"El mio ideal de les vacaciones ye nun facer nada"

Monchi Álvarez: Recomendar dende la radio, como si nun hubiere mañana, agora recomendaciones braniegues... Cris Puertas, ¿tovía equí?  

Cris Puertas: Ye que na redaición abúrrome. Nun puedo tar ellí metía.

M.A.: Pues siga equí. Nun hai problema. ¡David Rivas!, ¿qué tal?

David M. Rivas: Hola, bona tarde, que facía tiempu que nun falábamos, Monchi Álvarez.

M.A.: Llevábamos tiempu ensín charrar con David Rivas, que ye un personax esencial na historia contemporánia del país astur. Un humanista pero de los de... Primera División. Yá sabe, Puertas, que yo siempres busco exemplos fubolísticos. El profesor Rivas ye de Primera División y, si por min fuere, llegaría a presidente del Principáu. ¡Fíxese bien!

C.P.: ¡Por favor!

M.A.: David Rivas ye una de les mios debilidaes, confiésolo abiertamente. Güei va recomendar dalgo rellacionao col branu, col aroma'l branu. Yá tamos oliéndolo: tiempu de yerba, de dir a la yerba. Rivas: ¿que mos comenta?

D.M.R.: Pues mire, voi facer un eloxu de la pereza.

C.P.: ¡Mui bien!

M.A.: Por fín dalguién lo diz, que la pereza ye una cosa bona.

C.P.: ¡Gracies!

D.M.R.: Yá hai tiempu que lo fixo Paul Lafargue.

M.A.: ¿Y qué decía?

D.M.R.: Básicamente venía a desplicar, na obra El drechu a la pereza, de 1883, qu'el desendolcu capitalista llevaba a una crisis de sobroproducción y qu'entós lo revolucionario nun yera repartir meyor el trabayu sinón repartir meyor el tiempu llibre, dando más pesu a la máquina y reduciendo xornada llaboral al home. Ye una idega tremendamente actual. Lafargue ye un pensador más bien anarquista, anque se puso al serviciu de Marx por una razón mui simple: Marx yera'l so suegru.

M.A.: ¡Ai, la familia política! Vamos con esi eloxu de la pereza.

D.M.R.: Sí, sí, un eloxu de la pereza y un cantu a aquelles vacaciones ensín reló, aquella eternidá estival, na que tóo consitía en nun facer nada. Son les vacaciones en casa, o nel pueblu d'aú yera la familia, o, como muncho, desplazase unos cuantos kilómetros. Tol mundiu podía pagar eses vacaciones y, como diríamos agora, el nuesu impautu sobro'l mediu ambiente yera bien pequeñu, la nuesa güelga de carbonu mui débile. Quedabes en casa y dibes a la playa, al rigu, al monte, echabes la partía o la siesta dempués de comer, unes cerveces o unos culinos a media tarde... Y si tabes en pueblu facíes más o menos lo mesmo, andabes en bicicleta, dibes a pescar y ata trabayabes cola familia, dir a la yerba, como dicía Álvarez, pero aquello nun yera trabayar más que pa los mayores que vivíen d'ello. Agora hai que gastar muncho, dir a cadiós n'aviones o cruceros, amontonase tóos nun mesmu llugar, facer semeyes y videos muncho peores que lo que tenemos en cualisquier documental y ver ensín participar unes fiestes que son esautamente iguales en tolos sitios. Incluso los neños dexaron de tener vacaciones. Agora tienen programes d'actividaes, campamentos educativos, colonies pa daprender informática, viaxes a Ohio pa daprender inglés... Pa mi les vacaciones son, esautamente, nun facer nada. Pa min la mayor bayura que puede tener una persona ye poder perder el tiempu. 

M.A.: Arrascase la barriga.

DM.R. Sí, o arrascase lo que más-y preste a caún.

C.P.: Ye verdá. Hai quien acaba tan mayáu coles vacaciones que vuelve a casa a descansar.

D.M.R.: Pasa eso, sí. Hai pocos oficios tan duros y cansaos como'l de turista: xornaes interminables, palices n'autobús por estraes remotes, madrugones pa poner el parasol na playa... Ún de los grandes negocios de les vacaciones ye la venta d'apósitos pa les angüeñes y de ungüentos pa picadures. Eso por nun falar de les sangríes, les ensaladilles y les paelles, qu'enllenen les urxencies hospitalaries. Y al volver a casa mires l'estrautu bancariu con cara de salir de la celda pa facer la milla verde. En cambio tar en casina, o nel pueblu la familia, ensín facer nada de nada, tiráu nun práu interpretando la forma les nubes, una ye'l mapa de Francia, otra les narices d'una tía, la de más alló la virxe de Guadalupe...

C.P.: Ye un bon plan, sí.

D.M.R.: Pero, como la mayoría nun tien más remediu que garrar vacaciones en xunetu o agostu, pues tamién puede movese, pero que lo faiga poco y cerca, y evitar dalgunes coses. Por exemplu, nun dir a les playes del oriente, nun dir a Cuideiru, nun dir a Los llagos, nun dir a Les Piragües...

M.A.: Creyo que tenemos una llamada de Turismu d'Asturies entrugando por vusté, profesor.

D.M.R.: Pero si ye que tóos salimos ganando. Tu evites unes aglomeraciones y unos atascos tremendos, unes caravanes insoportables y coses d'esi tenor. Pero ye que los paisanos y los mesmos hosteleros van agradecételo. Nel branu yá lo cubren tóo colos turistes. En cambio, si lo que vas gastar esi día lo guardes pa un fin de selmana en febreru, en mayu, inclusive en setiembre, que ye un mes mui galanu, dexes ganancia cuando la demanda ye pequeña y contribuis a desestacionalizar el seutor, a procurar renta cuando más se necesita. Y, per otra banda, trátente meyor y pagues, polo xeneral, menos.

C.P.: Yo tuvi faciendo unos talleres en Cangues d'Onís y un día fui a Cuadonga y me recuerdo de la sensación, una sensación de que "esto ye mío". Yera un martes de marzu.

M.A.: Nun había naide. Nun taba nin la Santina.

C.P.: Fue una esperiencia maraviyosa. Yo recomiéndolo al que pueda facelo.

M.A.: ¡Oda a la pereza! ¡Cómo me gusta lo que diz Rivas!

D.M.R.: Pero ye que, si quies salir de viax en branu, puedes dir a Madrid. N'agostu Madrid ye una ciudá pa un garrapiellu de persones. Anque hai dalgo de turismu, normalmente de pasu pol centralismu de la rede de comunicaciones qu'entá tien España, la xente d'ellí escapó. Hai menos madrilanos qu'en Llanes o Ribeseya. 

C.P.: Eso ye verdá.

M.A.: Tan tóos n'Asturies. A partir de xunu vienen tóos. Tou Alcorcón ta equí.

D.M.R.: Decía Voltaire que lo guapo d'un viax nun ye descubrir coses rares sinón ver con nueos güeyos lo que yá conoces. Hai una esperiencia mui interesante, especialmente nes ciudaes, pal que viva en Xixón, Avilés, Uviéu, les zoner urbanes de les cuenques, que ye la d'apuntase a una ruta de les programaes pa turistas y ver la to propia ciudá. Descubres coses nes que nunca repararas.

C.P.: Eso ye verdá.

M.A.: Eso suel pasamos a cuasi tóos. Vamos a Llondres o a París y queremos ver tolos museos y resulta que nun conocemos los que tenemos al delláu de casa.

D.M.R.: Pero nun ye sólo un asuntu de museos. Tenemos los mesmos edificios de les cais, los portales, les escaleres de dalgunes cases del centru. Vas a París y vas mirando parriba viendo edificios, por exemplu, d'art decó, y resulta que Xixón ye una de les ciudades con más presencia d'esi estilu, por más que la piqueta municipal arruinó bastante la villa. Y, siguiendo en Xixón, ¿muncha xente dase cuenta d'un estilu qu'imita la construición mesoamericana precolombina y que alcontramos en tol centru burgués? ¿Cuántos avilesinos pasearon pela zona noble de La Carriona, que ye ún de los cementerios más impresionantes y cargaos de simbolismu?

M.A.: Caminamos pela nuesa ciudá ensín mirar cuasi nunca parriba.

D.M.R.: Pío Baroja, que yera un gruñon y un repunante con mui mala hostia, decía que, a partir d'una edá, nun hai que viaxar a dengún sitiu del que nun podamos volver andando.

C.P.: Voi tatuámelo.

M.A.: Una bona idega. A partir de cierta edá, por exemplu los cincuenta.

D.M.R.: Agora voi falar, pa poneme más positivu, de dos escursiones mui guapes, que, pa los que vivan nel centru, que son la mayoría, faese nel día o inclusive nuna mañana o una tarde. Los que vivan más cerca podrán dir andando, como recomienda Baroja, y los más alloñaos echarán una horina y media. Una ye una aldea que se llama Arbazal, que pertenez a la parroquia de Pueyes, nel conceyu de Villaviciosa. Ta nel camín de Compostela y fuera un centru importante como pasu ente Maliayo y Sariegu. El nome paez venir de "yerba", del llatín "herbam", que daría "yerbazal", un espaciu mui valoráu en tiempos nos que había pocos praos y lo más granible semábase con escanda, cebada, centén... Tamién, dempués de la siega, yera llugar frecuentáu por pastores, polo qu'acabó siendo vital nes alcordaes y repartos fronterizos ente les tierres de la mariña y les de la valle'l Nora. Pasear peles caleyes d'Arbazal ye una maraviya. Alcontramos un oratoriu baxomedieval, una antigua venta vinculada al monesteriu de Valdediós y una casa con un  preciosu reló de sol que tien, dicen, una función y un pasáu que ye un misteriu, porque nun ta nin datáu nin rexistráu en dengún documentu. La venta sí tien documentación precisa y ye una casona de 1640 que ye conocía como'l mesón de los cistercienses, con un escudu de la orde rellativamente bien conserváu na fachada. Ye un viax curtiu que puede completase con dir a Valdediós, onde sí que vamos topar más xente, y a la ilesia románica de San Andrés, con figures mui interesantes y que ta na cercana parroquia de Valdebárcena. Ya sé que van decime que yo siempres tiro pa Villaviciosa, pero de verdá que paga la pena.

C.P.: Nun quería decilo yo.

D.M.R.: El segundu destín ta nel occidente, pero tamién fácile de llegar y en poco tiempu dende'l centru'l país, y ye'l cementeriu moru de Barcia, nel conceyu de Valdés. Ye l'únicu cementeriu musulmán qu'hai en tol Cantábricu. Siempres lu llamaron cementeriu moru pero agora entamen llamalu cementeriu musulmán por aquello de la correición política y porque les pallabres cárgales el diablu, anque paez ser que yá nun carga los fusiles.

M.A.: Pero, ¿ta bien conserváu?, porque hai unos años taba mui mal, abandonáu y tomáu polos escayos. 

D.M.R.: Non, non. Ta mui mal conserváu. Paez ser que dalguién lu llimpia un poco dacuando en vez pero sigue nun estáu llamentable. Tamién hubo episodios de saqueos y profanaciones. Agora yá nun los hai, seguramente porque poco queda por robar, que nunca debió ser muncho porque los soldaos moros poco de valor llevaben encima. Pero sigue habiendo vandalismu, pintaes, grafitis... Esti cementeriu fízose por una orde del exércitu rebelde en 1936 pa albergar los cuerpos de los moros muertos nel frente d'Asturies. Yeran marroquinos y rifeños que desembarcaron en Galicia coles tropes de Franco y fueron caendo nel frente'l norte dende'l pasu l'Eo ata la toma d'Uviéu, más bien ata la batalla de L'Escampleru. 

M.A.: ¿Por qué decidieron poner el cementeriu en Barcia?

D.M.R.: Hai dos motivos. L'occidente asturianu cayera mui pronto nes manes de Franco pero la guerra taba pintando peor pa los fascistes de lo que pensaben. Los sublevaos nun yeren a unir l'exércitu'l sur col del norte y la situación del Cantábricu oriental, dende Irún a  Xixón, nun diba ser el paséu que fue, sacantes un par de focos, la campaña ente Castropol y L.luarca. Aquel territoriu yera seguru pa Franco y les sos fuerces mores. Per otru lláu, les tierres de Barcia yeran mayoritariamente comunales y de bon accesu, colo que les espropiaciones yeran más rápides.

M.A.: ¿Y cómo ye esi cementeriu?

D.M.R.: Ye mui intersante porque ye d'un claru estilu arquitectónicu islámicu, concretamente, diría yo, d'un estilu ente mudéxar y magrebín. La direición de la constriuición lleváronla alfaquíes, espertos en leyes y xurisprudencia islámiques, anque la mano d'obra fora de los pueblos de la fastera. Los moros de Franco nun formaben una tropa tan xabaz nin tan desordenada como creyemos. La so fama yera la que teníen, precisamente, de cuando combatieron a los españoles cuando Abd el-Krim. Yeren cuerpos disciplinaos y les sos tropelíes taben ordenaes y consentíes polos oficiales fascistes que, aprovechando l'estigma popular, aterrorizaben asina a la población. Los moros de Franco avanzaben con una lloxística complexa relixosa y espiritual, con imanes y mélicos propios, incluso hospitales propios. El cementeriu ta compuestu por dos recintos construyíos en momentos distintos, ocupando 4.500 metros cuadraos, que ye un espaciu grande, onde tan enterraos unos quinientos moros. Les tumbes tan siñalaes por dos llastres de pizarra, nos pies y na cabeza, con direición práuticamente norte-sur, de forma qu'el muertu mira pa La Meca, pero hai tamién tumbes disperses. Seguramente, al final, los franquistes nun teníen muncho interés y enterraron un poco al tuntún. De fechu, el recintu fue abandonáu mui pronto. Yo, les vegaes que fui a Barcia, siempres me recordé de dos cementerios que viera en Luxemburgu de cuando la segunda guerra mundial. Ta ún a poca distancia del otru. El de los angloamericanos ta impecable y'l de los alemanes ta fechu una llaceria.

M.A.: Rivas, lleguen les noticies.

D,M,R.: Sólo una cosa.

M.A.: Rápido entós. Yo, por mí, dexaba que diera vusté les noticies pero tienen que facelo los compañeros.

D.M.R.: Pues una notina: el cementeriu de Barcia ta como ta porque pal franquismu un cementeriu musulmán yera una cosa incómoda y pa la democracia un cementeriu franquista tamién yera una cosa incómoda.

M.A.: ¡Qué remate!

C.P.: Había que rematar.

M.A.: Esti home sabe titular meyor que munchos periodistes. Yo veolu presidiendo'l Principáu.

D.M.R.: Gracies, Álvarez, pero paezme que yá llego tarde.      

(Semeya d'Olaya Rivas)