El rei sabiu

El 23 de payares de 1221, hai polo tanto ochocientos años, nacía en Toledo Alfonso de Borgoña, el que, tres la muerte'l so padre, diba ser Alfonso X de Castiella, conocíu como El Sabiu. Pa tener un ñomatu tan escelente nun fuera ún de los monarques de los que más mos falaran nel bachiller a los que yéramos escolinos nos sesenta y setenta, aquellos años del destín no universal y d'aquello de pel imperiu haza Dios. Sí que mos falaran del so códigu xurídicu, les Siete partíes, pero poco más. Polo que toca a los Cantos de Santa María, sabíamos de la so esistencia pero nunca figuraron como llectura, de xuru porque nun yera mui desplicable pa los neños d'entóncenes qu'un rei castellán escribiere poesía en gallego.

Andando'l tiempu, siendo yá profesor na universidá, participando nunos cursos n'Alemaña sobro la formación intellectual de la Europa medieval, pidiéranmos a los europeos non alemanes que fixéramos una presentación sobro un personax de la nuesa historia. Como yo nun yera espertu en denguna figura concreta, polo que tinía que centrame nuna de fácile accesu, que me fora comprensible y que la pudiere asitiar nel so tiempu, propuse falar d'Alfonso X. Entá conservo les notes d'aquella esposición y, al ver que se cumple l'octinxentésimu aniversariu del nacimientu'l rei, saquelos d'un archivu perdíu ente cientos nun discu duru ya echéi una güeyada.

Voi volver a aquel escaezu d'Alfonso X nel mio bachiller, nel que rellumaben Fernán III, Sabel I, Carlos I, Felipe II. Careció Alfonso X d'un tópicu de gobernante débile y torpe militar, un mal rei más dau a la cultura y a la ciencia qu'a la guerra y a la cruzada. Anque esi sambenitu nun se cuerrespuende cola realidá ya organizó esitoses campañes militares, sí ye cierto qu'amaba más la música, la poesía, la ciencia, l'axedrez y los bonos vinos que la batalla y la caza. El so padre, yera un home mui lligáu al papa, ata'l puntu de que fora canonizáu un tiempu dempués y conocíu como Fernán III el Santu, patrón incluso del arma d'inxenieros del exércitu español pola so estratexa de pontones fluviales na toma de Sevilla a los moros. Fora'l rei qu'unificara definitivamente Castiella y Llíón, poniendo fin a les trafulques dinástiques llioneses y a los llevantamientos asturianos que llevaron a mal traer a la corona dende Fernán I ata Alfonso VII. Fora l'arquetipu de gran rei pa los qu'entienden les coses en función de les fazañes béliques. Pero Alfonso yera d'otra triba. Nun yera la primera vegada na historia na qu'a un rei guerreru y fundamentalista lu sucedía un rei cultu y tolerante.

Alfonso llega al tronu con gran esperiencia diplomática porque fora embaxador del so padre nes cancilleríes d'Europa y nos reinos musulmanes, sabiendo llingües y con munches rellaciones con sabios árabes, franceses ya ingleses, como tamién alemanes, pues cultivara la rellación cola so familia materna, la casa de Suabia. Amás, mesmo pa l'alministración de los sos bienes como pa la so formación científica tinía la confianza puesta en rellevantes hebreos. D'otra banda, pasara la so infancia bien lloñe de la corte, al curiáu d'una familia noble gallega que-y diera una sólida formación humanística, dexando pa otru momentu, si ye que llegaba, la instrucción militar y los xuegos políticos palatinos. Falante de gallego, siempres conservó ciñu por esa llingua, ata'l puntu d'escribir nella les cantigues a la Virxe siendo yá rei de Castiella.

Les cróniques contemporánies falen d'elli como d'un home brillante, valiente, xenerosu, con grandes capacidaes lliteraries, piadosu y famientu de saber. Pero tamién mos presenten a un home un tanto inxenu, fácile d'engañar, que pasaba de la firmeza a la debilidá con facilidá y rapideza. Nuna d'eses cróniques lleemos que yera "escodriñador de sciencias, requeridor de doctrinas e de enseñamientos". El xesuita Juan de Mariana, ún de los primeros estudiosos de la so figura, descríbelu d'una forma mui llamativa: "tinía nes sos aiciones una maraviosa inconstancia".

Una de les primeres decisiones del monarca fuera la de facer una rellectura ya un estudiu con anotaciones precises de los testos clásicos, empezando pola Biblia, pero tamién tola historiografía árabe, ya ordenando la traducción al romance llocal de, por exemplu, les Metamorfosis d'Ovidio y la Farsalia de Lucano.  

El so códigu de siete partíes ta inspiráu nes conceiciones más avanzaes de la época, que surdíen de los claustros de la Universidá de Boloña y que diben ser fontes del futuru drechu de xentes y de lo que güei conocemos como drechu civil. Nelles igualaba en drechos a tolos súbditos de la so corona, custión mui importante si tenemos en cuenta l'engromecimientu demográficu y pluricultural que taben suponiendo les conquistes de les tierres de La Mancha, Murcia, la baxa Estremaúra y Andalucía. Tamién alcontramos conceiciones sobro la propiedá pública de total actualidá nesti momentu de cris ambiental y cambiu cliumáticu, como cuando escribe: "comunalmente pertenecen a todas las criaturas el aire, el agua de la lluvia, el mar y sus riberas, mientras que los ríos pertenecerían a todos los hombres".

Eses partíes, escrites en llingua romance, no que diba ser el castellán normativizáu un tiempu dempués, funcionaron como fonte de drechu ata'l códigu civil del sieclu XIX. Munchu tiempu dempués d'Alfonso X fueron varios los monarques, incluso yá nes dómines borbóniques, que consideraben la necesidá de recurrir a les partíes siempres que nun hubiere llexislación o costume xurídica sobro una custión determinada.

Los espertos n'historia'l drechu consideren que si les partíes tuvieren redautaes en llatín seguramente sedríen aplicaes notros reinos d'Europa, anticipándose, grosso modo, al códigu napoleónicu. Ya ye qu'una característica de la obra d'Alfonso X fora la d'escribir siempres en romance castellán y, nel casu de la poesía, en romance galaicu, dexando'l llatín pa la so correspondencia col papa y coles cancilleríes foriates. Sobro esto hai un detalle mui llamativu del que podemos decatamos cuando visitamos Washington. A los escaños qu'ocupen les persones convidaes al Capitoliu llégase per una de ventitrés puertes y nel dintel de caúna d'elles figura un personax consideráu relevante na historia llexislativa de los Estaos Uníos, siendo una la d'Alfonso X. La llei alfonsí, tornada al inglés nos díes de les primeres colonies sublevaes, sirviera pa encadarmar xurídicamente la convivencia d'un país tan nuéu y tan distintu y distante. Entá a finales del XIX gran parte de los conflictos civiles nel estáu de Luisiana resolvíase acudiendo a les partíes castellanes.

Pero si importante fora esta obra xurídica tamién lo fora, si non más, el trabayu d'Alfonso X en favor del conocimientu científicu. Nel mesmu códigu escribe: "onde el rey que despreciase de aprender los saberes, despreciaría a Dios de quien vienen todos, segunt dixo el rey Salomón, que todos los saberes vienen de Dios, et con él son siempre, et aun despreciaría sí mesmo". 

En Toledo reunió a les meyores cabeces científiques de la época, propiciando l'estudiu de la naturaleza conforme a un métodu inductivu que llegaría al gumial nel renacimientu y na illustración, mui averáu a los avances árabes nos campos de la química, la melicina, l'astronomía, y tamién del ars magna de l'alquimia. Una bona parte de los saberes acumulaos na corte alfonsí procedía del impresionante llegáu recoyíu polos musulmanes na so espansión pel Mediterrániu, non namás de les ciencies empíriques, sinón tamién de la recuperación d'Aristóteles y l'helenismu. De fechu, ye nesti momentu cuando'l naciente castellán, y con él les demás llingües romances peninsulares, incorpora pallabres como ángulu, esfera, crepúsculu, planeta o diámetru. 

Na Europa d'entóncenes yera mester dir a Boloña pa estudiar lleis y a París teoloxía, pero'l que quisiera conocer les ciencies de la naturaleza nun tinía meyor destín que Toledo. Na ciudá castellana, yá práuticamente dende la so toma polos cristianos en 1085, estableciéranse comerciantes franceses, occitanos, gascones, catalanes y florentinos, nun ambiente cosmopolita nel que tuvieron gran importancia los xudíos, lo mesmo que los musulmanes que quedaron nella. Eso fora posible pola tolerancia imperante, non ensín episodios conflictivos y violentos en dalgún momentu, tolerancia que llegara a la so másima espresión cola entronización d'Alfonso X, al que nun-y entraríe na cabeza una política como la que dos sieclos dempués diba seguir la casa de Trastamara, coles espulsiones y persecuciones. D'esos años tenemos el testimoniu del astrónomu inglés Daniel de Morley, que diz: "como en nuestros días es en Toledo donde la enseñanza de los árabes es dispensada a gente, decidí acudir allí para escuchar las lecciones de los más sabios filósofos del mundo".

Alfonso X tuvo particular interés pola astronomía, a la que dedicó abondosos recursos humanos y financieros, aplicando, como dicía enantes, el métodu inductivu, un métodu ayenu al deductivismu escolásticu dominante na Europa cristiana. Asina, como exemplu claru d'ello, encargó a dos astrónomos xudíos la observación del movimientu de los astros tolos díes durante nueve años. Con esta base empírica fixéronse les tables alfonsíes, que sirvieron pa interpretar el cosmos, l'orde celeste, ata los tiempos de Copérnico. Nel so honor, un cráter llunar lleva'l nome d'Alphonsus ya un asteroide el d'Alphonsina.

Coincide'l tiempu d'Alfonso X cola espansión de la devoción a María, que non namás fae referencia a la Virxe dende un puntu de vista relixosu, sinón tamién a la fascinación astronómica pola constelación de Virgo. Embaxo esa devoción, identificable colos cultos a notre dame, alcontramos resclavos mistéricos de l'antigua veneración a la diosa madre, mui presente en Francia y espardía por un camín a Compostela yá plenamente consolidáu y aseguráu polos reis cristianos de Francia, Aragón, Navarra y Castiella. A Santa María dedica'l rei los cantos en gallego yá referíos, tanto los escritos por él mesmu como otros encargaos a autores anónimos que güei sabemos que nun son de la so pluma.

Pol contrario, nun hai llugar nel programa d'estudios pa la teoloxía, casu únicu naquel momentu, lo que suponía que la cultura y la visión del mundiu fomentaes pol rei difería de lo que la ilesia llevaba faciendo durante los cuatru sieclos anteriores. Como bon intellectual, tamién Alfonso X tinía un puntu narcisista ya egocéntricu bastante acusáu, lo que, unío a lo anterior, supuso choques de contino cola ilesia, pretendiendo nomar él mesmu a los obispos y negándose en munches ocasiones a aceutar la autoridá del papa. De fechu, llegó a proclamase representante de Dios na tierra, como yá fixeran otros soberanos anteriores como Adefonso II d'Asturies, Carlomagno y Alfonso VII de Llión, y como fairíen dempués otros, dende Felipe IV de Francia y Enrique VIII d'Inglaterra ata'l mesmu Napoleón. Tóo ello fixo que Gregorio X negara-y'l sofitu pal so intentu de coronase como titular del sacru imperiu romanoxermánicu.

Dalgunos historiadores, basándose nes cróniques del so tiempu, apuntaron nel debe del carácter d'Alfonso X la so irritabilidá y los ataques de soberbia y despotismu, que lu facíen temible na última década de la so vida. Anguaño, dempués de la exumación del so calabre y de facer los estudios pertinentes, sabemos que morriera d'un cáncer de mandíbula, una enfermedá llarga ya estremadamente dolorosa, la mayoría atribuin a ello esi cambiu nun home que fuera tolo contrario na mayor parte la so vida.

Ente les presiones de la ilesia, les conspiraciones nobiliaries y los pleitos familiares, Alfonso X, tamién como un intellectual arquetípicu, morriera na soledá y dafechamente desatendíu en Sevilla cuando tinía 62 años. La historia d'Europa ta repleta de reis bonos, santos, fuertes, bravos, grandes, católicos, vieyos, y ata crueles, impotentes y felones; pero namás qu'ún pasara a la historia como sabiu. Na mio biblioteca teo una placa de cerámica rural castellana, que compré precisamente dempués de, cuásique por obligación y compromisu, averame a la so figura. Nella lleemos l'ideal de vida d'aquel rei: "quemar leños viejos,/ leer viejos libros,/ beber vinos viejos,/ tener viejos amigos". Como sabiu perdurara Alfonso X de Castiella.