Pregón pal conciertu de campanes de Quintes

Por segundu añu consecutivu tamos equí, delantre la ilesia parroquial de Quintes, pa sentir un conciertu campanes y honrar la memoria de tolos campaneros mariñanes que durante años, por nun falar de sieglos, ficieron tañer, repicar y llanzar al vuelu estes campanes y les que hubo enantes y que tuvieron dempués d'otres.

N'actualidá y ente nosotros, la campana y'l so soníu tan mui identificaos coles ilesies y les catedrales, mesmo que coles ermites y capielles, pol fechu de que vivimos dende hai dos mil años nuna cultura cristiana ya identificamos esos soníos col añu llitúrxicu y coles hores de los ritos relixosos. Pero la campana ye un obxetu utilizáu dende la remota antigüedá, col so simbolismu de la música de les esferes, una idega pitagórica que se basaba en que l'universu ta gobernáu por proporciones numériques harmonioses, polo que tamién se refier a la comunicación ente'l cielu y la tierra. La música de l'harmonía cósmica, la de les campanes, tien polo tanto un poder purificador, un poder purificador que provién de la combinación de vibraciones de los siete astros entóncenes conocíos, caún de los siete representaos por un metal concretu y que se cuerresponden coles siete notes musicales.

Asina, na antigua China la campana representa al restallu, rellacionao col soníu de los tambores, mientres que nel budismu les campanes doraes son les voces de la divinidá, como nel islam representa'l poder d'esa divinidá. Pela so parte, na cultura hindú la campana simboliza l'oyíu y tolo que sentimos al través d'el. Y nel cristianismu, la mitoloxía que más cercana y conocía tenemos, el cantu les campanes aída na victoria contra les fuerces del mal porque los espiritus malignos espavóriense al sentilu. Amás, como pasaba en China, tamién representa la truena, el cañón del cielu, heredá qu'el cristianismu toma del paganismu romanu y del so Iuppiter Tronante.

La campana ye una mensaxera, polo que tamién suel emplegase nos ritos funerarios, como ún de los vehículos de contautu ente los vivos y los muertos, como ponte ente'l mundiu y l'inframundiu, ente'l reinu superior y'l reinu inferior. Ye la música d'eses copes de bronce la que suena en dalgunes tradiciones, como l'asturiana más antigua, na nueche de les ánimes, soníu al que munchos consideraron como'l de les campanes del alba. 

Tamién la campana tien, como tenía, una función más material: la de convocar al pueblu a aconceyamientos, yá fueran relixosos, sociales o políticos. El sumu sacerdote xudíu llevaba una campanina na túnica pa llamar a la oración, los romanos convocaben a actos públicos, incluyíos los xuegos, con unes campanes pequeñes llamaes tintinabula. Pero fueron los cristianos los que entamaron a facer campanes grandes pa convocar a la ilesia, siendo la voz de Dios llamando, polo que les denominaben signum. 

Tintinabula, signum, otros nomes anteriores como gloca. Entóncenes, ¿d'áu saliera la pallabra campana? Nun ta la cosa mui clara pero la mayoría de los investigadores piensen que vien de la rexón de Campania, una zona d'Italia famosa pol so bronce dende la época romana.

Dende l'antigüedá tamién les campanes tuvieron una función de defensa, especialmente na edá media, cuando se colocaben na torre vixía o na talaya de los castiellos o les ciudaes, dende les qu'avisaben d'ataques enemigos. Esa función de defensa siguieron cumpliéndola durante más sieglos, avisando d'incendios o de fuertes tormentes. Poco a poco, les campanes fueron ocupando los güeyos de la torre la ilesia, como tamos avezaos a veles, siendo una imax tan corriente, tan cuotidiana, que nunca mos preocupamos del so riquísimu simbolismu.  

N'Asturies nun sabemos con seguridá cuántes capanes hai, anque sí que tan catalogaes y bien estudiaes les de los principales templos, principalmente les de la catedral d'Uviéu. Pero podemos facemos una idega si tenemos en cuenta que cuntamos con unos 3.500 edificios relixosos, la mayoría d'ellos con campanes. Destaca pola so singularidá la llamada Wamba, de la que nun sabemos el motivu'l so nome pero que nada tien que ver col rei godu Wamba. Fundía nel añu 1219 n'honor al Santísimu Salvador, pesa 833 kilos y sigue tocándose a diario na catedral. Na parte superior podemos lleer en llatín la fras "de manera piadosa y voluntariamente, sueno n'honor de Dios y pa lliberar la mio patria", con tres invocaciones en griego y llatín que paecen glayíos de combate: "Cristo trona, Cristo suena, Cristo impera". Siendo como ye mui grande y d'un soníu mui potente, ye una campana que mos lleva al Dios vencedor, a aquella heredá romana de Iuppiter Tronante.   

Pero onde les campanes tiníen una importancia particularmente notable yera nos pueblos pequeños. Evidentemente, llamaben a misa, al angelus, a les vísperes y, en xeneral a tolos oficios relixosos, con toques específicos nes fiestes más señalaes. Pero, sobro tóo, cumplíen una función como vía d'información y como instrumentu de protección de la comunidá. Colos sos diferentes toques daben anuncia de defunciones, nacimientos, incendios, ataques, llamaes a conceyu abiertu... La música de los campanarios, tocada manualmente polos campaneros, verdaderos mayestros, fuera'l mediu de comunicación, el reló, el periódicu o la radio durante sieglos.

Tamién nos pueblos tiníen les campanes un poder simbólicu. Campanes y animales domésticos tuvieron siempres mui lligaos en munches cultures ganaderes y pastoriles. Yeran, por exemplu, amuletu proteutor frente al mal, frente a los espíritus malignos. Por eso, amás de pola su utilidá pa saber onde taba, yera habitual ponéi un cencerru al ganáu o, cuando menos, a determinaos exemplares. Cada cencerru, llamáu tamién lloqueru o esquilón, sonaba de manera diferente, colo que siempres sabía'l paisanu, en medio la ñebla o na fondura la viesca, a qué animal cuerrespondía. Pero tamién se creyía qu'el lloqueru protexía del mal al animal y a la cabañada. Por eso los cencerros tan perestendíos per Europa entá güei, cuando yá poca utilidá tienen pa una ganadería teunolóxicamente controlada y nun mediu natural muncho menos hostil al d'hai un sieglu o menos.

Na mitoloxía asturiana considerábase el campanariu y les campanes con poder de controlar la lluvia y les tormentes, particularmente d'atrayer los rayos y minimizar la so fuerza. Son docenes los cuentos y lliendes que tienen esti fondu míticu, col nuberu como protagonista principal y la campana como instrumentu máxicu. Esa creyencia tien una base real, güei diríamos científica, por cuanto los metales atraen al rayu, desviando la so posible trayeutoria pa que nun alcance cases y cuadres. Esi ye'l principiu básicu de los modernos pararrayos.

Na cultura asturiana la campana quedara afitada n'espresones llingüístiques mui distintes y nel floklore, como podemos ver agora mesmo, nesti tiempu de nueso. Asina, una cosa que merez ser atendida, que tien muncho interés, que resalta nuna conversación ye dalgo campanudo. Y tóos emplegamos la espresión "sentir campanes y nun saber ónde", utilizada pa referise a dalguién que fala ensín saber de lo que ta falando. Ye lo propio de quien siente una campana pero nun sabe de qué campanariu, polo que nun debería falar d'ello porque, anque tea una llixera idega l'asuntu, nun ye a ponelo nel so llugar, colo que lo entiende mal o lo terxiversa. Pa falar de lo que diz una campana hai que saber lo que diz, pero tamién d'aú sal, de qué campanariu. Pa pescanciar el mensax de la campana ye mester comprender la so sencia y conocer la so circunstancia. ¿Y quién nun sabe lo que ye'l campanu? Ye'l primer salmón echáu a tierra de la temporada y que, tradicionalmente, anunciábalu la campana más cercana y, en poco tiempu, viaxando de campanariu en campanariu, acababa por sabelo toul país.

Tamién la campana figura nes canciones populares, de les que de xuru la más conocía ye, precisamente, esa cola que ta illustráu el cartelu d'esti conciertu de campaneros de Quintes, tan popular que tien varies versiones, toes con esos dos versos de "campanines de mio aldea, nunca dexéis de tocar". La mayoría de les versiones tan referíes al regresu de los emigrantes, d'aquellos americanos del pote. Nel recuerdu de los emigrantes taben bien grabaos los soníos de les campanes del so pueblu, la voz de los dioses familiares. 

Asina, sentimos: "campanines de mio adea,/nunca dexéis de tocar,/los vuestros soníos me guien/per tierres d'allende'l mar;/campanines de mio aldea,/campanines de cristal,/tocaréis pa la mio boda/cuando regrese al llugar". Y notra versión sentimos: "campanines de mio aldea,/campanines del llugar,/de lloñe me tais llamando/a les fiestes del Portal".

Na música culta, normalmente sacra pero tamién d'otros xéneros, pol so simbolismu y pol caráuter de los sos acordes, munchos grandes músicos emplegaron la campana nes sos composiciones, anque normalmente recurriendo a otros instrumentos a los que conseguir sacá-ys el so soníu. Nostante, contamos con una música específica de campanes que conocemos col nome de carillón, que vien del francés arcaico quadrilon, evolución del llatín que mos fala de cuaternariu, el repique de cuatru campanes. Y tamién dalgunos músicos compusieron específicamente pa campanes, pa un númberu distintu de campanes, creando concietos pa campanarios musicales. Hai conciertos compuestos espresamente pa tocase con toles campanes d'una ciudá, dalgunes vegaes cola participación de más de cien, dalgunes distanciaes por miles de metros.

Mientres tanto, tamién nacía la música de campanes nos pueblos, nel mundiu rural, onde les ilesies cuenten, polo xeneral, con dos o tres campanes que nun se fundieron acompasaes. Con namás qu'una campana ye difícile salir de los toques de llamada a conceyu, allerta escontra'l pelligru, gayola pol nacimientu, duelu pola muerte. Esporpollaba asina una música popular, que executaben mayestros campaneros llocales que tocaben d'oyíu. Son esos campaneros a los que gúei homenaxeamos equí, recordando a los últimos d'estes parroquies mariñanes y cellebrando qu'una nuea xeneración, moza y entusiasta, pretende garrar el testigu de los sos antepasaos.  

Hai poco la Unesco declarara'l toque manual de campanes como patrimoniu inmaterial de la humanidá, poniendo nel so xustu llugar a una música de concordia que ye espiritual y material a un tiempu. Volvemos asina a valorar esa música, non pa marchar haza atrás na historia nin pa revindicar una vida y un mundiu perdíos, sinón pa retomar una racionalidá afitada na tradición y nel ritu si ye que pretendemos que siga tando sana.

Quiero terminar coles pallabres del poeta inglés John Donne, d'ente'l XVI y'l XVII, unes pallabres que sonarán a munchos. "¿Quién nun contempla'l sol cuando atapez? ¿Quién nun atiende pal cometa cuando españa? ¿Quién nun pon atención a una campana que tañe por daguna causa? ¿Quién puede desatender a esa campana que tien esa música que lu tresllada fuera d'esti mundiu? Dengún home ye una islla entera en sigo mesmu. Cada home ye una pieza'l continente, una parte'l tóo. Si la mar arrampla con una faza, toa Europa queda aminorgada, como si fuera un toral, o la casa d'un de los tos amigos, o la to propia casa. Deguna persona ye una islla; la muerte de cualisquiera afléutame, porque toi uníu a tola humanidá; por eso, nunca entrugues por quién doblen les campanes: tan doblando por ti".