"La denominación tiró de tola sidra y fízola meyor"

David Castañón: El profesor Rivas, cuando llega al estudiu, ye como una especie revolvín, podíamos consideralu cuasi como un ser mitolóxicu asturianu que revoluciona tol espaciu. Cuando llega echamos unos minutinos enantes d'entamar el programa y dizmos un poco de lo que quier falar, d'esto y d'aquello. Pero siempres acaba con un "bono, esto ye una idega porque lluéu, cuando mos sentamos a los micrófonos, la cosa nunca se sabe per ónde va acabar". ¿Cómo ta, amigu?

David M. Rivas: Bien, bien. Y ye verdá eso de que podemos acabar en cualisquier sitiu, incluso en dalgún sitiu poco recomendable.

D.C.: Pero sí que ye verdá que cuando facemos escursiones perí, cuando salimos del guión sidreru, falando de custiones económiques, nes que ye vusté un gran espertu, y tamién d'otres coses, siempres va per bon camín. El vieyu profesor sigue ehi.

D.M.R.: Sí, igual sí. Cuando reescribo lo que falamos pa metelo nel mio blogue y dai meyor forma lliteraria doime cuenta de qu'acierto en munches coses. Ye más: vengo acertando dende hai tres décades como poco. Y dígolo ensín falsa modestia.

D.C.: ¡Hahaha...! Vusté nun tien, precisamente, falsa modestia.

D.M.R.: Ye verdá. Sé bien lo que valgo, pero tamién conozo bien les mios llimitaciones. Siempres lo digo: yo nun soi muncho más llistu que los demás, pero ye qu'hai coses tan evidentes que namás qu'un interés espúreu oculta. Son coses de sentíu común. Cualisquier asturianu medianamente informáu sabe que tamos nel trixésimu aniversariu'l petromochu. Aquello víase venir. Nun fae falta ser mui llistu, nin conocer les estratexes de los países árabes, nin conocer bien los mercaos petrolíferos. Aquello tenía dende un principiu un fedorín a timu la estampina.

D.C.: Pero neso seguimos, ¿eh? Trenta años dempués munches de les coses y de les promeses elleitorales siguen fediendo a petromochu.

D.M.R.: Lo del petromochu de Rodríguez-Vigil fora una cosa a lo grande, del que supimos porque lo contaron nun chigre unos cuantos responsables que taben enfilaos, pero hubiera unos cuantos petromochinos. Nun falemos de los fondos mineros, el gran fraude económicu, social y políticu d'Asturies y puede que d'Europa. Y El Muselón y tantos otros... Esti país furrula asina, los gobiernos, l'alministración, la prensa... Pero al pueblu, polo visto, préstai y revalida cada cuatru años a los mesmos. Nun sé si los políticos representen completa o parcialmente a los pueblos pero ye evidente que salen de la xente, que nun son marcianos que vengan del espaciu esterior. 

D.C.: Esto yá-y lo sentí a vusté otres vegaes, cuando diz que los pueblos tienen los políticos que merecen. Pero los políticos salen del stablishment, de les castries partidistes. Dígolo por ser un poco benévolu col ciudadanu d'a pie.

D.M.R.: Asturies ye una sociedá mui mediocre, por nun decir dalgo más fuerte. Pero ye qu'Asturies ye la central, la que nun va llevantar cabeza. Esti país, si sobrovive, va facelo col oriente y l'occidente. Yá sé que soi un atrasáu o un tradicionalista, incluso me llamaron dalguna vegada coses peores. Por cierto, siempres tuve más descalificaciones dende la esquierda que dende la drecha. Agora yá toi al marxe de tóo y echo una mano a quien me lo pide y me cae bien. Siempres respondo a la llamada d'Andecha Astur y tamién de Podemos. Y, por supuesto, de la CNT. La cabra tira al monte. Voi votar a Foro en Villaviciosa. Ye que ta Francisco Menéndez, Francis, un paisanu de la madreña a la montera, d'esquierda dende siempres. Conózolu dende que ye rapacín. Ye un poco más xoven que yo pero daquella cuatru o cincu años yeran munchos. Y'l fíu, Xurde, gaiteru y científicu que trabaya nos Estaos Uníos ye, como dicen agora, un crack. Francis ye de Quintes y la mio familia de Quintueles. Y voi echái una manu no que pueda si llega a ser conceyal. Y que conste que teo gran simpatía por Alejandro Vega, el socialista que va ganar otra vegada. Pero, la verdá. yo soi mui benévolu incluso colos políticos. Hai vegaes que pienso qué ye lo que fairía yo si tuviera ellí. Pero tamién sé que teo unos conocimientos de los que la mayoría de los dirixentes nun tienen nin rudimentos y, amás, si me viera incapaz, teo la mio profesión, puedo volver al mio trabayu, a les clases, a los mios artículos y llibros. Bono, agora soi de clas pasiva. Ser un bon profesor o un bon téunicu nun te garantiza ser bon políticu o bon xestor, pero nun tener más profesión que la de medrar pel palu'l gallineru d'un partíu garantiza menos y, pa encima, oblígate a seguir y seguir porque nun quies volver al trabayu de siempres. Eso cuando tienes esi trabayu, que munches vegaes nun sabes facer la o col culu un vasu y nun trabayaste en nada. Yo tuve nun debate nuna televisión con un portavoz d'economía d'un partíu grande, ¡d'economía!, y resultó que nun distinguía inversión pública de gastu públicu. Y xubilárase de políticu, seguramente ensín saber distinguilo tovía. Nestes elleiciones autonómiques de la selmana que vien, dos de los seyes principales candidatos dicen nel so curriculum: profesión, políticu. Eso diz y desplica abondo.

D.C.: Vusté ye un poco meritócrata y hai quien lu tilda d'elitista, pesie a que siempre fizo política en minoría y mui apegáu a causes populares, equí n'Asturies y notros sitios, como Centroamérica.

D.M.R.: Ye mester matizar. Yo soi más partidariu del méritu, del conocimientu, del esfuerzu, que de la familia. Pero sé que la nuesa sociedá, l'asturiana y la española, ye arcaica y mediocre, onde ser fíu de ye garantía. Por eso nun progresa y difícile tien llegar a ser una sociedá verdaderamente avanzada. Llevamos dos sieglos asina. Elitista sí que soi, pero ye que la élite nun ye lo mesmo que la castria. Yo pertenezo a una élite cultural y científica, pero nun soi ricu. Y hai cientos d'homes y muyeres nes clases populares que formen una élite, la que conserva'l conocimientu tradicional de la naturaleza, la música, los cuentos... Lo malo ye qu'esa élite ta morriendo porque los ñetos, al pie'l monte o xunta la mar, yá tienen que ver el telediariu pa saber si va llover. Mentanto, los ricos dexen perres a los ñetos, que siguen siendo ricos. Pero nun son una élite, nun son los meyores ente los ciudadanos. Y gran parte de los asturianos más potentes ye particularmente palurda, como comprebé munches vegaes.

D.C.: Alcuérdome d'un llibru suyu d'hai unos años onde repasa la evolución económica d'Asturies dende la posguerra y califica a les clases dominantes como "incompetentes y autoritaries".

D.M.R.: Sí, esi ye'l títulu: Incompetentes y autoritarios. Pero ye que, amás, dempués de llegar l'autonomía, Asturies tien poques competencies, tien unos presupuestos mínimos. Por exemplu, ¿que metieron la pata con unos trenes que nun caben nos túneles?, ¡val!, vamos perdonalo, pero ye que nun tenemos competencies en tresporte ferroviariu y, lo que ye más llamentable, ye que nun tienen nin intención de teneles. Otru exemplu mui del día: en Castiella y Llión nun hai elleiciones esti mes. Ellí nun rixe la norma de que si disuelves la cámara y faes elleiciones la nueva sólo dura el tiempu que quedaba de l'anterior. Asina qu'agora tienen tiempos distintos Galicia, Cataluña, Andalucía, Castiella y Llión y País Vascu. Si Asturies pudiera dir a elleiciones sigún los sos propios tiempos les coses diben ser diferentes porque nun taríamos nel debate español, nin falaríamos de Madrid o de les cantineles valencianes. Si les comunidaes autónomes, non sólo Asturies, tuvieren ciclos elleitorales diferentes, esti circu de Sánchez y Feijoo o de Yolanda Díaz y Santiago Abascal taría de más. ¿Qué tendrá que ver el votu a Barbón, a Pumares o a Tomé col zurriburri de les candidatures de Bildu?     

D.C.: Y Ayuso... Hehehe...

D.M.R.: Bono... ¡Qué pongan a Ayuso pa tóo y acabamos! Pero si lo diz la nuesa tradición: ¿quíen manda en casa, Mingo o Colasa?, ¡Colasa!. Pues yá que manda Colasa, que gobierne Colasa.

D.C.: ¡Hahaha...! Esti ye l'analís elleitoral que facemos en Les fartures. Pero ye verdá que nunes elleiciones que son autonómiques el debate dende Madrid atápalo tóo y'l discusru asturianu que debería haber siempres ta contaxáu polo que cuecen nel centru peninsular. 

D.M.R.: ¡Caro! Nesta campaña sólo hai tres partíos con un discursu más asturianu. Nun voi pedir el votu pa naide, anque teo'l míu decidíu, mesmo'l municipal, que yá-y lo comenté, y tamién l'autonómicu. Ún ye Foro porque ye esclusivamente asturianu, otru Podemos porque tan engarraos col mandarinatu de Malasaña y otru ye Ciudadanos porque, nel carel del desaniciu, apúntense a lo que seya. ¡Home!, evidentemente ta Andecha Astur, peleando como siempres dende un silenciu programáu polos medios de comunicación, que ye la única organización nacionalista.

D.C.: Falando d'esto, de lo d'Andecha, en 2023 seguimos con una Xunta Elleitoral que nun almite un escritu en llingua asturiana.

D.M.R.: Pero almitera'l mesmu escritu en catalán.

D.C.: ¡En qué país vivimos!, ¿eh?

D.M.R.: Pues nesti, nel país de la sidra.

D.C.: Efeutivamente. Vamos cola sidra. Falamos l'últimu día de cómo entamó facese la denominación d'orixe y de cómo foi la polémica de les etiquetes, el cambiu a una profesionalización y eses coses. Eso, les innovaciones en determinaos asuntos altera muncho a los asturianos y aquello fue una especie de revolución, pero'l sentíu común acabó imponiéndose y tóo diera nuna normalidá. Tamién falamos de qu'en quince o venti años el mundiu la sidra evolucionó munchísimo, con una modernización qu'otros seutores económicos nun tuvieron. Ye un seutor que siempres asociamos a lo tradicional pero que, pasu a pasu, fue convirtiéndose en punteru.

D.M.R.: Asina fue, evidentemente. Agora, que paez que tenemos una especie de parón, anque nun hai que ser trementamente optimista, nun hai que cayer nel pesimismu. Dame'l pálpitu de que la sidra va alfrentase a problemes graves pero yo soi optimista sobro'l futuru. Si hai venti o trenta años, nun momentu muncho más delicáu, conseguimos lo que conseguimos, ¿por qué nun vamos repetir la xugada? Hai nueves xeneraciones de llagareros y de mazaneros que saben más que lo sos güelos porque conocen la tradición pero tamién estudiaron, viaxaron, saben d'otros mercaos. Y hai nueves xeneraciones de sidreros, de bebedores, que nacieron con una sidra asturiano meyor, más curiao bien tratao. A min, igual que me preocupaben los puristes" hai trenta años, contrarios a la etiqueta, a la denominación, a la sidra brut, a cualisquier innovación, agora preocúpame lo contrario, que los nuevos bebedores acaben adoutando formes de consumu llegaes de casa so madre. Quiero decir que, anque la sidra seya totalmente asturiana y de bona calidá, podría dase'l casu de que se perdiera la cultura sidrera, que tola ritualística se perdiera, qu'un chigre de Mieres acabare siendo lo mesmo qu'una cafetería de Badalona, sólo que con sidra.

D.C.: ¿Fue la denominación un pasu tan importante como pensamos?

D.M.R.: Sí, fue dalgo decisivo, porque non namás que ye custión d'una contraetiqueta, non. La denominación y los debates colos que nació tiró de tola sidra, la que lleva'l sellu y la que nun lu lleva. Cuando se pon alta la vara midir de cualisquier productu, y mui especialmente n'agroalimentación, sube, por emulación, la calidá xeneral. Si un llagareru corcha sidra ensín denominación nun puede mandar al chigre un mal productu, porque va ser desplazáu inmediatamente pola sidra regulao. La consecuencia ye evidente: tola sidra va ser meyor. Pero l'asuntu yá venía d'años atrás. Alló polos mediaos noventa Álvarez Pinilla, técnicu de la vieya Estación Pomolóxica de Villaviciosa, anque ye economista y, pa más inri, económetra, escribía qu'el 80 por cientu los asturianos optaben por una sidra con denominación. Eso quier decir que les discusiones foran mui formales, mui de llagareros y chigreros, mui de prensa, porque la xente consideraba, como falábamos l'otru día, que la sidra asturiano tien que ser asturiano, con mazana d'equí, criyao equí y corchao equí. Y Álvarez Pinilla afirmaba esto diez o quince años enantes de la denominación. Hai otros estudios d'aquellos años, finales de los ochenta y primeros de los noventa, qu'amosaben qu'había gran interés pol esporpolle de la sidra pero, y esto ye significativo, mui lligao al interés pola cultura asturiana en xeneral. La sidra apaez como un referente primordial de la cultura y de les tradiciones asturianes, cola llingua, la gaita, la bandera, el paxellu... Nun ye namás qu'un consumu d'asturianos, qu'eso fuéralo siempres, sinón una manifestación cultural. Eso ye dalgo fundamental pal seutor pero tamién pal país. Nun programa d'hai tiempu entrugábame vusté si bebíamos sidra nos setenta por resistencia ya yo contestaba que non. Pues nos finales ochenta y primeros noventa tampoco bebíamos sidra por resistencia, por un nacionalismu a lo Astérix, más bien a lo Obélix, pero si yera la xente consciente de que dir al chigre a tomalo yera un actu cultural.

D.C.: Choca muncho, cuando vamos con llagareros a dalgún sitiu de fuera d'Asturies, ver la sospresa de los anfitriones cuando-ys dicen cuánta sidra producen. Ye que nun hai llagares en degún sitiu que corchen nin la cuarta parte qu'un llagar mediu asturianu. ¡Home!, vamos dexar aparte les grandes embotelladores industriales d'Estaos Uníos o Inglaterra, por exemplu. Pero ye que queden entá más ablucaos cuando-ys dicen que toa esa sidra véndese na mesma Asturies, un país pequeñín de malapenes un miyón d'habitantes. Ye qu'el 90 por cientu de la nuesa sidra bebémosla nosotros.

D.M.R.: Hai años que llegamos al 95 por cientu. Y, volviendo a lo anterior, cuando ye añu de mazana, los años impares, una gran parte de la sidra, haiga o non sellu oficial, ye de mazana asturiana, anque siempres hai dalgo d'importación, que nun ye d'agora precisamente l'asuntu. Lo que la denominación traxo fue un control, una regulación, por exemplu de variedaes de mazana. Ehí, me paez a min, l'alministración fuera demasiao restrictiva, con aquelles 22 variedaes qu'impuso al principiu. Ye verdá que ser restrictivu nestes coses tien la so ventaxa, pa que nun te metan mazana de cualisquiera castria. Y, caro, controlar la producción de sidra cuando hai miles de races de mazana y unes trescientes mui espardíes ye complicao. Nostante cambiaron la norma bien pronto y permitieron más variedaes. Paezme qu'agora son 76, que pal mio maxín siguen siendo poques. El casu ye que la denominación furrula razonablemente bien, con fallos de xuru, pero bien. Los que somos veceros de sidra con denominación tamos satisfechos en xeneral. A min paezme una de les coses que meyor funcionen na economía asturiana. ¿Ye meyor la sidra con denominación que la otra? Non necesariamente. Pero la de denominación aída a caltener les pumaraes, a afitar la biodiversidá, a que los praos nun vaigan a monte, a que la población rural quede nel llar, a la multifuncionalidá de la casería, a que los salarios medren, a tener curiosu'l paisax... Y eso por unos centiminos de más.

D.C.: Hebo un gran debate al principiu, cuando permitieron a los llagares tener sidra de denominación y sidra de fuera la denominación, non como pasa col vinu de Cangas, que o tas dientro la denominación o tas fuera. Eso pa min fuera un aciertu porque permitió que los llagares fueran adautándose en función de les sos carauterístiques o, como vusté dicía, atendiendo a la vecería. Lo que nun permitieron ye qu'un llagar emplegara la mesma marca pa uno que pa otro. L'asuntu arremolinose muncho y fue cuando dalgunos llagares sacaron aquella marca xeneral privada de mazana selleicionao, con Trabanco al frente.

D.M.R.: Tamién me recuerdo d'una polémica sobro si se podía salir y entrar na denominación. De fechu, hebo llagares que fueron pioneros cola denominación, como'l del mio vecín Tomás, que taben nel conseyu regulador y nun podíen corchar nos años pares porque teníen poca mazana. Entós dalgunos llagareros plantegaben por qué nun permitíen una mayor flexibilidá en función de la vecería. Pero un baille de salir y entrar tampoco yera mui razonable dende un puntu vista seutorial y de marca xeneral. El problema yera peliagudu: si tu nun corchabes con denominación un añu par, cuando dibes al chigre dos años dempués teníes yá otra marca más potente ocupando'l to sitiu, sacantes qu'el chigreru fora particularmente fiel al to llagar. Hebo con esti asuntu cabreos soberanos ente llagareros, chigreros y la mesma alministración. Y sobro lo del vinu teo la mio particular opinión. Tampoco toi mui seguru de lo que digo y ye más una intuición. La marca Cangas cubre, cuando menos, tres conceyos, Cangas del Narcea, Ibias y Degaña. N'Ibias yá tan produciendo vinos estupendos. Pero ye que nes tierres del Seya, en Parres y Cangues d'Onís, tan sacando vinos mui buenos, anque deberán ameyorar. Pa min que la llínia canaria nun ye mui bona: la islla de Tenerife, que ye un cagayonín, tien cincu denominaciones d'orixe. La llínia madrilana, colos sos vinos de Madrid, ye diferente. A min paezme qu'Asturies debería averase al modelu de Madrid y non al que vamos, que ye'l de Canaries. Pero, repito, nun lo teo claro.  

D.C.: Naquellos primeros momentos, poles males comunicaciones, nun yera tan fácil trayer mazana de fuera, o polo menos de mui lloñe, non como agora, que vienen cubes con sidra yá cuásique fecho de unos cuantos países d'Europa. Perdiérase esa tradición qu'a min prestábame tanto d'amestar pera a la mazana nel añu probe de vecería. Dábai un agrín mui prestosu, frente a esta sidra de güei, mui afrutada, más fema.

D.M.R.: Ye verdá que la sidra d'anguaño ye más suavina y afrutada, pero recordemos que la francesa Toussaint-Samat nel so tratáu enciclopédicu sobro la historia de l'alimentación dicía, nos entamos del sieglu XX, que la sidra d'Asturies yera la meyor del mundiu porque recordaba la flor del pumar. Anque soi de sidra macho tampoco voi poneme estupendu. El tresporte yera un problema, seguramente, pero yo recuérdome de cuando neñu que yá vinía mazana de fuera, fundamentalmente de Galicia y de Normandía, anque tamién, yá mas sero, de Rumanía. Y decíame un llagareru hai unos años que la mazana más asemeyada a la nuesa yera la eslovena. Eso dicía. A lo meyor ye que les variedaes eslovenes yeran más asemeyaes a les qu'elli emplegaba de casa. Tampoco ye raro. Convidáronme a una xinta nun pueblín d'Eslovenia hai quince años, la familia d'un compañeru de la Universidá de Liubliana col que trabayé un tiempu. Los nomes de los platos nun soi a reproducilos pero, básicamente, yeran fabes pintes, truches con xamón y frixuelos. Yera como tar nun chigre de Caborana. Pero sobro eso que vusté diz de la pera, cuando llega la reglamentación actual, aparte d'otres coses, tamién se diz que ye lo que ye sidra. Y diz que sidra ye "bébora resultante de la fermentación alcohólica total o parcial de la mazana fresco o del so zusmiu y con una gradación mínima de cincu graos d'alcohol en volume". Eso quita cualisquier combinación de frutes, seya pera o lo que seya. Otra cosa ye lo que faigan nes caseríes. Na mio casa y paezme qu'en toles les de la contorna nun se mecía mazana con pera,

D.C.: Si venden pa fuera, con etiqueta, nun sería sidra.

D.M.R.: Asina ye. Y agora pienso na polémica de la que falamos l'últimu día, el del asuntu de Mayador. Paez que la cosa queda en nada, pero en nada. Entós, pienso, ¿pa qué tou esi barullu?

D.C.: Eso ye dalgo mui nueso: montamos un espolín ensín saber nada l'asuntu y yá veremos. 

D.M.R.: Sí, pero esto nun ye lo mesmo que si digo ciualesquier cosa de la sidra'l llagar la mio parroquia y sal el llagareru diciendo que yo nun teo nin puta idega de sidra. Eso ye un toletole d'aldea. Pero ye qu'equí hai una acusación a una empresa, empresa que diz qu'el Seprona ta persiguiéndola. ¡Chicu!, tas poniendo na picota la llibertá d'empresa y de comerciu, la bona fama d'una industria y la dignidá de la guardia civil. Tamos custionando el bon facer d'una empresa, una empresa potente, y de los custodios armaos de la naturaleza y del ámbitu rural. ¿Y esto queda asina? Cuando pase otra cosa asemeyada o más gorda, ¿vamos facer casu?

D.C.: La verdá ye que sí.

D.M.R.: Nel fondu ye cosa mui de sidreros. Un bon sidreru, acomodáu na barra, cuando va un poco de la manu, métese colo más sagrao que tien el paisanu vecín, el dios, el partíu políticu o l'equipu fúbol. Ármase un cafarnaún. Y, cuando llega a equis botelles, gárralu pel llombu y diz: "perdona ho, faltete, ye que nun merzo'l pan que como". Pero equí tamos falando d'empreses y d'una fuerza armada. 

D.C.: Ya falamos tamién de la prensa'l réxime, que paez que ta escribiendo na barra'l chigre. Ye que ye sosprendente. Tolo que tien que ver col mundiu'l chigre y la sidra va a primera plana. Eso llévamos a lo que vusté dicía enantes, a esi pegamentu cultural que tien la sidra. Agora paez que la mocedá ta pola cerveza y por otres coses, pero nunca la cerveza sal en grandes titulares de los dos periódicos principales d'Asturies. 

D.M.R.: Si, ho. Mire sinón la campaña elleitoral. Salen tolos díes los partíos parllamentarios y dacuando un detallín sobro los pequeños. Dalgunos nun salen nunca. Pero, por exemplu, Pepín Braña y'l so Que Hable Gijón ye habitual nes páxines d'El Comercio. ¿Por qué?: porque ye un grupu de chigre y fuboleru. Yo entiendo que noticies poco importantes salgan nos espacios dedicaos a conceyos pequeños. Ye política comercial porque los paisanos d'esos llugares quieren vese dacuando envez nos papeles. Pero les primeres planes ocúpenles les noticies polítiques, el Sporting y l'Oviedo, y la sidra. Los del Sporting tamos agradecidísimos a les neñes del hockey porque gracies a elles los carbayones nun mos chorrearen muncho dempués del derbi.

D.C.: Toi siendo bonu.

D.M.R.: Pero nun me va dicir que l'Oviedo xugara bien.

D.C.: Discretu.

D.M.R.: La verdá ye qu'a min gustome más l'Oviedo.

D.C.: Eso hónralu, profesor. Pocos esportinguistes dicen eso.

D.M.R.: La diferencia ye que vustedes tienen un entrenador muncho meyor.

D.C.: Neso tamos d'alcuerdu. Y durante munches partes de la temporada yera guapo ver xugar al Sporting.

D.M.R.: A mín l'otru día prestárame más como xugó'l Sporting, pero víes qu'el bloque, saber colocase nel campu, tiníalo muncho más claro l'Oviedo. 

D.C.: Ye lo que tien tener un filósofu allumáu nel bancu. ¿Cómo ye?; l'esquema de xuegu ye un organismu vivu...

D.M.R.: Hai un comentarista nuna cadena de radio que, paez ser, llámalu el predicador.

D.C.: Pero gústais a los mexicanos. Paez ser que va siguir l'añu que vien.

D.M.R.: Nun lo sé. Pero vamos ver, tienes l'equipu que tienes. Tu, si tienes a Messi, a Cruyff, a Cristiano, a Villa, a Vinicius, a Iniesta, puedes dir al toque, al malabarismu, a lo que quieras, colocar la pelota y arreglao. Pero con un equipín normal, non. Si'l fúbol ye mui cenciellu: amarrar atrás, cuerrer les bandes y centrar a un par de delanteros.

D.C.: Porque vusté ye mui inglés. Esi fúbol clasicón ye'l que-y presta.

D.M.R.: Será por eso.

D.C.: Esti añu coquetearon col descensu

D.M.R.: Matemáticamente podríamos descender. Yo creyo que nun va pasar, pero los númberos tan ehí.

D.C.: Ya-ys regalamos el puntu pa la salvación.

D.M.R.: Non, non. Tamos salvaos porque si perdemos n'Eibar y cola Ponferradina y el Málaga gana los dos partíos suyos quedamos a puntos, pero sacamos a los andaluces cincu goles. Eso quier dicir qu'ellos tendríen que meter seyes goles en dos partíos y nosotros dengún. 

D.C.: Dende que vusté ye tertulianu de fúbol na RPA...

D.M.R.: Nun me llevaron porque sepia de fúbol. Eso díxelo yo pa dame pistu. Convidáranme porque yera la Selmana de les Lletres Asturianes y queríen facer una tertulia esportinguista dafechamente n'asturiano. Fue cosa de Burilo, de Miguel Fernandi, bon amigu y compañeru, a pesar de ser oviedista.

D.C.: Pensé que diba sacái l'alma repunante, non por decir que falaba de fúbol, sinón por llamalu tertulianu, que ye una pallabra que sé que nun-y presta nada.

D.M.R.: Ye verdá. Primero porque lo de les tertulies ye una imax mui mala, pero, amás, yo siempres emplego la pallabra contertuliu. Ser tertulianu ye como ser un romanu de baxa clas. Yes contertuliu, partícipe d'una tertulia. Un tertulianu ye'l seguidor d'una tertulia, como un cristianu ye un seguidor de Cristo. Un cristianu nun participa na formación de la relixión, sinón que ye un seguidor. Podría ser inclusive un tertulista, como se puede ser marxista, ensín querer facer comparances.

D.C.: ¡Hahaha...! Yá tuvo que soltala.

D.M.R.: Hehehe...

D.C.: Entamamos falando de les elleiciones, dempués de sidra, agora de fúbol... Val vusté pa tóo, ¿eh?

D.M.R.: Seguro, seguro...

D.C.: Y yá que tamos: ¿un pronósticu pa estes elleiciones?

D.M.R.: Va ganar el PSOE. Barbón tien mui bona imax, ye un home que llega mui bien. Ye'l xenru fantásticu. Por desgracia Vox subirá. Nun sé mui bien qué pasará con Podemos y con Foro. A Podemos va castigalu la so engarradiella interna y Foro va pagar cara la so indefinición nacional. Dalgún gurú politólogu d'esos que tanto dancen pel escenariu debió proclamar que la llingua, la identidá y lo cultural quita votos, discursu que Pumares compró a baxu preciu. Y Canga yá tien el billete pa Bruxelles, salvo que gane Feijoo n'avientu y vaiga al palaciu de Santa Cruz.

D.C.: Un abrazu fuerte.

D.M.R.: Lo mesmo.