Les Seyes de La Suiza: dellitu de sindicalismu

Pal viniente sábadu, 28 de setiembre, ta convocada una manifestación en Xixón en defensa de Les Seyes de La Suiza. Trátase d'una concentración perimportante, dalgo que va más allá de los drechos o de la llibertá individual de media docena de sindicalistes. Trátase de salir tóos en defensa de la nuesa mesma llibertá, amachucada y puesta en pelligru nesta voráxine de reaición ya involución que tamos careciendo, y que percuerre los gobiernos, los parllamentos, los xulgaos, los medios de comunicación y la parte más inorante y visceral de la sociedá civil.

Vamos dar patrás nel tiempu, ata llegar a 2017. Una trabayadora de La Suiza, una pastelería mui conocía, un clásicu establecimientu de Xixón, acude al so sindicatu, la CNT, pa pedir sofitu y asesoramientu. La muyer desplica les males condiciones llaborales nes que ta, una situación que-y prevocara una tensión tala qu'a puntu tuvo de perder el neñu qu'esperaba. A un tiempu, tamién denunciaba acosu sexual nel trabayu. Dempués de tar de baxa por maternidá, yá qu'el neñu llográrase pesie a los problemes previos, vía con llercia el volver al so puestu.

La CNT autuara como cualisquier sindicatu sensatu lo fairía, especialmente escontra un casu que yera un poliedru de munches cares y, amás, con custiones tan complicaes, dao que dalgunes yeran, de constituir dellitu, d'eses difíciles de demostrar. Primero intentó una negociación y, como nun fuera posible, llamó a la movilización, en principiu de los sos militantes y más lluéu de la sociedá nel so conxuntu.

Hebo concentraciones delantre l'establecimientu unos cuantos díes, nes que nun se dieran casos de violencia nin de disturbiu dengún, como preben los informes policiales y los artículos de prensa, qu'aseguren que la fuerza pública nunca tuvo qu'intervenir. Namás que se llanzaron proclames, eslóganes y conseñes sindicales, les normales nestos tipos d'aiciones, evidentemente con frases y cantos "subíos de tonu y más o menos malsonantes". Dempués desplicaré el porqué de poner esta frase pentecominada. 

L'empresariu, pel so lláu, lliárase la manta a la cabeza y entamó poner denuncies y denuncies contra la CNT y contra toles persones que pudo, lo que derivó n'apertura d'un procesu xudicial contra cuásique cuarenta denunciaos, dalgunos que namás yeran vecinos que participaran en tarteraes y sartenaes n'amuesa de solidaridá. De resultes d'estes iniciatives xudiciales, seyes persones, cincu muyeres y un home, miembros de la CNT, fueron encausaos. Por motivos evidentes, los procesaos fueron reconocíos rápidamente en femenín: Les Seyes de La Suiza.

Un tiempu dempués, en medio de movilizaciones más o menos amplies, un tribunal de Xixón condergálales a 150.000 euros como indemnización y a tres años y mediu de prisión. Ye significativo lo qu'escriben nun artículu de prensa siete reconocíos profesores de la Universidá d'Uviéu, de los qu'el primer firmante ye Francisco Erice. Afirmen, y nun hebo rempuesta denguna, qu'el xuez Lino Rubio, de llarga xurisdicción en Xixón, ye reputáu pola so gran fortaleza por frente a los débiles, y que ye persabío dende hai años que tolo que llega a la so mesa sobro custiones sociales y llaborales tien la conderga asegurada'l más débile. A la contra, escriben, costaría trabayu recordar una sentencia condergatoria sobro persones o entidaes que son realmente poderoses. Por fin, el pasáu 24 de xunu, el Tribunal Supremu ratificó la sentencia.

Tóo paez indicar que les allegaciones del abogáu de la empresa, a les que faeré referencia dempués, convencieron al altu tribunal, un eufemismu que me recuerda a Cecilia con aquello "de alta cuna, de baja cama". Vuelvo a lo que dexé pendiente. Nes concentraciones namás qu'hubiera aición sindical, coles sos naturales cantos y frases "subíos de tonu y más o menos malsonantes", como se ve namás conque lleer nes mesmes sentencies dictaes.

Pues bien, afirmara la sala civil del Tribunal Supremu: "la llibertá d'espresión ampara la crítica molesta, cafiante o firiente a la empresa nel somatu d'un confliutu llaboral". Y non namás qu'eso, sinón que ye llícito "recurrir a una cierta dosis de desaxeración,  inclusive de provocación, esto ye, ser un poco tolondru nes sos espresiones". Y pa esa consideración basáranse los maxistraos en principios constitucionales qu'afirmen que les manifestaciones de trabayadores realizaes contra la empresa tan abellugaes pola llibertá sindical y que nun mescaben el drechu al honor.

Javier Gómez Bermúdez, abogáu de la empresa, el que fuera ún de los xueces estrella hai más d'una década, aquel sobro'l qu'Elisa Beni, la so esposa, ecribiera el llibru La soledad del juzgador, argumentó qu'el propietariu de La Suiza nun yera un empresariu sinón un trabayador con un negociu pequeñu. A causa d'eso, "abellugase nel sindicalismu pa la triba coaición que sufriera nun tien xacíu, y menos nuna ciudá pequeñina como Xixón". 

Vamos ver: si'l propietariu d'un negociu pequeñu nun ye un empresariu sinón un trabayador, ¿quién ye empresariu nun país onde'l tamañu mediu de la empresa ye de siete trabayadores? Serán seguramente "trabayadores emprendedores con un capitalín", mientres que los empresarios son venti o trenta, xustamente los que nun esisten porque trátase de grandes corporaciones. Per otra banda, si un trabayador que tien un negociu pequeñu cuenta con varios asalariaos, ¿son tamién trabayadores, o son compadres, compinches o compañeros? Yo nun soi xuez pero, con sólo escuchar esti argumentu, daría carpetazu a les dilixencies. 

Como escriben los siete profesores d'Uviéu, "mester conviniera qu'aclarare a partir de qué tamañu d'empresa y de ciudá se pueden formar piquetes na puerte d'un centru trabayu y, de la mesma manera, las razones poles que nun son aplicables los mesmos drechos almitibles nes mesmes formes de movilización nes empreses y ciudaes pequeñes".

Ye más: ye precisamente na pequeña empresa onde ye más difícile pa un trabayador defender los sos drechos. Alcontramos una casuística mui grande, dende rellaciones d'amistá ente empresariu y emplegáu ata represión o abusu patronal sobro un trabayador que nun tien conveniu, nin sindicatu y, delles vegaes, nin compañeros de tayu. Cuando llega una fuelga, ¿quién la secunda? Pues mayoritariamente los metalúrxicos, los funcionarios, los ferroviarios, los portuarios..., esto ye, los que tienen mayor seguridá y, normalmente, meyor sueldu. ¿Por qué? Ente otres coses porque tienen sindicatos. Nuna empresa grande puede facese aición sindical dende dientro, mientres que na pequeña empresa los trabayadores necesiten la solidaridá esterior, la de los sos vecinos, los sos sindicatos, les sos asociaciones, concentraos na puerte l'establecimientu. Precisamente por eso van a prisión Les Seyes de La Suiza, que nun participaron naquelles concentraciones por mor d'un porgüeyu propiu, sinón arriesgándose, y viérase con claridá por desgracia, por un fundamentu éticu, el principiu de solidaridá.

Vuelvo a González Bermúdez. Pa elli Xixón ye una ciudá pequeñina. Yo pequeñina diríalo de Navalcarnero, Tortosa o incluso Ponferrada, pero llamar pequeñina a una de 270.000 habitantes... Pal maxistráu Leverkusen, Grenoble o Luxemburgu deben ser pueblinos: tienen poco más que la tercera parte de población que Xixón. Otru motivu más p'archivar lo que proponga. Ye más, una razón pa mandalu a repetir el bachiller. Pero ye que tamién fala del gran poder que la CNT tien n'Asturies, y dizlo tamién na so esposición delantre los xueces. Otru motivu pa duldiar de la so forma de razonar: igual garró datos de 1931 o inclusive de 1978.

Pero sí qu'acierta nuna custión sobro esto útimo: la CNT, como tamién SUATEA, CGT o CSI, nun tendrán el pesu institucional de CCOO o d'UGT, como tampoco de los "sindicatos" seutoriales. Pero falamos d'un sindicatu que ta a pie d'obra y que nun abandona a un compañeru porque nun tea interés políticu, como nun abandonó a la trabayadora de La Suiza. Namás ver confirmada la sentencia González Bermudez reflexonara: "van tener que medir mui bien lo que-ys desixen a los empresarios y cómo-ys lo van desixir". Dexando a un lláu qu'agora yá nun fala d'un "trabayador con un negociu pequeñu", la frase paez clara de llucha, más bien venganza, de clases, pero de finales del XIX. Tóo paez apuntar a una amenaza: la de l'apaición del dellitu de sindicalismu. Pero paez que va ser un dellitu que figurará nel códigu penal especial pa dalgunes circunstancies y dalgunes persones, esto ye pa los que piensesn que l'aición sindical básase na concertación y l'alcordada pero que, si ye mester, ye combativa y ensín grandes declaraciones en televisión. La sentencia contra Les Seyes de La Suiza ye una conderga a los que resisten pa qu'otros, escarmentando en cabeza ayera, aten bien los zapatos.

La vicepresidenta'l gobiernu español, Yolanda Díaz, falando del asuntu que tratamos, dixera, testualmente, que "ye intolerable que vaigan entrar en prisión por lluchar por meyores condiciones llaborales: el sindicalismu nun ye dellitu". Y Jorge Espina, dirixente d'Izquierda Unida en Xixón escribiera na prena: "facer sindicalismu nun ye nin pue ser dellitu". De dirixentes del PSOE, a lo menos de cierta importancia, nun sabemos nada y, conforme a la frase alcuñada por Fernández Campo hai años y que fizo escuela, "nin ta nin lu esperamos".

Pues que vaigan tomando nota los grupos que dicen defender los drechos sociales y llaborales, especialmente los sindicatos oficiales, que la cosa, nun ye que tea entamando, sinón que va cuayando. Cuando, como escribía Niemöller, en frase atribuyía a Brecht xeneralmente, vengan por ellos nun quedarán los díscolos, los repunantes y los radicales pa defendelos porque lleváronlos enantes, mientres que los oficiales andaben a otres coses.

Polos mesmos díes de la confirmación de la conderga a Les Seyes de La Suiza, la fiscalía de l'Audiencia Nacional pedía l'amnistía pa los miembros de los CDR acusaos en Cataluña por terrorismu, lo que yera llóxico porque, como muncho, aquello fuera vandalismu y altercáu públicu. Pero, nun mos engañemos, l'amnistía nun se da en función de la tipicación penal de los fechos, sinón por razones polítiques que, paezme a min, más que xustificaes. Como escribía Sánchez Terán na prensa: "nun pue haber un desfase tan descomanáu nun mesmu estáu de drechu".

Pues, yá que la vicepresidenta Díaz, fía, por cierto, de un vieyu sindicalista gallegu, diz eso de que "el sindicalismu nun ye dellitu", que lleve al conseyu ministros l'indultu pa Les Seyes de La Suiza y nun les dexe amoriar, coles sos families moces con neños pequeños, ata llegar al Tribunal Constitucional o a la Unión Europea, onde, otra vuelta, sacarán los collores a un reinu d'España represor y con la peor calidá deemocrática.

"Les tres cuartes partes de los dellitos que son xulgaos polos tribunales cada añu tienen el so orix na desorganización autual de la sociedá, no que se refier a la produición y distribuición de la riqueza, y non na perversión de la naturaleza humana" (Piotr A. Kropotkin).