L'astracanada de los venticincu años

(El Fielato)

N'Europa yá conocimos la guerra de los cien años y la guerra de los trenta años, pero l'astracanada de los venticincu años nun taba previsto y menos a esteas altures del cursu. Pero equí ta Asturies pa pasar a la historia con redoble de tambores y timbales. A cincu menses, a lo menos teóricamente, de la llegada l'AVE, resulta que la estación d'Uviéu nun ta preparada pa ello: nun hai salíes llaterales, nin espaciu pa control d'equipaxes, nin escaleres mecániques peles que quepan les maletes, nin andenes pelos que pueda pasar una persona en silla ruedes. N'Asturies non sólo son los trenes los que nun caben pelos túneles, ye qu'una paisanu obesu tampoco entra peles estaciones. Pues si eso pasa n'Uviéu, ¿qué nun pasará en Xixón, con esi tendeyón prefabricáu al que llamen estación?

Les fuerces sociales acaben d'enterase d'estos problemes y dicen que nun hai nada pensao y, por exemplu, Juan Carlos Lora, de CCOO, diz, testualmente, qu'esto "tien mui mala igua". Nun sé por qué se sosprende, si esto ye lo normal na política asturiana, na que dalguna responsabilidá tienen dalgunos sindicatos dende hai cuarenta años, nuna política onde lo importante yera gastar y subvencionar ensín saber pa qué ni en qué. Nesti casu, lo importante yera facer del AVE una especie de santu grial y non otra cosa: poner Madrid, esa Meca pa los nuesos dirixentes, a tres hores y lo demás vendría como por ensalmu. Nun abordaran nada nos venti años que lleven les obres de la variante. Yera un fín ensigo mesmu, pura propaganda y elleitoralismu.

Tampoco queda atrás la patronal. María Calvo, presidenta de la FADE, reclama una "planificación seria" pa sacar beneficios globales de la llegada l'AVE. Ye llamativo qu'el capitalismu asturianu siempres se base na planificación y, evidentemente, na subvención y'l treslláu de costes al gobiernu, seya asturianu, español o européu. Sigún la FADE, la llegada l'AVE implica una estratexa integral de movilidá que debe incluyir autualizar les estaciones, planificar frecuencies y programar sinerxes con otros medios de tresporte. ¿Y dempués de venti años vienen a contar esto los empresarios, cuando falten cincu menses?

El trazáu del AVE, pa ser de verdá alta velocidá, requier una caxa férrea que nun se puede facer n'Asturies central, nel tramu Mieres-Xixón, porque, col únicu envís de gastar fondos como fuera, especular y cebar los duernos político-sindicales-patronales, nunca se fixo reserva de suelu. De la mesma manera, la vía nun permite esa velocidá.

L'alcalde d'Uviéu entra tamién na guerra sosprediéndose de que la estación  nun ta preparada, cosa que xulga como "pergrave". ¡Home!, nun fai falta ser alcalde pa ver les coses y abasta con viaxar en tren dacuando envez y ver otres estaciones pero, ¡ser alcalde y nun tener nin idega! Pero ye que los nuesos ayuntamientos, hai untamientu, nunca tuvieron interés na movilidá sinón na especulación urbanística. Les grandes ciudaes del mundiu desendolcáu tienen la principal estación de ferrocarril nel centru, inclusive la capitalona a la que miren los cosmopaletos. Son les ciudaes mal dirixíes y con vocación de pueblón subdesarrolláu les que saquen al tren del centru. Ya eso ye porque estorben pa la especulación y la inversión urbanística. Uviéu yá empezó a facelo cola estación del Vascu cuando'l llamentable mandatu del socialista Masip, que la cosa nun vien de Lorenzo nin de Canteli. Y lo de Xixón nun acabara entá pero los planes, tamién socialistes, yeran lo que yeran, y cola estación provisional del tendeyón nuna ubicación que ta pensada pa qu'el ferrocarril pierda usuarios.

Ente los axentes sociales ye mui significativa la opinión de Luis Blanco, d'UGT, que diz que lo de les estaciones nun ye mui importante porque nunca va haber n'Uviéu más de trescientos viaxeros por tren, ente otres coses, diz, porque los precios van ser mui altos. Esta sí ye un analís interesante que da la razón a los que siempres dixéramos eso, dende los más críticos col modelu ata'l mesmu Juan Velarde, el gran mayestru de la drecha asturiana. L'AVE va significar la perda del ferrocarril convencional, va ser carísimu, va esfarrapar el mediu ambiente y va circular ente L.lena y Xixón a 50 kilómetros por hora, lo mesmo qu'agora.