La muyer que dividiera l'átomu

Posiblemente namás que los especialistes sepan del meitneriu, l'ellementu qu'ocupa la caxella 109 de la tabla periódica. Nin tan siquier esiste na naturaleza, sinón que fuera sintetizáu en 1982, y, pa más inri, de momentu nun sirve pa nada porque sólo vive siete segundos. El nome d'esi ellementu vien de Meitner, de Lise Meitner, l'unicu que lleva nome de muyer. Podemos pensar qu'hai otros dos nomes femeninos: el paladiu, dedicáu a la diosa Palas Atenea, y'l curiu, n'honor de Marie Curie, pero que comparte col so esposu Pierre, que yera quien llevaba esi apellíu,  Curie. Güei ye'l cabudañu de Lise Meitner, que finara en Cambridge el 27 d'ochobre de 1968. Naciera en Viena en 1878, fue propuesta 46 vegaes pal Nobel pero nunca-y lu dieron, lo que formó parte d'una llarga historia d'inxusticies.

Estudió na Universidá de Viena embaxo la tutela de Ludwuig Boltzmann, un de los físicos más brillantes de la historia. Nun l'almitieron en París pa trabayar con Marie Curie y durante años dedicábase a la investigación poles tardes mientres ponía clas nun colexu poles mañanes. En viendo que nun conseguía lo que quería, marchó a Berlín y fue discípula de Max Planck, siendo una esceición na dómina, ya que la Universidá Humboldt, como toles de Prusia, nun almitíen muyeres. Pero llogró una plaza nel Institutu de Física Esperimental, onde formó equipu con Otto Hahn. Como muyer, nun tenía drechu a salariu nin a contratu, trabayaba nun suétanu, entraba nel centru pela puerta trasera ya incluso, como nun había retrete pa ella, tenía qu'usar el d'una cervecería cercana. Un tiempu dempués, Hahn treslládase al Institutu Kaiser Wilhelm de Física y lleva a Meitner como asistente ensín remuneración, onde descubrieron el protactiniu. Pesie al duru conservadurismu de la universidá llogró ser la primer profesora titular de física, siendo reconocía, si non en público si qu'en privao. Einstein dixera d'ella que yera "la nuesa Marie Curie". 

Nos años trenta, n'aplicación de les lleis raciales de Núremberg, pierde tolos cargos académicos pero sigue coles sos investigaciones. Una gran mayoría de científicos xudíos afuxeron d'Alemaña ente 1933 y 1934, tres llegar Hitler a la cancillería, pero Meitner decide quedar, confiando nel so pasaporte austriacu. Al poco, tres l'anexón d'Austria, la física pasaba a ser alemana y, polo tanto, sometía a les lleis nazis. La so situación ye yá insostenible y protagoniza una fuga de película dende Alemaña a Olanda y dempués a Suecia. Pa que nun la detuvieran los nazis desendolcárase un operativu nel que participaron dalgunos de los físicos más importantes del momentu, como Niels Bohr y Dirk Coster, el descubridor del hafniu, qu'aparentó ser el so esposu nos controles y fronteres.

Mientres protagonizaba esta aventura, Otto Hahn espublizaba un artículu en Nature nel qu'amosaba la evidencia de la fisión ñuclear que dividía átomos inestables nun procesu nel que se lliberaba enerxía. Yera l'aniciu de la enerxía ñuclear. Hahn firmó en solitario l'artículu, argumentando que les autoridaes nun diben dexar firmar a una científica xudía. Esta razón, más que discutible por cuanto la revista editábase en Llondres, fue lo que torgó que Lise Meitner obtuviera'l Nobel que por eses investigaciones-y dieron a Hahn en 1944. Güei sabemos que fuera ella quien interpretó y formalizó los resultaos de los estudios. De fechu, Hahn escribiéra-y nuna carta de 1938 que "prefiero nun confesar que yes la que lo descubriera tóo". Investigadores que revisaron les actes y apuntes de les deliberaciones nel procesu de concesión del Nobel de 1944 escriben que "Meitner quexárase mui poco y perdonara muncho".

Tolos científicos sabíen por desobra que yera Lise Meitner la verdadera artífice de la división del átomu. La división d'un átomu nun lliberaba demasiao enerxía pero dalgunos, Oppenheimer ente ellos, entamaron pensar en reaiciones en cadena. Aquello, en plena guerra, diba dar orix al Proyeutu Manhattan. Meitner, esiliada en Suecia, fora llamada por Oppenheimer pa trabayar na bomba atómica, lo que-y daría estabilidá, renome y dineru. Pero Lise Meitner nun quiso participar. La muyer xudía que se negó a marchar d'Alemaña y dexar empantanaes les sos investigaciones porque "amo la física con tol mio corazón y nun puedo abandonar agora" yera la científica cargada d'ética del que "nun tendré nada que ver con una bomba". Nos Estaos Uníos pusiéron-y como ñomatu "la mamá de la bomba", cosa que la tuvo indignada durante tola vida. Tamién en Hollywood trataron de facer una película de la so vida, centrada nel episodiu de la so fuga, y tampoco aceutó, argumentando que "nada de lo que van contar tien xacíu".

Pero Lise Meitner nun quedó nin muda nin ensín resquemor. Nuna carta empobinada en 1945 a Hahn, del que siguiera siendo amiga tola vida, escribe: "tóos vosotros trabayásteis pa l'Alemaña nazi, y pa calmentiar la vuesa conciencia aidábeis a dalguna persona perseguía allá y acullá, mientres que miyones de seres humanos yeran asesinaos ensín que protestáseis; que reconozáis lo que permitiérais significaría muncho p'Alemaña  y pa vosotros mesmos".   

Lise Meitner descansa nun pequeñu cementeriu rural inglés, en Hampshire, nun pueblín llamáu Bramley, nuna tumba tomada polos artos. Un sobrín suyu, Otto Frisch, escribiera l'epitafiu: "la científica que nunca perdiera la so humanidá". Dacuando envez dalgún caminante dexa enriba la llábana una piedra, el xeitu d'honra a los muertos na tradición xudía.