformaos de la fastera metropolitana. Sabemos mui bien lo que queremos y de los drechos que tenemos como ciudadanos y que mos vienen negando dende siempres.

Por ciertu, puede qu'estes lletres seyan una crítica más bien al PSOE, pero si'l PP piensa que mos va a engañar permanentemente, que se-y vaiga quitando la idega.

Jodi Picoult, escritora neoyorquina con una escelente y amplia producción pesie a la so relativa mocedá, escribiera que "los llobos sabíen cuando yera'l momentu de dexar de buscar lo que perdieran, pa centrase por contra no que taba por venir".