Un poco más qu'el puntu penalti
(El Fielato)
La patronal fotovoltaica, una forma mui científica de llamar a los tratantes de residuos, defende que los parques de bateríes se pongan en suelu industrial. Nun paez que seya mester tener grandes conocimientos científicos nin de política tarrentorial pa llegar a esa conclusión. Igual que los purines ganaderos deben ser xestionaos nos espacios rurales, que nun van llevar el mexu los gochos al centru d'Uviéu, la basoria industrial tampoco va dir a un prau de Pion.
Pero'l vicepresidente d'esa patronal, Javier Fernández-Font, avilesín pa más señes, da esi toque personal al que mos tienen avezaos. Diz, con gran rigor, que nun ye bono llexislar dende "la llerza y'l desconocimientu". Con eso quier decir, evidentemente, que los ciudadanos y dalgunos gobiernos municipales somos cagones ya inorantes. Pero equí ta la Unión Española Fotovoltaica, que vicepreside esti bon home, pa sacamos del desconocimientu y, más entá, del miéu. Eso del miéu ye cosa mui mala: entames por preocupate polos parques de bateríes y acabes creyendo qu'hai un infienru y un demoñu.
Pues bono sería que dieren meyor información pa poder ser menos pollinos los del rural y aceutar les bondaes de la gran industria fotovoltaica. Vien esti bon paisanu, l'educador d'aldeanos Javier Fernández-Font, a falamos de toles seguridaes de les plantes, que son tantes y tan costoses que yá mos indica de la so peligrosidá: denguna industria presume de tanta midía xunta, alternativa y sucesiva si nun fuera porque tien un evidente pelligru. Por exemplu: nun hai planta industrial con más midíes de seguridá qu'una central ñuclear. ¡Caro, porque ye perpelligrosa!
Por cierto, de la posible evaluación previa d'impautu ambiental nun diz nada esti home tan averáu al conocimientu y a la seguridá. Pero sí que comenta que si Asturies aplica'l criteriu de mil metros de distancia a les viviendes sedría como prohibir l'autividá. ¿Y cuántos metros propón la patronal fotovoltaica? Nun se sabe, pero Fernández-Font apunta: diz que n'Europa falen de venti metros. ¡Eso ye un poco más qu'un puntu penalti! La verdá, nun sé qué país permite cualisquier cosa química a venti metros d'una casa. Nun voi decir que, simplemente, tea mintiendo, porque igual hai dalguna rexón perí que lo permite, pero... Ye que si eso ye asina podríen poner un depósitu bateríes nos Campos Elíseos de París, na plaza España de Madrid o nel foru imperial de Roma. ¿Por qué non? ¡Ah!, porque ye zona urbana. ¿Y ye que la zona rural ye menos respetable? Si les ciudaes, xeneradores básiques de mierda, nun permiten eso, ¿por qué los pueblos tienen que comelo cuando nun lo xeneren? ¡Pero si les previstes normes pretenden que nun haiga piles de cuchu a menos de doscientos metros d'una vivienda! Y tola vida lo tuviéramos al pie casa y nun digo que fora saludable, pero siguimos equí.
Diz tamién Javier Fernández-Font qu'Asturies tien "un gran potencial d'almacenax". ¡Home!, evidentemente. Si podemos poner un parque bateríes a venti metros de les viviendes nos espacios rurales podemos tener cientos de miles de parques. Pero si ponemos una casa putes en cada parroquia, un despachu de fentanilu en cada chigre y matar un osu al mes por un miyón d'euros tovía ganaríamos más. Eso del potencial ye lo propio d'esti empresariáu que padecemos, seya industrial o turísticu, bien engrasáu dende les alministraciones, dende'l palaciu de Fruela al hai untamientu de cualisquier conceyu. Ye Asturies, una colonia española que nun llega nin a provincia.
Y vamos más allá. Paez ser que la salvación del planeta sólo ye posible desertizando les zones rurales y dedicándoles a parques de bateríes, aeroxeneradores, turismu rural ensín ruralidá, campos solares... Eso nun ye lo que tantos llevamos tanto defendiendo. Nun ye un desendolcu sostenible. Eso sí, ye una forma de tirar unes décades más. Nel campu quedamos pocos, mayoritariamente xubilaos agrarios o fíos de l'aldea que volvieron a la vieya casa dempués de bregar per esos mundios de tolos dioses. Y los que viven d'ello acabarán malvendiendo los praos a los fotovoltaicos, por falar de lo d'agora.
Paisanes, paisanos: o mos plantamos o, como diz Dante, "lasciate ogni speranza", escaezamos cualisquiera esperanza.
