"Na fábrica cristales hebo un paternalismu vinculáu al proteccionismu económicu"

David Castañón: Acabo poner sombreru y tarabica pa recibir al profesor David Rivas, que vien cuasi toles selmanes a visitamos pa falamos de la historia d'Asturies enfotada nel mundiu la sidra. Falar de la sidra y d'Asturies ye falar d'una mesma cosa. Ye imposible falar d'Asturies ensín referise ún a la sidra y falar de la sidra ye imposible ensín facelo d'Asturies. Entós cuásique usamos la sidra como un pretestu pa percorrer esta historia maraviosa que ye la d'Asturies y que, por desgracia, munchos asturianos y munches asturianes desconocemos en bona midía. ¿Qué tal, David Rivas?

David M. Rivas: Mui bien, David Castañón. Gracies por convidame otra vuelta a esti programa.

D.C.: Préstame tenelu equí nesti final del branu, cuando vamos recuperando la sencia d'esti país, con yá un poco d'orbayu, un ameyoramientu'l tiempu.

D.M.R.: Sí. Amás ellos van marchando.

D.C.: Efeutivamente. ¡Hahaha...! A esi puntu quería yo llegar.

D.M.R.: ¡Yá lo suponía! Por eso m'anticipé. Hehehe...

D.C.: Quedáramos l'últimu día con una sidra que yá se vendía en botelles, lo que fue tou un cambiu, non namás nel consumu cuotidianu, sinón nel ámbitu económicu, con un espoxigue industrial gracies a les fábriques de vidriu. Tamién mos falaba Rivas de qu'elli conociera aquella fábrica de Xixón.

D.M.R.: Sí. Paezme que yá comenté que yo conocila en ruines. Pesllara diez o doce años enantes de nacer yo y taba en pie pero esbarrumbada siendo yo mui pequeñu. Bono, siendo mui neñu, porque pequeñu siempres fuí, que nun medré muncho a lo llargo y menos entá a lo enancho.

D.C.: ¡Hahaha...!

D.M.R.: De lo que sí teo recuerdu claru ye de cuando yera un solar. Había unos furacos enormes, supongo que de los vieyos fornos y los conductos de gas y de refrixeración. Al principio yera mui fácil entrar pero, como hebo munchos accidentes, pola nueche especialmente, acabaron cercándola del tóo. Pero la xente seguía entrando, riba tóo les pandielles de ventiañeros. Tamién vagabundos y xente ensín techu, qu'había muncho d'ello entóncenes, anque aplicaben dacuando envez la llei de vagos y maleantes. Incluso un pariente de mio madre abrió la cabeza una nueche nun d'aquellos terraplenes y sobrovivió de milagru. Y lluéu los más neños, los de la mio edá, entrábamos a xugar. Yera como un frente de batalla. Yo pasábalo en grande y tamién prestábame dir a Verdiciu. ¿Sabe por qué? Porque ente les ruines de la fábrica cristales y les dunes aquelles tan grandes podíamos xugar a Lawrence d'Arabia y la so caballería árabe.

D.C.: ¡Qué peliculón!

D.M.R.: La fábrica cristales tuvo una enorme importancia. Cuando se funda La Industria, Xixón anda polos diez mil habitantes, lo que da idega del impautu que tuvo una instalación d'un seutor avanzáu como yera'l vidrieru. Nun sé cuántos operarios tendría entóncenes pero debió ser un númberu importante naquella villa nel 1842. De toles formes, el saltu impresionante va dase en 1897, cuando la fábrica pasa de tener un fornu, el fornu vieyu, a cuatro fornos, los tres nuevos cola más avanzada teunoloxía de la época. Entós Xixón tien unos 45.000 habitantes y la fábrica cristales cuenta con 680 obreros. Eso sí que mos da la idega de lo qu'aquello significaba.

D.C.: Una cantidá enorme.

D.M.R.: Caro. Amás, sumemos llabores ausiliares, de servicios, complementarios... Namás en toa Asturies presentaben mayores nómines de trabayadores la minería, y non toles empreses, y la siderurxa, y, evidentemente, el seutor agrariu y'l seutor pesqueru si sumamos tolos efeutivos. Pa poner un datu comparativu: la empresa privada con más trabayadores de Xixón, que fue Crady nos años anteriores a la crisis de los setenta, cuntaba con 800 obreros, nun conceyu de 185.000 habitantes. Esa actividá de la vidriera va marcar, evidentemente, tola vida socioeconómica de Xixón y de tola contorna. Anque la sociedá rural asturiana entá nun ta sufriendo la crisis del modelu tradicional, que llegó con retrasu con respeutu al restu d'Europa, yá entama cierta emigración haza les zones industriales. La Industria va tener un pesu tan grande como Moreda, la siderúrxica, o como La Algodonera o la fábrica tabacos, por falar de tres empreses emblemátiques del Xixón anterior a la guerra civil. Amás tamos falando d'una industria de bienes de consumu, non de bienes d'equipu, nin de produición d'enerxía o de materies primes. 

D.C.: Dicía que nesi 1897 instálense tres fornos nuevos. 

D.M.R.: Teníen, como-y dicía, un fornu vieyu col que fabricaben lo que se llama vidriu planu, pero nel 97, que ye l'añu de la gran ampliación, instalen tres fornos más. Los cuatro funcionaben con gas y los tres nuevos tienen una teunoloxía que, práuticamente, ye la mesma que vemos güei en cualisquiera vidriera, evidentemente, coles anovaciones que se fueron produciendo en más d'un sieglu. Ellaboraben vidrios de colores y equí tenemos la desplicación a dalgo que cuntábamos l'otru día, que ye'l porqué hai botelles de sidra de distintu color al verde escuru de la época. Hailes cuásique negres, marrones, ambarines, añiles... Dalgunes anden perí rodando tovía, anque yá mui buscaes, precisamente pola so rareza. L'asuntu ta en que esos años finales del XIX ye'l pasu d'una producción entá mui artesanal a otra más moderna, más industrial. Entóncenes, del fornu antigu salién delles vegaes unidaes con un color que nun yera l'estándar, mientres que los otros tres producíen vidriu uniforme. Conclusión: eses botelles rares son dalgunes de les procedentes del fornu de 1842, que tamién tuvo funcionando ata'l final de la empresa.

D.C.: Yo que voi muncho pel llagar de Viuda de Angelón, préstame ver esi llabor de compra, recuperación, restauración de llagares antiguos, preseos, botelles, vasos... Lo mesmo que fixeron los vascos dende hai tiempu colo suyo.

D.M.R.: Bono, va permitime duldiar de lo vasco. Cientos de pipes y toneles vieyos, afuracaos, acocaos, de llagares asturianos tan espuestos agora en restoranes y sidreríes vasques. En dalgunos nun ye raro atopar col sellu o la marca del llagareru o del toneleru orixinal. Por inorancia de los paisanos y dexadez ya incompetencia de l'alministración, bona parte del patrimoniu asturianu vinculáu a la sidra saliera del país nos últimos trenta años. Tuve hai un tiempu nun sitiu mui guapu, mui bien puestu, cerca de San Sebastián, que tinía un llagar antigu, de mediaos del XIX. Entrugué al encargáu que de qué tipu yera. Nun lo sabía. Pero despliquéilo yo: "ye un llagar de sobigañu, de los de tresmisión indireuta, y que se llama asina por esta pieza, esta viga'l fondu, el sobigañu, y, amás sé que vino de Villaviciosa, y de qué casa y de qué parroquia". Yera un llagar que yo conocía dende que teo recuerdos. 

D.C.: Quedaría plasmáu.

D.M.R.: Sí, supongo. Seguramente aquel home nun supiera del asuntu. Y menos mal, porque namás me faltaba que me cuntare una historieta d'un caseríu del sieglu XII onde, tomando sidra, declararon la guerra al reinu de Mordor.

D.C.: ¡Hahaha...!

D.M.R.: ¿Vusté quedaríe estrañáu?

D.C.: Non, seguramente non. Pues, volviendo al llagar de Viuda de Angelón, munches d'eses botelles tan mui cotizaes.

D.M.R.: Yá lo falamos hai una selmana. Ye que yá empiecen a escosar les normales, les verdes escures. El casu ye que naquel 1897 facíen 7.000 cilindros de vidriu, que veníen ser 12.000 botelles al día, y 10.000 de vidriu güecu pa facer vasos y copes. Como ve, tamos falando de unes bones cifres.

D.C.: ¿Y tamos falando d'una empresa que nutre namás qu'Asturies?

D.M.R.: Eso nun lo sé. Seguramente esportaría a otros llugares, pero la so especialización en la botella sidra fae qu'Asturies seya un mercáu, sinón únicu, mui predominante. De toles formes, anque La Industria ye conocía y reconocía poles botelles de sidra, tamién fabricaba otres, asina como vasos y copes. Si, amás, tenemos en cuenta qu'el vasu sidra, el de pa escanciar que güei conocemos, nun se xeneraliza ata un poco más tarde, ye de suponer qu'esportara, seguramente vasos y copes principalmente. Pa facer la botella sidra inspírense na botella típica de los vinos de Xerez, mesmo na forma que na coloración escura. Lo que pasa ye que la faen más regordeta, más estrecha de culu y muncho más pesada, pensando xustamente nel echao, anque tovía nun diseñaren el vasu que güei vemos como tradicional.

D.C.: Yera toa una innovación.

D.M.R.: Sí, y que va reondease la cosa cuando venga esi vasu. Pero vamos ver dalgunos datos de la empresa pa damos cuenta de la envergadura l'asuntu. Ente salarios, materia prima pal vidriu y combustible, gas fundamentalmente, el coste algamaba les 160.000 pesetes mensuales. Tamos a finales del XIX. Falamos d'una cantidá descomanada. Como datu complementariu valga decir que la Caxa d'Aforros Municipal de de Xixón fundárase en 1929 con una aportación del ayuntamientu de 28.000 pesetes. La partía salarial yera mui importante. Tamos falando de setecientes persones. Los sueldos y los salarios yeran los medios de la industria d'entóncenes, pero la vidriera tinía unes carauterístiques peculiares. Por exemplu, cuando los obreros se retitraben por edá seguíen recibiendo paga. Nun había entóncenes sistemes de financiación pública nin tampoco un mutualismu priváu desendolcáu. Tamién taben los obreros aseguraos cuando sufríen accidentes llaborales, de manera qu'aquellos que se mancaben na fábrica cobraben el salariu íntegru mientres duraba la so convalecencia. Tamién se decía que nunca echaran a un trabayador pa contratar a otru, custión mui interesante nos primeros años del XX, cuando la patronal recurría a esquiroles y a verdaderos pistoleros nos momentos de gran tensión social, qu'en Xixón fueron munchos nos años diez y venti, cola rempuesta violenta delles vegaes de les organizaciones proletaries, particularmente les de freba anarquista, mayoritaries na villa.

D.C.: Eso llama l'atención agora, en plenu XXI.

D.M.R.: Tamos seguramente delantre un exemplu de paternalismu empresarial, que n'Asturies tuvo bastante presencia, non namás na fábrica cristales, sinón tamién na minería y na siderometalurxia. Esi paternalismu ta mui vinculáu al proteccionismu económicu por parte del gobiernu español, que benefició a la industria asturiana, vasca y catalana y perxudicó a la agricultura castellana y valenciana, y a los bienes de consumu de tolos sitios. De fechu, a La Industria, a la fábrica cristales de Xixón, dedicói un ampliu reportax el diariu madrilanu "El Proteccionista", poniéndola como exemplu. Tamos en plena polémica llibrecambiu-proteccionismu, un debate durísimu en toa Europa y, en xeneral, nel capitalismu más avanzáu. El conflictu llevó incluso a la guerra n'ocasiones, como nos Estaos Uníos. La guerra de secesión, la guerra civil, fora una sangrienta versión de la polémica económica. Los sudistes yeran llibrecambistes, queríen caltener una economía abierta pa colocar los sos productos agrarios, especialmente l'algodón, nel mercáu internacional. Los estaos confederaos yeran los grandes proveedores de la industria testil inglesa. Los del norte pretendíen protexer la so industria naciente frente a les importaciones que-ys llegaben d'Europa. Y, caro, necesitaben proletariáu, mano d'obra llibre, xente que tuviera un sueldu y consumiera, non esclavos que trabayaben a cambiu de techu y alimentación y que nun necesitaben consumir nel mercáu. Por eso hai que rellativizar lo de l'esclavismu y l'antiesclavismu, la rellación ente llibertá política y llibertá económica, quién ye el progresista y quien el reaccionariu. La esclavitú ye intolerable dende un puntu vista éticu, pero la teoría económica puede tener una base ética o non, depende de los supuestos. N'España tamién trunfó'l proteccionismu cola restauración borbómica y col gobiernu de Cánovas, y proteccionista fue la monarquía d'Alfonso XIII, el directoriu de Primo de Rivera, la república y'l franquismu.

D.C.: Esa polémica, esa llucha d'idegues, va condicionar mucho la evolución posterior.

D.M.R.: Evidentemente. La guerra de Cuba y la independencia tamién vien determinada en parte por esi asuntu. El mesmu Flórez Estrada viéralo claro a mediaos del XIX. Flórez Estrada, al mio entender el gran economista asturianu, escribiera sobro ello años enantes. Al mio xuiciu, Xovellanos ye'l principal asturianu de la política económica concreta y, polo tanto, el más influente con diferencia de tolos nuesos economistes. Asturies diera, ente'l XVIII y'l XIX, más economistes por día de güés o por habitante qu'Inglaterra, y munchos más qu'Alemaña o Francia. Pero'l gran teóricu de la economía ye Flórez Estrada. Esti somedán ve claramente qu'el proteccionismu, especialmente el que beneficia a Cataluña, ta fundiendo a Cuba, que nun puede participar d'un mercáu más beneficiosu como yera'l norteamericanu. Y Flórez persabía, porque pertenecía a la mesma corriente ideolóxica de Jefferson, que los pilancos fiscales y comerciales británicos pa coles colonies provocaron l'entamu de la rebelión. La insurreición cubana profetizola Flórez Estrada cuarenta años enantes. Pues esa guerra de Cuba y la independencia condicionó la economía asturiana, les esportaciones, ente elles les de sidra, amás de convertir a miles d'asturianos en repatriaos o en ciudadanos d'otru país, xente retornao o cubanos.

D.C.: En cierta midía aquello fora un conflictu que sigui ehí, que nun ta resueltu.

D.M.R.: Ye verdá. Si hai un fechu rellativamente reciente que marcó a fuéu la nuesa historia, esi fora la guerra de Cuba. Tamién marcó muncho la guerra de Melilla, la del Rif, polo sangrienta que fue y pola culpabilidá criminal d'unos militares incompetentes y cortesanos y d'un rei que yera un taráu y un felón. Pero lo de Cuba nun tien comparanza con nada. Esa frase de "más se perdió en Cuba" dizse tovía agora en Candás, n'Almería, en Mondragón y en Tomelloso. La independencia de Cuba pa los españoles en xeneral y, mui especialmente, pa los asturianos, los gallegos y los canarios, los tres países que más población mandaron pallá, fuera una verdadera rotura familiar. Y eso caltúvose nel tiempu. Cuando Castro entró en L'Habana hebo discursos nes cortes franquistes d'un tonu sosprendente: "la sangre hispana derrota a los yanquis, el fíu d'un gallegu y una asturiana...". Yera como si Fidel Castro tuviera vengando la derrota de 1892. Por eso yo suelo dicir qu'ente nosotros ata los faches yeran castristes, a lo menos ata hai venti años, cuando Aznar cambió la visión na drecha, una visión conciliadora con Castro qu'incluso Franco tuviera. Yo, que tuve la suerte de conocer Cuba, y amás en periodos distintos, pude dame cuenta de tóo eso, porque también ellos mos ven d'una forma diferente a como mos ven otros americanos, con especial ciñu a los asturianos, a los canarios y a los gallegos.

D.C.: Como ven, amigos oyentes, de la sidra a la historia de Cuba. Pero ye que, como mos repite'l profesor David Rivas, ta tóo rellacionao. Asina, por exemplu, como vimos notros programes, pasamos de ver cómo'l mercáu de la sidra axampanao tenía un mercáu americanu a cómo una guerra fae que la economía asturiana quede resentía.

D.M.R.: Yo esi estremu nun lu teo estudiao. Amás, siempre lo digo, yo nun soi historiador, polo que tiro poco de fontes primaries y déxome llevar por interpretaciones plausibles en munches ocasiones, arriesgando puntos de vista qu'un historiador enxamás fairía. Nun sé si la independencia de Cuba influiría muncho na esportación sidrera asturiana, pero sí toi seguru de qu'hebo una paralización o una ralentización durante unos años. Tamién seguramente les coses se normalizaríen relativamente ceo porque les rellaciones con Cuba nunca francieron del tóo. Amás tamos falando d'anteayeri, porque ye un sieglu, y eso nun ye nada na historia. A nosotros. como tamos nun tremendu cortoplacismu, como vivimos el día a día, paezmos muncho tiempu, pero ye mui poco na historia d'un pueblu, y menos entá pa un pueblu como'l nuesu, con miles d'años pertrás. Otres sociedaes son más nueves y pa los sos componentes les coses son distintes.

D.C.: Histories de pallá d'El Payares.

D.MR.: Sí, por exemplu. Y nun creyo que se refiera vusté a Marruecos.

D.C.: ¡Hahaha...! Munches gracies, David Rivas, y seguiremos falando de sidra nel prósimu programa.

D.M.R.: Val, de sidra o de cualisquiera otra cosa.

D.C.: Pero presta pola vida, ¿non?

D.M.R.: Sí, ho, por supuesto.

D.C.: Un abrazu.

D.M.R.: Un abrazu.